प्रहरीधरहरा र ब्यूँझनुहोस्! —हाम्रो आपत्कालीन समयका लागि पत्रिकाहरू!
१ बाइबलको भविष्यवाणीको पूर्तिअनुरूप विश्वलाई हल्लाउने घटनाहरू भइरहेका छन्! हाम्रो वरपर संसारमा र ईश्वरतान्त्रिक संगठनभित्रै भइरहेका घटनाहरूलाई विचार गऱ्यौं भने राज्यको “सुसमाचार” प्रचार गर्नु कति जरुरी छ भनी राम्ररी बुझ्न सक्छौं। (मर्कू. १३:१०) अप्रिल महिनामा जोसका साथ सेवकाईमा लाग्न यसले हामीलाई यथेष्ट कारण प्रदान गर्छ।
२ यस महिना हामी सहभागी हुने विशेष कार्यले हाम्रो समाचारको महत्त्वलाई प्रकाश पार्नेछ। असाध्यै उत्सुकतासाथ हामी राज्य समाचार पर्चाको विमोचनलाई पर्खिरहेका छौं, जुन हामी अप्रिल र मे महिनामा वितरण गर्नेछौं। यस कार्यको लागि हाम्रो जोस बढाउन अनि हाम्रो इलाकामा चासो खेती गर्न प्रहरीधरहरा र ब्यूँझनुहोस्!-मा खल्बलाउने विश्व-परिस्थितिको भविष्यसूचक महत्त्वलाई जोड दिने सामयिक लेखहरू हुनेछन्। पत्रिकाहरूमा चासो जगाउने र त्यसको ग्राहक बन्न मानिसहरूलाई प्रोत्साहन दिने प्रस्तुतिहरू हामी कसरी तयार गर्न सक्छौं?
३ निम्न आधारभूत कदमहरू चालेर सम्भवतः तपाईंले प्रभावकारी प्रस्तुति विकास गर्न सक्नुहुनेछ: (१) तपाईंको समुदायमा मानिसहरूलाई मन पर्ने खालको लेख पत्रिकामा छान्नुहोस्। (२) तपाईंको विचारमा घरधनीको चासो जाग्ने खालको वाक्यांश वा उद्धृत शास्त्रपद त्यो लेखबाट छान्नुहोस्। (३) मित्रैलो अभिवादन, चाखलाग्दो शास्त्रीय विचारलाई प्रकाश पार्ने एउटा प्रश्न वा वाक्यांश र ती पत्रिकाहरूको ग्राहक बन्न साँचो निमन्त्रणा समावेश भएको छोटो प्रस्तुति तयार गर्नुहोस्। तपाईंले देखिहाल्नुभयो, यो सरल र सजिलो छ। सेवकाईमा तपाईं सँगै काम गर्ने अर्को प्रकाशकसित भेटेर यो प्रस्तुति तयार गर्नुभए हुन्छ।
४ अप्रिल २२ को “अवेक!” पत्रिकाले “के यी अन्तिम दिनहरू हुन्?” भन्ने प्रश्न उठाएकोले “रीजनिंग” (तर्क) पुस्तकको पृष्ठ १३ मा “अन्तिम दिन” अन्तर्गतको विषयवस्तु पुनरावृत्ति गर्न सक्नुहुन्छ। तपाईं यसरी कुरा थाल्न सक्नुहुन्छ:
▪“हाम्रो वरपर भइरहेका गोलमाल घटनाहरूको अर्थ छलफल गर्न हामी आएका हौं। यस लेखले के भन्छ हेर्नुहोस् त . . . ”
५ अप्रिल १ को “प्रहरीधरहरा[ले]” “धर्म—एक वर्जित विषय?” भन्ने प्रश्न गर्छ। यो पत्रिका प्रस्तुत गर्दा तपाईं यसो भन्न सक्नुहुन्छ:
▪“असाध्यै विवादास्पद हुनाले छलफल गर्न नहुने विषयमध्ये धर्म पनि एक हो भनी प्रायजसो भन्ने गरिन्छ। तपाईंलाई कस्तो लाग्छ?” त्यसपछि लेखको एउटा वाक्यांश देखाउनुहोस्।
६ “के धार्मिक सत्य प्राप्त गर्न सकिन्छ?” नामक लेख भएको अप्रिल १५ को “प्रहरीधरहरा” शायद प्रयोग गर्नुहुनेछ होला। यो परिचय चलाउँदा शायद राम्रो प्रत्युत्तर पाउन सक्नुहुन्छ:
▪“आज धेरै धर्महरू भएकोले धार्मिक सत्य प्राप्त गर्न सकिएला र भनेर धेरै मानिसहरू सोच्छन्। तपाईं र मैले यो प्रश्नको सन्तोषजनक जवाफ पाउन सक्ने तरिका यो लेखले प्रकट गर्छ। . . . ”
७ प्रचार-कार्यमा जानअघि आफ्नो प्रस्तुतिसित परिचित हुन अर्को प्रकाशकसित अभ्यास गरे कसो होला? सम्भवतः तपाईंको प्रभावकारिता बढाउने र अझ बढी आत्म-विश्वास प्रदान गर्ने मदतकारी सुझावहरू एकअर्कासित बाँड्न सक्नुहुनेछ।
८ जसै यस रीतिरिवाजको अन्त नजिकिंदै जान्छ, इमान्दार हृदय भएका मानिसहरूलाई महान् बेबिलोनबाट उम्कने मदत दिन हामी आफ्नो प्रयास तीव्र पारौं। (प्रका. १८:४) पुनः कहिल्यै नदोहोरिने यो काममा प्रहरीधरहरा र ब्यूँझनुहोस्!-ले महत्त्वपूर्ण भूमिका खेल्छ। हाम्रो प्रयोगको निम्ति यी असल साधनहरू प्रदान गर्नुभएको लागि हामी यहोवाप्रति कृतज्ञ छौं!