के तपाईं अग्रगामीहरूको दलमा पुनःभर्ती हुन सक्नुहुन्छ?
१ गत पाँच वर्षमा संसारभरि हजारौं नियमित अग्रगामीहरूले अग्रगामी सेवा छाड्न बाध्य भए। के तपाईं तिनीहरूमध्ये एक हुनुहुन्थ्यो? यदि हो भने तपाईंले यो अवसर त्याग्नुको पछाडि निस्सन्देह कुनै कारण थियो। शायद कुनै अप्रत्याशित अनि आफ्नो नियन्त्रण बाहिरको केही कुरा हुन सक्छ। के अहिले पनि अवस्था त्यस्तै नै छ? यदि स्वास्थ्य, आर्थिक समस्या अथवा पारिवारिक दायित्वहरूले गर्दा सेवा छाड्न बाध्य हुनुभएको थियो भने के अहिले परिस्थिति सुध्रिएको छ? नियमित अग्रगामी गर्नाले प्राप्त हुने आशिष्हरूबाट पुनः आनन्द उठाउन के तपाईंले व्यावहारिक छाँटकाँट गर्न सक्नुहुन्छ? पुनःदर्खास्त दिनेबारे के तपाईंले सोच्नुभएको छ?
२ तपाईंलाई थाहा भएकै कुरा हो, अग्रगामीको रूपमा सफल हुन राम्रो प्रबन्ध र समझदारीपूर्ण तालिका आवश्यक हुन्छ। मनोरञ्जन गर्न प्रायजसो धेरै समय नभए तापनि अग्रगामीले लिने अल्पकालीन आराम प्रायजसो सन्तोषजनक र इनामदायी साबित हुन सक्छ। (हितो. १९:१७; प्रे. २०:३५) सेवकाईमा व्यस्त रहँदा संसारले पछ्याउने स्वार्थी, ऐयासी जीवनशैलीको प्रभावबाट तपाईं सुरक्षित हुनुहुन्छ। तपाईं आत्म-त्यागी हुनुभयो र राज्य सम्बन्धी कामहरूलाई प्रथम स्थानमा राख्नुभयो भने तपाईंलाई आध्यात्मिक तवरमा धनी बनाउने प्रतिज्ञा यहोवाले गर्नुभएको छ। यहोवाको सेवामा पूर्ण मनको भएर तपाईंले अवश्य नै साँचो आनन्द र सन्तुष्टि अनुभव गर्न सक्नुहुन्छ।—हितो. १०:२२; कल. ३:२३, २४.
३ के पूर्ण-समय सेवकाईलाई केही विशेष व्यक्तिहरूको लागि मात्र उपलब्ध अवसरको रूपमा हेर्ने हो? होइन। हाम्रो जीवन यहोवाको सेवा गर्न समर्पण गर्ने वाचालाई ध्यानमा राख्ने हो भने, यथासम्भव परिस्थितिले भ्याएसम्म प्रत्येक मसीहीले पूर्ण-समय सेवकाईलाई गम्भीरतापूर्वक सोच्नुपर्छ।—मर्कू. १२:३०.
४ तपाईंको स्वास्थ्य र शास्त्रीय जिम्मेवारीहरूले गर्दा हाल तपाईं अग्रगामी गर्ने स्थितिमा हुनुहुन्न भने त्यो यहोवालाई थाहा छ र उहाँले बुझ्नुहुन्छ भनी तपाईं ढुक्क हुन सक्नुहुन्छ। परिस्थितिले दिएअनुसार गर्नुभएकोमा तपाईंको विश्वासलाई उहाँले इनाम दिनुहुनेछ। (१ कोरि. ४:२; २ कोरि. ८:१२) तर यदि अहिले पुनः अग्रगामी गर्न अनुकूल देखिन्छ भने मण्डलीको अध्यक्षसित कुरा गरेर दर्खास्तको निवेदन गर्नु भए कसो होला?
५ के तपाईंको परिवारले मदत दिन सक्छ? पारिवारिक दायित्वहरू पूरा गर्न तपाईंले अग्रगामीको दल छोड्नु भएको होला। तपाईं अग्रगामी कार्यमा पुनः प्रवेश गर्न के अब परिवारका अन्य सदस्यहरूले मदत दिन सम्भव छ होला? केही जिम्मेवारीहरू निभाउन अरूले अलिकता मात्र मदत गरिदिंदा पनि कसै कसैले अग्रगामी सेवा पुनः थाल्न सक्छन्।
६ परिवारका अन्य सदस्यहरूले राम्रो सहयोग र अलिकता थप प्रयास मात्र गर्दा पनि यो सम्भव हुन सक्छ। आर्थिक अथवा यातायात सुविधाको सहयोग पुऱ्याउनुको साथै सेवकाईमा सङ्गै काम गर्न नियमित तवरमा समय छुट्याएर मदत दिन सकिन्छ। तिनीहरूले मदत दिन सक्ने अरू तरिकाहरू पनि होलान्। परिस्थितिहरूले तपाईंलाई सेवकाईको यो अवसर सह्माल्न दिंदैन भने शायद अग्रगामी गर्न सक्ने परिवारको अर्को सदस्यलाई सहयोग दिन सकिन्छ।
७ परिवार नै बसेर यो विषय छलफल गरे कसो होला? सामूहिक योजना बनाउनुभयो भने परिवारको एक जना सदस्यले अग्रगामी गर्नु सम्भव हुन सक्छ। अग्रगामीको दलमा अर्को एक जना अग्रगामी थप्न सक्नुभयो भने सम्पूर्ण परिवारले त्यसमा आफ्नो भाग छ भनी औचित्यकासाथ महसुस गर्न सक्छन्। त्यस्तो उदारताको भावनाले प्रचार गरिने इलाकामा राज्यको साक्षी कार्य बढाउने मात्र होइन तर आध्यात्मिक तवरमा परिवारलाई अझ घनिष्ठ पार्नेछ।—लूका ६:३८; फिलि. २:२-४.