“परमेश्वरलाई महिमा दिनुहोस्” यहोवाका साक्षीहरूको जिल्ला अधिवेशन सन् २००३
१ आफ्नो विश्वासी अगमवक्ता यशैयामार्फत यहोवाले यस्तो आज्ञा दिनुभयो: “हे मेरो प्रजा हो, मेरो कुरामा ध्यान देऊ। हेर मेरो जाति हो, मेरो कुरामा कान थाप।” (यशै. ५१:४) झन्-झन् कठिन हुँदै गइरहेको अन्तको यस डरलाग्दो समयमा यहोवाका आज्ञाहरू पालन गर्नु पहिलेभन्दा झनै महत्त्वपूर्ण भएको छ भन्ने कुरा के हामी मानिलिंदैनौं र? यहोवाले भन्नुहुने कुरामा “कान थाप्ने” एउटा तरिका उपासनाको लागि भेला हुने उहाँको आज्ञा पालन गरेर हो। हाम्रो वार्षिक जिल्ला अधिवेशनले प्रदान गर्ने विशेष अवसरको हामी कत्ति उत्सुकतासाथ प्रतीक्षा गर्छौं! यहोवाका साक्षीहरूको परिचालक निकायले सन् २००३ मा भारत शाखाको इलाकामा फेरि थुप्रै जिल्ला अधिवेशनहरू आयोजना गर्ने भएको छ।
२ गत वर्ष, भारतमा आयोजित “परमेश्वरको राज्यका जोसिला उद्घोषकहरू” विषयक आध्यात्मिक तवरमा स्फूर्तिदायी जिल्ला अधिवेशनमा ३३,३७२ जना मानिसहरू उपस्थित भए। ती नौवटा अधिवेशनमा ८०७ जनाले आफ्नो समर्पण पानीको बप्तिस्माद्वारा प्रकट गरेको हेर्न पाउनु हृदयस्पर्शी कुरा हो। यी अधिवेशनहरूमा गरिएका प्रबन्धहरूले गर्दा अधिवेशन प्रतिनिधिहरू हर्षविभोर भएका थिए। अधिवेशन सम्पन्न भएका चारवटा शहरका (चेन्नाइ, कोची, मुम्बई र सिकन्दराबाद) भाइबहिनीहरूले देशभरिका हजारौं प्रतिनिधिहरूलाई स्वागत गरे। ती प्रतिनिधिहरूमध्ये धेरैजसो, जीवनमा पहिलो चोटि यस्तो ठूलो जमघटमा भेला भएका थिए। निस्सन्देह, सबै प्रतिनिधिहरूले आनन्दमय संगति तथा आध्यात्मिक भोजनबाट भरपूर लाभ उठाए। यस्तो प्रोत्साहन पाउँदा के हामी आफ्नो प्रेम र सुकर्ममा बढ्न उत्साहित हुँदैनौं र? यस ग्रहणयोग्य समयको दौडान धेरैभन्दा धेरैलाई परमेश्वरको महिमा गर्ने मदत दिन हामी सुसज्जित हुनुका साथै उत्प्रेरित भएका छौं भन्ने कुरामा कुनै शंका छैन।—२ कोरि. ६:१, २.
३ सन् २००३ मा हुने जिल्ला अधिवेशनको प्रतीक्षा गर्दै गर्दा हामी आफ्नो अनमोल भ्रातृत्व अनुभव गर्ने र हामीलाई प्रदान गर्नुभएको एकताको लागि यहोवालाई धन्यवाद चढाउने नयाँ-नयाँ अवसरहरू खोज्नेछौं। अधिवेशनहरूका लागि अहिले जति पनि प्रबन्धहरू गरिंदैछन्, त्यसबाट पूरापूर लाभ उठाउन हामी के गर्न सक्छौं?
४ हेरक दिन उपस्थित हुनुहोस्: विश्वासी र बुद्धिमान् दास वर्गमार्फत दिइने निर्देशनबाट पूरापूर लाभ उठाउन हामी सम्पूर्ण कार्यक्रमको लागि अधिवेशनमा उपस्थित हुन चाहन्छौं। (मत्ती २४:४५) अधिवेशनमा हरेक दिन उपस्थित हुन के तपाईंले हाकिमसित छुट्टी माग्नुपर्छ? पर्खाल पुनःनिर्माण गर्न यरूशलेम जानको लागि आर्ट-जारसेज राजालाई अनुमति माग्नुअघि नहेम्याहले “स्वर्गका परमेश्वरलाई प्रार्थना” गरे। (नहे. २:५) अधिवेशनको तीनै दिन उपस्थित हुन हाकिमसित छुट्टीबारे कुरा गर्न साहसको लागि तपाईंले पनि यहोवालाई यसरी नै प्रार्थना गर्नुपर्छ। तपाईंका हाकिम छुट्टी दिन अनिच्छुक भएमा नि? हाम्रा अधिवेशनहरूमा प्राप्त हुने निर्देशनले हामीलाई इमानदार, लगनशील तथा भरोसायोग्य कामदार हुन मदत गर्छ भनी बताएमा हाकिमले छुट्टी दिन सक्छ। यसबाहेक, बेग्लै विश्वास भएका परिवारका सदस्यहरू छन् भने, हाम्रो अधिवेशन योजनाहरूबारे उनीहरूलाई जतिसक्दो चाँडै खबर गर्नु बेस हुनेछ।
५ आवासको नयाँ प्रबन्ध: विशाल जिल्ला अधिवेशनमा उपस्थित हुने सयौं व्यक्तिविशेषको लागि बासको प्रबन्ध मिलाउनु सधैं एउटा ठूलो काम हो। आजकल प्रायजसो भाइबहिनीहरू होटल वा डोरमेट्रीमा बस्न रुचाउँछन्। भाइहरूलाई होटलमा राखेर सहयोग गर्न पाएकोमा अधिवेशन आवास विभागका भाइहरू खुसी भए तापनि कहिलेकाहीं हाम्रा थुप्रै भाइहरूले कम भाडामा आफ्नोलागि आफै प्रबन्ध मिलाउने छनौट गरेका छन्।
६ आवासको आवश्यकता पर्नेहरू सबैलाई सहयोग गर्न र सम्पूर्ण आवास कार्यप्रणालीलाई सरल बनाउन शाखा कार्यालयले “परमेश्वरलाई महिमा दिनुहोस्” जिल्ला अधिवेशनमा उपस्थित हुने व्यक्तिहरूको लागि यस वर्ष आवाससम्बन्धी नयाँ तरिका अपनाउने निर्णय गरेको छ। आवास विभागले होटलको लागि पहिल्यै बुकिङ गर्नुको सट्टा होटलका व्यवस्थापकलाई सीधै भेटेर आफ्नोलागि आफै प्रबन्ध मिलाउन चाहने व्यक्तिहरूलाई सिफारिश गरिएका होटल तथा तिनीहरूको दरसूची उपलब्ध गराउने निर्णय हामीले गरेका छौं। डरमेट्रीमा बस्न चाहनेहरूका लागि यो लागू हुँदैन। यद्यपि, डरमेट्री नै भए पनि उनीहरूले यो अधिवेशन आवास विभागमार्फत बुक गर्न सक्छन्।
७ डरमेट्री: प्रायजसो, मण्डलीहरूले यसबारे जानकारी होटलको पहिलो सूची पठाएको एक महिना वा त्यसपछि प्राप्त गर्नेछ। यसप्रकारको आवास चाहने व्यक्तिहरूले अधिवेशन आवास विभागले मण्डलीहरूलाई पठाउने सूचीमा उल्लिखित निर्देशनहरूअनुरूप गर्नु आवश्यक छ।
८ विशेष आवश्यकताहरू: विशेष आवश्यकता भएका व्यक्तिहरूको हेरचाह गर्ने प्रायजसो प्रबन्धहरू साधारणतया उनीहरू उपस्थित हुने मण्डलीले नै गर्दै आएका छन्। त्यस्ता व्यक्तिहरूको परिस्थितिबारे थाह भएका प्राचीन तथा अन्य व्यक्तिहरूले उनीहरूलाई मदत गरेका छन्, जुन एकदमै सराहनीय कुरा हो। यसरी मदत गर्ने सिलसिलामा तिनीहरूले पूर्ण-समय सेवक, वृद्ध जन, अशक्त वा खाँचोमा परेकाहरूलाई पनि आफू सँगै लगेका छन्। यसबाहेक, तिनीहरूले अन्य तरिकामा पनि उनीहरूका आवश्यकताहरूको हेरविचार गरेका छन्; जस्तै: प्रबन्धहरू मिलाउने सन्दर्भमा उनीहरूलाई मदत वा सम्भव भएमा आवश्यकताअनुसार उनीहरूलाई आर्थिक सहयोग गरेका छन्। (याकू. २:१५-१७; १ यूह. ३:१८) यस्तो मायालु चासो देखाई नै रहनुहुनेछ भन्ने करामा हामी ढुक्क छौं। (यूह. १३:३५) तथापि, आफ्नोलागि प्रबन्ध मिलाउन असमर्थ र आफू उपस्थित हुने मण्डलीका भाइबहिनीहरूले पनि केही गर्न नसकेको खण्डमा भने, अधिवेशन आवास विभागले त्यस्ता व्यक्तिहरूको लागि आवासको प्रबन्ध मिलाउन ठोस कदम चाल्नेछन्। यस्ता व्यक्तिहरूले मण्डलीका अधिवेशन संयोजकलाई आफ्नो परिस्थिति बताएर स्पेशल निड्स रुम रिक्वेस्ट फर्म भरेर पठाउन सक्छन्।
९ विशेष आवश्यकता भएका व्यक्तिहरूले मात्र यो फाराम प्रयोग गर्नुपर्छ। उनीहरूले यो फाराम भर्नुपर्छ र भर्नुपर्ने कुरा सबै भऱ्यो कि भरेन, भरेको कुरा ठीक छ कि छैन, सो जाँच्नुका साथै परिस्थिति लेखाजोखा गर्न यसलाई अधिवेशन संयोजककहाँ बुझाउनुपर्छ। अधिवेशन संयोजकले यसलाई अधिवेशन आवास विभागकहाँ पठाए तापनि विशेष आवश्यकता भएका व्यक्ति(हरू)लाई उनीहरूको आवासबारे आवास विभागले नै सीधै जानकारी दिनेछन्। विशेष आवश्यकता भएका व्यक्तिहरूको हेरविचार गर्न परिस्थितिअनुसार निजी घर तथा होटलहरू प्रयोग गरिनेछन्। साधारणतया निजी घरमा बस्ने प्रबन्ध विशेष गरी कम बजेट भएका र यस्तो आवास नपाएको खण्डमा निकै कठिनाइ झेल्नुपर्ने व्यक्तिहरूका लागि मात्र छुट्याइएका हुन्छन् भन्ने कुरा कृपया मनमा राख्नुहोस्। ती आफ्नो छुट्टी मनाउन र अन्य यस्तै कुराको लागि निश्शुल्क आवास वा पैसा बचाउनको निम्ति सस्तो कोठा खोज्नेहरूका लागि प्रबन्ध गरिएका होइनन्। साथै, निजी घरमा मिलाइने आवासका प्रबन्धहरू अधिवेशन अवधिभरिका लागि मात्र हुन्। अधिवेशनअघि वा अधिवेशन सिद्धिसकेपछि पनि यताउता घुम्न जानको लागि हाम्रा भाइहरूको घरमा अझ धेरै दिन बस्ने आशा गर्नु भनेको उनीहरूले देखाएको आतिथ्यको अनुचित फाइदा उठाउनु हो।
१० अर्को अधिवेशनमा उपस्थित हुने: कथङ्कदाचित् परिस्थितिले गर्दा तपाईं आफूलाई खटाइएको अधिवेशनमा नभई अर्कै अधिवेशनमा उपस्थित हुनुपर्ने भयो र होटलमा बस्ने कोठा मिलाउनुपऱ्यो भने, कृपया यसबारे मण्डलीका सचिवसित कुरा गर्नुहोस्। तिनले तपाईंलाई अधिवेशन मुख्य कार्यालयहरूका ठेगाना दिन सक्छन्। उपयुक्त ठेगानामा आफ्नो निवेदन पठाउनुहोस् र निवेदनसँगसँगै आफ्नो ठेगाना तथा टिकट टाँसेको खाम पनि राख्नुहोस्। अधिवेशन हुने शहरका आवास विभागले तपाईंलाई सुझावित होटलहरू तथा त्यसका दरसूची पठाइदिनेछन्।
११ हामी तमाशा भएका छौं: के मानिसहरूले यहोवाका साक्षीहरू र यस संसारका मानिसहरूबीच भिन्नता देख्छन्? अवश्य देख्छन्! तथापि, प्रतिनिधिहरूका लागि बुकिङ गर्दा त्यसको वास्तै नगरी वा कुनै-कुनै अवस्थामा त आफूले पैसा नै नतिरेका सुविधाहरू खोज्छन् भनी होटलका व्यवस्थापकहरूले कहिलेकाहीं हाम्रो विषयमा नकारात्मक टिप्पणीहरू गरेको हामीले पाएका छौं। अझ कसै-कसैले त आगामी दिनहरूमा हुने अधिवेशनहरूमा यहोवाका साक्षीहरूलाई प्रतिनिधिहरूको रूपमा आफ्नो होटलमा राख्न नचाहेको विचारसमेत व्यक्त गरे। यसबाट के देखिन्छ भने, हामीले यहोवाको नाउँको प्रतिनिधित्व गर्छौं र अरूले सधैं हाम्रो याद गरिरहेका हुन्छन् भनेर हामी सबैले बुझेका रहेनछौं।
१२ खुसीको कुरा, प्रायजसो होटलका व्यवस्थापकहरूले सकारात्मक टिप्पणी गरे। एउटा शहरमा एक जना व्यवस्थापकले यसो भने: “अधिवेशनको सिलसिलामा आउने मानिसहरू हाम्रो होटलमा बस्ने गर्छन् तर तपाईंहरू जत्तिको सहयोगी र दयालु अरू कोही पाएनौं। गत हप्ता हाम्रो होटलमा अर्कै धार्मिक समूहका मानिसहरू बसेका थिए। तपाईंहरू र तिनीहरूबीचको भिन्नता प्रस्ट छ। तपाईंहरूको मदत तथा सहयोगबारे हामी सधैं ढुक्क हुन सक्छौं भनेर हामीलाई थाह छ।” के यस्ता टिप्पणीहरूले “जुन ज्ञान माथिबाट आउँछ,” त्यसले हाम्रो व्यक्तित्वमा सकारात्मक प्रभाव पारेकोमा त्यसको मूल्यांकन गर्न हामीलाई मदत गर्दैन र? (याकू. ३:१७) हामी “मानिसहरूका निम्ति तमाशा भएको” कारण हाम्रो आचरणले सधैं परमेश्वर, यहोवाको आदर तथा महिमा गरिरहन सकोस्।—१ कोरि. ४:९.
१३ “यस संसारको रूप बितेर जाँदैछ,” त्यसैले आध्यात्मिक कामकुरामा मन लगाउन मदतको लागि हामीलाई जिल्ला अधिवेशनहरू आवश्यक छन्। (१ कोरि. ७:३१) हरेक दिन अधिवेशनमा उपस्थित हुनका लागि प्रबन्धहरू मिलाउन प्रयास गर्नुपर्छ तर यस्तो प्रयास बेकार जाँदैन। “परमेश्वरलाई महिमा दिनुहोस्” विषयक यस वर्षको जिल्ला अधिवेशन शैतानको संसारमाथि यहोवाको न्यायदण्ड हुने समय पर्खुन्जेल हामीलाई स्थिर रहन मदतको लागि तयार पारिएका हुन्। यहोवाले हाम्रोलागि प्रबन्ध गर्नुभएको निर्देशन प्राप्त गर्नदेखि हामीलाई कुनै पनि कुराले रोक्न नदेऔं।—यशै. ५१:४, ५.
[पृष्ठ ३-मा भएको पेटी]
कार्यक्रम समय
शुक्रबार र शनिबार
बिहान ९:३० - साँझ ५:०० सम्म
आइतबार
बिहान ९:३० - साँझ ४:०५ सम्म