सेवा सभाले हरेक असल कामको निम्ति हामीलाई सुसज्जित पार्छ
१ प्रचार गर्ने तथा चेला बनाउने कार्यमा पूर्णतया भाग लिन हामीलाई उत्प्रेरित र सुसज्जित गर्नु सेवा सभाको उद्देश्य हो। (२ तिमो. ३:१७) तर हामीले सभाको निम्ति राम्ररी तयारी गर्ने गर्दैनौं अथवा सिकेका कुराहरूलाई व्यवहारमा ल्याउन सकेनौं भने त्यसका लाभहरू कम हुनेछन्।
२ अग्रिम तयारी गर्नाले सल्लाहहरू अझ बढी ग्रहण गर्न मदत मिल्नेछ। सभामा प्रयोग हुने प्रकाशनहरू पुनरावलोकन गर्नुहोस्। यसो गर्नुभयो भने वक्ताले सो विषयमा छलफल गर्दा तपाईंले पनि उहाँ सँगसँगै मनमनै पढ्न र भाग लिन सक्नुहुन्छ। ध्यान दिएर सुन्नुहोस् र पछि प्रयोग गर्न टिपोटहरू लिनुहोस्।
३ मण्डलीका अध्यक्षले सेवा सभाको तालिकालाई ध्यानपूर्वक पुनरावलोकन गर्छन्। दक्ष, योग्य प्राचीन तथा सेवकाई सेवकहरूलाई सभाका अंशहरू तयार पार्ने जिम्मा दिइन्छ। (om p. 70) थोरै प्राचीन तथा सेवकाई सेवकहरू भएको मण्डलीमा अरू योग्य भाइहरूको सहयोग लिन सकिन्छ। (km 11⁄76, Question Box) प्रत्येक वक्ताले पूर्ण तयारी गर्नुपर्छ, दिइएको निर्देशनलाई तिनले ध्यानपूर्वक पछ्याउनुपर्छ र तोकिएको भन्दा बढी समय नलिन सतर्क हुनुपर्छ।
४ सेवा सभा प्रायजसो घोषणाहरूबाट सुरु हुन्छ। कुन कुन विषयहरू घोषणा गर्नु आवश्यक छन् भनी थाहा लगाउन घोषणा गर्ने जिम्मा पाएको भाइले अगावै मण्डलीको अध्यक्षसित सम्पर्क गर्नुपर्छ। त्यसमा सोसाइटीबाट प्राप्त पत्रहरू अथवा सेवा प्रबन्ध सम्बन्धी सम्झौटाहरू वा मासिक रिपोर्टहरू समावेश हुन सक्छन्। बिरामी भएकाहरूलाई भेट्न जानु पर्ने अथवा भविष्यको निम्ति मण्डलीका क्रियाकलापहरूबारे हामीलाई जानकारी गराइन सकिन्छ। ध्यान दिएर सुन्नुहोस्। त्यसो गरेमा तपाईंले पूर्ण जानकारी पाउनुहुन्छ र आफ्नो जिम्मेवारी पूरा गर्न तयार हुन सक्नुहुन्छ।
५ सभाको कुनै अंशमा स्रोताहरूको सहभागिता आवश्यक हुँदा विषय-वस्तुलाई पढेर अनि शास्त्रपदहरू पल्टाएर तयारी गर्नुहोस्। सुझावहरू तपाईंले कसरी प्रयोग गर्नुहुनेछ र अरूलाई प्रोत्साहन दिन कस्ता टिप्पणीहरू दिन सक्नुहुन्छ भनी विचार गर्नुहोस्। एउटा छोटो अनुभव बताएर तपाईंले सल्लाहको व्यावहारिकता छर्लङ्ग पार्न सक्नुहुन्छ।
६ प्रदर्शनीहरू हुँदा आफूलाई त्यस परिस्थितिमा कल्पना गर्नुहोस् र तपाईंले के भन्नुहुनेथियो त्यसमा विचार गर्नुहोस्। प्रयोग गरिएका तर्कहरू र त्यसका प्रत्युत्तरहरूलाई ध्यान दिनुहोस्। त्यस्तै खालको परिस्थितिमा पर्दा तपाईंले अगिल्लो पटक के भन्नुभएको थियो सम्झनुहोस् र प्रदर्शित बुँदाहरूले भविष्यमा राम्रा परिणामहरू प्राप्त गर्न कसरी मदत दिनेछन् भनी विचार गर्नुहोस्।
७ प्रदर्शनी र अन्तर्वार्ताहरूमा भाग लिनेहरूले राम्ररी पूर्वाभ्यास गरेको हुनुपर्छ। के भन्नुपर्ने र मञ्चमा गएर के गर्नुपर्ने हो भनी प्रत्येकले थाहा पाउनु पर्छ। पूर्वाभ्यास नगरेका अंशहरूले स्रोताहरूलाई प्रायः उत्प्रेरित र प्रोत्साहित गर्दैन। कसै कसैले आफूलाई दिइएको भाग प्रहरीधरहरा को अध्ययन सकिएपछि अभ्यास गर्न तयार भएर आउँछन्। यसो गर्दा तिनीहरूले मञ्चमा अभ्यास गर्न सक्छन् र के के आवश्यक पर्नेछ भनी माइक्रोफोन सञ्चालन गर्ने भाइहरूलाई थाहा दिन सक्छन्।
८ कार्यक्रममा कहिलेकाहीं मण्डलीको कुनै विशेष आवश्यकतासँग सम्बन्धित भाषण अथवा प्रहरीधरहरा को कुनै एउटा समयसापेक्ष लेख पनि समावेश हुन सक्छ। ध्यान दिएर सुन्नुहोस्, सल्लाहलाई हृदयङ्गम गर्नुहोस् र व्यवहारमा ल्याउने प्रयास गर्नुहोस्।
९ हामी “सबै असल काममा तंतयार” हुन चाहन्छौं। (२ तिमो. २:२१) त्यसो गर्न हामीलाई मदतस्वरूप यहोवाले गर्नुहुने प्रबन्ध अन्तर्गत सेवा सभा पनि एक हो। लगातार सेवा सभामा उपस्थित भएर अनि सिकेका कुराहरूलाई व्यवहारमा ल्याउन साँचो प्रयास गरेर हामी “[हाम्रो] सेवाको काम पूरा गर्न” सक्छौं।—२ तिमो. ४:५.