ईश्वरतान्त्रिक सेवा स्कुल २०१५ ले हाम्रो सिकाउने कला तिखार्न मदत गर्नेछ।
१ भजन किताबका लेखक दाऊदले यस्तो लेखे: “हे परमप्रभु, मेरो चट्टान र मेरो उद्धारक, मेरो मुखका वचनहरू र मेरो हृदयको ध्यान तपाईंको दृष्टिमा ग्रहणयोग्य होऊन्।” (भज. १९:१४) हामी पनि आफ्नो मुखबाट निस्कने वचन यहोवाको दृष्टिमा ग्रहणयोग्य भएको चाहन्छौं। किनभने मण्डलीमा र प्रचारमा सत्यबारे बोल्न पाएको सुअवसरको हामी कदर गर्छौं। यहोवा परमेश्वरले हामीलाई प्रचारको कामको लागि प्रशिक्षण दिने एउटा माध्यम ईश्वरतान्त्रिक सेवा स्कुल हो। यो स्कुल संसारभरिका १,११,००० भन्दा धेरै मण्डलीमा हरेक हप्ता सञ्चालन भइरहेको छ। यस स्कुलले संसारभरि रहेका विभिन्न पृष्ठभूमिका भाइबहिनीलाई सुसमाचार प्रचार गर्न योग्य बनाएको छ। साथै तिनीहरूलाई कौशलता अपनाउँदै, निर्धक्क हुँदै अनि तर्क गर्दै सिकाउन सक्षम बनाएको छ।—प्रेषि. १९:८; कल. ४:६.
२ सन् २०१५ को स्कुलको तालिकामा बाइबलले वास्तवमा के सिकाउँछ? [bh]र “आफूलाई परमेश्वरको प्रेम पाउन लायक बनाइराख” [lv] किताबका विषयहरू समावेश गरिनेछन्। साथै बाइबल पढाइका विशेषताहरू र असाइनमेन्ट न. १ को लागि छुट्ट्याइएको समयमा छाँटकाँट भएको छ। यी परिवर्तनका साथै हरेक भाग कसरी प्रस्तुत गर्नुपर्छ भन्नेबारे निर्देशनहरू निम्न अनुच्छेदहरूमा दिइएका छन्।
३ बाइबल पढाइका विशेषताहरू: यो भाग पाएका भाइले जम्मा दुई मिनेटभित्र साप्ताहिक बाइबल पढाइबाट एउटा चाखलाग्दो र व्यावहारिक धर्मशास्त्रीय बुँदा छलफल गर्नेछन्। राम्रो तयारी गर्दा छुट्ट्याइएको समयभित्रै मण्डलीसित महत्त्वपूर्ण बुँदा छलफल गर्न सकिनेछ। त्यसपछि सदाझैं भाइबहिनीहरूले छ मिनेटको लागि साप्ताहिक बाइबल पढाइमा रोचक लागेको बुँदाबारे ३० सेकेन्ड वा त्यो भन्दा कम समयमा टिप्पणी गर्न सक्नेछन्। तीस सेकेन्डमा अर्थपूर्ण टिप्पणी दिन तयारी र आत्म-अनुशासन चाहिन्छ। तर यो हाम्रो लागि राम्रो तालिम हो। साथै यसो गर्दा अरूले पनि व्यक्तिगत अनुसन्धानबाट सिकेका कुराहरूबारे टिप्पणी गर्ने मौका पाउँछन्।
४ असाइनमेन्ट न. १: बाइबल पढाइको लागि छुट्ट्याइएको समयलाई घटाएर ३ मिनेट वा त्यो भन्दा कम बनाइएको छ र यस भागमा थोरै पदहरू मात्रै पढिनेछ। बाइबल पढाइको भाग पाएको भाइले सही उच्चारण गर्ने अनि सरर्र पढ्ने कुरामा ध्यान दिंदै ठूलो स्वरमा धेरै चोटि अभ्यास गर्नुपर्छ। यसो गर्दा पढेको भागमा भएको भाव सबैले स्पष्टसित बुझ्न सक्नेछन्। पढाइले हाम्रो उपासनामा महत्त्वपूर्ण भूमिका खेल्ने भएकोले यहोवाका सबै जनहरूले राम्ररी पढ्न मेहनत गर्नुपर्छ। हाम्रा थुप्रै स-साना भाइबहिनीले राम्ररी पढ्न सकेकोमा हामी औधी खुसी छौं! बुबाआमाहरूले छोराछोरीलाई राम्ररी पढ्न सिकाएकोमा हामी उनीहरूको पनि प्रशंसा गर्छौं।
५ असाइनमेन्ट न. २: यो भाग एक जना बहिनीलाई दिइने पाँच मिनेटको प्रस्तुति हुनेछ। भाग पाउने बहिनीले दिइएको विषय नै प्रयोग गर्नुपर्छ। बाइबलले सिकाउँछ अथवा परमेश्वरको प्रेम किताबमा आधारित असाइनमेन्ट हो भने प्रस्तुतिलाई क्षेत्र सेवाको कुनै पक्षलाई ढाक्ने खालको बनाउनुपर्छ। साथै स्थानीय इलाकाको लागि सुहाउँदो र उपयोगी हुनुपर्छ। मुख्य विषयसित सम्बन्धित अन्य बाइबल पदहरू पनि समावेश गर्न सकिन्छ। स्कुल निरीक्षकले एक जना सहयोगी खटाउनेछन्।
६ असाइनमेन्ट न. ३: यो भाग कुनै एक जना भाइ वा बहिनीलाई दिइने पाँच मिनेटको प्रस्तुति हुनेछ। यो भाग बहिनीले प्रस्तुत गर्दा असाइनमेन्ट न. २ का लागि दिइएको सल्लाह अनुरूप गर्नुपर्छ। तर भाइले प्रस्तुत गर्दा विषयवस्तु परमेश्वरको प्रेम किताबमा आधारित छ भने श्रोताहरूलाई मनमा राखेर भाषणको रूपमा प्रस्तुत गर्नुपर्छ। मुख्य विषयसित सम्बन्धित अन्य बाइबल पदहरू पनि समावेश गर्न सकिन्छ।
७ असाइनमेन्ट न. ३ मा भाइहरूका लागि नयाँ कुरा: असाइनमेन्ट न. ३ को विषयवस्तु बाइबलले सिकाउँछ किताबमा आधारित छ भने यस भागलाई पारिवारिक अध्ययन वा क्षेत्र सेवाको प्रदर्शनको रूपमा प्रस्तुत गरिनेछ। प्रायजसो अवस्थामा स्कुल निरीक्षकले नै सहयोगी खटाउनेछन् र भूमिका दिनेछन्। खटाइएको सहयोगी विद्यार्थीको परिवारको सदस्य वा मण्डलीकै भाइ हुनुपर्छ। मुख्य विषयसित सम्बन्धित बाइबल सिद्धान्तहरूलाई प्रस्ट पार्न अन्य बाइबल पदहरू पनि प्रस्तुतिमा समावेश गर्न सकिन्छ। समय-समयमा यो भाग एल्डरले प्रस्तुत गर्नेछन्। एल्डरले भाग पाउँदा आफैले सहयोगी र भूमिका छान्न सक्छन्। यसरी एल्डरले आफ्नो परिवारका सदस्यहरूसित वा अरू कुनै भाइसित सिकाउने कला प्रस्तुत गरेको देख्दा मण्डलीको लागि पक्कै प्रोत्साहनदायी हुनेछ।
सल्लाह स्वीकारेर अनि लागू गरेर उन्नति गर्नुहोस्
८ सल्लाह: प्रत्येक भागपछि स्कुल निरीक्षकले २ मिनेटभित्र विद्यार्थीको प्रशंसा गर्नुका साथै सेवा स्कूल किताबका बुँदाहरूमा आधारित हुँदै विद्यार्थीले काम गर्नुपर्ने क्षेत्रमा सकारात्मक टिप्पणी वा सल्लाह दिनेछन्। स्कुल निरीक्षकले विद्यार्थीलाई आफ्नो भाग प्रस्तुत गर्न बोलाउँदा तिनले विद्यार्थी कुन बुँदामा काम गर्दै छन् भनेर बताउने छैनन्। हरेक प्रस्तुतिपछि स्कुल निरीक्षकले विद्यार्थीको साँचो प्रशंसा गर्नुपर्छ। त्यसपछि विद्यार्थीले कुन बुँदामा काम गरिरहेका छन्, बताउनुपर्छ। विशेषगरि विद्यार्थीले काम गर्नुपर्ने बुँदामा कसरी राम्रो गरेका छन्, स्पष्ट पार्नुहोस् अथवा विद्यार्थीले उक्त बुँदामा अझ ध्यान दिंदा किन मदतकारी हुन सक्छ, दयालु भई बताउनुहोस्।
९ विद्यार्थीको सल्लाह फाराम तिनको व्यक्तिगत सेवा स्कूल किताबको पृष्ठ ७९ देखि ८१ मा पाइन्छ। विद्यार्थीले आफ्नो भाग प्रस्तुत गरिसकेपछि स्कुल निरीक्षकले विद्यार्थीको किताबमा उपयुक्त चिन्ह लगाउनेछन् र विद्यार्थीले काम गर्नु पर्ने बुँदामा अभ्यास गरे कि गरेनन्, व्यक्तिगत रूपमा सोध्नेछन्। सभापछि वा अरू कुनै समयमा स्कुल निरीक्षकले विद्यार्थीको प्रशंसा गर्न वा थप मदतकारी सल्लाह दिन सक्छन्। स्कुलमार्फत पाइने व्यक्तिगत मदतलाई विद्यार्थीले आध्यात्मिक प्रगति गर्ने मौकाको रूपमा लिनुपर्छ।—१ तिमो. ४:१५.
१० विद्यार्थीको भाग तोकिएको समयभन्दा लामो भयो भने स्कुल निरीक्षक वा तिनको सहयोगीले आदरपूर्वक विद्यार्थीको समय सिद्धियो भनेर सजग गराउन घण्टी बजाएर वा टेबुलमा टकटक गरेर सङ्केत दिनुहोस्। विद्यार्थीले पनि सङ्केत बुझेर आफ्नो वाक्य टुङ्ग्याउँदै मञ्च छोड्नुपर्छ।—सेवा स्कूल किताबको पृ. २८२, अनु. ४ हेर्नुहोस्।
११ ईश्वरतान्त्रिक सेवा स्कुलमा भाग लिन चाहिने आवश्यकताहरू पूरा गरेका सबैलाई यस स्कुलमा नाम लेखाउन प्रोत्साहन दिन चाहन्छौं। (सेवा स्कूल किताबको पृ. २८२, अनु. ६ हेर्नुहोस्।) यस स्कुलले दिने शिक्षाले गर्दा यहोवाका सेवकहरू विश्वस्त भएर, आदर र प्रेमका साथ मानिसहरूलाई परमेश्वरको राज्यबारे प्रचार गर्न सक्षम भएका छन्। ईश्वरतान्त्रिक शिक्षामार्फत थुप्रै लाभ उठाइरहेका मानिसहरूको मुखबाट प्रशंसा सुन्न पाउँदा यहोवा परमेश्वर पक्कै खुसी हुनुहुन्छ!—भज. १४८:१२, १३; यशै. ५०:४.