जिल्ला अधिवेशनमा विमोचित नयाँ पुस्तक पाएर सबै रोमाञ्चित भए
नयाँ पुस्तकले परमेश्वरको ज्ञानमाथि प्रकाश पार्छ
१ “आनन्दित प्रशंसकहरू” जिल्ला अधिवेशनको सम्पूर्ण कार्यक्रमबाट हामी सबै कत्ति हर्षित थियौं! शनिबार दिउँसो ज्ञान जसले अनन्त जीवनतर्फ डोऱ्याउँछ शीर्षक भएको नयाँ पुस्तकबारे गरिएको घोषणा अनि त्यसपछि बताइएको जानकारी सुनेर हामी हर्षले गद्गद भयौं। अरबौं पृथ्वीबासीलाई परमेश्वर र उहाँको पुत्र येशू ख्रीष्टको ज्ञान चाहिएको छ र त्यो ज्ञान परमेश्वरले मात्र प्रदान गर्न सक्नुहुन्छ।—हितो. २:१-६; यूह. १७:३.
२ त्यस पुस्तकका केही भागहरू वक्ताले साँच्चै जीवन्त ढंगमा वर्णन गरे! चित्ताकर्षक शीर्षकहरू, व्यवहारिक उदाहरणहरू, सकारात्मक ढंगमा प्रस्तुत गरिएको सच्चाइ, सरल प्रश्नहरू र अध्यायको अन्तमा “आफ्नो ज्ञान जाँच्नुहोस्” शीर्षकको पेटी यस पुस्तक पढ्ने हरेकलाई मन पर्ने केही पक्षहरू हुन्। तर हाम्रा बाइबल विद्यार्थीहरूले बाइबलका आधारभूत शिक्षाहरू द्रुत गतिमा हासिल गर्दै जाँदा विशेषगरि यो पुस्तकबाट तिनीहरूले लाभ उठाउनेछन्।
३ शनिबार र आइतबारको समापन भाषणहरूमा यस नयाँ पुस्तकबाट पारिवारिक अध्ययन गर्न प्रोत्साहित गरियो। अहिलेसम्ममा हामी यस पुस्तकका विषयवस्तुहरूसित परिचित भइसक्यौं होला। यो नयाँ पुस्तकलाई क्षेत्रमा प्रस्तुत गर्ने उद्देश्य मनमा राख्दै तपाईंले पक्कै पनि केही बुँदाहरू छलफल गरिसक्नुभएको होला।
४ नरावलोकनका लागि केही बुँदाहरू: “मानवजातिलाई परमेश्वरको ज्ञान किन चाहिन्छ” शीर्षकको भाषण प्रस्तुत गर्दा वक्ताले केही बुँदाहरूलाई जोड दिएको तपाईंलाई सम्झना नै होला। ती बुँदाहरूमध्ये केही यसप्रकार छन्: (१) अध्ययन सञ्चालन गर्न यो पुस्तक प्रयोग गर्नुहुँदा मुख्य बुँदाहरू नै अस्पष्ट हुने ढंगमा थप विषयवस्तुहरू समावेश गर्नु बुद्धिमानी होइन। बरु, पुस्तकको हरेक अध्यायले प्रमाणित गर्न खोजेको कुरामाथि ध्यान केन्द्रित गर्नुहोस्। (२) अध्यायहरू त्यति लामो नभएकोले प्रत्येक पटक अध्ययन गर्नुहुँदा तपाईंले सालाखाला एउटा अध्याय पूरा गर्न सक्नुहुनेछ। (३) हरेक अध्यायको अन्तमा रहेको “आफ्नो ज्ञान जाँच्नुहोस्” शीर्षकको प्रश्न पेटीले संक्षिप्तमा पुनरावलोकन गर्न सम्भव पार्नेछ।
५ बाइबल अध्ययनहरूमा प्रयोग गर्नुहोस्: आफ्नो पुरानो बाइबल अध्ययन पुस्तकको साटो यो नयाँ पुस्तक चलाउनु उपयुक्त होला भनेर निकै प्रकाशकहरूले सोधेका छन्। हाल अध्ययन गरिरहनुभएको प्रकाशनबाट निकै अध्ययन भइसकेको छ भने त्यसलाई सिध्याउनु नै व्यवहारिक हुनेछ। अन्यथा ज्ञान पुस्तकबाटै अध्ययन सञ्चालन गर्ने सुझाउ दिइएको छ। बाइबल अध्ययन सुरु गर्न तपाईंले पुस्तिका वा पर्चा प्रयोग गर्नुभएको थियो भने, उपयुक्त समयमा त्यो नयाँ पुस्तक देखाउनुहोस् र त्यसैबाट अध्ययन थाल्नुहोस्। ज्ञान पुस्तकको प्रयोगबारे आउँदा महिनाहरूको हाम्रो राज्य सेवकाई-मा अझ थप जानकारी पाउनुहुनेछ।
६ अनन्त जीवनतर्फ डोऱ्याउने ज्ञान अरूलाई सिकाउनका लागि मदत गर्न यहोवाले हामीलाई यस नयाँ पुस्तक दिनुभएको छ। त्यसकारण अब हामीले राम्ररी तयारी गर्नु र यस कार्यमा सम्पूर्ण तवरले भाग लिनु आवश्यक छ।