आज हाम्रो सेवकाईमा पर्चाहरू किन अति मूल्यवान छन्
१ जनवरी १, १९९१-को द वाचटावर, पृष्ठ ३०-मा “उनले रेलको लिकमा एउटा पर्चा भेट्टाए” भन्ने शीर्षक भएको एउटा अनुभव थियो। रेलको लिक मर्मत गर्ने एकजना व्यवस्थापकले लिकको बीचमा चेपिएको एउटा पर्चा भेट्टाएको विवरण त्यसमा दिइएको थियो। उनले त्यस पर्चालाई तुरून्तै पढे र त्यसपछि आफ्नो ज्वाईंलाई भने: “आज मैले सत्य भेट्टाएँ।” ती दुवैजना मानिसले अझ बढी साहित्यहरू मगाए र त्यसको अध्ययन गरे। आज, तिनीहरूका सयजनाभन्दा बढी सन्तानहरू सच्चाईमा जोशिला छन्। एउटा पर्चा मात्र पढ्दा पनि कस्तो नतिजा हुन सक्छ भनी यसले देखाउँछ।
२ अवसरहरूको उपयोग गर्नु: पर्चाहरूलाई प्रस्तुत गर्न सबै ठाउँमा भाइहरूले मौकाको फाइदा उठाइरहेका छन्। सासूको मृत्युको कारण आफ्नी शिक्षिका दुःखी भएको कुरा एकजना जवान साक्षीले याद गरिन्। त्यस जवान बहिनीले आफ्नी शिक्षिकालाई एउटा सान्त्वनादायी चिठ्ठी लेखिन् र के आशा छ मरिगएका प्रिय जनहरूको निम्ति भन्ने पर्चा पनि साथमा पठाइन्। शिक्षिकाले पत्रद्वारा आफ्नो धन्यवाद व्यक्त गरिन् र हाम्री बहिनीसङ्ग कुरा पनि गरिन्। अहिले यस शिक्षिकाले नियमित तवरमा उनीसित पत्रिकाहरू लिन्छिन्।
३ चिहानतर्फ जाने बाटोमा प्रचार गरिरहेका केही प्रकाशकहरूले मानिसहरू चिहानमा सेतो पोतिरहेका देखे। प्रकाशकहरूले मौका छोपी तिनीहरूलाई पर्चाहरू बाँडे। भोलिपल्ट बिदाको दिन हुनाकारण धेरै मानिसहरू चिहानमा आउँछन्। त्यसकारण प्रकाशकहरूले चिहानको ढोकामा उभिएर मानिसहरूलाई पर्चाहरू दिने निधो गरे। पाँच सयभन्दा बढी पर्चाहरू बाँडियो र त्यसमध्ये केवल तीनजनाले मात्र पर्चा लिन अस्वीकार गरे। अर्को वर्ष प्रकाशकहरू फेरि त्यही ठाउँमा गए र एक हजारभन्दा बढी पर्चाहरू बाँडे। यसपटक केवल छ जनाले मात्र पर्चा लिन अस्वीकार गरे। धेरै व्यक्तिहरूले गहिरो मूल्याङ्कन प्रकट गरे। पढेर हिंड्दै गरेका एकजना मानिस एकछिनपछि सो पर्चा दिने बहिनीसित कुरा गर्न फर्केर आए। उनले भने: “एकजना अर्को व्यक्तिले पनि यो पर्चा पढेको म चाहन्छु। के म अर्को एउटा पाउन सक्छु?”
४ पर्चाहरू सानो र बोक्न सजिलो हुन्छ। परिचित या अपरिचित, जोसुकै व्यक्तिसङ्ग अनौपचारिक कुराकानी हुँदा हामीले हामीसङ्ग भएका आठवटा पर्चाहरूमध्ये कुनै एउटामा भएको विषयवस्तुबाट छोटकरीमा छलफल गर्ने प्रयास गर्नुपर्छ। छिमेकीहरूसित कुराकानी गर्दा, किनमेल गर्दा, कसैलाई भेट्न पर्खिरहँदा, नातेदारहरूलाई भेट्न जाँदा र अन्य परिस्थितिहरूमा यसो गर्न सकिन्छ।
५ किन प्रभावशाली: पर्चाहरूका रङ्गहरू आकर्षक हुन्छन्। तिनीहरूमा कुरा छोटो हुन्छ। घरधनीहरू अथवा अनौपचारिक तवरमा भेटेका मानिसहरूले धेरै कुराहरू पढ्न बाध्य भएको महसुस गर्दैनन् र दिक्क पनि मान्दैनन्। तथापि, त्यसमा भएको समाचार घतलाग्दो र जानकारीमूलक छ। पर्चामा प्रस्तुत गरिएको विषयको वास्तविक शास्त्रीय दृष्टिकोण पाठकले बुझ्न सक्छन्। शान्तिमय नया संसारमा जीवन भन्ने पर्चा पढिसकेपछि, एकजना जवान व्यक्तिले यसो भने: “विश्व परिस्थितिहरूबारे त्यस्तो प्रोत्साहनजनक जानकारी मैले कहिल्यै सुनेको थिएन!”
६ हामीहरू हरेक सुअवसरमा यी पर्चाहरू प्रयोग गर्न चाहन्छौं। धेरै प्रकाशकहरूले घर-घरको सेवकाईमा वार्तालाप सुरु गर्न पर्चाहरू मदतकारी पाएका छन्। अहिले सञ्चालन भइरहेका थुप्रै अध्ययनहरू एउटा पर्चाबाट नै सुरु भएका थिए। पर्चाहरूलाई प्रभावशाली ढङ्गमा कसरी प्रयोग गर्ने भनेर केही व्यावहारिक सुझावहरू हाम्रो राज्य सेवकाई-को यस अङ्कको पृष्ठ ४-मा दिइएको छ। हो, पर्चाहरू साना छन् तर हाम्रो सेवकाईको निम्ति मूल्यवान साधनहरू हुन्।