यहोवाका साक्षीहरूको १९९५ “आनन्दित प्रशंसकहरू” जिल्ला अधिवेशन
१ भारतमा गत वर्षको “ईश्वरीय भय” जिल्ला अधिवेशनमा २३,३६३ उपस्थित भएका थिए र हामी पनि त्यसमध्ये हुनु कति आनन्दको कुरा हो! सही ईश्वरीय भय व्यक्त गरेर कुल ८३० जनाले बप्तिस्मा लिए। यस वर्ष तीन दिने “आनन्दित प्रशंसकहरू” जिल्ला अधिवेशनमा भेला हुन पाउनु कति प्रोत्साहनजनक हुनेछ! यस भावोत्तेजक शीर्षक भएको कार्यक्रमले हामीलाई आफ्ना बाइबल विद्यार्थीहरूको साथमा उपस्थित हुन उत्प्रेरित गर्नुपर्ने हो। यस अन्तको समयमा यहोवालाई विश्वासीपूर्वक सेवा गरिरहँदा यस कार्यक्रम निश्चय पनि आध्यात्मिक स्फूर्तिको साँचो स्रोत साबित हुनेछ।
२ अधिवेशनको प्रारम्भिक गीतदेखि समापन प्रार्थनासम्म सम्पूर्ण मनोरम आध्यात्मिक कार्यक्रमको आनन्द उठाउने प्रबन्ध मिलाउन नभुल्नुहोस्। मदतको खाँचो पर्नसक्ने व्यक्तिहरू र अझ विशेषगरि नवजिज्ञासुहरूलाई प्रेमपूर्वक आफ्नो योजनामा समावेश गर्नुहोस् ताकि तिनीहरू सम्पूर्ण कार्यक्रममा उपस्थित हुनसकून्। अधिवेशनमा उपस्थित हुन चाहने कुनै पनि बाइबल विधार्थीसँग यस परिशिष्टांकको जानकारी छलफल गर्नु मदतकारी साबित हुनेछ। (गला. ६:६, १०) शुक्रबार बिहान ९:४० मा संगीतद्वारा कार्यक्रम सुरु हुनेछ र लगभग साँझ ५:०० बजे विसर्जन हुनेछ। शनिबारको दिन बिहान ९:३० बजे कार्यक्रम सुरु भएर लगभग साँझ ४:५० बजे गीत र प्रार्थनासाथ कार्यक्रम विसर्जन हुनेछ। आइतबारको दिन बिहान ९:३० बजे बिहानको कार्यक्रम आरम्भ हुनेछ र लगभग अपरान्ह ३:५० बजे दिनको कार्यक्रम विसर्जन हुनेछ।
३ मण्डलीका सभाहरू होस् वा क्षेत्रीय सम्मेलन, विशेष सम्मेलन दिन होस् वा जिल्ला अधिवेशन नै किन नहोस्, आध्यात्मिक भोजहरूमा उपस्थित हुन पाउनु कति रोमाञ्चकारी कुरा हो! किन? किनभने त्यस्ता अवसरहरूमा ईश्वरभीरु मानिसहरूसँग स्फूर्तिदायी संगत गर्न पाउनुको साथसाथै हामीलाई अझ महत्त्वपूर्ण कुराहरू स्मरण गराइन्छ।
४ हालका वर्षहरूमा हजारौं मानिसहरू त्यस्ता आध्यात्मिक जमघटतर्फ आकर्षित भएका छन् र यो क्रम बढ्दो छ। सन् १९८५ देखि १९९४ बीच सारा संसारभरि मण्डलीहरूको संख्यामा ५० प्रतिशत वृद्धि भएर ४९,७१६ बाट ७५,५७३ पुगेको छ। यसरी जम्मा गर्ने कामलाई यहोवाले वृद्धि गर्दै लानुहुँदा जिल्ला अधिवेशन र क्षेत्रीय सम्मेलनहरूको संख्या पनि स्वतः वृद्धि हुन्छ। (यशै. ६०:२२) भारतमा सन् १९८५ मा ११,२४३ उपस्थित भएका थिए भने सन् १९९४ मा २३,३६३ उपस्थित भए—त्यो दश वर्षमा १०८ प्रतिशत वृद्धि थियो! यसले संगठनमा बृहत् रूपले वृद्धि भएको प्रकाश पार्छ। बढ्दो मण्डलीहरूको संख्याले गर्दा अधिवेशनहरूको प्रबन्ध र तयारी गर्ने काम पनि बढेको छ। यस्ता भोजहरूका लागि तयार पारिएका आध्यात्मिक कार्यक्रमहरूबाट लाभ उठाउन हामी भेला हुने हुँदा सकेसम्म कम भौतिक आवश्यकताहरू पूरा गर्ने प्रबन्ध मिलाउनु बुद्धिमानी देखिन्छ।
५ चाल्नुपर्ने कदमहरू: हामीहरू प्रगतिशील रूपमा अगाडि बढ्दा यहोवाका आशिष्हरू प्रतीक्षा गर्छौं। यहोवाले आफ्ना जनहरूलाई आवश्यक बुद्धि र समझशक्तिको आत्मा दिनुभएकोमा हामी खुशी छौं। यहोवाको उद्देश्यलाई अद्भुत ढंगमा पूरा गर्न येशू ख्रीष्टले विश्वासी र बुद्धिमान दासद्वारा कुशलतापूर्वक कामकुरालाई अघि बढाइ रहनुभएको छ भनेर हामी सहमत हुनैपर्छ। (मत्ती २४:४५-४७; कल. १:९, १०) जून महिनाको हाम्रो राज्य सेवकाई-मा यस्तो घोषणा गरिएको थियो: “अब उप्रान्त, जिल्ला अधिवेशन, क्षेत्रीय तथा विशेष सम्मेलनहरूमा खाजाको मात्र प्रबन्ध गरिनेछ। पहिले जस्तो भोजन पकाएर वितरण गरिनेछैन। यदि उपस्थित व्यक्तिहरूले चाहन्छन् भने, त्यहाँ वितरण गरिने हलका खाजाको अलावा आफ्नो निम्ति भोजन ल्याउनसक्छन्।” यो प्रबन्धको कार्यान्वयन भइसकेको छ र यस घोषणाको सकारात्मक प्रतिक्रिया प्राप्त भएको छ। यस परिवर्तन कसरी फाइदाजनक हुनेछ भनेर जान्न शायद तपाईं उत्सुक हुनुहुन्छ होला। हालका वर्षहरूमा गरिएका निम्न संशोधनहरूको पुनरावृत्ति गर्दा शायद अधिवेशनसम्बन्धी कामहरूलाई सरल बनाएर हामीले के-कस्ता लाभहरू उठायौं त भनी राम्ररी सम्झना हुनसक्छ।
६ पहिलेका संशोधनहरू सरलीकरण गरिने: भोजन सेवा, स्वयम् सेवा, आवास सेवाजस्ता स्तर निर्धारित तथा सरलीकृत जिल्ला अधिवेशन प्रबन्धहरू लागू गरिनअघि हजारौं स्थानीय भाइ-बहिनीहरूले अधिवेशनअघि निकै काम गर्नुपर्थ्यो। जीवन निर्वाह गर्न दिनहुँ हाम्रा भाइहरूले सामना गर्नुपर्ने दबाब तथा मागहरूका साथै हाम्रो संगठनको अनवरत वृद्धिले गर्दा अधिवेशनका कामहरूलाई सरल पार्न साँच्चै काँटछाँट गर्न आवश्यक थियो। यसबाहेक सन् १९७८ तिर संयुक्त राज्यमा भोजन सेवा प्रक्रियालाई सरल बनाउँदा सभा सञ्चालन भइरहेको बेला भोजन तयार गर्ने काममा जुट्ने ७०,००० भन्दा बढी भाइ-बहिनीहरूले कार्यक्रम सुन्न पाए। त्यसपछि सन् १९८७ को अधिवेशन र अर्को सेवा वर्षतिर सम्मेलन भवनहरूमा भोजन सेवासम्बन्धी थप सरलीकरण लागू गरियो। यस वर्षदेखि त्यस देशमा अधिवेशन वा सम्मेलनहरू सबैमा कुनै प्रकारको खाना पनि प्रबन्ध गरिएको छैन। यी राम्रा संशोधनहरूले कामलाई अझ हलुको बनाउनुका साथै अधिवेशनको आध्यात्मिक पक्षमा अझ ध्यान दिन पाइयो भने कामदारहरूले पनि अधिकांश कार्यक्रमहरू सुन्न र आनन्द उठाउन पाए। (व्यव. ३१:१२) हाम्रा माझ निष्ठावान सेवा चढाएको निकै वर्ष भइसकेका विश्वासी जनहरूले यी प्रगतिहरू राम्ररी सम्झेका छन् र प्राप्त निर्देशनप्रति मूल्यांकन व्यक्त गरेका छन्। तर के हाम्रो देशमा पनि यी सरलीकृत प्रबन्धहरूलाई अझ सरल बनाउन र आध्यात्मिक रूपमा पूर्णतया लाभ उठाउन सम्भव पार्न सकिन्छ?
७ प्रत्याशित परिवर्तनहरू: अरू देशहरूमा सरल भोजनको तयारी र प्रबन्ध गरिंदै आएका वर्षहरूमा वास्तवमा “कम कुराहरू” मात्र “आवश्यक” हुँदा रहेछन् भन्ने देखियो। (लूका १०:३८-४२ तुलना गर्नुहोस्।) तथापि, उपस्थित सबैलाई भाग पुऱ्याउने हो भने, ती कम वस्तुहरू मात्रै पनि ठूलो मात्रामा प्रबन्ध गर्नुपर्ने हुन्छ र त्यसका लागि थुप्रै काम र महंगा उपकरणहरू किन्नुपर्ने हुन्छ अनि त्यस क्षेत्रका भाइहरूले मर्मत र ढुवानी गर्नुपर्छ। यसको अलावा सम्पूर्ण प्रबन्धहरू मिलाउन र कार्यान्वयन गर्न ठूलो संख्यामा स्वयम्सेवकहरू चाहिन्छ। खानेकुरा संचय र वितरण गर्ने ठाउँको प्रबन्ध गर्नुपऱ्यो। त्यसको साथै भोजन विभागका भाइहरूले उपस्थित व्यक्तिहरूको सही कुल संख्या थाह पाउन असम्भव हुने भएकोले कहिले खाना पुग्दैन त कहिले फाल्नु पर्ने हुन्छ। यसले गर्दा सोसाइटीले ठूलो दायित्व बहन गर्नुपरेको छ। खाना पकाउन उपकरणहरू भएको क्षेत्रहरूमा ती सामानहरूलाई मर्मत, संचय तथा ढुवानी गर्नका लागि मेहनतका साथै समय तथा पैसा खर्च गर्नुपर्ने हुन्छ। अहिले गरिएको सरलीकरण लागू गर्दा थुप्रै भाइहरूले यी उपकरण मर्मत गर्ने झर-झमेलाबाट मुक्ति पाउनेछन्।
८ यी सम्बन्धित क्षेत्रहरूमा स्वयम्सेवकको रूपमा स्वेच्छापूर्वक काम गर्ने व्यक्तिहरूको सेवा अनमोल छ र हामी त्यसको ठूलो मूल्यांकन गर्छौं। तथापि, यस थप सरलीकरण लागू गर्दा स्याहारसम्भार गर्ने र साथै किन्ने, ढुवानी गर्ने, तयारी गर्ने र भोजन बाँड्ने हजारौं व्यक्तिहरूले अधिवेशनमा अझ बढी संगतिको आनन्द उठाउनलगायत राज्यसम्बन्धी अन्य गतिविधिहरूमा समय बिताउन सक्नेछन्। भोजन सेवामा काम गर्ने स्वयम्सेवकहरूले अब परिचारक र सफाइजस्ता अन्य विभागहरूमा सहयोग पुऱ्याउनसक्छन्। यसो गर्दा कसैलाई कामको भार पर्नेछैन र भोजन सेवामा जस्तो धेरै व्यक्तिहरूले राती अबेरसम्म, बिहान सबेरै अथवा सभाहरू सञ्चालन भइरहेको बेला काम गर्नु पर्नेछैन।
९ प्रबन्धहरूलाई समर्थन गर्ने: तपाईं भाइ-बहिनीहरूले वर्षौंदेखि भोजन सेवालगायत अधिवेशनसम्बन्धी अन्य प्रबन्धहरूलाई “राजी-खुशीसित” दिएको राम्रो सहयोगको सोसाइटीले मूल्यांकन गर्छ। (१ इति. २९:९) यसले थुप्रै ढंगमा मदत पुऱ्याएको छ। यसले गर्दा राम्रा भवनहरू भाडामा लिन र अधिवेशनका खर्चहरू टार्न सम्भव भएको छ। दिउँसो छोटो मध्यान्तरमा सजिलै भोजन प्राप्त गर्न र स्फूर्ति प्राप्त गरेर पुनः आध्यात्मिक कार्यक्रमका लागि उपस्थित हुन, अधिवेशन धाउने सबैलाई अधिवेशन थलोमै रहन यसले सम्भव बनाएको छ। अनि यस्ता प्रबन्धहरूका लागि चन्दा दिन हाम्रा भाइ-बहिनीहरूले देखाएको उदारता र समर्थन निस्सन्देह कायम रहनेछ। वास्तवमा त्यो तिनीहरूको मूल्यांकनको व्यवहारिक अभिव्यक्ति साबित भएको छ।—हितो. ११:२५; लूका १६:९.
१० आफ्नो खाजाको प्रबन्ध आफै गर्नुहोस्: तथापि, थप काँटछाँट गर्दा व्यक्तिविशेष र परिवारहरूले दिउँसो मध्यान्तरमा आफूलाई चाहिने मात्र खाजाको प्रबन्ध गर्न आवश्यक पर्नेछ। आध्यात्मिक कार्यक्रमबाट हुने लाभलाई हामी ठूलो मोलको सम्झन्छौं। शारीरिक भोजनलाई अनावश्यक महत्त्व दिनु बुद्धिमानी हुनेछैन। यस सम्बन्धमा प्रत्येकले “अझ महत्त्वपूर्ण कुरा के हो भनी जान्न” अत्यावश्यक छ। (फिलि. १:९, १०क, न्युव) हालसालै पोल्यान्ड, रूस र युक्रेनका साथै पश्चिम युरोपका केही भागहरूमा कुनै भोजन सेवाको प्रबन्धबिना यहोवाका साक्षीहरूका ठूल-ठूला अधिवेशनहरू सफलतापूर्वक सम्पन्न भएका थिए। साथै ती मुलुकका केही क्षेत्रहरूमा स्थानीय परिस्थितिले गर्दा भोजन सेवाबिना सम्मेलनहरू तथा विशेष सम्मेलन दिन कार्यक्रमहरू सम्पन्न भएका थिए। यी सबै अधिवेशनहरूमा प्रतिनिधिहरूले दिउँसोको खाजा आफै ल्याएका थिए। स्याण्डवीच, उसिनेको अण्डा र फलफूलहरूजस्ता हलका खाजाहरू उपलब्ध हुनेछन् र यी धेरै प्रतिनिधिहरूलाई पर्याप्त हुनसक्छ। यदि कसैलाई धेरै खाना चाहिन्छ जस्तो लाग्छ भने तिनीहरूले हलका खाजा ल्याउँदा त्यसले जागा रहन र अपरान्हको कार्यक्रमबाट अझ बढी लाभ उठाउन मदत गर्दो रहेछ भनेर तिनीहरूले थाह पाउनेछन्। यसअनुरूप सबैले साधारण र पौष्टिक भोजन अधिवेशनमा ल्याउनुपर्छ। उदाहरणको लागि, येशूले भीडलाई खुवाउनु हुँदा रोटी र माछा गरी जम्मा दुई थोक मात्र दिनुभएको थियो। (मत्ती १४:१६-२०; लूका १०:४२क पनि हेर्नुहोस्।) दिउँसोपखको छोटो मध्यान्तर र हामीसँग भएको सुविधाहरूलाई ध्यानमा राख्दै यस सम्बन्धमा के-के गर्नसक्छौं, त्यसबारे हामी केही सुझावहरू दिन चाहन्छौं।
११ अधिवेशनमा कुनै भोजन सेवा उपलब्ध नहुने हुँदा उपस्थित सबैले राम्रो योजना बनाएमा घरैमा वा स्थानीय भोजनालयहरूमा बिहानको चिया-चमेना गर्नसक्छन्। राती चाँडै सुतेमा बिहान सबेरै उठेर आवश्यक चिया-चमेना गर्न र अधिवेशमा पर्याप्त समय अगावै आएर अन्य प्रतिनिधिहरूको संगतिबाट आनन्द उठाउन सम्भव हुनुपर्ने हो। यस नयाँ प्रबन्धको अर्को फाइदा के हो भने, भोजन सेवामा काम गर्ने स्वयम्सेवकहरू तथा तिनीहरूका परिवारका लागि बिहान सबेरै अधिवेशनको ढोका खोल्न कसैलाई अह्राउनु पर्नेछैन। विशेष कामवश चाँडै प्रवेश गर्नुपर्ने व्यक्तिहरूबाहेक बाँकी सबै प्रतिनिधिका लागि बिहान ८:०० बजे अधिवेशन भवनको ढोका खोलिनेछ। आइन्दा अधिवेशनमा बस्ने ठाउँ खोज्न पहिले जस्तो हतार हतार भवनभित्र प्रवेश गर्नु पर्नेछैन। किनकि अनुमानित भीडका लागि पर्याप्त बस्ने ठाउँको योजना बनाइ सकिएको छ।
१२ अपरान्हको मध्यान्तर पूर्व अधिवेशनहरूमा भन्दा छोटो हुनेछ। तथापि, अपरान्हको कार्यक्रमका लागि तयार हुन केही हलका भोजन लिनुका साथै अरूसँग केही बेर कुराकानी गर्न त्यो समय पर्याप्त हुनेछ। अधिवेशन शहर वा वरपर बस्ने र दिनहुँ साँझ घर फर्कने हाम्रा भाइ-बहिनीहरूलाई अपरान्ह मध्यान्तरका निम्ति सबै परिवारका लागि अलिकता खाजा तयार पारेर लैजान गाह्रो पर्नेछैन। वास्तवमा स्कूल जाने केटा-केटीहरूले पनि त्यस्तै खाजा लैजाने गर्छन्। थुप्रै मानिसहरूले आ-आफ्नो काम गर्ने ठाउँमा पनि त्यस्तै खाजा लैजाने गर्छन्।
१३ निस्सन्देह अधिवेशन शहरबाहिर अन्य ठाउँहरूबाट आउने व्यक्तिहरूका लागि यो एउटा चुनौती हुनसक्छ र दिउँसोको खाजाका लागि पूर्वतयारी गर्न आवश्यक हुनसक्छ। कसै-कसैलाई ताजा फलफूल अथवा हरियो सागपातको हलका खाजा पर्याप्त लाग्नसक्छ र यी कुराहरू पनि घरबाट ल्याउन सकिन्छ। दिउँसो मध्यान्तरका लागि चाहिने अन्य भोजनहरू अधिवेशन शहरको स्थानीय किराना पसलबाट किन्न सकिन्छ।
१४ स्मरण रहोस्, पकाउनको लागि भिन्नै स्थान छुटाएको छैन भने कृपया होटेलका कोठाहरूमा नपकाउनुहोस्। त्यसो गर्नु खतरनाक र गैर-कानुनी मात्र नभई कोठामा भएको फर्निचरहरूमा दाग र कालो चिल्लो लागेर बिग्रनसक्छन्। त्यसो गर्दा दुई-तीन दिनसम्म पनि जाँदै नजाने गन्ध कोठाभरि फैलनसक्छ। फलतः कोठाको सरसफाइ गर्न र दुर्गन्ध हटाउन पैसा खर्च र काम नगरी होटेललाई त्यो कोठा भाडामा दिन गाह्रो हुन्छ। त्यसैकारण, अधिवेशनको एक-दुइ दिनसम्ममा बिग्रेर नजाने खानेकुराहरू रोज्नु बेस हुनसक्छ। तयारी हलका खाना खान मन परेमा तपाईंले तयारी भोजन पाइने पसलमा ती सामग्रीहरू पाउन सक्नुहुन्छ। पहिले पकाइसकेका यस्ता भोजनहरू खरीद गरेमा होटेलको कोठामा पकाउनु पर्नेछैन।
१५ वास्तवमा अधिवेशनको दौडान अधिवेशन थलो र ठूलो राज्य भवनमा केही हदसम्म कुनै भिन्नता नहुने हुँदा दिउँसो मध्यान्तरमा पिकनिकजस्तो वातावरण नबनाउनु बुद्धिमानी हुनेछ। र जसरी हामी राज्य भवनमा सभा चलिरहेको बेला केही खाँदैनौं, त्यसरी नै अधिवेशनमा सभा सञ्चालन भइरहेको बेला हामीले केही खाने वा पिउने गर्नु हुँदैन। कृपया पिकनिकमा लैजाने ठूलो भाँडा नल्याउनुहोस्, त्यसले हानि पुऱ्याउनसक्छ र भवनभित्र जाने बाटो छेक्नसक्छ; त्यस्ता भाँडाहरूलाई मेचमाथि राख्नु हुँदैन। दिउँसो मध्यान्तरमा हामीलाई चाहिने हलका खाजा राख्न ठूलो झोला वा कागजको झोला ठिक्क हुनसक्छ। आवश्यक परेमा खानेकुरा राख्ने सानो भाँडा ल्याउन सकिन्छ तर त्यो मेचमुनि राख्न मिल्ने हुनुपर्छ।
१६ अधिवेशन थलोमा ल्याइने पेय पदार्थका भाँडाहरूको सम्बन्धमा पनि होश पुऱ्याउनु आवश्यक छ। तातो पेय पदार्थ थर्मसहरूमा ल्याउन सकिन्छ। काँचका भाँडाहरू प्रयोग गर्नु खतरापूर्ण हुनसक्छ। थुप्रै सभा भवनहरूले यिनीहरूको प्रयोगमा समेत प्रतिबन्ध लगाएका छन्। त्यसैकारण भवनभित्र काँचका भाँडाहरू नल्याउन हामी तपाईंहरूलाई निवेदन गर्छौं।
१७ थप लाभहरू: यसप्रकारका संशोधित प्रबन्धहरू मिलाउनुमा हामी साँच्चै बुद्धिमानी देख्नसक्छौं। यसो गऱ्यौं भने अधिवेशनमा भेला हुनुको वास्तविक उद्देश्य पूरा गर्न अर्थात् आध्यात्मिक लाभहरू प्राप्त गर्न सबैले सम्पूर्ण ध्यान लगाउन सक्नेछन्। हामीले आनन्द उठाउने संगति र कार्यक्रमबाट यसप्रकारका लाभहरू प्राप्त हुन्छन्। अतः दिउँसो मध्यान्तरमा खाजा खोज्न अधिवेशन थलो छोडेर हिंड्नुको साटो आफैसित केही खानेकुराहरू लिएर आउनु कति लाभकारी हुनेछ। यसो गऱ्यौं भने हाम्रा भाइ-बहिनीहरूसितको संगतिबाट आनन्द उठाउनेछौं र अपरान्हको कुनै पनि कार्यक्रम छुट्नेछैन।
१८ अपरान्हको कार्यक्रमबाट आध्यात्मिक तवरमा स्फूर्ति प्राप्त गरिसकेपछि पनि कसै कसैलाई स्थानीय भोजनालयमा परिवार र मित्रहरूसित बसेर ठोस भोजन खाँदै मसीही संगति र सिकेका असल कुराहरूबारे वार्तालाप गरेर आनन्द उठाउन मन पर्ला। अरू कसैले भने किराना पसल वा तयारी भोजन पाइने पसलहरूबाट केही खानेकुरा किन्लान्। आफ्नै घर पुग्न सक्नेहरूले चाहिं अरू दिनमा काम वा क्षेत्र सेवकाईबाट फर्केजस्तै घरैमा खाना खान रुचाउँलान्।
१९ यी अधिवेशनहरूमा पाइने नयाँ साहित्यहरू, असल शिक्षा तथा व्यवहारिक सल्लाहले युक्त आध्यात्मिक भोजबाट हामी साँच्चै आनन्द उठाउँछौं। परमेश्वरका जनहरू भेला भएको ठाउँमा आफू पनि हुन पाउनुको आनन्दलगायत यी आशिष्हरू सबैले सम्झनेछन्। हितोपदेश १०:२२ यसो भन्छ: “परमप्रभुको आशिषले धन-सम्पत्ति ल्याउँछ, उहाँले तीसित दुःख पठाउनुहुन्न।” किनभने यहोवाका जनहरूको हैसियतमा हामी भौतिक चाहना तथा सुविधाहरूलाई मनमा राखेर अधिवेशनहरूमा उपस्थित हुँदैनौं। आध्यात्मिक तवरमा यथासम्भव भरपूर लाभ उठाउने सकारात्मक इच्छा संगालेर हामी अधिवेशनहरू धाउँछौं र हामीले प्रदर्शन गरेको आत्माप्रति यहोवाले प्रचुर आशिष्हरू दिनुहुनेछ।—१ तिमो. ६:६-८; हिब्रू ११:६.
२० यी प्रोत्साहनदायी अवसरहरूले हामीलाई आध्यात्मिक कटनीमा भइरहेको प्रगतिको पनि सम्झना गराउँछ। (यूह. ४:३५, ३६) यशैया ५४ अध्यायका प्रारम्भिक शब्दहरूले यहोवाको पत्नीरूपी संगठनलाई आनन्ददायी वृद्धिको लागि तयार हुन आह्वान गरेको छ। यशैयाको भविष्यवाणीअनुसार अझ ठूलो प्रगति, वृद्धि र नयाँ बल नजीकै छ: “तेरो पालको ठाउँ बढ़ा। तेरो डेराको पाटा तन्काइऊन्। न थाम्, लामो पार्, र तेरा कीलाहरू बलियो गर्। किनकि तिमीहरू बढ़ेर दाहिने र देब्रेतिर फैलिनेछौ।” यस रोमाञ्चकारी भविष्यवाणीको पूर्तिको परिणाम साँचो उपासकहरूले आज देखिरहेको अद्भुत वृद्धि हो।—यशै. ५४:१-४.
२१ अधिवेशन प्रबन्धमा गरिएका यी थप सरलीकरणलाई प्रयोगमा ल्याउनु साँच्चै असल निर्णय देखिन्छ। यसो गरेमा अलमलाउने कुरा थोरै हुनेछ र तयार पारिएको आध्यात्मिक कार्यक्रमबाट सबैले लाभ उठाउनेछन्। यस प्रबन्धले थप वृद्धिलाई कुशलतापूर्वक सँभाल्न सघाउ पुऱ्याउने हुँदा त्यसमा यहोवाको आशिष् रहनेछ भन्ने विश्वास हामीले राखेका छौं। आवश्यक कुरामा ध्यान केन्द्रित गऱ्यौं भने रमाइलो संगति र आध्यात्मिक असल कुराहरूका लागि योजनाबद्ध गरिएका दिनहरूबाट आनन्द उठाउन सक्नेछौं। एकै ठाउँमा भेला हुन र यहोवाको टेबलमा खान हामीले गरेका सम्पूर्ण प्रयत्नहरूलाई यहोवाले आशिष् दिऊन् भन्ने निष्कपट प्रार्थना हामी गर्छौं।—व्यव. १६:१४, १५ तुलना गर्नुहोस्।
[पृष्ठ ६-मा भएको पेटी]
भोजन सेवा उपलब्ध नहुनुका फाइदाहरू
▪ कार्यक्रमको दौडान, अघि र पछि कम काम हुने अरूसँग संगत गर्न बढी समय हुन्छ
▪ भोजन सेवासम्बन्धी उपकरणहरू सँभाल्नु पर्नेछैन
▪ आध्यात्मिक कार्यक्रममा धेरैभन्दा धेरै मानिसहरूले पूर्ण ध्यान केन्द्रित गर्नसक्छन्
▪ अन्य विभागहरूमा सहयोग गर्न धेरै स्वयम्सेवकहरू उपलब्ध हुनेछन्
▪ अन्य ईश्वरतान्त्रिक गतिविधिहरूका लागि अझ धेरै समय हुनेछ
दिउँसो मध्यान्तरमा ल्याउन सकिने सुझावित खाद्य सामग्रीहरू
▪ हलका, साधारण तथा पौष्टिक खाना
▪ चपाटी वा परोठा र भुटेको तरकारी
▪ सुकाएका फलफूल, काजु, बदाम, बिस्कुट र ताजा फलफूलहरू
▪ साथै अधिवेशन भवनमा उपस्थित व्यक्तिहरू बसेर खाने ठाउँ छ भने, भात र भुटेको तरकारी सानो भाँडामा ल्याउन सकिन्छ
यी सामग्रीहरू अधिवेशन भवनमा नल्याउनुहोस्
▪ मद्य
▪ काँचका भाँडाहरू
▪ पिकनिक जाँदा लग्ने भोजन राख्ने ठूलो भाँडो
मासु ल्याउँदा होशियार हुनुहोस्। धेरै भवनहरूमा मांसाहारी खाना ल्याउन प्रतिबन्ध लगाइएको हुन्छ। दोधारमा हुनुहुन्छ भने त्यस्तो खाना नल्याउनु बेस हुनेछ।