Vintsina via Mukanda ua Viuano via Muono Uetu Vakua Kilistu na Vipanga Vietu
© 2025 Watch Tower Bible and Tract Society of Pennsylvania
7-13 YA JULHO
VUPITE VUA MU LIZI LIA NJAMBI | VISIMO 21
Vimamuna via Mana vi mi Kuasa ku Yoya mu Ndzolela mu Vulo
Mua Kuendesela Vuino ku Litantekeya Cenu
Ku litantekeya ca pande kuambata ntsimbu ingahi? Kua kala cimo cisimo nguavo: Vuasi-vuasi kati kulia. (Visi. 21:5) Ngeci mukemuo, ku litantekeya ca pande kuambata ntsimbu ya ku puamo, linga mu litantekeye vuino umo na mukuavo. Vunoni ka ci tondeka mu lahese cikuma ntsimbu ya ku litantekeya. Mbimbiliya ya muesa ngecize, ku nakuila ku lutue cuma ca lavelela muntu ‘ce ku vavalesa mutima.’ (Visi. 13:12) Cikuavo naua, omo cilemo cenu ciya na ku kola, ce ku kaluua ku pokuesa masungu. (1 Kol. 7:9) Mu cihela ca ku tala lika ku ntsimbu ya ku litanteya cenu, ca cili ku lihula nguenu: ‘Viuma vika vikuavo vi nji tonda kasi ku tantekeya hali ou mukuetu, mangana nji linge cihangula?’
Mua ku Kaniamesela Vulo Vuenu
3 Yehova, ua tumbikile vulo linga vu pue ndundzi ya ndzolela kuli yala na mpuevo va liambata. Vunoni mu ku linga ka kua kele muntu ua ku tantuluka, mu malo mue ku soloka visoti. Kapostolo Paulu neni ua vi handekele ngueni, vaze va liambata va na pandele ku lavelela visoti mu vulo. (1 Kol. 7:28) Vamo, ve ku lihoya ntsimbu yose na vakua ndzivo yavo. Kaha ngeci ve ku singanieka ngecize, ka va li fuililile mu ku liambata. Kaha nga visinganieka via vakua mavu via va sambukila laza, ve ku singanieka vuasi-vuasi ngecize, ku tsiha vulo cikeco ku manusula visoti. Kaha ve ku singanieka naua ngecize, cuma ca kama ci va hasa ku linga ca pua ku tuameka ndzolela yavo ku lutue mu ku tsiha vulo.
4 Tua pande ku liniunga ku ku singanieka ngecize, tua lihono na mukua ndzivo yetu. Tu tantekeya nguetu, vupangala vukevuo lika vu ya tavesa Mbimbiliya mu ku tsiha vulo. (Mat. 5:32) Ngeci mukemuo, nga tu hita mu visoti via tumbuile Paulu, tua pande ku liniunga ku ku singanieka nguetu: ‘Vuno ovu vulo vuli pundu na ku puisamo vi nja tondeka ni? Vuno mukuetu ali na ku nji muesa cilemo ca nji pande ni? Ni nja pande ku tondako ueka?’ Nga tu singanieka mu cifua eci, tu li na ku singanieka lika hali etu vavene kati hali mukua ndzivo yetu. Mana a vakua mavu e ku muesa ngecize, muntu na pande ku kava mutima ueni na ku linga vize vi mu vuisa ndzolela, ambe nga viuma viaco vi ka tsiha vulo vuavo. Vunoni mana a Njambi nguao: “Na umo uahi a yongole vieni ivene, vunoni enu vose vize via vakuenu.” (Filp. 2:4) Mua vusunga, Yehova a tonda mu niunge vulo vuenu, kati ku vu tsiha. (Mat. 19:6) Kaha a tonda naua mu livange ku singanieka hali ikeye, kati hali enu vavene.
5 Va yala na mpuevo, va pande ku limuesa cilemo na kasingimiko umo na mukuavo. (Tandenu Efeso 5:33.) Mbimbiliya ya tu kaniamesa tu tuale cikuma mana ku ku hana kati ku ku tambula. (Vili. 20:35) Cifua cika ci hasa ku kuasa vaze va liambata linga va li muese cilemo na kasingimiko? Ku likehesa. Yala ni mpuevo ua ku likehesa ke ku li tuameka ikeye ivene, vunoni ue ku tuameka “ku-vezika ca mukuavo.”—1 Kol. 10:24.
w06-E 9/15 28 ¶13
“Zolela Mpuevo ya Vukuendze Vuove”
13 Vatico nga vaze va liambata ka vesi na ku litombola omo lia cifua ci va yoyelamo muvulo vuavo? Va pande ku lihakela kapandi linga va hase ku uana njila ya ku sungameselamo viuma. Ca ku muenako, halumo va na lizilisa ku handeka mezi a ku hona ngozi. (Visimo 12:18) Ngue mu tu na mono mu cilongesa ci na hiti, evi vi hasa ku koka visoti via kama mu vulo. Cimo cinimbu ca Mbimbiliya nguaco: “Ku kala ku zindinda ca hiana ku kala hamo na mpuevo mukua luozi na mukua kalua.” (Visimo 21:19) Nga ua pua mpuevo ua somboka kaha muli na ku hita mu visoti ngeci muevi, lihulenu nguenu: Vuno cifua cange cili na ku kaluuisa muono ua yaliange ni? Mbimbiliya ya handeka ku tuala ha vamala nguayo: “Enu vamala, lemenu vampuevo venu, kati mu sase navo.” (Kolose 3:19) Nga ua pua yala uambata, lihulenu nguenu: Vuno nja pua muntu ua mukalu na ku lingisa mpueyange ku kovela mu ceseko ca ku tondela ciyulo kueka ni? Ku handeka vusunga, muntu ka pandele ku lingisa visoti viali na ku lihita navio muvulo, ku pua vukovelelo vua ku linga vupangala. Vunoni mu ku linga viuma viaco vi hasa kusoloka, mua pande ku simutuila na mutima uose ku tuala ha visoti vienu.
Vupite vua mu Lutsilielo
Tue ku Pangela Njambi “Mukua Cikeketima ca Kama”
9 Vakua Kilistu vose ve ku lihakela kapandi ka ku tambuluisa cikeketima ca Yehova. Omo lia vika? Vumo vusunga vua pua, muomu Yehova ke ku halakana vaze ka ve ku muesa cikeketima ku vakuavo. (Tandenu Visimo 21:13.) Na umo uahi ha kati ketu a tonda Yehova a viane ku halakana ku vivundilo vieni. Ngeci mukemuo, tue ku lihakela kapandi kose ka ku viana ku kala na mitima ya ikalu. Ka tua pandele ku zika matuitui etu ku miteto ya Mukua Kilistu ali mu lamba. Vunoni tua pande ku linga cose mu ku pua na ku halakana ku mitambi ya muhutu. Cikuavo naua, ka tue ku suva eci cilungula ca mu Mbimbiliya: “Uze ka muesa cikeketima ku vakuavo, neni va ka mu sompesa ca ku hona cikeketima.” (Tia. 2:13, NWT) Ku vuluka ngecize netu tua tondeka mua kama cikeketima, ci ka tu kuasa ku muesa cikeketima ku vakuetu. Tua pande ku linga cose mu ku muesa cikeketima, cikuma-kuma kuli mukua vupi ue ku hiluka mu cikungulukilo.
14-20 YA JULHO
VUPITE VUA MU LIZI LIA NJAMBI VISIMO 22
Vimamuna via Mana vi mi Kuasa ku Lela Vuino Vana
Vuno Vana Venu va ka Pangela Njambi mu va ka Kola Ni?
7 Nga mua liambata kaha mu tonda ku kala na vana, lihulenu nguenu: ‘Vuno tua pua vantu va ku likehesa, va lutsilielo kaha vaze va hasa ku hangula Yehova linga va niunge muono ua uha ni?’ (Visa. 127:3, 4) Nga mua kala laza na vana, lihulenu nguenu: ‘Vuno njili na ku longesa vana vange seho ya ku pua vakua ku fuitangana ni?’ (Ekel. 3:12, 13) ‘Vuno nje ku linga cose mu ku niunga vana vange ku vusonde vua ku muvila na vua mu visinganieka vu hasa ku va solokela mu mavu ano a Satana ni?’ (Visi. 22:3) Ka citava ku niunga vana ku visoti viose vi va hasa ku lihita navio. Vunoni kamandende-kamandende kaha na cilemo mu hasa ku va viukisila ku visoti via mu muono na ku va lekesa vati va hasa ku pangesa Mbimbiliya mu visoti viaco. (Tandenu Visimo 2:1-6.) Ca ku muenako, nga umo kavusoko kenu a likela ku pangela Yehova, kuasenu vana venu va lilongese mu Mbimbiliya omo lia vika ca pua ca seho ku tualelelaho ku pangela Yehova na lukakatela. (Visa. 31:23) Ni nga mua tsisa umo kavusoko, kuasenu vana venu vati va hasa ku pangesa Lizi lia Njambi mu ku-lua na vusiua na ku uana ku lembama.—2 Kol. 1:3, 4; 2 Tim. 3:16.
Visemi—Longesenu Vana Venu ku Lema Yehova
17 Kati mu kotokele ku putuka ku longesa vana. Ua livanga ka liveyele, ngeci mukemuo visemi va na pande ku longesa muana ntsimbu a cili ua mundende cikuma. (Visi. 22:6) Hilulenu ha lungano lua Timoteo, uze omo ua kolele ua putukile ku enda mangendzi na kapostolo Paulu. Yunisi, naye ya Timoteo, na kukueni Loisi, va longesele Timoteo “fume ku vukeke.”—2 Tim. 1:5; 3:15.
18 Kaha muanetu Jean-Claude na mpueyeni Peace, va hasele ku lela vana vavo 6 vose va leme na ku pangela Yehova. Vika via va kuasele ku puisamo ku longesa vana vavo vose? Va kavele lungano lua Yunisi na Loisi. Va handekele nguavo: “Tua putukile ku longesa vana vetu Lizi lia Njambi tunde ku vunike, mu nima ya ntsimbu ya indende tunde ha ku semuka cavo.”—Ndeu. 6:6, 7.
19 Vika ca lomboloka “ku longesa” mezi a Yehova ku vana venu? Lizi “ku longesa” li va tumbula ku Ndeutelonomi lia lomboloka “ku longa muntu na ku mu vuluisa” ku sua kumo. Kaha linga va puisemo evi, visemi va tondeka ntsimbu ya kama ya ku pua na ku simutuila na vana vavo ku sua kumo. Vintsimbu vimo, ku hilukila-hilukila viuma vi mua longesa laza vana ce ku futula ku mutima. Vunoni, visemi va na pande ku lihakela vene kapandi ka ku lingamo, muomu ovu vukevuo vukovelelo vu va kala navuo mu ku kuasa vana vavo vevuisise Lizi lia Njambi na ku pangesa vitume vialio mu miono yavo.
w06-E 4/1 9 ¶4
Visemi—Puenu Lungano Lua Cili ku Vana Venu
Vanike ve ku muesa vilinga via vunike vene, kaha vamo ve ku muesa zimpata cipue lisino vene. (Njenisisi 8:21) Vika visemi va hasa ku linga? Mbimbiliya nguayo: “Vuheve vu na sata mu mutima ua kanike; vunoni citetele ca ku mu longesa naco ci ka vu sekula ku laako nendi.” (Visimo 22:15) Vunoni vamo ve ku mona eci ku sungamesa ku pua ca vukenia kaha ca laza. Vunoni Mbimbiliya ya vindika vukenia na vilinga viose via vipi. Vutuhu ku pangesa citetele ya pua imo njila ya kasitiku, vunoni ya muesa mpoko ya visemi i ve ku pangesa ca ku hona kuvongoloka, vunoni na cilemo mu ku muesa ngecize va tonda vana va kale vuino kaha va ka yoye mua cili ku lutue.—VaHevelu 12:7-11.
Vupite vua mu Lutsilielo
Viukililenu na Viteli vi mua Kala Navio
11 Na vuno vene, tu hasa ku vueza ku ndzolela yetu mu ku lihaka na ndzili yose mu nkala cipanga ci va tu kundika mu vipanga via Yehova. Kalenu na “ntuima” mu cipanga ca ku ambulula kaha na mu vipanga via mu cikungulukilo. (Vili. 18:5; VaHe. 10:24, 25) Puenu na ku lihakela kapandi ka ku livuahesela vikumbululo vize vi kaniamesa, ku viuano. Tualenu mana ku nkala mitamba ya vandongesi i mue ku tambula mu viuano via mu kati ka simano. Nga va na mi vundila ku ka kuasa ku vimo viuma vitondeka mu cikungulukilo, kati mu kotokele kaha vi lingenu vuino. Kati mu mone na umo mutamba uahi u mue ku tambula ku pua ua seho ya indende. Lihakelenu kapandi ka ku vueza ku vutongue vuenu. (Visi. 22:29) Omo mu vueza ku ku fuitangana cenu mu vipanga via Yehova, mu ka kola vuasi mu lutsilielo kaha na ndzolela yenu i ka livuezelela cikuma. (Ngal. 6:4) Cikuavo naua, ci ka mi puila ca casi ku viukilila na vakuenu nga va tambula citeli ci mua tondele nenu.—Loma 12:15; Ngal. 5:26.
21-27 YA JULHO
VUPITE VUA MU LIZI LIA NJAMBI | VISIMO 23
Vimamuna via Mana ku Tuala ha ku Pangesa Vuala
Pangesenu Vuala na Mana
Yehova ua vindika ku nua mua kama na ku penda. (Ngalata 5:21) Lizi lieni ngualio: “Kati u kale ha kati ka vaka ku nua viniu via vingi.” (Visimo 23:20) Ngeci mukemuo, nga tu hangula ku nua, cipue vene kua lika lietu ka tua pandele ku hianesamo mu cifua ca ku linga, ka tu hasa ku singanieka, ku handeka, ni ku linga viuma via ku-sua. Ni vene ku nua mu cifua ci pihisa cihindu cetu. Ku tsiha mpanga, nga ka tue ku hasa ku nua mu ku puisamo, tua pande ku likela mu vutuntu.
it-1-E 656
Ku penda
Mbimbiliya ya civindika. Kunua cikuma vuala na ku heta ha ku penda, va civindika mu Mbimbiliya. Mukua mana ua sonekele mukanda ua Visimo ua hitile mu citanga ca kunua cikuma vuala na ku heta ha ku penda. Ivene ua handekele nguendi: “Iya ue ku mona cikele? Iya a li na vusiua? Iya a linienga? Iya ali na zimbandu na kasuilo kahi? Iya a tsitsivala meso? Vaze va toka ku viniu; vaze va ya mu ku lengeya viniu via ku pandakana. Kati u tale ku viniu omo vi tila, omo vi viazima mu ngandza, omo vi hita vuino: [evi vi hasa ku lingisa muntu ku kala na cihindu ca cindende; ngeci mua cirrose hepática, vuvezi vua mu vuongo] kaha naua vihasa ku koka [delirium-tremens] (ni nguetu ku zaza) na ku koka vene kutsa. Mu ku sulumuina vi sumana ngue linoka, vi vavalesa ngue limbuambua. Meso ove a ka mona via ku komouesa, ni nguetu vuala vu hasa ku kuata ku vuongo, ku kala na vilinga kati vikevio, ni ku singanieka ca ku hianesamo vize ka via keleko. Vuongo vua muntu uaco ka vue ku panga vuino na ku putuka ku handeka mizimbu ya ku hianesamo. Ambe vene vilinga viendi kati via cili. Na mutima u ka handeka via ku pihia, [visinganieka na vizango viendi kati via cili].”—Visi. 23:29-33; Hoz. 4:11; Mat. 15:18, 19.
Mukua ku soneka Visimo a tualelelaho ku handeka viuma vie ku lihita navio mukua ku penda nguendi: “U ka fua ngue uze na kosa ha kati ka mema a kalunga, ni nguetu ue ku pinda ngue muntu ali na ku zivilila kaha ngue muntu a li na kutsa kavundende-kavundende. “Cipue ngue uze na kosa helu lia citi ca ha kati ka vuato.” Ngue vuato vuli na ku ndenga-ndenga cikuma, muono ua mukua ku penda ue ku hita mu visoti via kama ngeci mua ku vatuka misisa, ku linga luozi na visoti vikuavo vi hasa ku soloka. “Va na nji veta, u ka handeka nange ka nja vavalele; va na nji tingula, nange ka nja vavale.” Mezi a mukua ku penda ngue ali na ku handeka lika liendi. Ua kele na ku sembulula viose via lihitile navio cipue visoti via mu solokelele omo lia ku penda. “litangua lika nji hinduka? Hanga nji ka vi lengeya naua.” Ue ku kosa noho vuala vu na mu hiti, vunoni ua tsa ha vuala kaha ali na ku vandamena vukovelelo vukuavo linga a ka nue naua. Mua vusunga, cinua vuala ue ku kovela mu vuhutu omo lia ku sanduola vimbongo via vingi ku vuala. Cikuavo naua vantu ka ve ku mu kulahela kaha ue ku hona ndzili ya ku panga.—Visi. 23:20, 21, 34, 35.
Vupite vua mu Lutsilielo
Mana a Vusunga Ali na ku Tambeka
16 Viukililenu na vize vi muli navio. Mbimbiliya ya tu mamuna nguayo: “Kati u katiese mu ku lifukisa . . . U hianga ku talekesa meso ove kuli vize vikevio viahiko, ni? Muomu cili vene, vupite vu lipangesela mavava, ngue cihungu a pululuka muilu.” (Visi. 23:4, 5) Vupite ka ve ku vu kosela mu kali, muomu ca casi ku vu zimbalesa. Vunoni lelo lino, cipue vampite ni vihutu mueka ve ku tonda vimbongo. Kaha ku tonda vimbongo, vintsimbu via vingi ce ku va lingisa ku linga viuma vie ku vihisa lutsimo luavo, ku likata cavo na vakuavo kaha na cihindu cavo vene. (Visi. 28:20; 1 Tim. 6:9, 10) Vunoni mana e ku tu kuasa ku mona vimbongo mu njila ya cili. Kaha cifua ci tue ku vimuenamo, ce ku tu niunga ku ku kala na mutima ua lizangamena na ku tu kuasa ku viukilila na vize vi tuli navio.—Ekel. 7:12.
28 YA JULHO 3–YA AGOSTO
VUPITE VUA MU LIZI LIA NJAMBI | VISIMO 24
Lingenu Viuma vi ka mi Kuasa Kulua na Visoti
‘Kolesenu Kaha Manenu Ngo’
15 Puenu na ku lilongesa Lizi lia Njambi na ku li hilula. Muti ua kala na mizi ya lova, ka ue ku ua ngoco. Na vuno vene, tu hasa ku kaniama nga tu kala na lutsilielo lua kama lua hitukila ha Lizi lia Njambi. Muti nga uli na ku kola vuasi na mizi yauo ye ku kola vuasi. Na vuno vene, mu tue ku lilongesa na ku hilula tue ku kaniamesa lutsilielo luetu na lukulahelo luetu ngecize ku yoya mua ya vitume via Njambi cikeco ca hiana seho. (Kolo. 2:6, 7) Puenu na ku hilula ha vati vitume, masiko na ku tuamenena ca Yehova via kuasele vangamba veni ku nima. Ca ku muenako, Ezekiele ua halakanene vuino ku vitume via mu hele kangelo ku tuala ha tembele ya cimueso. Kaha eci cimona caco ca kaniamesele Ezekiele. Lelo lino tue ku lilongesako via vingi ku tuala ha vati tu hasa ku hakuila vitume via Yehova via likuata na ku lemesa ca ku lela. (Ezek. 40:1-4; 43:10-12) Netu tue ku uana vukuasi vua vuingi mu tue ku lilongesa na hilula ha vilongesa via ku lova via kala mu Lizi lia Njambi.
w09-E 12/15 18 ¶12-13
Kati mu Tavese Visoti Vitanganese Ndzolela Yenu
12 Visimo 24:10 ya mamuna nguayo: “Nga u lezumuka ku litangua lia kayando, Ngolo yove ya indende.” Mukanda ukuavo ua visimo nguao: “Vunoni ha vusiua vua mutima cimbembesi ci vatuka.” (Visi. 15:13) Vamo Vakua Kilistu ve ku ecelela visoti viva zeyese mu cifua ca ku linga na ntsimbu ya ku tanda Mbimbiliya na ku ihilula ka ve ku kala nayo. Ambe vivundilo viavo vie ku pua via helu-helu lika, kaha halumo ve ku heta vene ha ku sondoloka ku vamuanaye. Mua vusunga, ka tua pandele kuecelela visoti vitu zeyese cikuma.—Visi. 18:1, 14.
13 Cikuavo naua, ku mona viuma mu njila ya cili, ci hasa ku tu kuasa ku mona viuma vi hasa ku tu vuisa ndzolela. Ndaviti ua handekele nguendi: “Nji zolela mu ku linga cizango cove, a Njambi yange.” (Visa. 40:8) Vunoni nga viuma ka viesi na kuenda vuino mu muono uetu, ka tua pandele ku likela ku linga viuma via mu lutsilielo. Ngeci mukemuo, ku fuitangana mu cipanga ca Yehova ce ku neha ndzolela, ci hasa ku tu kuasa cikuma. Yehova nguendi, tu hasa ku kala na ndzolela nga tu tanda na ku hilula Lizi liendi Mbimbiliya kusua kumo. (Visa. 1:1, 2; Tia. 1:25) Visoneka via ku lela hamo lika na viuano, vie ku tu kaniamesa na mezi a ku tovola aze eku tu nehela ciyulo na ku zolesa mutima uetu.—Visi. 12:25; 16:24.
Vihula via Vakua ku Tanda
Visimo 24:16 nguayo: “Mukua vuviuke a ua lutanu na luvali, na ku katuka naua.” Vuno aa mezi emanena muntu ue ku vulumuna ku sua kumo kaha va mu konekela kuli Njambi?
Kati oko ca talekesa eci cinimbu. Vunoni, eci cinimbu cemanena muntu ue ku uila mu visoti ni vitanga via kama kaha mu nima yaco a katuka ni nguetu a vi vula.
Ku tsiha mpanga, Visimo 24:16, ka ya handekele via “ku ua” mu vilinga ngeci mua ku uila mu vupi. Vunoni lia handeka via ku uila mu visoti via vingi kaha naua kusua kumo. Mu mavu ano a api, mukua vuviuke a hasa ku hita mu visoti via cihindu ni visoti vieka via kama. Ni va hasa ku mu luisa cikuma kuli vakua nguvulu. Vunoni ua kulahela ngecize, Njambi ikeye mukuasi ueni kaha a ka mu kuasa linga a hase ku kolesa na ku vula nkala cisoti caco. Aci singaniekenuho, vintsimbu vingahi mua limuena vangamba va Yehova va hita mu visoti na ku vi vula? Mua vusunga via vingi. Omo lia vika? Muomu tuli na vusunga ngecize, “Yehova a kuatesa vose va lahuka, kaha a katula vaze vose va na kotama.”—Visa. 41:1-3; 145:14-19.
Vupite vua mu Lutsilielo
Vati nji Hasa ku Liviukisila via Vulo?
13 Nga mu tonda ku ambata ni ku somboka, lihulenu vuino linga mu kale na vusunga ngecize mu na puho mpundu. Halumo muli na ku singanieka nguenu mu na puho laza, vunoni tu ci simutuilenu vi ca lomboloka mpundu ku puaho. Vi tu simutuila vi hasa ku mi komouesa.
14 Mbimbiliya ya muesa ngecize yala na mpuevo va kala na vipanga via ku liseza mu vulo. Ngeci mukemuo ku puaho ca yala na mpuevo ka ca lifuile. Nga yala a tonda ku ambata na pande ku lihula nga na puho ha ku pua mutue ua vusoko. Yehova ua tuma vamala ku tonda via kambela mpueyeni na vana, cipue via ku ntsitu ni via mu visinganieka. Vunoni cuma ca seho ya kama ca va tuma ca pua ku tuamenena vusoko mu ku lemesa. Mbimbiliya nguayo yala ke ku niunga vusoko vueni ku Vihia ceni ca “hiana uze ka tsililielele.” (1 Timoteo 5:8) Ngeci mukemuo, nga mua pua yala kaha mu tonda ku ambata, singaniekenu vati mu hasa ku kava eci citume: “Liviukisile vipanga viove ha mbandza, kaha liviukisilevio muihia; kaha ku lutue tunga ndzivo yove.” Aa mezi a lomboloka ngecize, ntsimbu kanda mu ci ambate, liviukisilenu mu ku pua cifua ca yala ua tonda Yehova.—Visimo 24:27.
15 Kaha mpuevo a tonda ku somboka na pande ku lihula nga na puho ha ku puisamo viteli via tondeka mu ku pua mpuevo ya muntu ni vene cisemi. Mbimbiliya ya tumbula naua viuma via vingi via hasa ku linga mpuevo a niunge mua cili yalieni na vana. (Visimo 31:10-31) Matangua ano, cingi ca vamala na vampuevo ve ku singanieka lika ha vika mukua ndzivo a ka va lingila. Vunoni Yehova ua tonda tu singanieke ha viuma vi tu hasa ku lingila mukua ndzivo yetu.
4-10 YA AGOSTO
VUPITE VUA MU LIZI LIA NJAMBI | VISIMO 25
Vimamuna via Mana vi tu Kuasa ku Pangesa Vuino Mezi
w15-E 12/15 19 ¶6-7
Pangesenu Vuino Mezi Enu
6 Mezi a ku Visimo 25:11, a muesa seho ya ku hangula ntsimbu ya cili ya ku handeka. Nguayo: “Lizi lia ku handeka ku ntsimbu yalio li nafu ngue vusuka vua olu mu lilonga lia palata.” Mansa ya olu ye ku soloka ku viuka, vunoni nga u ihaka ha lilonga lia palata ku vuaha cayo ce kulivuezelela cikuma. Na vuno vene, mu tue ku hangula ntsimbu ya cili ha ku handeka, mezi etu eku pua acili kaha eku kuata ku mutima. Vunoni vati tu hasa ku lingamo?
7 Mezi etu a hasa ku pua aze a tonda ku halakana muntu. Vunoni nga tu handeka mu ntsimbu ize kati ya cili, mezi etu ka a kala na seho. (Tandenu Visimo 15:23.) Caku muenako, mu Março ya 2011, limo lindunduma na mpuendza via solokele ku vucelo vua Japão via pihisile vimbonge via vingi. Kaha vantu va ku pua 15.000 va tsile. Mponde yaco ya kuatale na ku Vakaleho va Yehova va ku vihela viaco. Vutuhu ngoco, vamuanetu va pangesele vukovelelo vuose va lembezieke vantu va tsisile, mu ku pangesa Mbimbiliya. Vunoni vantu va ku vihela viaco va tsiliela mu budismo. Ngeci cingi ca vantu va tantekeya via vindende kutuala ha Mbimbiliya vakuavoco na vimo viahi. Vamuanetu va nongonuene ngecize mu nima ya mpuendza, kaya puile ntsimbu yacili ya ku handeka via lulavelelo lua cisangukilo na vantu va na tsisa. Vunoni va pangesele vuana vua ku handeka mu ku va kaniamesa na ku pangesa Mbimbiliya va lombonone omo lia vika viuma via ku pihia vie ku solokela vantu va cili.
w15-E 12/15 21 ¶15-16
Pangesenu Vuino Mezi Enu
15 Cifua ci tue ku handekelamo ca pua ca seho ngue vene viuma vi tue ku handeka. Yesu mua kele na ku handeka mu sinangonga, mu mbonge ya Nazaleta, vantu va kele na ku “likomokela mua kama omo lia mezi a cili akele na kutunda mu kanua kendi.” (Luka 4:22) Mezi acili eku kuata ku mutima kaha ka ekuzeyesa na umo uahi. Mua vusunga vantu ci ka va puila ca casi ku tava vitue ku handendeka nga tu handeka mezi acili. (Visi. 25:15) Tu hasa ku tambuluisa cifua ca kele na ku handekelamo Yesu, mu ku pua vakua ngozi na cilemo kaha na ku haka seho ku cifua ci ve ku livuilamo vantu. Mu ku mona kapandi ka ca lihakelele cize civunga ca kama mu ku mu halakana, Yesu ua va vuililile cikeketima kaha “ua sangumukile ku va longesa viuma via vingi.” (Mako 6:34) Ambe vene mu va mu tukile, Yesu ka handekele mezi a ku pihia.—1 Pet. 2:23.
16 Tua lema mua kama vavusamba na vavusoko vetu. Vutuhu ngoco, vintsimbu vimo tue ku handeka navo mu cifua ka ce ku muesa kasingimiko. Vunoni viuma via cifua eci vie ku soloka muomu halumo tue ku singanieka nguetu, mu ku linga tu va tantekeya laza ngeci tue ku handeka navo muose omuo mu tu tonda. Vunoni Yesu kati mukemuo mua fuile na vavusamba vendi. Caku muenako, vamo vavusamba vendi mu va licokotele ku tuala ha iya ua puile ua kama ha kati kavo, Yesu ua va sungamesele na cilemo. Kaha ua pangesele cimo cimueso ca vanike a hase ku kuasa vandongesi vendi linga va likele ku kala na visinganieka viaco. (Mako 9:33-37) Vakuluntu mu cikungulukilo navo va na pande ku tambuluisa lungano lua Yesu, mu ku hana cimamuna na cilemo.—Ngal. 6:1.
w95-E 4/1 17 ¶8
Cilemo na Vipanga Vietu via ku Viuka vi Hasa ku Sambukila Vakuetu
8 Omo tu pangela Njambi yetu, tu vose tu hasa ku sambuesa vakuetu ku hitila mu lungano luetu. Yesu ua sambuesele vantu va mu halakanene. Ua lemene mua kama cipanga ca ku ambulula na ku heta vene ha ku handeka nguendi, ngue via-kulia kuli ikeye. (Yoa. 4:34; Loma 11:13) Mua vusunga ndzolela ya cifua eci, ye ku sambukila. Vuno nenu mu hasa ku muesa ndzolela ya cifua eci mu cipanga ca ku ambulula ni? Mu cihela ca ku lihalesa, lekenuko vamuanoko mu cikungulukilo via mizimbu yenu ya cili mu ku ambulula. Kaha omo mu panga na vakuenu mu ku ambulula, talenu nga mu hasa ku vakuasa ku kala na cizango ca ku simutuila na vantu ku tuala ha Sakatanga uetu, Yehova.—Visimo 25:25.
Vupite vua mu Lutsilielo
it-2-E 399
Kukonkama
Muntu ua ku konkama ua kala na lutsilielo na ndzili ya ku hiana. Ke kuecelela viuma viose-ovio vi tanganese cifua cendi. Vunoni nga muntu ka puile ua kukonkama, a hasa ku likokela vusonde ngeci mua: ku sakalala, ku hona lutsilielo, lulavelelo na ku hona ku kala na ntsintsa. Kaha muntu uaco va mu lombonona vuino ku mukanda ua visimo. Nguayo: “Uze ka hasa ku sika cimbembesi cendi na fu ngue limbo lia ku sihuka kaha ka liesi na cimpaka.” (Visi. 25:28) Ngeci mukemuo muntu uaco ali mu vusonde vua ku kala na visinganieka vi ka mu lingisa ku linga viuma via ku vihia.
11-17 YA AGOSTO
VUPITE VUA MU LIZI LIA NJAMBI | VISIMO 26
Kati Muende na “Ciheve”
it-2-E 729 ¶6
Niondzi
Vintsimbu. Evi vintsimbu vivali ntondue na masika, mu cifuti ca cikulaheso, citava tu tumbule na vusunga vuose nguetu ya puile ntsimbu ya litanha na ntsimbu ya niondzi. (Setekesenu na Visa. 32:4; Muaso 2:11) Ha kati-kati ka Abril na Outubro, kua kele na ku noka niondzi ya indende cikuma, kaha ya puile ntsimbu ya ku tia. Visimo 26:1 ya lekesa ngecize, niondzi hamo lika na kutia ka vie ku litombola. (Setekesenu na Visi. 26:1; 1 Sam. 12:17-19) Ha ntsimbu iya pandele ku noka, niondzi ka ya kele na ku noka ntsimbu yose, kaha mu cihela ca ku noka lika kua kele naua litanha. Mu ku linga naua ye ku pua ntsimbu ya cisika, niondzi ye ku lingisa muntu azive lisika lia kama. (Ezela 10:9, 13) Ngeci mukemuo, ku kala na vuvando vua cili vua pua vua seho cikuma.—Isaya 4:6; 25:4; 32:2; Yombi 24:8.
w87-E 10/1 19 ¶12
Ku Sungamesa ce Kuima Vusuka vua Ciyulo
12 Vamo vantu ve ku tondeka ku vasungamesa ca ku hona ku vongoloka ngue muya muesa Visimo 26:3. Nguayo: “Likote ku kavalu, cikungu ca mu kanua ka cimulu, na citetele ku muongo ua viheve.” Vintsimbu vimo, Yehova ua kele na kuecelela vaIsaleli kulihisa vakevo vavene omo lia viuma via ku vihia vi va lingile. Ivene nguendi: “va vianene mezi a Njambi, na ku yengula zinguli zia Mukua ku Hiana viose: Ngoco vene ua kehesele mitima yavo na ku-fuitangana; Va uile, kaha mukua ku kuasa uahiko. Amba vuose va tambakanene Yehova ku lamba yavo Kaha ikeye ua vohielele ku tuyando tuavo.” (Visamo 107:11-13) Vamo viheve ve ku kala na mutima ua ukalu mu cifua ca ku linga, ambe ku vasungamesa ka ve ku tavako. Visimo 29:1 nguayo: “Uze va mu handekela zintsimbu zia zingi kaha a kankamesa ntsingo yeni va mu enieka vuasi-vuasi, na ha kuovokela hahi.”—Visimo 29:1.
it-2-E 191 ¶4
Vulema ni ku Venduka
Cisimo. Muangana ua mana Solomone, ua handekele nguendi: “Uze a tuma lizi ha livoko lia ciheve a vatula viliato vieni ivene, kaha a nua luvinda.” Muntu ue ku hana vipanga ku ciheve, ue ku tavesa va mu lingile cipanga ca vulema. Kaha evi vie ku lingisa linga vipanga viendi kati viye ku lutue na ku mu kokela visoti via kama.—Visi. 26:6
Vupite vua mu Lutsilielo
it-1-E 846
Ciheve
Ku “kuania ciheve ngue ku vuheve vuendi” mu cifua ca ku mu kumbulula ku mezi endi ka cesi na seho, ce ku lingisa muntu ku kala na vilinga via vuheve. Ngeci mukemuo, linga kati tu pue ngue viheve mukua visimo ua handekele nguendi: “Kati u kuanie ciheve ngue ku vuheve vuendi.” Kaha naua Visimo 26:4, 5, ya muesa ngecize tu hasa ku muesa mana mu ku kumbulula “ciheve [kuliya] na vuheve vueni,” na vutumbe vua ku hilula viali na ku handeka na ku visolola ku pua via vuheve. Na ku mu muesa ngecize visinganieka viendi ka via sungamene.
18-24 YA AGOSTO
VUPITE VUA MU LIZI LIA NJAMBI | VISIMO 27
Vukuasi vue Kuiza mu ku Kala na Vavusamba va Cili
Yehova ua Haka Seho Kuli Vakua ku Likehesa
12 Mukua ku likehesa ue ku muesa ku santsela ku cimamuna. Ca ku muenako: A ci singaniekenu nga muli na ku simutuila na vamo vamuanetu ku ndzivo ya Vuangana ni ku Ndzivo ya Viuano. Kaha umo uavo a mi sanena ku mukulo na ku mi leka ngueni kuli vimo via-ku-lia vi na mi sata ha mazo. Mua vusunga mu kevua ntsoni ya kama. Kaha mu ka santsela cikuma ku muntu na mi mamuna. Halumo mu hasa na ku singanieka nguenu, “nga ku na kele ueka na livangele ku nji mamuna, nga nji na vi tundisile laza.” Na vuno vene tua pande ku likehesa na ku santsela ku nkala muanetu a tu mamuna. Na ku mona muntu uaco ku pua kavusamba, kati citozi.—Tandenu Visimo 27:5, 6; Ngal. 4:16.
it-2-E 491 ¶3
Mukuenu, muntu u mua lihata nendi
Mukanda ua visimo ua mamuna ku tsiliela na ku kulahela muntu u tua lihata nendi kaha capua ku muesa ku tuntila kuli ikeye mu ntsimbu ya visoti. Visimo 27:10 nguayo: “Kavusamba kove, na kavusamba ka iso, kati u va seze; kaha kati u ye ku ndzivo ya muanoko ku litangua lia kayando kove: Mukuenu a li ha hiehi nove na hiana muanoko ua ku laako.” Hano mukua ku soneka, cimoneka ngecize ngue a tonda ku handeka nguendi, tua pande ku haka seho ya kama ku kavusamba ua ha mutima uze ua pua ngue kavusoko. Kaha tua pande ku tuntila kuli ikeye tu ka pinge vukuasi, mu cihela ca ku tuntila kuli kavusoko ngeci mua muanetu ua ku ntsitu nga ua kala ku laako. Muomu halumo ka livuahesele mu ku kuasa ha citanga caco vutuhu ua pua kavusoko ketu.
Vakuendze na Vahumbe—Mu Tonda Muono Uenu u ka Fue Vati ku Lutue?
7 Ku cihangula ca ku vihia ca Yoase, tu lilongesako ngecize tua pande ku hangula vavusamba vaze va tu kuasa ku linga via cili, kaha va lema Yehova na ku tonda ku muya ku mutima. Vunoni ka ca tondekele ku likuata lika vusamba na vakua citso cetu. Vulukenu ngecize Yoase ua likuatele vusamba na Yehoyanda, uze ua puile mukuluntu kuli ikeye. Ku tuala ha vavusamba venu, lihulenu nguenu: ‘Vuno ve ku nji kuasa ku kaniamesa lutsilielo luange muli Yehova ni? Ve ku nji kaniamesa ku yoya muaya vitume vieni ni? Ve ku handeka via Yehova na vilongesa vieni neni? Ve ku singimika vitue vieni ni? Vuno ve ku nji leka lika vize vi nji tonda, ni va kala na ku simpa ca ku nji sungamesa nga nja sevuka?’ (Visi. 27:5, 6, 17) Ku handeka vusunga, nga vavusamba venu ka va lemene Yehova, kaha vaali? Vunoni nga va mu lema, kaha kati mu va mbile kuti, muomu va mi kuasa.—Visi. 13:20.
Vupite vua mu Lutsilielo
Vulukenu Ngecize Yehova ua pua “Njambi ua Muono”
9 Ku mona Yehova kupua muntu mpundu, ci tu kuasa ku mona vieseko vietu mu njila ya cili. Vati omuo? Muomu tu pua na ku mona visoti vietu mu ku pua cimpande ca kama ca Yehova na Satana. Kaha Ndiavu ua muesa nguendi nga tu hita mu vieseko, tu likela ku lemesa Yehova. (Yombi 1:10, 11; tandenu Visimo 27:11.) Mu tue ku vula vieseko, tue ku muesa nguetu tua lema Yehova, kaha Ndiavu ua pua mukua makuli. Ca ku muenako, halumo vali na ku mi luisa ku nguvulu, ni muli na ku hita mu vitanga via ku honoua vimbongo, ni halumo vantu ka vesi na ku tava muzimbu ua cili ni muli na ku hita mu visoti vikuavo. Nga mukemuo, vulukenu ngecize vieseko viaco vi hasa ku mi hana vukovelelo vua ku vuisa Yehova ndzolela. Cikuavo naua, Yehova ka ka tavesa tu hite mu vieseko ka tu hasa ku vula. (1 Kol. 10:13) Vunoni a ka tu hana ngolo ya ku kolesa.
25-31 YA AGOSTO
VUPITE VUA MU LIZI LIA NJAMBI | VISIMO 28
Ku Litepa ca Kala ha Mukua Vipi na Mukua Vuviuke
w93-E 5/15 26 ¶2
Vuno Mue ku Pangela Yehova na Mutima Uose Ni?
“Vakua vuviuke va simpa ngue ndumba.” (Visimo 28:1) Vakevo ve ku muesa lutsilielo na ku kulahela mu Lizi lia Njambi na ku pangela Yehova mu vutuntu ambe mu vintsimbu via vikalu.
it-2-E 1139 ¶3
Ku Muesa Mangana
Vaze ve ku Litenga Kuli Njambi. Vantu ve ku tanguka na kulinga via vipi ve ku putuka ku sembulula Njambi nga va linga vihangula. (Yombi 34:27) Muntu ua cifua eci ue ku tavesa mutima uendi u mu hungumune ku vupi na ku zimbalesa liano. (Visa. 36:1-4) Vutuhu ikeye ue ku handeka nguendi ue ku lemesa Njambi, vunoni ue ku tuameka vizango via vantu kati via Njambi. (Isaya 29:13, 14) Kaha ue ku mona vilinga viendi via vipi kupua via “sanda” (Visi. 10:23) Ngeci ue ku pihilila, kupua cikenia, ku kala na visinganieka via vuheve mu cifua ca ku heta ha ku singanieka nguendi Njambi keku mona vililnga viendi via vipi. (Visa 94:4-10; Isa 29:15, 16; Yel 10:21. 10:21) Ku hitila mu vilinga na mu mezi endi ue ku handeka nguendi Yehova uahiko (Visa 14:1-3) Kaha keku vuluka Njambi. Mu ku linga keku kava vitume via ku lela ikeye ue ku hengesa viose, keku mona viuma mu njila yacili, keku hilula ha viose vitondeka kaha keku linga vihangula via cili.—Visi 28:5.
it-1-E 1211 ¶4
Vuoloke
Vuoloke ka vue kuiza ku ndzili ya muntu, vunoni omo lia lutsilielo lua ku kaniama na ku kulahela muli Yehova na mu ngolo yendi (Visa 25:21) Njambi ua kulahesa nguendi a ka pua “ntelo” na “cimpaka” mu ku niunga njila ya vaze vose ve kuenda mu vuoloke (Visi 2:6-8; 10:29; Visa 41:12) Kapandi ka mue ku lihakela mu ku ononoka Yehova, keku neha vivezikiso via vingi mu muono uenu, na ku mi kuasa ku tualelelaho ku kakatela kuli ikeye ca ku hona ku tanguka (Visa 26:1-3; Visi 11:5; 28:18) Vutuhu Yombi ua muene ngecize mukua vuviuke a hasa kuyanda omo lia mukua vipi kaha a hasa kutsa hamolika na vakua vipi vunoni Yehova ua tu kulahesa na vusunga vuose nguendi, kaka suvu mukua vuviuke kaha a ka mu lunguisa ku miaka yose, a ka yoya mu ciyulo na ku viukilila. (Yom 9:20-22; Visa 37:18, 19, 37; 84:11; Visi 28:10) Ngue via solokelele Yombi, cuma ce kulingisa muntu a pue ua seho kaha a fuile kasingimiko capua kupua mukua vuoloke, kati vupite vuendi. (Visi 19:1; 28:6) Ngeci vana va kala na visemi va kala na cifua caco, vapua va ku vezika. (Visi 20:7) Vakevo ve ku kala na civezikiso ca ku kava lungano lua cili lu va seza visemi kaha na kuli kuua mutamba ua kasingimiko na lizina lia cili li va linga visemi.
Vupite vua mu Lutsilielo
Tualelelenuho ku Vingila Linga Kati mu Uile mu Vieseko
19 Vika tu hasa ku linga mangana vuzeye vuetu kati vu tu lingise ku vulumuna? Tua pande ku linga via tu sikile Yesu nguendi: “Vingilenu,” ni nguetu ku liniunga ku vieseko. Ambe nga mu livua nguenu mua kaniama, tualelelenuho ku liniunga ku viuma vi hasa ku mi lingisa ku hita mu vieseko. (1 Kol. 10:12) Ngeci mukemuo, tualelelenuho ku linga viuma via mi kuasele kulua na vuzeye vuenu. Visimo 28:14 nguayo: “Ua vezika muntu uze [ue ku vingila] ntsimbu yose.”—2 Pet. 3:14.