यहोवाका साक्षीहरूको “परमेश्वरको वचन पालन गर्ने होओ” जिल्ला अधिवेशन
१ “ठूलो समुदायमा म तपाईंमा धन्यवाद चढ़ाउनेछु। धेरै मानिसहरूका बीचमा म तपाईंको प्रशंसा गर्नेछु।” (भज. ३५:१८) हाम्रा अधिवेशनहरूमा हजारौं व्यक्तिहरू ईश्वरीय निर्देशन लिन शान्तपूर्वक सँगै भेला भएको देखेका भए दाऊद कत्ति दंग पर्थे होलान्, कल्पना गर्नुहोस् त! नोभेम्बर १९९९ को बीचदेखि जनवरी २००० को सुरुसम्म भारतमा “परमेश्वरको भविष्यसूचक वचन” नामक २७ वटा जिल्ला अधिवेशन सम्पन्न भए। ती अधिवेशनहरूमा उपस्थित हुने ३०,४६२ जना मानिसहरूमध्ये के तपाईं पनि हुनुहुन्थ्यो? अब आउन लागेको “परमेश्वरको वचन पालन गर्ने होओ” जिल्ला अधिवेशनले “आत्मामा दरिद्र” र “आत्माले मण्डलीहरूलाई के भन्नुहुन्छ” सुन्न खुसी र उत्सुक यहोवाका सँगी प्रशंसकहरूसित भेला हुने अवसर प्रदान गर्नेछ।—मत्ती ५:३; प्रका. २:२९.
२ आवश्यक आवास गृहका लागि: हरेक अधिवेशनमा तपाईंलाई चाहिएको जानकारी दिन र अधिवेशन सम्पन्न हुने शहरमा आवासको व्यवस्था गर्न आवास विभागको व्यवस्था गरिएको हुन्छ। आवास गृहको प्रबन्ध गर्न अग्रिम योजना बनाउनुहोस्। तपाईंको मण्डलीको सचिवले तपाईंलाई रुम रिक्वेस्ट फाराम दिनसक्छन्। आवश्यक जानकारीहरू भरिसकेपछि तपाईंले उक्त फाराम मण्डलीका सचिवलाई दिनसक्नुहुन्छ अनि तिनले त्यस फारामलाई तपाईं उपस्थित हुनुहुने अधिवेशनको मुख्यालयमा पठाउने छन्। फारामलाई खाममा ठेगाना लेखी टिकट टाँसेर दिने गर्नुहोस्। त्यस शहरमा एकभन्दा बढी अधिवेशनहरू हुनेछन् भने, तपाईं उपस्थित हुनुहुने अधिवेशनको मिति पनि उल्लेख गर्न नबिर्सनुहोस्।
३ वृद्ध तथा विशेष रेखदेख गर्नुपर्नेहरूको हेरचाह गर्ने: वृद्ध, अशक्त अथवा विशेष रेखदेखको आवश्यकता परेकाहरूबारे राम्रो जानकारी भएका नातेदारहरू, मण्डलीका प्राचीनहरू तथा अन्य जोसुकैले पनि तिनीहरूलाई मण्डलीमा उपस्थित हुन मदत गरेर मायालु चासो तथा चिन्ता प्रकट गर्नसक्छन्। (१ तिमोथी ५:४ तुलना गर्नुहोस्।) तिनीहरूले सुनेर पूर्णतया लाभ उठाऊन् भनी आरामदायी ठाउँमा बस्न पाएका छन् कि छैनन् पक्का गर्नुहोस्। हरेक भाइ तथा बहिनीहरूले त्यस्ताहरूलाई मदत गर्नु साह्रै राम्रो कुरा हो। यसमा तिनीहरूलाई खाना खान मदत गर्नु, तिर्खा लाग्दा पानी ल्याइदिनु र शौचालयमा साथी गइदिनु समावेश छ। धेरै व्यक्तिहरूले यसरी वृद्धहरू तथा खाँचोमा परेकाहरूको हेरचाह गर्ने सुअवसर स्वीकारेमा दिनरात तिनीहरूको हेरचाह गर्ने नातेदार अथवा मण्डलीका प्रकाशकलगायत सबैले कार्यक्रमबाट फाइदा उठाउनेछन्।
४ तीन दिनै उपस्थित हुने प्रबन्ध मिलाउनुहोस्: शैतानले आध्यात्मिक कामकुरोहरूबाट तपाईंको ध्यान खलबलाउने प्रयास गरेको छ कि? दुःखको कुरा, थुप्रै भाइबहिनीहरू तथा तिनका परिवारहरूले अन्य कामकुराहरूले गर्दा आधारभूत आध्यात्मिक आहार प्राप्त गर्ने सुअवसर गुमाएका छन्। कसरी? शुक्रबारको दिन जिल्ला अधिवेशनका कार्यक्रमहरूमा भेला नभएर। कुनै कुनै बेला त, हाम्रा धेरै प्रतिशत भाइहरूले शुक्रबारको कार्यक्रममा प्रस्तुत गरिने आध्यात्मिक निर्देशन तथा संगतिको लाभ उठाउनदेखि चुकिरहेको देखिएको छ।
५ केही भाइहरू आफ्ना हाकिमकहाँ गएर अधिवेशनमा उपस्थित हुन बिदा माग्न हिचकिचाउन सक्छन्। के तपाईंलाई पनि त्यस्तै लाग्छ? लाग्छ भने, यसबारे यहोवालाई प्रार्थना गरेर हाकिमलाई आफ्नो परिस्थितिबारे बताउन साहस जुटाए कसो होला? यस्तै परिस्थितिबाट गुज्रिरहेका नहेम्याहले पनि प्रार्थना गर्दा राम्रो परिणाम पाएको कुरा याद गर्नुहोस्। (नहे. २:१-६) राज्यसम्बन्धी क्रियाकलापलाई प्रथम स्थान दिनुभयो भने, जीवनका आवश्यकताहरू पूरा गरिदिएर तपाईंलाई मदत गर्न यहोवा उत्सुक हुनुहुन्छ भन्ने कुरामा विश्वस्त हुनुहोस्।—मत्ती ६:३२ख, ३३.
६ हाम्रा अधिवेशनहरूले तपाईंलाई कसरी असर गर्छ? पूर्वीय संयुक्त राज्यकी एक बहिनीले यस्तो लेखिन्: “सन् १९९९ को जिल्ला अधिवेशनका लागि तपाईंलाई धेरै धेरै धन्यवाद। कहिल्यै नभेटिने भाइहरूलाई वर्षको एक चोटि भेट्न पाउँदा म साह्रै आनन्दित हुन्छु। किशोरावस्थामा गर्भवती भएकोबेला मैले सच्चाई सिकें। अनि मेरो बाइबल अध्ययन संचालकले मलाई पहिलोपल्ट लगेको अधिवेशन अझ पनि उत्सुकतासाथ सम्झिरहन्छु। हामी सबै मिलेर ‘असंख्य भाइहरू’ विषयको राज्य गीत गाउँदा मैले आफ्नो शिर उठाएर हेरें त्यो खुला रंगशालामा असंख्य भाइहरू देखेर म रोएँ। ‘मेरो वरपर भएका यत्तिका राम्रा मानिसहरूबीच यहोवाले मलाई पनि छान्नुहोला?’ भनेर मैले मनमनै सोचें। त्यसै दिनदेखि मैले पूर्णतया यहोवालाई सेवा गर्ने निर्णय गरें।” कस्तो हृदयस्पर्शी घटना! यहोवाका शुद्ध जनहरूसित संगत गर्नु के आनन्दको कुरा होइन र?
७ यस अन्तिम दिनको पनि अन्तमा हामीलाई जिल्ला अधिवेशनमा भेला हुनु झनै बढी आवश्यक छ। हाम्रो आध्यात्मिक स्वास्थ्य तथा सन्तुलन कायम राख्न यो यहोवा परमेश्वरले गर्नुभएको प्रबन्ध हो। तसर्थ, यस वर्षको “परमेश्वरको वचन पालन गर्ने होओ” विषयक जिल्ला अधिवेशनमा तीनै दिन उपस्थित हुने संकल्प गर्नुहोस्। तपाईं कसरी आफ्नो संकल्पअनुरूप चल्नसक्नुहुन्छ? अधिवेशनमा सबै दिन भेलाहुन आफ्नो हाकिमसित पहिल्यै बिदा माग्नुहोस्। अनि तपाईंको जीविका धान्ने माध्यम बलियो छैन भने त्यहाँ उपस्थित हुन अहिल्यैदेखि पुग्ने गरी रकम छुट्याउनुहोस्। कुनै पनि बाधाविघ्नहरूमा विजयी हुन यहोवासित प्रार्थना गरेर मदत माग्नुहोस्। त्यसो गर्नुभयो भने, तपाईंले भाइबहिनीहरूसित न्यानो संगतिको आनन्द उठाउँदै हाम्रा स्वर्गमा हुनुहुने मायालु पिता यहोवाबाट अनन्त जीवनका कुराहरू सुन्न सक्नुहुनेछ।—यूहन्ना ६:६८ तुलना गर्नुहोस्।
[पृष्ठ ३-मा भएको पेटी]
कार्यक्रमको समय
शुक्रबार र शनिबार
बिहान ९:३० – साँझ ५:०० बजेसम्म
आइतबार
बिहान ९:३० – साँझ ४:०० बजेसम्म