“ईश्वरीय आज्ञाकारिता” यहोवाका साक्षीहरूको जिल्ला अधिवेशन सन् २००५
१ हाम्रा महान् शिक्षकको हैसियतमा यहोवा परमेश्वरले आफ्नो मार्ग हामीलाई सिकाउन एक ठाउँमा भेला हुने प्रबन्ध मिलाउनुहुन्छ। (यशै. ३०:२०; ५४:१३) उहाँले यो काम विश्वासी र बुद्धिमान् दासमार्फत सम्पन्न गर्नुहुन्छ र यिनै दास वर्गले हाम्रो वार्षिक जिल्ला अधिवेशनहरूको रूपमा यस्ता जमघटहरूको प्रबन्ध मिलाउँछन्। (मत्ती २४:४५-४७) हाम्रो मनका भावनाहरू भजनहार दाऊदको भावनासित मेल खान्छन्, जसले यसो भन्दै भजन गाएका थिए: “समुदायहरूमा म परमप्रभुको प्रशंसा गर्नेछु।” (भज. २६:१२) दाऊदले यहोवाद्वारा सिकाइनुको महत्त्व छर्लङ्गसँग बुझेका थिए र उहाँका जनहरू भेला भएको बेला आफू पनि उनीहरूमाझ हुन तिनी कटिबद्ध थिए।
२ यस वर्ष हुने “ईश्वरीय आज्ञाकारिता” विषयक जिल्ला अधिवेशनमा उपस्थित हुने व्यक्तिहरूको “समुदायहरूमा” के तपाईं पनि हुनुहुनेछ? यदि हुन चाहनुहुन्छ भने, त्यहाँ उपस्थित हुन तयारी गर्दा निम्न जानकारी तपाईंको लागि मदतकारी साबित हुनेछ।
३ प्रत्येक दिन उपस्थित हुन अहिल्यै योजना बनाउनुहोस्: “पूर्व-सोच र परिश्रमले अवश्य लाभ ल्याउँछ।” (हितो. २१:५) के यी शब्दहरूले अधिवेशनमा उपस्थित हुन ढिला नगरी योजना बनाइहाल्नुको महत्त्वलाई जोड दिंदैन र? आध्यात्मिक तवरमा स्फूर्तिदायी कुनै पनि कार्यक्रम नछुटाउन बुद्धिमानीपूर्वक अहिल्यैदेखि तीनै दिन उपस्थित हुन सक्ने गरी आवश्यक प्रबन्धहरू मिलाउन थाल्नुहोस्। ठाउँअनुसार सार्वजनिक बिदाको दिन अनि स्कूलको जाँचका तालिकाहरू फरक-फरक हुने भएकोले सबैलाई मिल्ने समय तालिका मिलाउन असम्भव भएको छ। यस कुरालाई ध्यानमा राख्दै, यस वर्षदेखि वर्षा याममा अधिवेशनहरू आयोजना गर्ने निश्चय गरिएको छ किनभने यस समयमा यात्राको लागि रिजर्भेसन गर्न, आवास तथा सम्मेलनको लागि भवनको प्रबन्ध मिलाउन अझ बढी सजिलो हुन्छ। यसको लागि हामीले आफ्नो तर्फबाट अझ बढी योजनाहरू बनाउनुपर्छ भन्ने कुरा पक्का छ। हाकिमसँग छुट्टी माग्नुपर्छ भने यसबारे तुरुन्त कुरा गरिहाल्नुहोस्। आफ्नो योजनाबारे बेग्लै विश्वास भएका पति वा पत्नीसित छलफल गर्नुपर्छ भने अन्तिम घडीमा आएर त्यसो नगर्नुहोस्। जस्तासुकै अप्ठ्याराहरूको सामना गर्नुपरे तापनि यहोवाको मदत पाएमा हाम्रा “योजनाहरू सफल हुनेछन्” भन्ने कुरामा भरोसा गर्दै त्यसबारे यहोवासित प्रार्थना गर्नुहोस्। (हितो. १६:३) यसबाहेक, आफ्ना बाइबल विद्यार्थीहरूलाई प्रत्येक कार्यक्रममा तयारीका साथ उपस्थित हुन मदत गर्नु बेस हुनेछ।
४ आवास: तपाईंहरूको सुविधाको लागि अधिवेशन हुने सबै सहरमा आवासको प्रबन्ध मिलाइसकिएको छ। उपलब्ध होटलहरूको रिक्मेन्डेट लजिङ लिस्ट प्राप्त हुनासाथ त्यसलाई सूचना पाटीमा टाँसिनेछ। थुप्रै अवस्थामा भाइहरूले हाम्रा प्रतिनिधिहरूका लागि कम मूल्यमा होटलका कोठा मिलाएका छन्। त्यसैले होटल अथवा लजको लागि होटलसित सम्पर्क राख्दा अधिवेशनमा उपस्थित हुँदैछु भनी बताउनुहोस् र भाइहरूले मिलाएको दरअनुसार मात्रै पैसा तिर्नुहोस्। होटल मालिकले सहमति भएअनुसारको दरमा कोठा दिन नमानेको खण्डमा कृपया यसबारे आफ्नो मण्डलीका सचिवमार्फत आवास विभागलाई खबर गर्नुहोस्। तपाईंहरूको सहयोग मिलेमा शाखा कार्यालयले राम्रा खालका होटलहरू कम दरमा मिलाइरहन सक्नेछ। स्मरण रहोस्, राम्रा खालका होटलहरू अधिवेशनस्थल नजिकै नहुन पनि सक्छन्। रिजर्भेसनको लागि फोन गर्नुअघि “तपाईं कसरी आवासका प्रबन्धहरूमा सहयोग गर्न सक्नुहुन्छ” भन्ने पेटीमा दिइएका बुँदाहरू पुनरावलोकन गर्नुहोला। फोन गर्दा “होटल रिजर्भ गर्ने सबैभन्दा उत्तम तरिका के हो?” भन्ने पेटीमा बताइएअनुसार गर्नुहोस्।
५ विशेष आवश्यकताहरू: प्रेरित पावलले केही भाइहरू तिनको लागि “सुदृढ पार्ने” मानिसहरू साबित भए भनी बताए। (कल. ४:७-११, NW) उनीहरूले पावलका आवश्यकताहरू पूरा गरिदिएर तिनलाई मदत गरे। अधिवेशनको सन्दर्भमा तपाईं अरूका लागि कसरी “सुदृढ पार्ने” व्यक्ति बन्न सक्नुहुन्छ? वृद्ध-वृद्धा, अशक्त, पूर्ण-समयमा लागेका तथा अरूलाई यातायात अथवा आवासको उपयुक्त प्रबन्ध मिलाइदिनुपर्ने हुन सक्छ। यस्ता व्यक्तिहरूको हेरविचार गर्ने मुख्य जिम्मेवारी आफन्तहरूको हो। (१ तिमो. ५:४) तथापि, उनीहरू यसो गर्न सक्दैनन् भने उनीहरूका स्थानीय मण्डलीका सँगी विश्वासीहरू मदत गर्न अग्रसर हुन सक्छन्। (याकू. १:२७) पुस्तक अध्ययन निरीक्षकहरूले आफ्नो समूहमा विशेष आवश्यकताहरू भएका कोही छन् कि पक्का गर्नुपर्छ ताकि अधिवेशन अगावै उनीहरूका लागि प्रबन्ध मिलाउन सकियोस्।
६ स्पेशल निड्स रुम रिक्वेस्ट फारामहरू आफ्नो परिवार अथवा मण्डलीले आवासको प्रबन्ध मिलाउन नसक्ने प्रकाशकहरूका लागि मात्रै उपलब्ध छन्। मण्डलीको सेवा समितिले फाराममा दिइएको निर्देशन तथा प्राचीनहरूको सम्पूर्ण निकायलाई सम्बोधन गरेर पठाइएको सन् २००४, डिसेम्बर १४ तारिखको पत्रअनुसार प्रकाशकहरूको योग्यता विचार गर्नुपर्छ। यो प्रबन्ध राम्रो नाउँ कमाएका प्रकाशक तथा उनीहरूका असल शीलस्वभाव भएका छोराछोरीको लागि मात्र हो।
७ अर्को अधिवेशनमा उपस्थित हुने: यो वर्ष धेरै ठाउँमा अङ्ग्रेजी भाषाका अधिवेशनहरू सम्पन्न हुनेछन्। आफ्नो भाषाका अधिवेशनहरू हुने एउटै ठाउँमा उपस्थिति संख्या कम गर्न आफ्नो मण्डलीलाई आफ्नै भाषाको अधिवेशनमा खटाइएको भए तापनि स्पष्टसित अङ्ग्रेजी बुझ्ने र बोल्नेहरूलाई हामी अङ्ग्रेजी अधिवेशनमा उपस्थित हुन प्रोत्साहित गर्दैछौं। यसो गर्दा सिट, साहित्य र आवासको प्रबन्धहरू पर्याप्त मात्रामा मिलाउन सकिनेछ। अङ्ग्रेजी भाषाको अधिवेशनमा उपस्थित हुन सक्नुहुन्छ भने भारतमा सम्पन्न हुने सम्पूर्ण अधिवेशनको ठेगानाको लागि कृपया अप्रिल २००५ अंकको हाम्रो राज्य सेवकाई हेर्नुहोला। रिक्मेन्डेट लजिङ लिस्ट अथवा थप जानकारीको लागि निवेदन पठाउँदा, त्यस निवेदन सँगसँगै आफ्नो ठेगाना तथा टिकट टाँसेको खाम पनि पठाउनुहोस्। सहरमा एकभन्दा बढी अधिवेशन सम्पन्न हुनेवाला छ भने, निवेदनमा तपाईं उपस्थित हुन चाहनुभएका अधिवेशनका मितिहरू उल्लेख गर्नुहोस्।
८ स्वयम्सेवकहरूको खाँचो छ: अरूको आवश्यकताप्रति नम्र भई ध्यान दिने सन्दर्भमा येशूले उत्कृष्ट उदाहरण बसाल्नुभयो। (लूका ९:१२-१७; यूह. १३:५, १४-१६) अधिवेशनहरूमा काम गर्न स्वयम्सेवा गर्नेहरूले पनि त्यस्तै मनोभाव झल्काउँछन्। अधिवेशन विभागहरूको आवश्यकता पूरा गर्न स्थानीय अधिवेशन समितिले चाँडै उनीहरूसित मिलेर काम गर्न अरूलाई पनि आह्वान गर्नेछन्। यस सन्दर्भमा विशेष गरी प्राचीनहरू अघि सरेर जिम्मेवारीहरू स्वीकार्नुपर्छ। उनीहरूको इच्छुक मनोभाव मण्डलीका सबैको लागि एउटा राम्रो उदाहरण बन्न सक्छ।—१ पत्रु. ५:२, ३.
९ अरूले याद गर्ने कुरा: एउटा होटलकी सेल्स् म्यानेजरले यसो भनिन्: “तपाईंहरू हामीलाई एकदमै मनपर्ने समूह हुनुहुन्छ। अन्य समूहको तुलनामा तपाईंहरूको आचरण असाध्यै राम्रो छ। आफूहरूसित राम्रो व्यवहार गरेको र मूल्याङ्कनस्वरूप टिप्स् दिएकोमा सबै हाउसकिपरहरू खुसी व्यक्त गर्छन्। तपाईंहरू यहाँ बस्नुहुने सप्ताहन्तमा सबैजना काम गर्न चाहन्छन्!” अर्कै होटलको एक जना व्यक्तिले चाहिं यस्तो टिप्पणी गरे: “यहोवाका साक्षीहरूसित काम गर्नु एकदमै सजिलो छ।” सायद तपाईंकै उदाहरणीय आचरणले गर्दा यस्ता अभिव्यक्तिहरू आएका हुन सक्छन्। यस्तो प्रशंसा मिल्ने तरिकामा हामी चलेको देख्दा यहोवा कत्ति रमाउनुहुन्छ होला, कल्पना गर्नुहोस् त!—१ पत्रु. २:१२.
१० “विश्वासी . . . भण्डारे[मार्फत]” यहोवा परमेश्वरले यो वर्ष आफ्ना जनहरूका निम्ति आध्यात्मिक निर्देशनको लागि भेला हुने प्रबन्ध मिलाउनुभएको छ। (लूका १२:४२) तीनै दिन उपस्थित हुनको लागि तयारी गर्न प्रयास गर्नुपर्नेछ तर यो प्रयास त्यत्तिकै खेर जानेछैन। यस वर्ष हुने “ईश्वरीय आज्ञाकारिता” विषयक जिल्ला अधिवेशनले अहिले र अनन्तकालसम्म यहोवाको सेवा गर्ने हाम्रो सङ्कल्पलाई बलियो बनाउनेछ। भजनहारको यो सल्लाह पालन गर्न हामी कटिबद्ध हुन सकौं: “समुदायहरूमा परमेश्वरलाई, परमप्रभुलाईनै धन्यवाद चढाओ।”—भज. ६८:२६.
[पृष्ठ ३-मा भएको पेटी]
कार्यक्रम समय
शुक्रबार र शनिबार
बिहान ९:३० - साँझ ५:०५ सम्म
आइतबार
बिहान ९:३० - साँझ ४:१० सम्म
[पृष्ठ ४-मा भएको पेटी]
तपाईं कसरी आवसका प्रबन्धहरूमा सहयोग गर्न सक्नुहुन्छ
◼ आफैले टेलिफोन गरेर अथवा सम्भव भए व्यक्तिगत रूपमा भेटेर सूचीमा भएका होटलहरूसित सम्पर्क राख्नुहोस्।
◼ केटाकेटी होस् वा वयस्क, आफू बस्ने कोठामा अरू व्यक्तिहरूलाई पनि राख्ने योजना छ भने आफ्ना आवश्यकताहरूबारे होटल व्यवस्थापनलाई स्पष्टसित बताउनुहोस्।
◼ सूचीमा भएका होटलहरूलाई फोन गर्दा कुनै पनि होटलमा कोठाहरू उपलब्ध छैनन् भने अथवा होटलसित केही समस्या भएको खण्डमा आफ्नो मण्डलीका सचिवलाई खबर गर्नुहोस्। तिनले सूचीको सबैभन्दा माथि दिइएको जानकारी चलाएर अधिवेशनको आवास विभागसित कुरा गर्नुपर्छ र तपाईंलाई थप होटलहरूको नाउँ उपलब्ध गराइनेछ।
◼ साँच्चै प्रयोग गर्नुहुने कोठाहरू मात्र रिजर्भ गर्नुहोस्।
◼ रिजर्भेसन पक्का गर्नको लागि आफूले रिजर्भ गरेको प्रत्येक कोठाको तपाईंले अग्रिम भुक्तानी गर्नै पर्छ। नत्र, होटलले तपाईंले रिजर्भ गर्नुभएको कोठा अरू कसैलाई दिन सक्छ।
◼ आफूले गरेको होटल बुकिङको कदर गर्नुहोस्। अन्यत्र राम्रो होटल मिल्यो भन्दैमा होटल परिवर्तन नगर्नुहोस्।
[पृष्ठ ४-मा भएको पेटी]
होटल रिजर्भ गर्ने सबैभन्दा उत्तम तरिका के होला?
१. रिक्मेन्डेट लजिङ लिस्ट-मा दिइएका टेलिफोन नम्बरहरू चलाएर अफिस टाइममा होटललाई फोन गर्नुहोस्।
२. तपाईं यहोवाका साक्षीहरूको अधिवेशनमा उपस्थित हुँदैछु भनेर होटललाई खबर गर्नुहोस्।
३. होटलमा बस्ने र होटल छोड्ने निश्चित मिति बताउनुहोस्।
४. यदि कोठाहरू उपलब्ध छैनन् भने, सूचीमा भएको अर्को होटललाई फोन गर्नुहोस्।
५. सूचीमा दिइएको भन्दा बढी रेट नस्वीकार्नुहोस्।
६. रिजर्भेसन गर्नुहोस् र दस दिनभित्रमै डिमान्ड ड्राफ्ट, अथवा मनी अर्डर पठाउनुहोस्। नगद कहिल्यै नपठाउनुहोस्।
७. आफूले गरेको बुकिङको रसिद अनि लिखित कन्फरमेसन माग्नुहोस्।