Tá kúu iin tu̱ndóʼo

Ni chíka̱a̱níndó ndée ña̱ vií koondó xíʼin na̱ veʼendó, sava yichi̱ iin kama kuitíva ndakava tu̱ndóʼo nu̱úndó ta ña̱yóʼo sakusuchíña-inindó (Eclesiastés 9:11). Soo, Ndióxi̱ chindeéra ndóʼó tá ki̱vi̱ yáʼandó nu̱ú tu̱ndóʼo. Tá ndíku̱nndó consejo ña̱ va̱xi nu̱ú Biblia ña̱yóʼo chindeé ndóʼó ña̱ va̱ʼa ya̱ʼandó nu̱ú tu̱ndóʼo nda̱a̱ ndáakaña ná kixi nu̱úndó.

1 KANDÍXANÍNDÓ JEHOVÁ

ÑA̱ KÁʼA̱N BIBLIA: “Ta ndiʼi tu̱ndóʼo ndóʼondó sandákoondóña ndaʼa̱ Ndióxi̱, chi ta̱yóʼo ndíʼi̱-inira xa̱ʼandó” (1 Pedro 5:7). Ndakaʼánndó chi su̱ví Ndióxi̱ kúú ta̱ táxi tu̱ndóʼo ña̱ ndóʼondó (Santiago 1:13). Tá ná kuyatinndó nu̱úra ta̱yóʼo chindeévara ndóʼó (Isaías 41:10). Ndiʼi tu̱ndóʼo ndóʼondó ndaʼa̱ ta̱yóʼo sandákoondóña (Salmo 62:8.)

Inka ña̱ va̱ʼa chindeé ndóʼó kúú ña̱ ndiʼi ki̱vi̱ ná kaʼvindó Biblia. Tá ná kaʼvi ni̱ʼindóña saá kúúña kunindó ndixa chindeé Ndióxi̱ miíndó tá yáʼandó nu̱ú tu̱ndóʼo (2 Corintios 1:3, 4; Romanos 15:4). Ndióxi̱ káʼa̱nra ‘chindeéra miíyó ña̱ va̱ʼa kǒo kúndi̱ʼi̱ka-iniyó xa̱ʼa ña̱ ndóʼoyóʼ (Filipenses 4:6, 7, 13).

ÑA̱ VA̱ʼA KEʼÉNDÓ:

• Ka̱ʼa̱nndó xíʼin Jehová ná chindeéra ndóʼó ña̱ ná kǒo kundi̱ʼi̱ní-inindó, ña̱kán va̱ʼa vií ndakanixi̱níndó xa̱ʼa ña̱ keʼéndó

• Siʼna koto va̱ʼandó ndáaña kúú ña̱ va̱ʼa keʼéndó

2 KUNDAA NA̱ VEʼÚN TA SAÁTU KUNDAÚN MIÍÚN

ÑA̱ KÁʼA̱N BIBLIA: “Na̱ ndíchi xíniñúʼuna xi̱nína ña̱ sakuaʼana ta xíniso̱ʼo va̱ʼana ña̱ sákuaʼakana ku̱a̱ʼa̱nna” (Proverbios 18:15). ¿Ndáaña xíniñúʼu iin iin na̱ veʼún? Natúʼun xíʼinna ta kuniso̱ʼo va̱ʼún ña̱ káʼa̱nna saá kunda̱a̱-iniún ndáaña xíniñúʼuna (Proverbios 20:5).

¿Ndáaña keʼún tá ná kuvi iin na̱ veʼún? Va̱ása kukaʼan nu̱ún kuakún. Ndakaʼún chi nda̱a̱ ta̱ Jesús xa̱ku (Juan 11:35; Eclesiastés 3:4). Xíniñúʼu ndakiʼinndée va̱ʼún ta ku̱su̱n va̱ʼún (Eclesiastés 4:6). Ña̱yóʼo chindeé yóʼó ña̱ va̱ʼa ya̱ʼún nu̱ú tu̱ndóʼo ña̱ ndóʼondó.

ÑA̱ VA̱ʼA KEʼÉNDÓ:

• Ni kǒova tu̱ndóʼo íyo nu̱úndó ndiʼi ki̱vi̱ xíniñúʼu natúʼun xíʼin táʼanndó. Ña̱kán va̱ʼa tá ná koo tu̱ndóʼo nu̱úndó, na̱ veʼún va̱ása kaka-inina natúʼunna xíʼún

• Natúʼun xíʼin sava na̱ xa̱ni̱ya̱ʼa nu̱ú tu̱ndóʼo táʼan ña̱ yáʼandó

3 KA̱ʼA̱NNDÓ XÍʼIN INKANA NÁ CHINDEÉNA NDÓʼÓ

ÑA̱ KÁʼA̱N BIBLIA: “Na̱ ndixa kúú migoyó ndiʼi tiempo ma̱nína miíyó, tá íyo tu̱ndóʼo nu̱úyó nda̱a̱ tá íyo ñaniyó á ku̱ʼvayó saá íyona xíʼinyó” (Proverbios 17:17). Sana na̱ kúú migondó kúni̱na chindeéna ndóʼó, soo kǒo xíni̱na ndáa ki̱ʼva chindeéna ndóʼó. Ka̱ʼa̱nndó xíʼinna ndáaña kivi chindeéna ndóʼó (Proverbios 12:25). Kivitu ndukúndó ndée nu̱ú na̱ xíni̱ va̱ʼaka xa̱ʼa Biblia. Consejo ña̱ taxina ndaʼa̱ndó chindeéña ndóʼó ña̱ va̱ʼa ya̱ʼandó nu̱ú tu̱ndóʼo ña̱ ndóʼondó (Santiago 5:14).

Tá kítáʼan ni̱ʼindó xíʼin na̱ ndixa ndásakáʼnu Jehová ta kándíxana ña̱ káʼa̱nra, ña̱yóʼo chindeé ndóʼó ña̱ va̱ʼa ya̱ʼandó nu̱ú tu̱ndóʼo. Inkatu ña̱ kivi chindeé ndóʼó kúú ña̱ chindeéndó inka na̱ ñúʼu ndaʼa̱ tu̱ndóʼo. Natúʼunndó xíʼinna ña̱ kandíxaníndó Jehová ta kandíxandó ña̱ káʼa̱nra. Ndiʼi tiempo chindeéndó inkana ta va̱ása kuxíkandó nu̱ú na̱ ndixa kúni̱ xíni ndóʼó (Proverbios 18:1; 1 Corintios 15:58).

ÑA̱ VA̱ʼA KEʼÉNDÓ:

• Ka̱ʼa̱nndó xíʼin na̱ migondó ta taxindó ná chindeéna ndóʼó

• Káxiní ka̱ʼa̱nndó xíʼinna ndáaña xíniñúʼundó