MUSOLO WO KUJIJA 22
NGOMA 15 Kusimba Mwana wo Dangwe ra Jehovha!
Zina la Jehovha Rinobhuyenyi Kuna Jesu
‘Ndakazivisa zina renyu kavari uye ndisarizivisa.’—JOHANI 17:26.
ZVATISAJIJA
Jesu wakaitisa kudini kuti zina la Jehovha rizivikanwe uye wakaricenesesa kudini no kurijivirira.
1-2. (a) Jesu wakaitenyi pa usiku asati a ulaiwa? (b) Muvhunjo jipi jinozojijwa mu cijijo cino?
PAINGA pakati po usiku wo mucina 14 ya Nisani, 33 Kristu aviya uye Jesu wainga aaphedo no kutengeswa, kutongwa, kusungwa, kutambujwa uye kuuraiwa. Iyena wainga apeja kurhya kunokosha mu nyumba yo pamusolo-solo no vapostori vake vakagondeka. Pasure po kurhya uku, Jesu wakabhuya magama manganani okuvangisa no kueneka. Pasure po cinguva cidoko, vandhu vese vasati vabuda mumba umu, Jesu wakaema padoko oita mukumbiro unokosha maningi. Mu postori Johani wakanyora masoko umukumbiro uwu, angawanika pana Johani citsauko 17.
2 Mukumbiro wa Jesu unokhombijenyi ngo zvaimunesa panguva yonayo? Mukumbiro uwu unokhombijisa kudini caikosha mukati mo basa lake lo kuparijira paainga ari pasi pano? Ngatimbobhuya ngo mupingulo jo muvhunjo iji.
“NDAKAVAITA KUTI VAZIVE ZINA RENYU”
3. Jesu wakabhuyenyi ngozvo zina la Jehovha uye waida kubhuyenyi? (Johani 17:6, 26)
3 Mu mukumbiro wake Jesu wakati: ‘Inini ndakaita kuti vazive zina renyu.’ Nzvakadi, iyena wakabhuya kaviri kese kuti wakazivisa zina la Jehovha kuvajiji vake. (Verenganyi Johani 17:6, 26.) Iyena waida kubhuyenyi? Kubhuya kuti iyena wakavazivisa zina lavainga vasingazivi? Vajiji va Jesu vainga Vajudha, ngo kudalo vaitoziva zina la Jehovha Mwari kare. Zina iri, rinowanika ko mamiriyau akawanda mu zvinyorwa zvo ciHebheru. Jesu wainga asingabhui ngo pamusolo po zina la Mwari kamare, asi waibhuya zvaraiemerera. Jesu wakazivisa zvinoreva zina la Jehovha zvinobatanija zvinangwa zvake, mabasa ake uye no maitiro ngo njira yokuti apana na umwe waizozvikwanisa.
4-5. (a) Tingazviezanisisa kudini kuti zvinobhuyenyi kuziva zina lo mundhu? (b) Mu njira ipi vajiji va Jesu vakaguma pakuziva zina la Jehovha?
4 Inga muezaniso, ambolangariranyi kuti umwe wo vakuru vo ungano yenyu unozwi Dhavhidhi ndi medhiko wokuita operasau. Imwimwi munoziva hama iyi ko makore akawanda. Asi zuva rimweni munonga mesida kulapwa ngo kukasika. Yemwi ngo kukasika munotorwa kuti muende ku cipitari kunoshanda hama iyi uye hama iyi inoshandisa uzivi wayo no zvainoziva mubasa lo kulapa kuti iponese upenyu wenyu. Zina lo hama iyi raanorevo yakakura kamuri here? Zvakajeka kuti hina! Ivona avasiripizve mukuru basi wamunoziva, ivona vaamulapizve wakaponesa upenyu wenyu.
5 Mu njira yakatojana, vajiji va Jesu vainga vooriziva zina la Jehovha. Zina iri lakava no revo huru kavari ngo muviyo wo basa lo kuparijira la Jesu. Ngenyi tingabhuya izvi? Jesu waikhombija undhu wa Baba vake pa zvese zvaiita no zvaibhuya. Ngo kudalo, vajiji vake “vakaziva” zvakanaka ngo zva Jehovha ngo kuzwa majijisire aiita Jesu uye no kuwona mabatire aiita vandhu.—Johani 14:9; 17:3.
“ZINA RENYU LAMAKANDIPA”
6. Mu niira ipi Jehovha wakapa Jesu zina lake? (Johani 17:11, 12)
6 Mu mukumbiro wake, Jesu wakaitira mukumbiro vajiji vake esiti: ‘Vatungamirirenyi ngo ndava yo zina renyu lo makandipa.’ (Verenganyi Johani 17:11, 12.) Izvi zvinobhuya here kuti Jesu zvino waakuzivikanwa inga ndi Jehovha? Haiwa. Ambowonanyi kuti mu mukumbiro wa Jesu wakabhuya ngozvo zina la Jehovha kuti “zina renyu kamare.” Ngo masoko aya zina la Jehovha arito kuva zina la Jesu pacake. Jesu waida kubhuyenyi paakabhuya kuti zina la Mwari wainga aripuwa? Pakutanga Jesu wainga ari muemereri wa Mwari uye ndhumwa. Iyena wakaviya ngo zina laaBake uye wakaita mabasa ano simba ngo ndava yo zina iri. (Johani 5:43; 10:25) Kunja ka izvi zina la Jesu rinobhuya kuti: “Jehovha muponesi.” Hina, zina la Mwari lainga lakabatana maningi no zina la Jesu.
7. Ezanisiranyi kuti Jesu waizovereketesa kudini ngo zina la Jehovha.
7 Inga muezaniso, ngo ndava yokuti muemereri anoemerera mutongi angabhuya ngo zina lo mutongi. Ngo kudalo masoko omuemereri anosimba ngo kuti ngoomutongi. Mu njira yakatojana, Jesu wakaemerera Jehovha obhuya no vandhu ngo zina lake.—Mateu 21:9; Ruka 13:35.
8. Zina la Jehovha lainga lakadini ‘kuna’ Jesu asati aviya panyika pano? (Ekisodho 23:20, 21)
8 Mu basa leke inga soko, Jesu wakashanda inga muemereri wa Jehovha ngo kupa masoko ondhungamiriro ku vana vamweni vo kumweya va Mwari pamwepo no vandhu. (Johani 1:1-3) Jesu ingadai wainga ngirosi iya yakatumwa ndi Jehovha kuti itungamirire vaIziraeri mu nguva yo Ekisodho. Paakavhunja vaIziraeri kuti vayaeye ngirisi iyi Jehovha wakati: ‘Ngokuti zina langu riri maari.’a (Verenganyi Ekisodho 23:20, 21.) Zina la Jehovha lainga ‘muna’ Jesu pakuti iyena waiemerera Jehovha uye iyena waitsigira no kucenesa zina la Baba vake.
“BABA KUJANYI ZINA RENYU”
9. Zina la Jehovha raikosha kudini kuna Jesu? Sananguranyi.
9 Inga zvatapeja kubhuisana, kunyange Jesu asati aviya pasi pano Zina la Jehovha lainga resindokosha maningi kaari. Azvishamaisi kuziva kuti zina la Jehovha lainga lakabatana mu zviro zvese zvaaizwa ndi Jesu paainga ari pasi pano! Mu kupejisira mo basa lake lo kuparijira Jesu wakati: ‘Baba kujanyi zina renyu.’ Ngo kukasika aBake vakadavira ngo izwi guru resivha kudenga vesiti: ‘Ndakarikuja uye ndinozorikujazve.’—Johani 12:28.
10-11. (a) Jesu wakakujisa kudini zina la Jehovha? (Wonanyi foto.) (b) Ngenyi zina la Jehovha rinodikana kuceneswa no kupuwa nduma?
10 Jesu wakakujawo zina laaBake. Wakazviitisa kudini? Maitire aakazviita ndiwona ngookuzivisa mavara anoshamaisa aaBake no zviito kuvamweni. Ngo kudalo, wainyanya kubatanijwa mu kukuja zina iri. Zina la Jehovha laidikana kuceneswa uye nduma yake yaidikana kuziviswa.b Jesu wakakhombija kuti izvi zvaikosha zvakadini paakajijisa vajiji vake mukumbiro, ngo muezaniso. Iyena wakati: “Baba vedu vari kudenga zina renyu ngariceneswe.”—Mateu 6:9.
11 Zina la Jehovha ngenyi rinodikana kuceneswa uye kupuwa nduma? Ngokuti mu munda wo Edheni Sathana Dhiyabhu wakashora uye wasvipisa zina la Jehovha Mwari. Sathana wakati Jehovha munyepi uye wainga esiita kuti Adhamu na Evha vasawana zviro zvakanaka. (Gen. 3:1-5) Sathana wakaita kuti tizwisise kuti maitire anoita Jehovha zviro aato kururama. Manyepo a Sathana akarwisa kamare nduma ya Jehovha kana kuti zina lake. Mu kuhamba ko nguva mu mazuva aJobho, Sathana wakabhuya kuti vaya vanonamata Jehovha vakaita kudalo ngokuti zviripo zvavanoda kaari. Munyepi uwu wakanyepazve kuti apana mundhu ari wese anganamata Jehovha zvakakwana oenderera mberi esimunamata kuveni uri kusangana no matambujiko. (Job. 1:9-11; 2:4) Zvainga zvesida nguva kuti tiwone kuti ndiyani wainga munyepi Jehovha kana Sathana.
Jesu wakajijisa vajiji vake kukosha ko kucenesa zina la Mwari (Wonanyi ndima 10)
“ININI NDINOPIRA UPENYU WANGU”
12. Jesu wainga akanasiririka kuitenyi ngo rudo wake pazina la Jehovha?
12 Ngo ndava yo rudo wake kuna Jehovha, Jesu waida kuita zvese zvaanokona kuti acenese zina la Jehovha no kupa nduma kaari. Jesu wakati: ‘Ndinopira upenyu wangu’. (Johani 10:17, 18) Hina, iyena wainga akatonasiririka kuti afire zina la Jehovha.c Vandhu vaviri vokutanga vainga vasina cishaishi Adhamu na Evha vakafuratira Jehovha uye voenda ku divi la Sathana. Mu kusiyana Jesu wainga akanasiririka kuti aviye pasi pano uye kuti akhombije kuti unoda Jehovha. Jesu wakaita izvi ngo kurarama upenyu wakakwana wokugondeka. (VaH. 4:15; 5:7-10) Iyena wakaemerera Jehovha ngo njira yakakwana, onasa kuthemba Jehovha mbhera pakufa kake pa danda lo kutambujikira ngo njira iyi iyena wakakhombija rudo wake kuna Jehovha uye no kuno zina lake.—VaH. 12:2.
13. Ngenyi Jesu wainga akacunga kuti akhombije kuti Sathana munyepi? (Wonanyi foto.)
13 Pasina kukaya-kaya Jesu wakakhombija kuti Sathana ndiyena munyepi haiwa Jehovha! (Johani 8:44) Jesu unoziva Jehovha zvakakwana kupinda mundhu ari wese. Kudai painga no cokwadi ciri cese pamanyepo a Sathana ngo pamusolo pa Jehovha, Jesu angadai esizviziva. Asi Jesu wakalamba akavanga pakujivirira nduma ya Jehovha no zina lake. Kunyange zvaiwoneka inga Jehovha amusiya, Jesu wakakhombija kuti wainga akansiririka kufa pano kusiya kutsigira Baba vake vano rudo.—Mateu 27:46.d
Upenyu wa Jesu wakabudisa pambhene kuti Sathana ndiyena munyepi haiwa Jehovha! (Wonanyi ndima 13)
“YENI . . . NDAKAPEJA BASA LAMAKANDIPA”
14. Jehovha wakakomboreresa kudini kugondeka ka Jesu?
14 Mukumbiro waakaita no usiku asati afa, Jesu ingadai akabhuya kuti: ‘Ndapeja . . . Basa lamakandivhunja kuti ndiite.’ Iyena waithemba kuti Jehovha waizomupa mubairo ngo kugondeka kake. (Johani 17:4, 5) Kuthemba ka Jesu kuna Baba vake akuto kucinja. Jehovha aato kutendera kuti Jesu agare muguva. (Mabasa 2:23, 24) Jehovha wakamusa Jesu uye wakamupa cigaro co pamuso-solo kudenga. (VaF. 2:8, 9) Pa kupejisira Jesu wakatanga kutonga inga Mambo wo Umambo wa Mwari. Zvicinyi zvinozoizwa ngo Umambo uwu? Pa divi lo cipiri pa mukumbiro wo kuezanisira Jesu wakati: ‘Umambo wenyu ngauviye. Kuda kenyu nga kuitikewo pasi pano inga kudenga.’—Mateu 6:10.
15. Zvicinyi zvinozoizwazve ndi Jesu?
15 Ngo kukasika munguva inotevera, Jesu unozorwa no vavengi va Mwari opalaja vakashata vese pa Armagedhoni. (Zvak. 16:14, 16; 19:11-16) Pasure pazvo iyena unozokanda Sathana “mu gomba” lakajika maningi pamugariro wokuti apana caanokona kuita zvakatojana no rufu. (Zvak. 20:1-3) Jesu unozohwirija runyararo uye kukwana ko vandhu mukati mo kutonga kake ko Makore Ano Ciuru. Iyena unozomusa vakafa. Unozoitazve kuti nyika ive paradhiso. Cinangwa ca Jehovha cinozozajika!—Zvak. 21:1-4.
16. Zvicinyi zvinozoizwa mbhera mukupera ko kutonga ko Makore Ano Ciuru?
16 Icinyi catinosoterera kuti ciitike mukupera ko kutonga ko Makore Ano Ciuru? Cishaishi no kutama kukwana ko vandhu zvinozopera. Jinja lo vandhu avazodikani kukumbira ruregerero lo zvishaishi zviri zvese vakacijikira pa muripo uye avazodi muemereri kana mupristi. Mu kupejisira “muvengi mukuru rufu wa Adhamu rinozopalajwa.” Makuva anozonga asina ciro. Vakafa vanozomuswazve kuti vararame. Vandhu vese munyika vanonga vasina cishaishi.—1 VaK. 15:25, 26.
17-18. (a) Zvicinyi zvinozoitika mukupera kokutonga ko makore ano curu? (b) Jesu unozoitenyi ikakwana nguva yo kupera ko kutonga kake? (1 VaKorinde 15:24, 28) (Wonanyi foto.)
17 Zvicinyi zvinozoitika mukupera ko kutonga ko Makore Ano Ciuru? Pa nguva iyi zviro zvinokosha maningi zvinozoitika. Kuphikiza kunobatanija pakucenesa zina la Jehovha kunozopera. Kuitisa kudini? Mu munda wo Edheni Sathana wakavhunja Jehovha kuti munyepi uye iyena aatongi vandhu ngo rudo. Kuvha pa nguva yonayo, zina lake rinozoceneswa kakawanda nga vaya vanomukuja uye vanomureremeja. Asi mukupera kokutonga ko makore ano curu, nduma yake Inozobuda pa mbhene kuti Jehovha ndi Baba vo kudenga vano rudo.
18 Manyepo a Sathana anozobudiswa pambhene ko kutanga no kokupejisira. Jesu unozoitenyi kudai makore aakavhunjwa kuti atonge akakwana? Unozotevejera muezaniso wa Sathana uye kupandukira Jehovha here? Haiwa! (Verenganyi 1 VaKorinde 15:24, 28.) Jesu unozohwirija Umambo kuna Baba vake. Iyena unozozvikanda pasi po Umambo wa Jehovha. Hina mukusiyana na sathana, Jesu unotendera kusiya ciri cese ngo ndava yo kuda Jehovha.
Jesu ngo kuzvipira unozohwirija Umambo wa Jehovha mukupera ko kutonga kake mu Makore Ano Ciuru (Wonanyi ndima 18)
19. Zina la Jehovha rinobhuyenyi kuna Jesu?
19 Azvishamaisi kuti Jehovha wainga esida kupa Jesu zina lake! Jesu wakatenda kuva muemereri wakakwana wa baba vake. Hino zina la Jehovha rinobhuyenyi kuna Jesu? Rinobhuya zvese kaari. Iyena waitodisisa kufira zina iri uye unotoda kuhwirija zviri zvese kuna Baba vake pakupera kokutonga ko Makore Ano Ciuru. Tingatevejeresa kudini muezaniso wa Jesu? Tinozozwa mupingulo wo muvhunjo uwu mu cijijo cinotevera.
NGOMA 16 Simbanyi Jehovha Ngo Mwana wake wo Dangwe
a Nguva jimweni, ngirosi jakaemererawo Jehovha pa jaibhuya masoko mu zina lake. Ndiyo ndava nguva jimweni mu Bhaibheri ngirosi jinobhuiwa kuti Jehovha. (Gen. 18:1-33) Kunyange kuti zvinyorwa zvinobhuya kuti Mosi wakaashira mutemo wa Jehovha, mavhesi amweni anobhuya kuti Jehovha wakashandisa ngirosi kuti aviise mutemo uwu ngo zina lake.— Rev. 27:34; Mabasa 7:38, 53; VaG. 3:19; VaH. 2:2-4.
b MASOKO AKASANANGURWA: Gama lokuti”: “Kucenesa” zvinobhuya kukuja kulangarira inga vapsene kana kuti kukuja. Gama lokuti: “Kukhombija” Zvinobhuya kusunungura nduma yo mudhu wakanyeperwa kana kuti kusunungura mundhu enawo kuti aana ndava yo kunyeperwa.
c Rufu la Jesu lakaita kuti vandhu vawane upenyu usingaperi.
d Wonanyi “Muvhunjo Jinovha Kuvaverengi” mu Murindiri wa Abril wo 2021, pheji 30-31.