उत्पत्ति
२५ अब्राहामले अर्की पत्नी पनि भित्र्याए। उनको नाम केतुराह थियो। २ उनले जिम्रान, योक्षान, मदान, मिद्यान,+ इस्बाक र सुहलाई+ जन्माइन्।
३ योक्षानका छोराहरू सेबा र ददान थिए।
ददानका छोराहरू अस्सुरिम, लतुसिम र लउम्मिम थिए।
४ मिद्यानका छोराहरू एपा, एपेर, हानोक, अबिदा र एल्दाह थिए।
यी सबै केतुराहका नातिहरू थिए।
५ अब्राहामले आफ्नो सबै सम्पत्ति इसहाकलाई दिए।+ ६ तिनले आफ्ना उपपत्नीहरूबाट जन्मेका छोराहरूलाई भने थुप्रै उपहार दिए। आफू जीवित छँदै अब्राहामले तिनीहरूलाई आफ्नो छोरा इसहाकबाट अलग पारेर पूर्वतिर पठाइदिए।+ ७ अब्राहाम १७५ वर्ष बाँचे। ८ तिनी आफ्नो जीवनसित सन्तुष्ट भएर लामो समयसम्म बाँचे अनि अन्तमा आफ्ना पितापुर्खाजस्तै माटोमा मिल्न गए। ९ अब्राहामको लासलाई तिनका छोरा इसहाक र इस्माएलले मम्रेनजिकै मक्पेलाको ओडारमा राखे, जुन ओडार हित्ती जोहरका छोरा एप्रोनको खेतमा थियो।+ १० त्यो खेत अब्राहामले हित्तीहरूसित किनेका थिए। साराको चिहान पनि त्यही ओडारमा थियो र अब्राहामको लासलाई पनि तिनका छोराहरूले त्यहीँ राखे।+ ११ अब्राहामको मृत्युपछि पनि परमेश्वरले इसहाकलाई आशिष् दिइरहनुभयो।+ इसहाक बेर-लहै-रोइनजिकै+ बसोबास गर्थे।
१२ साराकी दासी मिश्री हागारबाट+ जन्मिएको अब्राहामको छोरा इस्माएलका+ सन्तानको वंशावली यही हो:
१३ इस्माएलका छोराहरू यी नै हुन्, जसबाट तिनीहरूको आ-आफ्नो कुल बने: इस्माएलका पहिलो सन्तान नबायोथ,+ त्यसपछि केदार,+ अद्बेल, मिब्साम,+ १४ मिस्मा, दुमा, मस्सा, १५ हादद, तेमा, यतुर, नपिस अनि केद्मा। १६ इस्माएलका यी १२ छोरा आ-आफ्ना कुलका नाइके थिए। तिनीहरूले आ-आफ्नो बस्ती अनि इलाका* छुट्ट्याएका थिए र कुलअनुसार त्यसको नाम राखेका थिए।+ १७ इस्माएल १३७ वर्ष बाँचे। अनि तिनी आफ्ना पितापुर्खाजस्तै माटोमा मिल्न गए। १८ इस्माएलका छोराहरू हविलाहदेखि+ अस्सेरियासम्म बस्न थाले। हविलाह सुरनजिकै+ पर्छ अनि सुरचाहिँ मिश्रनजिकै छ। इस्माएलका छोराहरू आफ्ना दाजुभाइको नजिकै बस्न थाले।*+
१९ अब्राहामको छोरा इसहाकको विवरण यही हो:+
अब्राहामका छोरा इसहाक थिए। २० रिबेकासित विवाह गर्दा इसहाक ४० वर्षका थिए। रिबेका पद्दान-अरामका अरामी बतुएलकी+ छोरी र लाबानकी बहिनी थिइन्। २१ आफ्नी पत्नी बाँझी भएकीले इसहाक यहोवा परमेश्वरलाई बारम्बार बिन्ती गरेर सन्तान माग्थे। अन्तमा यहोवा परमेश्वरले तिनको बिन्ती सुन्नुभयो र रिबेका गर्भवती भइन्। २२ अनि उनको गर्भमा भएका छोराहरूले एकअर्कालाई ठेल्न थाले।+ त्यसैले उनले यसो भनिन्: “यस्तो दुःख हुने हो भने म बाँचेर के फाइदा?” यो के भएको होला भनेर उनले यहोवा परमेश्वरलाई प्रार्थना गरिन्। २३ अनि यहोवा परमेश्वरले उनलाई जवाफ दिनुभयो: “तिम्रो गर्भमा दुई जाति छन्।+ जन्मँदै तिनीहरू दुई जाति हुनेछन्।+ एउटा जाति अर्कोभन्दा शक्तिशाली हुनेछ+ र जेठोले कान्छोको सेवा गर्नेछ।”+
२४ महिना पुगेपछि रिबेकाले जुम्ल्याहा छोरा जन्माइन्! २५ पहिला जन्मिएको चाहिँ पूरै रातो देखिन्थ्यो। उसको शरीरभरि रौँ नै रौँ भएकोले भुत्लाको लुगा लगाएझैँ देखिन्थ्यो।+ त्यसैले तिनीहरूले उसको नाम एसाव*+ राखे। २६ त्यसपछि भाइचाहिँ जन्मियो। एसावको कुर्कुच्चो समातेर जन्मिएको भएर+ इसहाकले कान्छोचाहिँको नाम याकुब* राखे।+ छोराहरू जन्मँदा इसहाक ६० वर्षका थिए।
२७ इसहाकका छोराहरू हुर्कँदै गए। एसाव निपुण सिकारी भए+ र तिनी सिकार खोज्न वनतिर डुलिरहन्थे। याकुब भने शान्त स्वभावका थिए र तिनी पालमै बसिरहन्थे।+ २८ एसावले सिकार गरेर मासु ल्याउने भएकोले इसहाक एसावलाई माया गर्थे तर रिबेकाचाहिँ याकुबलाई माया गर्थिन्।+ २९ एकदिनको कुरा हो, एसाव सिकारबाट लखतरान भएर घर फर्कँदा याकुब सुरुवा पकाइरहेका थिए। ३० एसावले याकुबलाई भने: “लौ! झट्टै मलाई त्यो रातो सुरुवा अलिकता देऊ न! म भोकले मर्नै लागिसकेँ!” त्यसैकारण एसावलाई एदोम*+ नाम दिइयो। ३१ तब याकुबले भने: “पहिला आफ्नो ज्येष्ठ-अधिकार+ मलाई बेच्नुहोस्!” ३२ त्यसपछि एसावले भने: “यहाँ म मर्नै लागिसकेँ! मलाई त्यो ज्येष्ठ-अधिकारको के काम?” ३३ अनि याकुबले भने: “त्यसोभए पहिला कसम खानुहोस्!” एसावले कसम खाए र आफ्नो ज्येष्ठ-अधिकार याकुबलाई बेचे।+ ३४ त्यसपछि याकुबले एसावलाई रोटी र सुरुवा दिए। खानपिन गरेर एसाव उठे र आफ्नो बाटो लागे। यसरी एसावले आफ्नो ज्येष्ठ-अधिकारलाई केही मोलको गनेनन्।