सही र गलत: भरपर्दो डोऱ्याइ दिने धर्मशास्त्र
हामीले आफ्नो वा अरूको नैतिक मूल्यमान्यतामा भर परेर निर्णय गर्दा सधैँ सफल हुन्छौँ भन्ने कुराको कुनै ग्यारेन्टी छैन। त्यसको कारणबारे एउटा पुरानो धर्मशास्त्र बाइबलले बताउँछ। त्यति मात्र होइन, यसले हामीलाई सही र भरपर्दो बाटोमा हिँड्न मदत गर्छ। बाइबलले दिने निर्देशनअनुसार चल्दा हामी आनन्दित र सफल हुन सक्नेछौँ।
ईश्वरले दिनुहुने डोऱ्याइ
यहोवाa हाम्रो सृष्टिकर्ता हुनुभएकोले उहाँसित मात्र हामीलाई डोऱ्याउन सक्ने बुद्धि र ज्ञान छ। (भजन १००:३; १०४:२४) उहाँले मानिसहरूलाई डोऱ्याउनको लागि बाइबल दिनुभएको छ किनभने उहाँलाई मानिसहरू आफूखुसी चल्दा सफल हुन सक्दैनन् र तिनीहरूलाई डोऱ्याइ चाहिन्छ भन्ने कुरा थाह छ। (यर्मिया १०:२३) उहाँ मानिसहरूलाई प्रेम गर्नुहुने भएकोले तिनीहरूले गलत निर्णय गरेर दुःखदायी नतिजा भोगेको चाहनुहुन्न। (व्यवस्था ५:२९; १ युहन्ना ४:८) उहाँ तिनीहरूलाई जीवनका महत्त्वपूर्ण निर्णयहरू सही तरिकामा गर्न मदत गर्नुहुन्छ। तर उहाँ कहिल्यै हामीलाई उहाँको तौरतरिकाअनुसार चल्न जबरजस्ती गर्नुहुन्न।
यहोवाले पहिलो मानव दम्पती आदम र हव्वालाई बनाउनुभयो। उहाँले तिनीहरूलाई आनन्दित हुन चाहिने सबै थोक दिनुभयो। (उत्पत्ति १:२८, २९; २:८, १५) उहाँले तिनीहरूलाई सजिलै पालन गर्न सकिने केही निर्देशनहरू पनि दिनुभयो र उहाँ तिनीहरूले ती पालन गरेको चाहनुहुन्थ्यो। तर उहाँले जबरजस्ती भने गर्नुभएन किनभने उहाँले तिनीहरूलाई छनौट गर्ने स्वतन्त्रता दिनुभएको थियो। (उत्पत्ति २:९, १६, १७) दुःखको कुरा, तिनीहरूले सही र गलतसम्बन्धी यहोवाले तोक्नुभएको स्तर पालन गरेनन् बरु आफूखुसी चल्ने छनौट गरे। (उत्पत्ति ३:६) नतिजा कस्तो भयो? मानिसहरू यहोवाको स्तरअनुसार नचल्दा शान्ति र आनन्दसित जीवन बिताउन सक्दैनन् भन्ने कुराको इतिहास साक्षी छ।—उपदेशक ८:९.
हामी जुनसुकै पृष्ठभूमिका भए तापनि बाइबलले हाम्रो जीवनलाई सही बाटोमा डोऱ्याउन मदत गर्छ। (२ तिमोथि ३:१६, १७; “सबैका लागि लाभदायी किताब” पेटी हेर्नुहोस्।) कसरी?
बाइबललाई “परमेश्वरको वचन” भन्नु किन उपयुक्त छ भन्नेबारे अझै बुझ्नुहोस्।—१ थिस्सलोनिकी २:१३. हाम्रो वेबसाइट jw.org मा बाइबलको वास्तविक लेखक को हो? भिडियो हेर्नुहोस्।
ईश्वरले उहाँको वचनमार्फत डोऱ्याउनुहुन्छ
बाइबलमा यहोवाले सुरुदेखि नै मानिसजातिसित कस्तो व्यवहार गर्नुभयो भनेर लेखिएको छ। यसले हामीलाई उहाँको नजरमा के सही र के गलत छ अनि के फाइदाजनक र के हानिकारक छ भनेर बुझ्न मदत गर्छ। (भजन १९:७, ११) बाइबलमा सधैँ उपयोगी हुने सल्लाहहरू पाइन्छ र ती सल्लाहहरूले हामीलाई दैनिक जीवनमा नैतिकताको सन्दर्भमा बुद्धिमानी छनौट गर्न मदत गर्छ।
उदाहरणको लागि, हितोपदेश १३:२० को सल्लाहलाई विचार गर्नुहोस्। त्यहाँ यस्तो लेखिएको छ: “बुद्धिमान्सित हिँड्ने मानिस बुद्धिमान् हुन्छ तर मूर्खसित सङ्गत गर्ने मानिसले दुःख भोग्छ।” यो सल्लाह बाइबल लेखिएको समयमा जत्ति उपयोगी थियो, अहिले पनि उत्तिकै उपयोगी छ। बाइबलमा यस्ता थुप्रै व्यावहारिक र लाभदायी सल्लाह पाइन्छ।—“अहिले पनि उत्तिकै उपयोगी सल्लाहहरू” पेटी हेर्नुहोस्।
तर तपाईँलाई लाग्ला, ‘बाइबलले नैतिकताको सन्दर्भमा दिने सल्लाहहरू के अहिले पनि उत्तिकै उपयोगी छन्?’ यसपछिको लेखमा भएका वास्तविक अनुभवहरूले यस प्रश्नको जवाफ दिन्छ।