दोस्रो इतिहास
१६ आसाको शासनकालको ३६ औँ वर्षमा इस्राएलका राजा बासा+ यहुदाविरुद्ध उठे अनि यहुदाका राजा आसाको इलाकामा कोही पनि जान नसकोस् अनि त्यहाँबाट कोही आउन पनि नपाओस् भनेर बासाले रामा+ सहरलाई मजबुत बनाउन थाले।+ २ तब आसाले यहोवा परमेश्वरको भवनका भण्डारहरूबाट र राजमहलका भण्डारहरूबाट सुनचाँदी निकाले+ अनि ती सुनचाँदी सिरियाका राजा बेन-हददकहाँ पठाए।+ बेन-हदद दमिसकमा बस्थे। आसाले उनलाई यस्तो सन्देश पनि पठाए: ३ “तपाईँको बुबा र मेरो बुबाले जस्तै तपाईँ र मैले पनि सन्धि* गरेका छौँ। म तपाईँलाई सुन र चाँदी पठाउँदै छु। अब इस्राएलका राजा बासासित गरेको सन्धि तोडिदिनुहोस् र तिनी मेरो इलाका छोडेर जाऊन्।”
४ बेन-हददले राजा आसाको कुरा सुने र आफ्ना सेनापतिहरूलाई इस्राएलका सहरहरूमाथि आक्रमण गर्न पठाए। तिनीहरूले इयोन,+ दान+ र हाबिल-मैमलाई अनि नप्तालिको कुलका+ सहरहरूमा भएका सबै भण्डार नाश गरिदिए। ५ यो कुरा सुन्नेबित्तिकै बासाले रामा सहरलाई मजबुत बनाउने काम रोके। ६ त्यसपछि राजा आसाले यहुदाका सबै मानिसलाई लगे अनि तिनीहरूले रामा+ सहरलाई मजबुत बनाउन बासाले+ प्रयोग गरेका ढुङ्गाहरू र काठहरू बोकेर ल्याए। राजा आसाले ती ढुङ्गाहरू र काठहरूबाट गेबा+ अनि मिस्पा+ सहरलाई मजबुत बनाए।
७ तब दर्शी हानानि+ यहुदाका राजा आसाकहाँ आए र यसो भने: “तपाईँ आफ्ना परमेश्वर यहोवामाथि भर नपरी सिरियाका राजामाथि भर पर्नुभएकोले सिरियाका राजाको सेना तपाईँको हातबाट उम्केर गयो।+ ८ के इथियोपियालीहरू र लिबियालीहरूको सेना विशाल थिएन र? के तिनीहरूको फौजमा थुप्रै रथ र घोडचढी थिएनन् र? तर त्यसबेला तपाईँ यहोवामाथि भर पर्नुभएको हुनाले उहाँले तिनीहरूलाई तपाईँको हातमा सुम्पिदिनुभएको थियो।+ ९ किनकि जो-जो आफ्नो पूर्ण हृदयले यहोवा परमेश्वरप्रति भक्त छन्,+ तिनीहरूको खातिर आफ्नो शक्ति प्रकट गर्न* उहाँको नजर पृथ्वीभरि नै घुमिरहन्छ।+ तपाईँले यस पटक मूर्ख काम गर्नुभयो। त्यसैले अबदेखि तपाईँले युद्ध लडिरहनुपर्नेछ।”+
१० तर ती दर्शीको कुरा आसालाई मन परेन। आसा उनीसित साह्रै रिसाए र उनलाई झ्यालखानामा हालिदिए। त्यसै बेलादेखि तिनले अरू मानिसहरूलाई पनि दुर्व्यवहार गर्न थाले। ११ आसाको जीवनकालका सम्पूर्ण घटना—सुरुदेखि अन्तसम्मै ‘यहुदा र इस्राएलका राजाहरूको पुस्तक’-मा लेखिएका छन्।+
१२ आसाको शासनकालको ३९ औँ वर्षमा तिनलाई खुट्टामा रोग लाग्यो र तिनी सिकिस्त बिरामी भए। तर आफू बिरामी पर्दा समेत तिनले यहोवा परमेश्वरको मदत खोजेनन् बरु वैद्यहरूमा भर परे। १३ त्यसपछि आसा आफ्ना पितृहरूसितै सुते।+ तिनको शासनकालको ४१ औँ वर्षमा तिनको मृत्यु भयो। १४ तिनलाई दाउदनगरमा+ एउटा भव्य चिहानमा गाडियो, जुन तिनले आफ्नो निम्ति बनाइराखेका थिए। तिनको लास राखिएको अरथी विभिन्न किसिमको मसला र सुगन्धित तेल मिसाएर बनाइएको लेप अनि बाल्सम तेलले* भरिपूर्ण थियो।+ साथै तिनको सम्मानमा असाध्यै ठूलो आगो पनि बालियो।*