चासो देखाउने व्यक्तिहरूलाई मद्दत दिन आनन्दपूर्वक फर्कनुहोस्
१ चासो देखाउने व्यक्तिहरूलाई मद्दत दिन घर-घरको सेवकाईमा भाग लिने सबैजना इच्छुक हुन्छन्। त्यस्तो मद्दत दिनाले हामी गहिरो आनन्द र सन्तुष्टि अनुभव गर्छौं। (भजनसंग्रह १२६:५, ६ तुलना गर्नुहोस्।) यसको लागि हामी तयार हुनु आवश्यक छ।
२ घर-घरको रेकर्डमा विस्तृत वर्णनहरू भर्नु तैयारीको सुरुवात हो। घरधनीसँग वाचटावर र अवेक!-को कुन अङ्क छाडेका थियौं र घरधनीले ग्राहक बन्ने प्रस्ताव स्वीकार गरेको थियो कि थिएन, यी सबै जानकारीहरू यसमा समावेश हुनेछ। प्रथम भेटमा छलफल गरेको विषय र घरधनीको प्रतिक्रिया टिप्नुहोस्। पछि फर्केर जाँदा कसरी वार्तालाप सुरु गर्ने भनेर सानो टिप्पणी पनि गर्न सक्नुहुन्छ।
३ उदाहरणको लागि, यदि तपाईंले प्रभुको प्रार्थना देखाउनुभएको थियो र “त्यो राज्य” भन्ने पुस्तिका दिनुभएको थियो भने, छोटकरीमा यस्तै केही भन्न सक्नुहुन्छ:
◼ “यो भन्दा अघिको भेटमा हामीले परमेश्वरको इच्छा यस पृथ्वीमा कसरी पूरा हुनेछ र कसरी जीवनको हरेक क्षेत्रमा शान्ति हुनेछ भन्ने विषयमा छलफल गरेका थियौं। मैले छाडेर गएको पुस्तिकाको पृष्ठ २९-मा परमेश्वरको राज्यले मानवजातिको निम्ति ल्याउने अरू आशिषहरूबारे के भन्छ कृपया ध्यान दिनुहोस् त।”
४ यदि त्यो व्यक्ति एकजना हिन्दू हो भने तपाईं यस्तै केही भन्न सक्नुहुन्छ:
◼ “मैले अस्तिको पटक भेट गर्दा हामीले दानियल २:४४-मा लेखिएको भविष्यवाणी र यो कहिले पूरा हुनेछ भन्ने विषयमा छलफल गरेका थियौं।” त्यो पदलाई फेरि पढ्नुहोस् र हाम्रा समस्याहरू—तिनीहरूको समाधान गर्न हामीलाई कसले मद्दत दिनेछ? भन्ने पुस्तिकाको पृष्ठ १२ देखि १७ सम्म देखाउनुहोस् र तपाईंले प्रथम भेटमा जहाँ कुरा टुङ्ग्याउनुभएको थियो त्यहींबाट कुरा सुरु गर्नुहोस्। यो परिवर्तन आउने समयावधिबारे बाइबलले हामीलाई कुनै अन्योलमा पार्दैन भन्ने तथ्यलाई घरधनीको ध्यानमा ल्याउनुहोस्। यदि व्यावहारिक छ भने तिनको पुस्तिका निकाल्न आग्रह गर्नुहोस् र सँगै बसेर छलफल गर्नुहोस्।
५ यदि घरधनी भौतिक तवरमा अथवा अन्यथा पनि सन्तुष्ट देखिन्छ भने तपाईंले तिनीकहाँ छाड्नुभएको पत्रिकामा भएको प्रोत्साहनजनक चित्र अथवा वाक्यांशमा उहाँको विचार सोध्नुहोस्। अथवा यदि तिनले शान्तिमय नया संसारमा जीवन भन्ने पर्चा मात्र लिएको थियो भने पुनः त्यो देखाउनुहोस् र पृष्ठ ३ र ४-मा लेखिएका कुराहरू पढ्नुहोस्। एउटा सुन्दर पार्थिव प्रमोदवनमा बस्न चाहन्छन् कि चाहँदैनन् भनेर घरधनीलाई सोध्नुहोस्। पृष्ठ ६-मा ‘यो तपाईंको निम्ति कसरी सम्भव हुनु सक्छ’ भन्ने उपशीर्षक अन्तर्गत लेखिएका कुराहरू छलफल गर्नुहोस्।
६ तपाईंले वाचटावर र अवेक!-मा भएको लेखलाई छलफल गर्नुभएको थियो भने माथि दिएअनुसार फेरि कुरालाई अगाडि बढाउन सक्नुहुन्छ। प्रथम भेटमा प्रकाश गर्नुभएको लेखलाई देखाउनुहोस् र त्यसै लेखमा अथवा तपाईंसँग भएको अर्को अङ्कमा भएको चाखलाग्दो बुँदालाई देखाउनुहोस्। सम्भव छ भने, सँगै मिलेर एउटा पद पढ्नुहोस् र घरधनीको टिप्पणी सोध्नुहोस्।
७ प्रथम पटक भेट गर्नुहुँदा शायद घरधनी ग्राहक बन्न इच्छुक थिएनन् होला तर तपाईंले पुनः भेट गर्नु हुँदा तपाईंसँग पत्रिकाको अर्को अङ्क छ भने उनलाई यी नयाँ लेखहरू देखाउने र ग्राहक बन्ने प्रस्तावना राख्ने एउटा राम्रो मौका हो।
८ बाइबल अध्ययन सुरु गर्ने तपाईंको लक्ष्यलाई ध्यानमा राख्नुहोस्। साधारणतया चासोलाई त्यस हदसम्म विकास गर्न धेरै चोटि भेट गर्नु आवश्यक पर्दछ। जति सक्दो चाँडो फर्केर घरधनीलाई आफ्नो व्यक्तिगत चासो देखाउनुहोस्।
९ हामीले सुनाउने सुसमाचारले धेरै आनन्द ल्याउँछ। (लूका २:१०) हामीले गरेको प्रयासहरूप्रति जब चासो देखाउने व्यक्तिहरूले प्रतिक्रियाहरू देखाउँछन् तब त्यो साँच्चै नै एउटा आनन्द दिने कुरा हो। (फिलि० ४:१) हामीले क्षेत्र सेवकाईमा भेट्टाउने चासो देखाउने व्यक्तिहरूकहाँ पुनः गएर मद्दत दिई त्यस्ता आनन्द उठाऔं।