သင်သည် ‘ဘုရားသခင်၏မဟာကြင်နာမှု ခံစားရသူ ဘဏ္ဍာစိုး’ ဖြစ်သလော

“ညီရင်းအစ်ကိုကဲ့သို့ချစ်ခြင်းဖြင့် အချင်းချင်းချစ်ခင်စုံမက်ကြလော့။ အချင်းချင်းဂုဏ်တင်ရာတွင် ဦးဆောင်ကြလော့။” —ရော. ၁၂:၁၀။

၁။ ဘုရားသခင့်နှုတ်မြွက်တော်တွင် အဘယ်အာမခံချက်များ တွေ့ရသနည်း။

ကျွန်ုပ်တို့စိတ်ဓာတ်ကျ သို့မဟုတ် ဝမ်းနည်းကြေကွဲသောအခါ ယေဟောဝါကူညီထောက်မမည်ဖြစ်ကြောင်း ဘုရားသခင့်နှုတ်မြွက်တော်တွင် အကြိမ်ကြိမ်အာမခံထားသည်။ ဥပမာ၊ ဤနှစ်သိမ့်ဖွယ်စကားများကို သတိပြုပါလေ– ‘ယေဟောဝါသည် လဲကျသူရှိသမျှကိုထောက်မ၍ နှိမ့်ချခံရသူအပေါင်းတို့ကို ထူပင့်တော်မူ၏။’ “နှလုံးကြေကွဲသောသူတို့ကို နှစ်သိမ့်စေ၍ သူတို့ဒဏ်ချက်များကိုပတ်စည်းတော်မူ၏။” (ဆာ. ၁၄၅:၁၄၊ သမ္မာ; ၁၄၇:၃၊ သမ္မာ) ထို့ပြင် ကျွန်ုပ်တို့၏ကောင်းကင်ခမည်းတော်ကိုယ်တော်တိုင် ဤသို့ဖော်ပြတော်မူသည်– ‘သင်၏ဘုရားသခင်ယေဟောဝါက မစိုးရိမ်နှင့်။ ငါမစမည်ဟုသင့်အားဆိုလျက် သင်၏လက်ယာလက်ကိုကိုင်မည်။’—ဟေရှာ. ၄၁:၁၃။

၂။ ယေဟောဝါသည် မိမိကျေးကျွန်များကို မည်သို့ထောက်မတော်မူသနည်း။

^၂ သို့သော် မမြင်နိုင်သောကောင်းကင်တွင်ကျိန်းဝပ်တော်မူသည့် ယေဟောဝါသည် မည်သို့ ‘ကျွန်ုပ်တို့၏လက်ကိုကိုင်’ တော်မူသနည်း။ ကျွန်ုပ်တို့သည် စိတ်နှလုံးကြေကွဲမှုဖြင့် “နှိမ့်ချခံရ” သောအခါ ကိုယ်တော်မည်သို့ “ထူပင့်တော်မူ” သနည်း။ ယေဟောဝါဘုရားသခင်သည် နည်းအမျိုးမျိုးဖြင့် ထိုသို့သောထောက်မမှုကို ပေးတော်မူ၏။ ဥပမာ၊ ကိုယ်တော်သည် သန့်ရှင်းသောစွမ်းအားတော်ဖြင့် မိမိလူမျိုးတော်ကို “သာမန်ထက်ထူးကဲသောတန်ခိုးတော်” ပေးတော်မူ၏။ (၂ ကော. ၄:၇; ယော. ၁၄:၁၆၊ ၁၇) ဘုရားသခင့်ကျေးကျွန်များသည် တန်ခိုးပါသည့် ဘုရားသခင့်မှုတ်သွင်းခံနှုတ်မြွက်တော် သမ္မာကျမ်းစာတွင်တွေ့ရသည့် သတင်းစကားအားဖြင့်လည်း စိတ်ဓာတ်မြှင့်တင်ခြင်းကို ခံစားကြရသည်။ (ဟေဗြဲ ၄:၁၂) ယေဟောဝါ ကျွန်ုပ်တို့အား ခွန်အားရှိစေသည့် အခြားနည်းရှိသေးသလော။ ယင်းအဖြေကို ပေတရုပထမစာစောင်တွင် ကျွန်ုပ်တို့တွေ့ရသည်။

‘နည်းအမျိုးမျိုးဖြင့်ဖော်ပြသော ဘုရားသခင်၏မဟာကြင်နာမှု’

၃။ (က) စမ်းသပ်မှုများနှင့်ပတ်သက်၍ အဘယ်ဖော်ပြချက်ကို တမန်တော်ပေတရုထောက်ပြခဲ့သနည်း။ (ခ) ပေတရုစာစောင်၏နိဂုံးပိုင်းတွင် အဘယ်အရာဆွေးနွေးထားသနည်း။

^၃ စွမ်းအားတော်ဖြင့်ဘိသိက်ပေးခံရသော ယုံကြည်သူများအတွက် ကြွယ်ဝသောဆုကျေးဇူးစောင့်ကြိုနေသောကြောင့် သူတို့တွင် ရွှင်လန်းစရာအကြောင်းကောင်းရှိကြောင်း တမန်တော်ပေတရုသည် သူတို့ထံ စာရေးခဲ့သည်။ ထို့နောက် “သင်တို့သည် စမ်းသပ်မှုအမျိုးမျိုးကြောင့် ယခုကာလ တစ်ခဏမျှ ဝမ်းနည်းရမည်မှန်သော်လည်း” ဟူ၍ထပ်ပြောသည်။ (၁ ပေ. ၁:၁-၆) “အမျိုးမျိုး” ဟူသောစကားလုံးကို သတိပြုပါ။ ယင်းက စမ်းသပ်မှုများမှာ အမျိုးမျိုးဖြစ်လိမ့်မည်ဟူသည့် အဓိပ္ပာယ်ဖြစ်သည်။ သို့သော် ပေတရုသည် မိမိညီအစ်ကိုများအား ယင်းစမ်းသပ်မှုအမျိုးမျိုး ခံရပ်နိုင်မနိုင်ဇဝေဇဝါစိတ်ဖြင့် ပစ်မထားခဲ့ပါ။ ယင်းအစား ပေတရုက ခရစ်ယာန်များသည် မည်သို့သောစမ်းသပ်မှုမျိုးပင် ရင်ဆိုင်ကြုံတွေ့ကြပါစေ စမ်းသပ်မှုတိုင်းကို ရင်ဆိုင်ဖြေရှင်းရန် ယေဟောဝါကူညီပေးမည်ကို ယုံကြည်စိတ်ချနိုင်ကြောင်း ထောက်ပြ၏။ ယင်းအာမခံချက်ကို ပေတရုစာစောင်၏နိဂုံးပိုင်းတွင် ဖော်ပြထားပြီး ယင်းတွင် တမန်တော်သည် “အရာခပ်သိမ်း၏အဆုံး” နှင့်ပတ်သက်ဆက်နွှယ်သောကိစ္စရပ်များကို ဆွေးနွေးထားသည်။—၁ ပေ. ၄:၇။

၄။ ၁ ပေတရု ၄:၁၀ ပါစကားများသည် အဘယ်ကြောင့် ကျွန်ုပ်တို့အတွက် နှစ်သိမ့်မှုဖြစ်သနည်း။

^၄ ပေတရုဤသို့ဖော်ပြသည်– ‘နည်းအမျိုးမျိုးဖြင့်ဖော်ပြသော ဘုရားသခင်၏မဟာကြင်နာမှု ခံစားရသူ ဘဏ္ဍာစိုးကောင်းများအနေနှင့် သင်တို့တစ်ဦးစီသည် ရရှိထားသောဆုကျေးဇူးတော်ကို အချင်းချင်းအတွက် အကျိုးဆောင်ရာတွင် အသုံးပြုကြလော့။’ (၁ ပေ. ၄:၁၀) ပေတရုသည် “အမျိုးမျိုး” ဟူသောစကားလုံးကို အသုံးပြုပြန်သည်။ အမှန်တွင် သူဤသို့ပြောခြင်းဖြစ်၏– ‘စမ်းသပ်မှုဆိုတာ ပုံစံအမျိုးမျိုးနဲ့လာမယ်၊ ဒါပေမဲ့ ဘုရားသခင့်မဟာကြင်နာမှုဖော်ပြချက်ကလည်း ပုံစံအမျိုးမျိုးနဲ့ပဲလာမယ်။’ ယင်းဖော်ပြချက်သည် အဘယ်ကြောင့် နှစ်သိမ့်မှုဖြစ်စေသနည်း။ မည်သို့သောစမ်းသပ်မှုမျိုးကိုမဆို ကျွန်ုပ်တို့ကြုံတွေ့ပါစေ ယင်းကိုခံရပ်နိုင်စေမည့် ဘုရားသခင့်မဟာကြင်နာမှုဖော်ပြချက်သည် အမြဲရှိလိမ့်မည်ကို ဆိုလိုသည်။ သို့သော် ပေတရု၏ဖော်ပြချက်တွင် ကျွန်ုပ်တို့အပေါ် ယေဟောဝါ၏မဟာကြင်နာမှု မည်သို့ဖော်ပြသည်ကို သင်သတိပြုမိသလော။ ခရစ်ယာန်ချင်းများအားဖြင့် ဖြစ်သည်။

‘အချင်းချင်းအတွက် အကျိုးဆောင်ခြင်း’

၅။ (က) ခရစ်ယာန်တိုင်း အဘယ်အရာပြုသင့်သနည်း။ (ခ) အဘယ်မေးခွန်းများပေါ်ပေါက်လာသနည်း။

^၅ ခရစ်ယာန်အသင်းတော်သားအားလုံးကို ပေတရုဤသို့ပြောသည်– “ထိုအရာအားလုံးတို့ထက် အချင်းချင်းအားကြီးသောမေတ္တာဖြင့် ချစ်ကြလော့။” ထို့နောက် ဤသို့ထပ်ပြော၏– “သင်တို့တစ်ဦးစီသည် ရရှိထားသော ဆုကျေးဇူးတော်ကို အချင်းချင်းအတွက် အကျိုးဆောင်ရာတွင် အသုံးပြုကြလော့။” (၁ ပေ. ၄:၈၊ ၁၀) ထို့ကြောင့် အသင်းတော်ရှိယောက်တိုင်းသည် ခရစ်ယာန်ချင်းများကိုတည်ဆောက်ပေးရာတွင် ပါဝင်ကြရန်ဖြစ်သည်။ ယေဟောဝါပိုင်တော်မူသည့် တန်ဖိုးရှိသောတစ်စုံတစ်ရာကို ကျွန်ုပ်တို့အား ကိုယ်တော်ပေးအပ်ထားသည်၊ ယင်းကို အခြားသူများအား မျှဝေပေးရန်မှာ ကျွန်ုပ်တို့၏တာဝန်ဖြစ်၏။ သို့ဆိုလျှင် ယင်းတန်ဖိုးရှိသောအရာများကား အဘယ်နည်း။ ယင်းကို ပေတရုက “ဆုကျေးဇူးတော်” ဖြစ်သည်ဟုဆို၏။ အဘယ်ဆုကျေးဇူးတော်နည်း။ ကျွန်ုပ်တို့သည် “အချင်းချင်းအတွက် အကျိုးဆောင်ရာတွင်” ယင်းကိုမည်သို့ “အသုံးပြု” သနည်း။

၆။ ခရစ်ယာန်များအား အပ်နှင်းထားသော ဆုကျေးဇူးတချို့ကား အဘယ်နည်း။

^၆ ဘုရားသခင့်နှုတ်မြွက်တော်က ဤသို့ဆို၏– “ကောင်းမြတ်သောဆုကျေးဇူး၊ ပြည့်ဝစုံလင်သောလက်ဆောင်ရှိသမျှသည် အထက်အရပ်မှဖြစ်၏။” (ယာ. ၁:၁၇) မှန်ပါသည်၊ မိမိလူတို့ထံ ယေဟောဝါအပ်နှင်းထားသည့်ဆုကျေးဇူးမှန်သမျှသည် ကိုယ်တော်၏မဟာကြင်နာမှု ဖော်ပြချက်များဖြစ်သည်။ ကျွန်ုပ်တို့အား ယေဟောဝါပေးသနားသည့် ထူးခြားသောဆုကျေးဇူးတစ်ခုမှာ သန့်ရှင်းသောစွမ်းအားတော်ဖြစ်သည်။ ယင်းဆုကျေးဇူးက ချစ်ခြင်း၊ ကောင်းမြတ်ခြင်း၊ နူးညံ့သိမ်မွေ့ခြင်းကဲ့သို့သော ဘုရားသခင်နှစ်သက်သည့်အရည်အသွေးများကို မွေးမြူစေနိုင်သည်။ တစ်ဖန် ယင်းအရည်အသွေးများက ယုံကြည်သူများကို စစ်မှန်သောချစ်ခင်စုံမက်မှုတင်ပြရန်နှင့် သူတို့အား လိုလိုလားလားထောက်ပံ့ကူညီပေးရန် ကျွန်ုပ်တို့ကိုလှုံ့ဆော်၏။ သန့်ရှင်းသောစွမ်းအားတော်အကူအညီဖြင့် ကျွန်ုပ်တို့ရရှိသည့် ကောင်းမြတ်သောဆုကျေးဇူးများထဲတွင် စစ်မှန်သောဉာဏ်ပညာနှင့် အသိပညာတို့လည်းပါဝင်သည်။ (၁ ကော. ၂:၁၀-၁၆; ဂလ. ၅:၂၂၊ ၂၃) အမှန်တွင် ကျွန်ုပ်တို့၏ခွန်အားရှိသမျှ၊ အစွမ်းရှိသမျှနှင့် ဉာဏ်စွမ်းရှိသမျှကို ကောင်းကင်ခမည်းတော်အား ချီးမွမ်းဂုဏ်တင်ရန်အသုံးပြုဖို့ ဆုကျေးဇူးများအဖြစ် ရှုမြင်သင့်သည်။ ကျွန်ုပ်တို့၏ယုံကြည်သူချင်းများအပေါ် ဘုရားသခင့်မဟာကြင်နာမှုဖော်ပြချက်များကို တင်ပြသည့်အနေနှင့် ကျွန်ုပ်တို့၏အရည်အချင်းများနှင့် အရည်အသွေးများကိုအသုံးပြုရန် ကျွန်ုပ်တို့တွင် ဘုရားသခင်ပေးသည့်တာဝန်ရှိသည်။

‘အကျိုးဆောင်ရာတွင် ယင်းကို အသုံးပြုပါ’ —မည်သို့အားဖြင့်နည်း

၇။ (က) “အသီးအသီး” ဟူသောစကားက အဘယ်ရာကိုဖော်ပြသနည်း။ (ခ) မိမိတို့ကိုယ်ကို အဘယ်မေးခွန်းများမေးသင့်သနည်း၊ အဘယ်ကြောင့်နည်း။

^၇ ကျွန်ုပ်တို့ရရှိသည့်ဆုကျေးဇူးများနှင့်ပတ်သက်၍လည်း ပေတရုက “ဆုကျေးဇူးတော်ကို အသီးအသီးခံရကြသည်နှင့်အညီ အသုံးပြုကြလော့” [သမ္မာ] ဟူ၍ဖော်ပြသည်။ “အသီးအသီး” ဟူသောအသုံးအနှုန်းက အရည်အသွေးများနှင့် အရည်အချင်းများသည် အမျိုးအစားသာမက ပမာဏတွင်လည်း အမျိုးမျိုးဖြစ်ကြောင်းကို ဖော်ပြ၏။ မည်သည့်ဆုကျေးဇူးပင်ဖြစ်ပါစေ တစ်ဦးစီသည် ‘အချင်းချင်းအတွက် အကျိုးဆောင်ရာတွင် ယင်းကို [မိမိရရှိထားသည့် မည်သည့်ထူးခြားသောဆုကျေးဇူးကိုမဆို] အသုံးပြုကြ’ ရန်တိုက်တွန်းထားသည်။ ထို့ပြင် ‘ဘဏ္ဍာစိုးကောင်းများအနေနှင့် ယင်းကို အသုံးပြုကြလော့’ ဟူသောအသုံးအနှုန်းသည် အမိန့်ဖြစ်၏။ ထို့ကြောင့် ကျွန်ုပ်တို့သည် မိမိတို့ကိုယ်ကို ဤသို့မေးသင့်သည်– ‘ငါ့ကို ပေးအပ်ထားတဲ့ဆုကျေးဇူးတွေကို ယုံကြည်သူချင်းတွေ အားရှိစေဖို့ ငါတကယ်အသုံးပြုရဲ့လား။’ (၁ တိမောသေ ၅:၉၊ ၁၀ နှင့်နှိုင်းယှဉ်ပါ။) ‘ဒါမှမဟုတ် ယေဟောဝါဆီကနေ ငါရခဲ့တဲ့အရည်အချင်းတွေကို စည်းစိမ်ဥစ္စာရဖို့၊ လူနေမှုအဆင့်အတန်းမီဖို့ဖြစ်တဲ့ ကိုယ်ကျိုးအတွက်ပဲ ငါအဓိကအသုံးပြုသလား။’ (၁ ကော. ၄:၇) ကျွန်ုပ်တို့သည် မိမိတို့၏ဆုကျေးဇူးတော်များကို “အချင်းချင်းအတွက် အကျိုးဆောင်ရာတွင်” အသုံးပြုပါက ယေဟောဝါအား အားရနှစ်သက်စေပါလိမ့်မည်။—သု. ၁၉:၁၇; ဟေဗြဲ ၁၃:၁၆ ကိုဖတ်ပါ။

၈၊ ၉။ (က) ယုံကြည်သူချင်းများအတွက် ကမ္ဘာတစ်ဝန်းရှိခရစ်ယာန်များ လုပ်ဆောင်ပေးသည့်နည်းလမ်းအချို့မှာ အဘယ်နည်း။ (ခ) သင့်အသင်းတော်ရှိညီအစ်ကို၊ ညီအစ်မများသည် အချင်းချင်း မည်သို့ကူညီပေးကြသနည်း။

^၈ ပထမရာစုခရစ်ယာန်များ အချင်းချင်းအတွက် အကျိုးဆောင်ခဲ့ကြသည့်နည်းအမျိုးမျိုးကို ဘုရားသခင်နှုတ်မြွက်တော်တွင် ဖော်ပြသည်။ (ရောမ ၁၅:၂၅၊ ၂၆; ၂ တိမောသေ ၁:၁၆-၁၈ တို့ကိုဖတ်ပါ။) ယနေ့လည်း အလားတူပင်၊ စစ်မှန်သောခရစ်ယာန်များသည် ယုံကြည်သူချင်းများအတွက် မိမိတို့၏ဆုကျေးဇူးတော်ကို အသုံးပြုပါဟူသောအမိန့်ကို ဝမ်းသာစွာလိုက်နာကြသည်။ ယင်းကိုအသုံးပြုနေကြသည့်နည်းလမ်းအချို့ကို သုံးသပ်ကြည့်ပါ။

^၉ များစွာသောညီအစ်ကိုတို့သည် အစည်းအဝေးအပိုင်းများကိုပြင်ဆင်ရာတွင် လစဉ်နာရီများစွာအသုံးပြုကြသည်။ မိမိတို့၏ကျမ်းစာလေ့လာမှုတွင်တွေ့ရှိထားသော တန်ဖိုးရှိအကြောင်းအရာအချို့ကို အစည်းအဝေးများတွင် တင်ပြသောအခါ သူတို့၏ထိုးထွင်းသိမြင်မှုရှိသောစကားများက အသင်းတော်ရှိသူတိုင်းကို ခံရပ်တည်ကြည်နိုင်ရန် လှုံ့ဆော်ပေးသည်။ (၁ တိ. ၅:၁၇) များစွာသောညီအစ်ကို၊ ညီအစ်မများသည် ယုံကြည်သူချင်းများအပေါ် သူတို့ထားရှိသည့်လှိုက်လှဲမှုနှင့် စာနာထောက်ထားမှုကြောင့် သူတို့ကို လူသိများသည်။ (ရော. ၁၂:၁၅) အချို့တို့သည် စိတ်ဓာတ်ကျသူတို့ထံ မှန်မှန်လည်ပတ်ကာ သူတို့နှင့်အတူဆုတောင်းကြသည်။ (၁ သက်. ၅:၁၄) အခြားသူတို့သည် စမ်းသပ်မှုကြုံတွေ့နေသောခရစ်ယာန်ချင်းများထံ နွေးထွေးပြီး အားရှိစေသောစကားများရေးရန် အချိန်ယူကြသည်။ အချို့သူတို့မူ အသင်းတော်အစည်းအဝေးများတက်ရောက်ရန် ကာယရေးတွင် ကန့်သတ်ချက်များရှိသူတို့ကို ကြင်နာစွာဖေးမကူညီပေးကြသည်။ ထောင်နှင့်ချီသောသက်သေခံများသည် ကယ်ဆယ်ရေးလုပ်ငန်းတွင် ပါဝင်ကြကာ သဘာဝဘေးဒဏ်များကြောင့် ပျက်စီးသွားသော ယုံကြည်သူချင်းများ၏အိမ်များကို ပြန်ဆောက်ပေးကြသည်။ ထိုသို့သောဂရုစိုက်တတ်သည့်ညီအစ်ကို၊ ညီအစ်မများတင်ပြသည့် ချစ်ခင်စုံမက်မှုနှင့် လက်တွေ့ကျကူညီပေးမှုသည် ‘နည်းအမျိုးမျိုးဖြင့်ဖော်ပြသော ဘုရားသခင်၏မဟာကြင်နာမှု’ ဖော်ပြချက်များပင်ဖြစ်သည်။—၁ ပေတရု ၄:၁၁ ကိုဖတ်ပါ။

မည်သည့်အရာ ပို၍အရေးကြီးသနည်း

၁၀။ (က) ပေါလုသည် ဘုရားသခင့်အမှုတော်ထမ်းဆောင်ခွင့်နှင့်ဆိုင်သော အဘယ်ကဏ္ဍနှစ်ခုကို အာရုံစူးစိုက်ခဲ့သနည်း။ (ခ) ပေါလုကို ယနေ့ကျွန်ုပ်တို့ မည်သို့တုပကြသနည်း။

^၁၀ ဘုရားသခင့်ကျေးကျွန်များသည် ယုံကြည်သူချင်းများအတွက် အသုံးပြုရန် ဆုကျေးဇူးတစ်ခုသာ ပေးအပ်ခံရသည်မဟုတ်ဘဲ လူသားချင်းအား မျှဝေရမည့် သတင်းစကားကိုလည်း ရရှိထားကြသည်။ ယေဟောဝါ၏အမှုတော်ထမ်းဆောင်ခွင့်နှင့်ဆိုင်သော ယင်းကဏ္ဍနှစ်ခုကို တမန်တော်ပေါလုအသိအမှတ်ပြုခဲ့သည်။ သူသည် ဧဖက်အသင်းတော်အကျိုးအတွက် မိမိအားအပ်ပေးတော်မူသော ‘ဘုရားသခင်၏မဟာကြင်နာမှုကြောင့်ရသည့် ဘဏ္ဍာစိုးအရာ’ နှင့်စပ်လျဉ်း၍ သူတို့ထံစားရေးခဲ့သည်။ (ဧ. ၃:၂) သို့တိုင် သူဤသို့လည်းပြော၏– ‘ငါတို့သည် ဘုရားသခင်စစ်ဆေး၍ သတင်းကောင်း လွှဲအပ်ခံထိုက်သူများဖြစ်’ ကြသည်။ (၁ သက်. ၂:၄) ကျွန်ုပ်တို့သည် ဘုရားသခင့်နိုင်ငံတော်ဟောပြောသူများအဖြစ် အမှုထမ်းရသည့်တာဝန်ကို လွှဲအပ်ခံရသူများဖြစ်ကြောင်း ပေါလုကဲ့သို့ ကျွန်ုပ်တို့လည်း အသိအမှတ်ပြုကြသည်။ ကျွန်ုပ်တို့သည် ဟောပြောခြင်းလုပ်ငန်းတွင် ဇွဲရှိစွာပါဝင်ခြင်းဖြင့် မမောနိုင်သောသတင်းကောင်းကြွေးကြော်သူတစ်ဦးအဖြစ် ပေါလုချမှတ်ခဲ့သောပုံသက်သေကို တုပရန်ကြိုးစားကြသည်။ (တ. ၂၀:၂၀၊ ၂၁; ၁ ကော. ၁၁:၁) ဘုရားသခင့်နိုင်ငံတော်သတင်းဟောပြောခြင်းက အသက်ကယ်တင်နိုင်ကြောင်း ကျွန်ုပ်တို့သိထားသည်။ သို့သော် တစ်ချိန်တည်းတွင် ယုံကြည်သူချင်းများထံ “ဘုရားသခင်ထံတော်မှ ဆုကျေးဇူးကို ဝေမျှပေး” ရန်အခွင့်အရေးများရှာကြံခြင်းဖြင့်လည်း ပေါလုကိုတုပဖို့ ကျွန်ုပ်တို့ကြိုးစားကြသည်။—ရောမ ၁:၁၁၊ ၁၂; ၁၀:၁၃-၁၅ တို့ကိုဖတ်ပါ။

၁၁။ ဟောပြောရန်နှင့် ကျွန်ုပ်တို့၏ညီအစ်ကိုများကိုတည်ဆောက်ရန်ဟူသော ကျွန်ုပ်တို့၏တာဝန်များကို မည်သို့ရှုမြင်သင့်သနည်း။

^၁၁ ဤခရစ်ယာန်လုပ်ဆောင်မှုနှစ်ခုတွင် အဘယ်အရာက ပိုအရေးကြီးသနည်း။ ဤမေးခွန်းသည် ငှက်တစ်ကောင်နှင့်ပတ်သက်၍ ဤသို့မေးခြင်းနှင့်အတော်အတန်တူသည်၊ တောင်ပံနှစ်ခုတွင် မည်သည့်တောင်ပံက ပိုအရေးကြီးသနည်း။ အဖြေကား ရှင်းနေသည်။ ငှက်တစ်ကောင်သည် ကောင်းစွာပျံသန်းနိုင်ရန် တောင်ပံနှစ်ခုစလုံးကို အသုံးပြုဖို့လို၏။ အလားတူပင် ကျွန်ုပ်တို့သည် ခရစ်ယာန်များအဖြစ် ကျွန်ုပ်တို့အားတောင်းဆိုထားသမျှကို အကုန်အစင်ပြုရန် ဘုရားသခင့်အမှုတော်ဆောင်ခြင်းကဏ္ဍနှစ်ခုစလုံးတွင် ပါဝင်ဖို့လိုသည်။ ထို့ကြောင့် သတင်းကောင်းဟောပြောရန်နှင့် ယုံကြည်သူချင်းများကို တည်ဆောက်ပေးရန်ဟူသော ကျွန်ုပ်တို့တာဝန်နှစ်ခုသည် မဆက်စပ်ဟုရှုမြင်မည့်အစား တမန်တော်ပေတရုနှင့် ပေါလုတို့ရှုမြင်ခဲ့သကဲ့သို့ ယင်းတို့သည် တစ်ခုနှင့်တစ်ခုဖြည့်စွက်ပေးသည့်တာဝန်များအဖြစ် ကျွန်ုပ်တို့ရှုမြင်ကြသည်။ မည်သည့်နည်းဖြင့်နည်း။

၁၂။ ကျွန်ုပ်တို့သည် ယေဟောဝါလက်တော်ရှိ ကိရိယာတစ်ခုအဖြစ် မည်သို့အမှုထမ်းဆောင်ကြသနည်း။

^၁၂ သတင်းကောင်းဟောပြောသူများအနေနှင့် ကျွန်ုပ်တို့သည် အားတက်ဖွယ်ဘုရားသခင့်နိုင်ငံတော်သတင်းနှင့်အတူ လူတို့၏နှလုံးကို ထိမိစေဖို့ကြိုးစားရာတွင် ကျွန်ုပ်တို့တွင်ရှိသည့် မည်သည့်စွမ်းရည်ကိုမဆို အသုံးပြုကြသည်။ ထိုသို့အားဖြင့် သူတို့သည် ခရစ်တော်၏တပည့်များဖြစ်လာရန် အကူအညီဖြစ်စေဖို့ ကျွန်ုပ်တို့မျှော်လင့်ကြသည်။ ထို့ပြင် ယုံကြည်သူချင်းများ၏နှလုံးကို နွေးထွေးစေဖို့ကြိုးစားရာတွင် ကျွန်ုပ်တို့တွင်ရှိနိုင်သည့် အဘယ်အရည်အချင်းကိုမဆိုနှင့် အခြားဆုကျေးဇူးများကိုလည်း အသုံးပြုကြသည်၊ ဘုရားသခင်၏ မဟာကြင်နာမှုဖော်ပြချက်များဖြစ်သော အားတက်ဖွယ်စကားများ၊ အကူအညီဖြစ်စေသောအပြုအမူများအားဖြင့် ဖြစ်သည်။ (သု. ၃:၂၇; ၁၂:၂၅) ထိုသို့အားဖြင့် သူတို့သည် ခရစ်တော်၏တပည့်များဖြစ်မြဲဖြစ်ရန် အကူအညီဖြစ်စေဖို့ ကျွန်ုပ်တို့မျှော်လင့်ကြသည်။ လုပ်ဆောင်မှုနှစ်ခုစလုံးတွင်—လူများအားဟောပြောခြင်းနှင့် “အချင်းချင်းအတွက် အကျိုးဆောင်ရာတွင်”—ကျွန်ုပ်တို့သည် ယေဟောဝါလက်တော်ရှိ ကိရိယာတစ်ခုအဖြစ် အမှုဆောင်ရသော ကောင်းမြတ်လှသည့်အခွင့်ထူးရရှိကြသည်။—ဂလ. ၆:၁၀။

“အချင်းချင်း ချစ်ခင်စုံမက်ကြလော့”

၁၃။ ကျွန်ုပ်တို့သည် “အချင်းချင်းအတွက် အမှုဆောင်ရာတွင်” အားနည်းသွားပါက အဘယ်အရာဖြစ်ပျက်မည်နည်း။

^၁၃ ပေါလုသည် ယုံကြည်သူချင်းများကို ဤသို့တိုက်တွန်းခဲ့သည်– “ညီရင်းအစ်ကိုကဲ့သို့ချစ်ခြင်းဖြင့် အချင်းချင်း ချစ်ခင်စုံမက်ကြလော့။ အချင်းချင်း ဂုဏ်တင်ရာတွင် ဦးဆောင်ကြလော့။” (ရော. ၁၂:၁၀) အမှန်တွင် ကျွန်ုပ်တို့၏ညီအစ်ကိုများအား ချစ်ခင်စုံမက်ခြင်းက ဘုရားသခင်၏မဟာကြင်နာမှုခံစားရသူ ဘဏ္ဍာစိုးကောင်းများအနေနှင့် နှလုံးအကြွင်းမဲ့အမှုဆောင်ရန် စေ့ဆော်သည်။ ‘အချင်းချင်းအတွက် အကျိုးဆောင်ခြင်း’ မပြုရန် ကျွန်ုပ်တို့ကိုစာတန်အနိုင်ယူပါက သူသည် ကျွန်ုပ်တို့၏စည်းလုံးမှုကို အားနည်းစေမည်ဖြစ်ကြောင်း ကျွန်ုပ်တို့သိထားကြသည်။ (ကော. ၃:၁၄) ယင်းမှတစ်ဖန် စည်းလုံးမှုမရှိခြင်းက ဟောပြောခြင်းလုပ်ငန်းတွင် ဇွဲထက်သန်မှုကင်းမဲ့ခြင်းအဖြစ်သို့ ဦးတည်စေလိမ့်မည်။ ပျံသန်းနေသောငှက်တစ်ကောင်၏တောင်ပံတစ်ခုကို ထိခိုက်လိုက်ရုံဖြင့် မြေပြင်ပေါ်သို့ကျစေနိုင်သကဲ့သို့ စာတန်သည် ကျွန်ုပ်တို့၏အမှုဆောင်ခြင်းအပိုင်းတစ်ခုကိုသာ ရပ်တန့်စေဖို့လိုကြောင်း သူကောင်းစွာသိထား၏။

၁၄။ ကျွန်ုပ်တို့သည် “အချင်းချင်းအတွက် အမှုဆောင်ရာတွင်” မည်သူတို့အကျိုးခံစားကြရသနည်း။ ဥပမာပေးပါ။

^၁၄ ‘အချင်းချင်းအတွက် အမှုဆောင်ခြင်း’ ကဘုရားသခင့်မဟာကြင်နာမှုခံစားသူတို့ကိုသာမက ယင်းကို တင်ပြသူတို့ကိုပါ အကျိုးရှိစေသည်။ (သု. ၁၁:၂၅) ဥပမာအနေနှင့် အမေရိကန်ပြည်ထောင်စု၊ အီလီနွိုက်စ်ပြည်နယ်ရှိ ရိုင်ယန်းနှင့် ရွန်းနီတို့ဇနီးမောင်နှံကို ကြည့်ပါ။ ကက်ထရီနာမုန်တိုင်းကြောင့် ရာနှင့်ချီသောသက်သေခံများ၏အိမ်များပျက်စီးသွားကြောင်း သူတို့ကြားသိသောအခါ မိမိတို့၏အလုပ်နှင့် တိုက်ခန်းကိုစွန့်ကာ နောက်တွဲယာဉ်အဟောင်းတစ်စီးဝယ်ပြီး ယင်းတွင်နေထိုင်၍ရအောင် ပြုပြင်၍ လူဝီဇီယားနားပြည်နယ်သို့ မိုင်ပေါင်း ၉၀၀ ခရီးနှင်ရန် ညီအစ်ကိုချင်းမေတ္တာက သူတို့ကို လှုံ့ဆော်ခဲ့သည်။ သူတို့သည် ညီအစ်ကိုများကို ကူညီပေးရန် မိမိတို့၏အချိန်၊ ခွန်အားနှင့် ပိုင်ဆိုင်ရာဥစ္စာများကိုပေးဆက်ကာ ထိုတွင် တစ်နှစ်ကျော်နေထိုင်ခဲ့သည်။ “ကယ်ဆယ်ရေးလုပ်ငန်းမှာပါဝင်ခြင်းက ကျွန်တော့်ကို ဘုရားသခင်နဲ့ ပိုရင်းနှီးစေတယ်။ ယေဟောဝါဟာ မိမိရဲ့လူမျိုးကို ဘယ်လိုဂရုစိုက်စောင့်ရှောက်တယ်ဆိုတာကို မြင်တွေ့ခဲ့ရတယ်။ ကျွန်တော်ထက်အသက်ကြီးတဲ့ညီအစ်ကိုတွေနဲ့အတူ အလုပ်လုပ်ရတာက ညီအစ်ကိုတွေကို ဘယ်လိုဂရုစိုက်ရမယ်ဆိုတာနဲ့ပတ်သက်ပြီး ကျွန်တော့်ကို များစွာသင်ပေးပါတယ်။ ယေဟောဝါရဲ့အဖွဲ့အစည်းအတွင်းမှာ ကျွန်တော်တို့လူငယ်တွေအတွက် လုပ်စရာအများကြီးရှိတယ်ဆိုတာကိုလည်း သိခဲ့ရတယ်” ဟု ၂၉ နှစ်အရွယ်ရှိရိုင်ယန်းက ပြောသည်။ ၂၅ နှစ်အရွယ်ရှိရွန်းနီ ဤသို့မှတ်ချက်ချသည်– “တခြားသူတွေကို ကူညီပေးတဲ့နေရာမှာ ပါဝင်ခွင့်ရတဲ့အတွက် ကျွန်မဝမ်းသာတယ်။ ကျွန်မ အရင်ကထက် ပိုပြီးပျော်ရွှင်တယ်လို့ခံစားတယ်။ လာမယ့်နှစ်တွေမှာ ဒီကောင်းမွန်လှတဲ့အတွေ့အကြုံကနေ ဆက်ပြီးအကျိုးခံစားရလိမ့်မယ်ဆိုတာ ကျွန်မသိတယ်။”

၁၅။ ဘုရားသခင်၏မဟာကြင်နာမှုခံစားရသူ ဘဏ္ဍာစိုးကောင်းများအနေနှင့် ဆက်၍အမှုထမ်းဆောင်ရန် ကျွန်ုပ်တို့တွင် အဘယ်အကြောင်းကောင်းများရှိသနည်း။

^၁၅ မှန်ပါသည်၊ သတင်းကောင်းဟောပြောရန်နှင့် ယုံကြည်သူချင်းများကို တည်ဆောက်ရန်ဟူသော ဘုရားသခင့်ပညတ်တော်များကိုနာခံခြင်းက အားလုံးကိုကောင်းချီးခံစားရစေသည်။ ကျွန်ုပ်တို့ကူညီပေးလိုက်သောသူတို့သည် ယေဟောဝါကို ဆက်ပြီးပို၍ကောင်းစွာအမှုဆောင်နိုင်ကြကာ ကျွန်ုပ်တို့လည်း ပေးကမ်းခြင်းမှသာရနိုင်သော စိတ်နှလုံးရွှင်လန်းမှုကို တွေ့ကြုံခံစားကြရသည်။ (တ. ၂၀:၃၅) အသင်းသားတစ်ဦးစီသည် အချင်းချင်း မေတ္တာပါပါစိတ်ဝင်စားမှုတင်ပြသောအခါ အသင်းတော်တစ်ခုလုံးသည် ပို၍နွေးထွေးမှုရှိလာသည်။ ထို့ပြင် အချင်းချင်းအပေါ်တင်ပြသော ကျွန်ုပ်တို့၏မေတ္တာနှင့် ချစ်ခင်စုံမက်မှုက ကျွန်ုပ်တို့အား စစ်မှန်သောခရစ်ယာန်များဖြစ်ကြောင်း ရှင်းလင်းစွာခွဲခြားသိမြင်စေသည်။ ယေရှုဤသို့မိန့်တော်မူခဲ့သည်– “သင်တို့အချင်းချင်းချစ်ကြလျှင် ထိုချစ်ခြင်းမေတ္တာကိုထောက်၍ သင်တို့သည် ငါ၏တပည့်များဖြစ်ကြောင်း လူအပေါင်းတို့ သိရကြလိမ့်မည်။” (ယော. ၁၃:၃၅) အကူအညီလိုအပ်နေသူများကို ခွန်အားပေးလိုသော ကိုယ်တော်၏ဆန္ဒသည် မိမိ၏မြေကြီးပေါ်ရှိကျေးကျွန်များတွင် ထင်ဟပ်ပြနေသောကြောင့် အဓိကအနေနှင့် ဂရုစိုက်တတ်သောခမည်းတော်ယေဟောဝါအပေါ် ဂုဏ်တင်မှုဖြစ်စေသည်။ ထို့ကြောင့် ကျွန်ုပ်တို့သည် ‘ဘုရားသခင်၏မဟာကြင်နာမှုခံစားရသူ ဘဏ္ဍာစိုးကောင်းများအနေနှင့်’ မိမိတို့၏ဆုကျေးဇူးတော်ကို “အချင်းချင်းအတွက် အကျိုးဆောင်ရာတွင်” အသုံးပြုရန် အကြောင်းကောင်းရှိလှ၏။ သင်သည် ယင်းသို့ ဆက်၍လုပ်ဆောင်မည်လော။—ဟေဗြဲ ၆:၁၀ ကိုဖတ်ပါ။

သင်မှတ်မိသလော

• ယေဟောဝါသည် အဘယ်နည်းများဖြင့် မိမိကျေးကျွန်များကို ခွန်အားရှိစေသနည်း။

• ကျွန်ုပ်တို့အား အဘယ်အရာအပ်နှင်းထားသနည်း။

• ကျွန်ုပ်တို့၏ယုံကြည်သူချင်းများအတွက် ကျွန်ုပ်တို့လုပ်ဆောင်နိုင်သည့်နည်းလမ်းအချို့ကား အဘယ်နည်း။

• “အချင်းချင်းအတွက် အမှုဆောင်ရာတွင်” ကျွန်ုပ်တို့၏ ဆုကျေးဇူးတော်ကို ဆက်၍အသုံးပြုရန် အဘယ်အရာက ကျွန်ုပ်တို့အား လှုံ့ဆော်မည်နည်း။

[စာမျက်နှာ ၁၃ ပါ ရုပ်ပုံ]

သင့် “ဆုကျေးဇူးတော်” ကို သူတစ်ပါးအကျိုး သို့မဟုတ် ကိုယ်ကျိုးအတွက် အသုံးပြုပါသလော

[စာမျက်နှာ ၁၅ ပါ ရုပ်ပုံ]

ကျွန်ုပ်တို့သည် အခြားသူတို့ကို သတင်းကောင်းဟောပြောကြပြီး ခရစ်ယာန်ချင်းများကို ကူညီပေးကြ

[စာမျက်နှာ ၁၆ ပါ ရုပ်ပုံ]

ကယ်ဆယ်ရေးလုပ်သားများသည် သူတို့၏ကိုယ်ကျိုးစွန့်စိတ်ဓာတ်အတွက် ချီးမွမ်းခံထိုက်သူများဖြစ်ကြ