Tenderanyi Ruregerero ra Jehovha

1-2. Tinojizwa kudini patinozwa kuti Jehovha waregerera zvishaishi zvedu? (Wonanyi pakhavha.)

MAMBO Dhavhidhi wainasa kuziva mawajire anoita zvishaishi zvo kare. (Ps. 40:12; 51:3; masoko okutanga) Iyena wakaita zvishaishi zvakakura maningi mu upenyu wake. Ngo kudaro, iyena wakakhombija kukhauya ko cokwadi uye Jehovha wakamuregerera. (2 Sam. 12:13) Inga muviyo, Dhavhidhi wakadakara maningi paakazwisisa kuti Jehovha wainga amuregerera. — Ps. 32:1.

² Inga ndi Dhavhidhi, isusu tingajizwa takadakara paya patinozwisisa kuti Jehovha watikhombijira unyasha uye kuti watiregerera zvishaishi zvedu. Zvinovangisa kuziva kuti Jehovha unoda kuregerera zvishaishi zvedu kunyange zvakakura, kudai tikakhauya ngo mwoyo wese ku zvishaishi zvedu uye toita zvese zvatinokona kuti tisaphindazve kuita cishaishico! (Zvi. 28:13; Mabasa 26:20; 1 Joh. 1:9) Uye zvinodakaja kuziva kuti Jehovha unotiregerera kamare, zvoita inga kuti atito kumboita cishaishi!—Ezek. 33:16.

3-4. Hanzvaji imweni, yakajizwa kudini poyakapera kubhabhatijwa? Tinozowonenyi mu cijijo cino?

³ Nguva jimweni, vamweni vanowona zvesinesa kutendera ruregerero ra Jehovha. Wonanyi zvakaitika na Jenifa wakarerehwa mu cokwadi. Iyena wakajijiswa ngo vabereki vake ngo pamusoro pa Jehovha. Asi iyena painga esikura, wakatanga kuita zviro zvakashata uye waivigira vabereki vake zvaaitari. Ngo kuhamba ko makore, Iyena wakahwirira kuna Jehovha uye wakava akanasiririka kuti abhabhatijwe. Iyena wakati: “Muupenyu wangu, nguva jese inini ndaita zvo uhure, ndainga cidhakwa, ndainga ndiri mundhu waikasika kunyangajwa uye ndaidisa maningi mare. Mumurangariro mangu, inini ndaizviziva kuti Bhaibheri rinobhuya kuti ngo ndava yo mupiro wa Jesu Kristu, waizoita kuti ndiregererwe zvishishi zvangu. Asi kunyange, ndainga ndakhauya uye kukumbira Jehovha kuti andiregerere, inini andisaizvithemba kamare kuti iyena wainga andiregerera.”

⁴ Zvingaita kuti imwimwi, muri kurangarira kuti Jehovha usakanyangajwa ngo ndava yozvishaishi zvamakaita kare. Inga ndi Dhavhidhi, Jehovha unoda kuti tithembe unyasha wake. Mucijijo cino, tinozowona kuti ngenyi tesidikana kutendera ruregerero ra Jehovha uye kuti zvicinyi zvingatibesa kuti tiite izvi.

NGENYI TESIDIKANA KUTENDERA RUREGERERO RA JEHOVHA?

5. Sathana unoda kuti tithembenyi? Ipanyi muezaniso.

⁵ Patinotendera ruregerero ra Jehovha, zvingatibesa kuti tisawira mu murawu ya Sathana. Rangariranyi kuti Sathana, uri kuita zvese zvaanokona kuti atiyemese kushandira Jehovha. Inga muezaniso, Sathana unoeja kuita kuti isusu tithembe kuti Jehovha aazotiregereri zvishaishi zvedu. Wonanyi zvakaitika no mwanarume woku Korinde, wakaita zvohure uye ovhiswa muungano. (1 VaK. 5:1, 5, 13) Ngo kuhamba ko nguva, iyena wakakhauya, asi Sathana waida kuti hama jo mu ungano jirambe kumuregerera uye kumuashirazve mu ungano. Panguva yonayo, Sathana waida kuti mwanarume uwu wainga akhauya, ajizwe inga asito kuregererwa ogara akanyangajwa mbhera kutosiya kushandira Jehovha. Izvi ndizvona zvinodiwa ndi Sathana nyamasi uno, iyena unoda kuti tijizwe kuti Jehovha aazotiregereri zvishaishi zvedu kuti tisiye kumushandira. Asi, “isusu tinociziva cinangwa cake.”—2 VaK. 2:5-11.

6. Tingaitisa kudini kuti tijizwe takarerukihwa pa mutwaro wo kujipa ndava?

⁶ Kudai tikathemba kuti Jehovha watiregerera tinozovazve no mudakaro. Tingaita cishaishi, icokwadi kuti tinojipa ndava. (Ps. 51:17) Izvi zviro zvakanaka. Hana yedu ingatibesa kuti tiite cinjo jinodiwa uye kuita zviro zvakanaka. (2 VaK. 7:10, 11) Ngo kudaro, tikabatikana maningi pa zvishaishi zvokare pasure po kukhauya, tingaejwa kuti tisiye kushandira Jehovha. Patinotendera ruregerero ra Jehovha, tingasiya kuzvipa ndava uye tinozoshandira Jehovha takadakara uye no hana yakacena. (VaK. 1:10, 11; 2 Tim. 1:3) Asi, zvicinyi zvatingaita kuti tithembe kuti Jehovha watiregerera?

ZVICINYI ZVINGATIBESA KUTI TITENDERE RUREGERERO RA JEHOVHA?

7-8. Jehovha wakajikhombijisa kudini kuna Mosi, uye izvi zvinotithembesenyi? (Ekisodho 34:6, 7)

⁷ Rangariranyi kuti Jehovha wakabhuyenyi ngo pamusoro pake. Inga muezaniso, wonanyi zvakabhuya Jehovha kuna Mosi pa Dundhu ro Sinai.a (Verenganyi Ekisodho 34:6, 7.) Mu zvese zvaidikana kubhuiwa ndi Jehovha ngo pamusoro po mugariro no maitire ake, “Iyena wakawona zviri nane kuzvikhombija inga Mwari anounyasha uye usizi.” Kubhuya kuti Mwari wakadai, ungaramba kamare kuregerera mushandiri wake anonga akhauya pa cishaishi cake here? Haiwa! Kudai Jehovha angatama kuregerera mundhu uwu, iyena waizova akacunga asina unyasha, Jehovha aazomboiti zvakadai.

⁸ Tingava no cokwadi cokuti, Jehovha paanobhuya kuti ndi Mwari ano unyasha unonga esibhuya cokwadi, iyena azombonyepi. (Ps. 31:5) Ngo kudaro, tinodikana kuthemba masoko aanobhuya. Kudai imwimwi zviri kunesa kusiya kujipa ndava yo zvamakashaisha kare, jivhunjisenyi kudai: ‘Ndinothemba kamare kuti Jehovha ndi Mwari uno unyasha uye uno usizi uye kuti aazomborambi kuregerera mushaishi unonga akhauya here? Asi inini andidikani kutendera kuti iyena wakandiregerera here?’

9. Zvinoda kubhuyenyi kuti zvishaishi zvedu zvakaregererwa? (Pisarema 32:5)

⁹ Rangariranyi kuti Jehovha wakafemera vainyora Bhaibheri kuti vanyore ngo pamusoro po ruregerero. Inga muezaniso, wonanyi zvakanyorwa ngo munyori wo Pisarema Dhavhidhi, wakatsanangura ngo pamusoro po kuregerera ka Jehovha. (Verenganyi Pisarema 32:5.) Dhavhidhi wakati: “Imwimwi makandiregerera zvishaishi zvangu”. Mucihebheru gama rokuti “kuregerera” rinoda kubhuya kuti “kumusa”, “kuvhisa, kana kuti” “Kutwara.” Paakaregerera Dhavidhi, Jehovha wakaita inga akatwara zvishaishi zvake kuyenda nazvo ndhambo. Dhavhidhi wakarerukirwa ngo zvishaishi zvaainga akatwara. (Ps. 32:2-4) Isusu tingajizwawo takarerukirwa inga ndi Dhavhidhi. Patinokhauya ngo mwoyo wese, atidikani kuramba takatwara mutwaro unorema ngo kuramba tesijipa ndava ngo zvishaishi zvatakaita kare, ngo kuti Jehovha wakazvivhisa katiri.

10-11. Masoko okuti “wakanasirira kuregerera” anotiwonesenyi ngo pamusoro pa Jehovha? (Pisarema 86:5)

¹⁰ Verenganyi Pisarema 86:5. Apa Dhavhidhi wakabhuya kuti Jehovha “wakanasiririka kuti aregerere.” Bhuku rimweni rinobhuya ngozvo Bhaibheri, resibhuya ngo pamusoro pa Jehovha rinoti: “Iyena muregereri ici cibarihwe cake.” Ngenyi tesiti Jehovha cibarihwe cake co kuregerera? Padivi rinotevera rovhesi rinotsanangura kuti: “Rudo wenyu usikacinji, wakakura maningi ku vandhu vese vaya vanodainja zina renyu.” Inga zvatakawona mucijijo cakapera, rudo risingacinji rinoita kuti Jehovha ade maningi vanamati vake vakagondeka. Esindundirwa ngo rudo rake risingacinji, iyena “unoregerera mukuperera zvishaishi zvese zvo vandhu vakhauya”. (Isa. 55:7) Kudai imwimwi mesiwona kuti zvinonesa kutendera ruregerero ra Jehovha, mungajivhujisa kuti: ‘Ndinothemba kuti Jehovha unoregerera here? Inini andisaidikana kutendera kuti Jehovha wandiregerera paya pondaideketera kaari ndesikumbira kuzwihwa unyasha?’

¹¹ Tinowana nyarajo ngo kuzwisisa kuti Jehovha unozwisisa kubahwa kedu no cishaishi. (Ps. 139:1, 2) Izvi zvinonasa kujekeswa pa bhuku ra pisarema ya Dhavhidhi, rinotibesazve kutendera ruregerero ra Jehovha.

JEHOVHA UNOEJURIRENYI NGO PAMUSORO PEDU

12-13. Mukuzwirana na Pisarema 103:14, Jehovha unorangarirenyi ngo pamusoro pedu, uye izvi zvinoita kuti tiitenyi?

¹² Verenganyi Pisarema 103:14. Dhavhidhi unobhuya kuti Jehovha “unoejurira kuti isusu tiri bukuta.” Ngo masoko aya Dhavhidhi, wakatsanangura zvikonzero zvokuti Jehovha wakanasiririka kuti aregerere zvishaishi zvinonga zvakaizwa ngo vanamati vake vanonga vakhauya: Iyena nguva yese wakanasiririka kuti azwisise cibarihwe cedu co cishaishi. Kuti tinase kuzwisisa izvi ngatiwonezve masoko amweni a Dhavhidhi.

¹³ Dhavhidhi wakabhuya kuti Jehovha “unonasa kuziva masikirwe atakaizwa.” Iyena wakasika Adhamu ngo “bukuta ro mavhu”. Ngo kudaro, unoziva masikirwe atakaizwa uye zvatinoda. Inga muezaniso, tinoda zvokuha, kuvata uye kufema, kunyange kuti vandhu vasina cishaishi vanodawo zviro izvi. (Gen. 2:7) Asi, Adhamu na Evha povakashaisha, vandhu vakaita bukuta ngo njira imweni. Inga vana vavo, takagara utaka wo cishaishi cinoita kuti tiite zviro zvakashata. Jehovha aazivi basi kuti tino zvishaishi, Dhavhidhi unobhuya ngo pamusoro pake kuti “unozviejurira” kuti tino cishaishi, ngo magama amweni, iyena waida kubhuya kuti Jehovha unonasa kuzviziva kuti tiri vandhu vanoshaisha. Ngo kudaro, Jehovha unozviziva kuti nguva jimweni tinoshaisha, asi paanotiwona kuti takhauya iyena unotikhombijira unyasha uye kutiregerera.—Ps. 78:38, 39.

14. (a) Dhavhidhi wakatsanangurisa kudini kuregerera ka Jehovha? (Pisarema 103:12) (b) Muezaniso wa Dhavhidhi unokhombijisa kudini kukwana kokuregerera ka Jehovha? (Wonanyi bhokiso rinoti: “Jehovha Unoitisa Kudini Kuti Aregerere Zvishaishi Zvedu no Kuzvikanganwa.”)

¹⁴ Zvicinyi zvingatibesa kuti tive no cokwadi cokuti Jehovha watiregerera? (Verenganyi Pisarema 103:12.) Dhavhidhi wakabhuya kuti Jehovha paanotiregerera, “iyena unokanda ndhambo na isusu zvishaishi zvedu inga kumavhazuva kuri ndhambo no kumavirira.” Kumavhazuva no kumavirira indhambo no ndhambo zvokuti azvikwanisi kubatana. Izvi zvinoda kubhuenyi ngo pamusoro po zvishaishi zvatakaregererwa ndi Jehovha? Bhuku rimweni rakatsanangura vhesi iyi kuti: Mwari unotora zvishaishi zvedu ozvikanda ndhambo na isusu. Izvi zvakatojana no kunuha ko ciro zvokuti zvingapera azvizozikizve kunuha, “ngo kudaro, tingava no cokwadi cokuti iyena aazombozvirangaririzve kana kutieujira ngo pamusoro pazvo.” Nguva jimweni kunuha kozvokuha kana kuti zviro zvimweni kungatiita kuti tirangarire zviro zvimweni zvakadarika. Asi, Jehovha paanotiregerera cishaishi cedu, aazorangaririzve ngo pamusoro pazvo, kana kutipumbha no kutipanica ngo ndava yazvo.—Ezek. 18:21, 22; Mabasa 3:19.

15. Tingaitenyi kudai tesigara tesijipa ndava ngo zvishaishi zvatakaita kare?

¹⁵ Magama a Dhavhidhi ari pana Pisarema 103 angatibesesa kudini kuti titendere ruregerero ra Jehovha? Kudai tikaramba tesijipa ndava, tinodikana kujivhunjisa kuti: ‘Kubhuya kuti ndiri kukanganwa zvinorangarirwa ndi Jehovha here? Ndiri kukanganwa kuti iyena unozviziva kuti takabarwa no cishaishi here? Uye kubhuya kuti unoregerera mushaishi unonga akhauya ngo mwoyo wese inga inini here? Rangariranyizve kuti Jehovha wakakheta kutama kurangarirazve ngo pamusoro po zvishaishi zvaanonga aregerera. Ngo kudaro, iyena aazorambi esirangarira zvishaishi zvatakaita kare kana kutipanica ngo ndava yazvo.’ Na isusuwo atidiki kuzvirangarira. (Ps. 130:3) Kudai tikathemba kuti Jehovha unotiregerera, tinodikikana kusiya kujipa ndava, toshandira Jehovha takadakara.

16. Ipanyi muezaniso unokhombija kuti zvakashatira papi kugara tesizvipa ndava ngo zvishaishi zvatakaita kare. (Wonanyi foto.)

¹⁶ Ngatimbowona muezaniso uwu basi. Kuramba teijipa ndava pazvishaishi zvatakaita kare, zvakatojana no kucovha karu tesiyenda mberi takasota pabuko tesiwona zviri sure. Zvakanaka kuita ngokupota mesisota pabuko, ngokuti zvingabesa kuti musaita ngozi inovha ngo sure kenyu. Asi, kuti muenderere mberi makangwaririka, imwimwi munodikana kukanda murangariro wenyu pa zviro zviri mberi. Mukutojanawo, izvi zvingatibesawo kudai tikasota pa zvishaishi zvatakaita kare; tingajija kuvha pazviri uye tovangisira kuti titame kuphindazve. Asi, kudai tikaramba tesibatikana pa zvishaishi zvatakaita kare, toramba takatwara mutwaro wo kujipa ndava, nguva jimweni, zvingaita kuti tirembe pa kushandira kedu Mwari. Kunja ka izvi, tinodikana kuramba takakanda murangariro wedu pa zviro zviri mberi. Tiri mugwanja rinoenda kuupenyu watakagondeswa munyika ipsa ya Mwari “motisingazomborangaririzve zvatakashaisha.”—Isa. 65:17; Zvi. 4:25.

RAMBANYI MESIGUTSIKANA MU MWOYO MENYU

17. Ngenyi tinodikana kuramba tesithembesa mwoyo wedu kuti Jehovha unotida uye unotiregerera?

¹⁷ Tinodikana kuramba tino cokwadi cokuti, Jehovha unotida uye unotiregerera. (1 Joh. 3:19) Ngenyi? Ngo kuti, Sathana aazoregeri kutieja kuti tithembe kuti tiri vashaishi uye kuti Jehovha aatidi uye aazotiregereri. Asi cinangwa cake ngo cokuti tisiye kushandira Jehovha. Tinodikana kuziva kuti Sathana usaita zvese zvaanokona ngokuti unoziva kuti nguva yake yaaphedo. (Zvak. 12:12) Atidikani kumusiya esitinyisa!

18. Mungaitenyi kuti muthembese mwoyo wenyu kuti Jehovha unomuda no kumuregerera?

¹⁸ Kuti muvangise kuthemba kenyu rudo ra Jehovha, shandisanyi ndhungamiriro jo takajija mu cijijo cakapera. Mu cijijo cino tajija kuti, tingazviitisa kudini kuti tive no cokwadi cokuti Jehovha unoregerera. Inga muezaniso rangariranyi kuti Jehovha wakabhuyenyi ngo pamusoro pake. Amborangarijisisanyi ngo zvaakafemera vanyori vo Bhabheri, esibhuya ngo pamusoro po kuregerera kake. Musakanganwa kuti iyena unonasa kuziva kuti takabarwa tino cishaishi uye kuti unozotiitira unyasha. Uye ejuriranyi kuti iyena paanoregerera, unoregerera no kusingaperi. Ngo kudaro, inga ndi Dhavhidhi waithemba unyasha wa Jehovha, na imwimwiwo musakanganwa kuvhunja Jehovha kuti “ndabonga Jehovha ngo kundiregerera komaita zvishaishi zvangu!”—Ps. 32:5.