နိုင်ငံတော်သတင်း နံပါတ် ၃၆ ကနှိုးဆွပေးသည့် စိတ်ဝင်စားမှုကိုပြုစုပျိုးထောင်ခြင်း

^၁ သင်၏ နိုင်ငံတော်သတင်း နံပါတ် ၃၆ ဝေစုကို ဝေငှပြီးပြီလော။ ယင်းက အားလုံး အလေးထားစဉ်းစားရန်အတွက် ဤအခန့်သင့်မေးခွန်းကိုမေးထားသည်– “ထောင်စုနှစ်သစ်—သင့်အတွက် မည်သည့်အနာဂတ်အလားအလာရှိသနည်း။” ၂၀၀၀ ပြည့်နှစ်သို့ချဉ်းကပ်လာသည်နှင့်အမျှ ထောင်စုနှစ်သစ်က မည်သည့်အရာကိုဆောင်ကြဉ်းပေးမည်နည်းဟူသော မျှော်လင့်ချက်များသည် အလွန်ကွဲပြားခြားနားကြသည်။ နိုင်ငံတော်သတင်း နံပါတ် ၃၆ က ထိုမျှော်လင့်ချက်များမှအချို့ကို သုံးသပ်ကာ ကမ္ဘာ့အခြေအနေများသည် အကောင်းဘက်ကမျှော်လင့်ရန်အတွက် အခြေအမြစ်မပေးကြောင်း ကျွန်ုပ်တို့ကိုသတိပေးသည်။ လူအများစုကြိုးစားရှာဖွေကြသည့် ငြိမ်သက်မှုနှင့်လုံခြုံမှုကို ဆောင်ကြဉ်းပေးမည့် တစ်ခုတည်းသောထောင်စုနှစ်မှာ ယေရှုခရစ်၏အနှစ်တစ်ထောင်အုပ်ချုပ်မှုဖြစ်သည်။ ကိုယ်တော့်နိုင်ငံတော်ဖြစ်ရပ်မှန်ကို ယုံကြည်စိတ်ချခြင်းက လူတိုင်းအား နိုင်ငံတော်သတင်း နံပါတ် ၃၆ ကို အတတ်နိုင်ဆုံးဝေငှရန် ကျွန်ုပ်တို့ကိုစေ့ဆော်ခဲ့ပြီဖြစ်သည်။

^၂ နိုင်ငံတော်သတင်းကိုတုံ့ပြန်မှုများ– ယခင်နိုင်ငံတော်သတင်း ဖြန့်ဝေမှုများသည် အမှုဆောင်လုပ်ငန်းတွင် ကျွန်ုပ်တို့အတွက် စေ့ဆော်မှုကောင်းတစ်ရပ်ဖြစ်ကြောင်း တွေ့ရှိခဲ့ရပြီ။ နိုင်ငံတော်သတင်း နံပါတ် ၃၅ နှင့်ပတ်သက်၍ ကနေဒါနိုင်ငံဌာနခွဲက ဤသို့ရေးခဲ့သည်– “လယ်ကွင်းတွင် ကြေညာသူများနှင့်ရှေ့ဆောင်များသည် ဤကင်ပိန်းကို စိတ်အားထက်သန်စွာထောက်ခံခဲ့ကြပြီး အားရှိစရာတွေ့ ကြုံမှုများစွာရရှိခဲ့သည်။” သင်သည် နိုင်ငံတော်သတင်း နံပါတ် ၃၆ ဝေငှရာတွင် ထပ်တူစိတ်အားထက်သန်မှုမျိုးကို တင်ပြခဲ့မည်မှာသေချာသည်။

^၃ လက်ရှိ နိုင်ငံတော်သတင်း ကင်ပိန်းကို ၂၀၀၀ ပြည့်နှစ်၊ နိုဝင်ဘာ ၁၇ ရက်တွင်အဆုံးသတ်ဖို့ စီစဉ်ထားသည်။ သို့သော် ရပ်ကွက်အများစု၏အရွယ်အစားကြောင့် သင့်ရပ်ကွက်မပြီးမချင်း ကင်ပိန်းကိုဆက်လုပ်ဆောင်ရန် အကြီးအကဲများကို တောင်းဆိုထားသည်။

^၄ ယခုအထိ နိုင်ငံတော်သတင်း နံပါတ် ၃၆ ဖြန့်ဝေမှုကို သင့်ဒေသတွင် မည်သို့တုံ့ပြန်လျက်ရှိသနည်း။ လူအနည်းငယ်သာ ဖြတ်ပိုင်းကိုဖြည့်ပြီး တောင်းဆို ဘရိုရှာနှင့်/သို့မဟုတ် အိမ်တွင်းကျမ်းစာသင်အံမှုကို တောင်းဆိုမည်ဖြစ်သည်။ သို့သော် ထောင်စုနှစ်အကြောင်းကို အစပိုင်းကစိတ်ဝင်စားသူအများစုသည် ယေဟောဝါသက်သေတစ်ဦးပြန်မလည်ပတ်မချင်း အရေးတယူရှိမည်မဟုတ်ပေ။ စိတ်ဝင်စားမှုပြသူအားလုံးထံ နောက်တစ်ကြိမ်ပြန်လည်ပတ်သင့်သည်။ ထိုသို့လုပ်ဖို့ကောင်းမည့်အချိန်ကား အဘယ်အချိန်ဖြစ်မည်နည်း။ ဖြစ်နိုင်လျှင် ချက်ချင်းပြန်သွားသင့်သည်။

^၅ နိုင်ငံတော်သတင်း နံပါတ် ၃၅ ဝေငှခဲ့သည့်နေရာများသို့ ပြန်သွားရာမှရရှိခဲ့သည့် ဤတွေ့ ကြုံမှုများကို သတိပြုပါ။ အိုင်ယာလန်နိုင်ငံရှိရှေ့ဆောင်တစ်ဦးသည် စားသောက်ဆိုင်ပိုင်ရှင်တစ်ဦးအား နိုင်ငံတော်သတင်း ဝေငှခဲ့သည်။ အမျိုးသမီးသည် သတင်းတရားကို သဘောကျသွားကာ ညီအစ်မအား ပြန်လာဖို့ဖိတ်ခေါ်ခဲ့သည်။ ညီအစ်မသည် နှစ်ရက်အတွင်းပြန်သွားကာ ကျမ်းစာသင်အံမှုစခဲ့သည်။ ဒိန်းမတ်နိုင်ငံ၌ လူမရှိသည့်အိမ်တစ်အိမ်တွင် နိုင်ငံတော်သတင်း တစ်စောင်ကိုထားခဲ့သည်။ ထိုနေ့၌ပင် ၎င်းအိမ်တွင်နေသောအမျိုးသမီးသည် ဖြတ်ပိုင်းကို ဌာနခွဲရုံးသို့ပို့လိုက်ရာ ၎င်းမှတစ်ဖန် ဒေသခံအသင်းတော်သို့ ယင်းကိုပို့ပေးခဲ့သည်။ တစ်ပတ်မကုန်မီ ညီအစ်မနှစ်ယောက်သွားရောက်လည်ပတ်ပြီး သင်အံမှုကိုစီစဉ်ခဲ့ရာ အမျိုးသမီးသည် နိုင်ငံတော်ခန်းမတွင် ပထမဆုံးအနေဖြင့် အစည်းအဝေးတက်ခဲ့သည်!

^၆ သင်ပြန်သွားသည့်အခါပြောရမည့်အရာ– နိုင်ငံတော်သတင်း ဝေငှထားသည့်နေရာများသို့ ပြန်လည်ပတ်မှုများပြုလုပ်ခြင်းသည် အတော်အတန်လွယ်ကူပြီး ယင်းသည် ကျွန်ုပ်တို့ဓမ္မအမှု၏ ပျော်ရွှင်ဖွယ်ရာကဏ္ဍတစ်ခုဖြစ်သည်။ ထိုသို့လုပ်ဆောင်သည့်အခါ နိုင်ငံတော်သတင်း နံပါတ် ၃၆ တစ်စောင်ယူသွားသင့်သည်၊ အကြောင်းမှာ အိမ်ရှင်တွင် ၎င်းစာစောင်ရှိချင်မှရှိမည်ဖြစ်သောကြောင့်တည်း။ ဤအကြံပြုချက်များကို သင်စမ်းကြည့်နိုင်သည်။

^၇ သင်မည်သူမည်ဝါဖြစ်သည်ကို အိမ်ရှင်အား သတိရစေပြီးနောက် ဤသို့ပြောနိုင်သည်–

◼ “‘ထောင်စုနှစ်သစ်—သင့်အတွက် မည်သည့်အနာဂတ်အလားအလာရှိသနည်း’ လို့ခေါင်းစဉ်တပ်ထားတဲ့ စာစောင်တစ်စောင်ကို ကျွန်တော်ထားခဲ့တယ်။ မကြာခင် ကမ္ဘာမြေကြီးကို ပရဒိသုအခြေအနေဖြစ်စေမယ့် ယေရှုခရစ်ရဲ့အနှစ်တစ်ထောင်အုပ်ချုပ်မှု စတင်တော့မယ့်အကြောင်း ဖတ်ရတာအားမရှိဘူးလား။ [နိုင်ငံတော်သတင်း နံပါတ် ၃၆ ပါ ပရဒိသုရုပ်ပုံများကိုပြပါ။] နောက်ကျောစာမျက်နှာမှာ ကျွန်ုပ်တို့ထံမှ ဘုရားသခင် အဘယ်အရာတောင်းဆိုတော်မူသနည်း ဆိုတဲ့ ဘရိုရှာတစ်စောင်တောင်းခံဖို့ မိတ်ဆွေကိုဖိတ်ခေါ်ထားတယ်။” ဘရိုရှာကိုပြ၍ သင်ခန်းစာ ၅ ကိုဖွင့်ကာ ပထမမေးခွန်းနှင့် အပိုဒ် ၁၊ ၂ ကိုဖတ်ပြီး အိမ်ရှင်အား မှတ်ချက်ပေးဖို့တောင်းဆိုပါ။ ကျမ်းချက်တစ်ချက်နှစ်ချက်ကို ဖတ်ပြီးဆွေးနွေးပါ။ ဖြစ်နိုင်လျှင် နောက်မေးခွန်းနှင့်အပိုဒ်ကို သုံးသပ်ပါ၊ ယင်းနောက် ပြန်လာပြီးဆက်ဆွေးနွေးဖို့ စီစဉ်ပါ။

^၈ နိုဝင်ဘာလတွင် “တောင်းဆို” ဘရိုရှာ သို့မဟုတ် “အသိပညာ” စာအုပ်ကို ဆက်ဝေငှမည်ဖြစ်သောကြောင့် သင် ဤသို့ပြောနိုင်သည်–

◼ “မကြာခင်က မိတ်ဆွေဆီလည်ပတ်ခဲ့တဲ့အချိန်မှာ ‘ထောင်စုနှစ်သစ်—သင့်အတွက် မည်သည့်အနာဂတ်အလားအလာရှိသနည်း’ ဆိုတဲ့စာစောင်တစ်စောင် ကျွန်တော်ထားခဲ့တယ်။ အဲဒီမှာ အခမဲ့အိမ်တွင်းကျမ်းစာသင်အံမှု ကမ်းလှမ်းချက်တစ်ခုပါတယ်။ ကျွန်တော်တို့အသုံးပြုတဲ့ သင်အံမှုအထောက်အကူတစ်ခုကိုပြဖို့ မိတ်ဆွေဆီပြန်လာတာပါ။ [တောင်းဆို ဘရိုရှာကိုပြပြီး နောက်ကျောဖုံးကိုပြပါ; သို့မဟုတ် အသိပညာ စာအုပ်ကိုပြပြီး စာမျက်နှာ ၁၈၈-၉ ကိုဖွင့်ပါ။] ကျမ်းစာမှာပြောထားတဲ့ အနှစ်တစ်ထောင်က ဒီရုပ်ပုံမှာ မိတ်ဆွေတွေ့ရတဲ့အခြေအနေမျိုးကို ဆောင်ကြဉ်းပေးပါလိမ့်မယ်။ ပရဒိသုအသက်တာအတွက် အရည်အချင်းပြည့်မီဖို့ ဘုရားသခင်နဲ့ဆိုင်တဲ့ တိကျမှန်ကန်တဲ့အသိပညာကို ဆည်းပူးဖို့လိုတယ်။ ကျေးဇူးပြု၍ ကျွန်တော်တို့ကျမ်းစာလေ့လာပုံကို တိုတိုတုတ်တုတ်သရုပ်ပြခွင့်ပြုပါ။”

^၉ နိုင်ငံတော်သတင်း နံပါတ် ၃၆ ဖြန့်ဝေမှုက ဓမ္မအမှု၌ ကျွန်ုပ်တို့၏ပါဝင်မှုကိုတိုးမြှင့်ရန် လှုံ့ဆော်ပေးကာ ကြီးမားသည့်သက်သေခံချက်တစ်ရပ်ကို ဖြစ်မြောက်စေသည်။ ယင်းသည် ရပ်ကွက်ရှိလူများစွာ၏စိတ်ဝင်စားမှုကို နှိုးဆွပေးခဲ့ပေမည်။ ယေဟောဝါ၏အကူအညီဖြင့် ၎င်းစိတ်ဝင်စားမှုကိုပြုစုပျိုးထောင်ရန် ကျွန်ုပ်တို့စုပေါင်းကြိုးစားကြလျှင် ပိုမိုများပြားသည့်သိုးကဲ့သို့သောသူများကို အားရဝမ်းသာရှာတွေ့ပါလိမ့်မည်။—မ. ၁၀:၁၁; တ. ၁၃:၄၈၊ ၄၉၊ ၅၂။