“परमेश्वरको राज्यका जोसिला उद्घोषकहरू” यहोवाका साक्षीहरूको जिल्ला अधिवेशन सन् २००२
१ “जब तिनीहरूले मलाई भने, ‘परमप्रभुको भवनमा जाऔं।’ तब म रमाएँ।” (भज. १२२:१) भजनहारको यस अभिव्यक्तिलाई जाँच्नुहुँदा याद गर्नुहोस् (१) यहोवाको उपासनामा भाग लिने निम्तो पाउँदा तिनले कस्तो महसुस गरे, (२) साँचो उपासनाप्रति गहिरो चासो देखाउने तिनका असल मित्रहरू थिए अनि (३) निमन्त्रणा दिन, सँगै भेला हुन र परमेश्वरको भवनसम्म यात्रा गर्न आवश्यक योजना बनाउनुपरेको हुन सक्छ।
२ हाम्रो अर्को अधिवेशनका लागि योजनाहरू बनाइँदैछन् भन्ने कुरा सुन्दा के भजनहारका शब्दहरूसित हाम्रा भावनाहरू मेल खाँदैनन् र? बितेका अधिवेशनहरूमा अनुभव गरेको आनन्दलाई सम्झँदा र यहोवालाई माया गर्ने उहाँका जनहरूसित फेरि विशेष भेलामा भेट्न पाइने प्रत्याशाले गर्दा हामी त्यसको उत्सुकतासाथ बाटो हेरिरहेका छौं। भारतमा २००२-२००३ मा हुने तीन दिने “परमेश्वरको राज्यका जोसिला उद्घोषकहरू” विषयक जिल्ला अधिवेशनहरूका लागि प्रबन्धहरू गरिएका छन्। त्यस अधिवेशनमा उपस्थित हुन र हाम्रोलागि तयार पारिएको आध्यात्मिक भोजबाट पूरापूर लाभ उठाउनको निम्ति योजना बनाउने समय अहिल्यै हो।
३ अधिवेशनमा समयानुकूल आध्यात्मिक भोजन पस्कनको लागि “विश्वासी र बुद्धिमानी भण्डारे[ले]” तयारी गर्ने काम सुरु गरिसकेको छ। (लूका १२:४२) नयाँ व्यक्तिहरूलाई अधिवेशनमा उपस्थित हुन सजिलो होस् भनेर अनि सयौं स-साना शहरहरूमा विभिन्न ठाउँबाट आएका यहोवाका साक्षीहरूको विशाल प्रतिनिधिलाई जनसाधारणले नजिकबाट देख्न सकून् भन्नाखातिर बितेका वर्षहरूमा साना-साना धेरै अधिवेशनहरूको प्रबन्ध मिलाइन्थ्यो। यस वर्षका अधिवेशनहरू निक्कै ठूलठूला हुनेछन्। यसो गर्दा धेरै ठाउँहरूबाट आएका साक्षीहरूसित सरसंगत गर्ने मौका मिल्नेछ। उत्तर र उत्तरपूर्वीय प्रदेशजस्ता एकदमै टाढाकाहरूका लागि केही साना अधिवेशनहरू हुने भए तपानि प्रत्येक मण्डलीलाई यीमध्ये कुनै एउटा ठूला अधिवेशनमा जान खटाइनेछ। प्रतिनिधिहरूले उचित बस्ने ठाउँ वा धेरै जना एउटै कोठामा बस्न मिल्ने कोठा पाऊन् भन्ने हेतुले प्रबन्धहरू मिलाउने काम भइरहेको छ। यसबाहेक, “सबै कुरा शिष्ट रुपले र नियमपूर्वक गर्न[का]” लागि धेरै भाइहरूले विभिन्न विभागहरूको व्यवस्था मिलाउन थालिसकेका छन्। (१ कोरि. १४:४०) हाम्रो लाभ र सुविधाको लागि धेरै कुराको प्रबन्ध गरिएका छन् तर अधिवेशनको तयारीको लागि हामी व्यक्तिगत तवरमा के गर्न सक्छौं?
४ तीनै दिन उपस्थित हुन अहिल्यै योजना बनाउनुहोस्: यस वर्ष प्रायजसो सबै अधिवेशनहरू दिपावलीको छेउछाउ र डिसेम्बरमा छुट्टीको बेला मिलाइएका छन्। तथापि, यात्रा गर्न र सम्पूर्ण अधिवेशनमा उपस्थित हुनको लागि तपाईंले अझै आफ्नो हाकिमसित छुट्टीको लागि कुरा गर्न आवश्यक पर्न सक्छ। कुनै-कुनै हाकिमहरूलाई “खुसी पार्न गाह्रो” हुन्छ भन्ने कुरा यहोवालाई थाह छ। (१ पत्रु. २:१८, NW) तर हाम्रा अधिवेशनहरू एकदमै महत्त्वपूर्ण छन् र हामी सम्पूर्ण कार्यक्रममा उपस्थित हुन सक्दो प्रयास गर्न चाहन्छौं। यस्ता विषयहरूमा यहोवालाई प्रार्थना गर्नुहोस् र असल परिणामको लागि उहाँको निर्देशन खोज्नुहोस्।—नेह. २:४.
५ परिवारका सबै उपस्थित हुने योजना बनाउनुहोस्: आफ्नो परिवारसित यात्रा गर्न र अधिवेशन हुने शहरमा बस्नको लागि खर्च मिलाउन हामीमध्ये धेरैलाई निकै चुनौतीपूर्ण हुन सक्छ। होसियारसाथ योजना बनाएको खण्डमा यसले आर्थिक दबाउहरू कम गर्न मदत दिन सक्छ। यदि हामीले अधिवेशनको निम्ति अहिलेदेखि नै परिवारका हरेक सदस्यको लागि दिनको पाँच रूपैयाँ मात्र जोगायौं भने पनि यात्रा अनि आवासको खर्च बटुल्न यसले धेरै मदत गर्न सक्छ।—१ कोरि. १६:२ तुलना गर्नुहोस्।
६ आफूलाई चाहिने आवासका लागि: हरेक अधिवेशनमा तपाईंलाई चाहिएको जानकारी दिन र अधिवेशन सम्पन्न हुने शहरमा आवासको व्यवस्था मिलाउन आवास विभागको व्यवस्था गरिएको हुन्छ। आवास गृहको प्रबन्ध गर्न अग्रिम योजना बनाउनुहोस्। तपाईंको मण्डलीको सचिवले तपाईंलाई रुम रिक्वेस्ट फाराम दिन सक्छन्। आवश्यक जानकारीहरू भरिसकेपछि तपाईं उक्त फाराम मण्डलीका सचिवलाई दिन सक्नुहुन्छ अनि तिनले त्यस फारामलाई तपाईं उपस्थित हुनुहुने अधिवेशनको मुख्यालयमा पठाउनेछन्। सधैं फारामलाई खाममा हालेर आफ्नो ठेगाना लेखी टिकट टाँसेर दिने गर्नुहोस्। एउटै कोठामा धेरै जना बस्न मिल्ने कोठाको भाडा कम्तीमा पनि प्रति रात रू. ५० रूपैयाँ हुने भएकोले तपाईं कतिसम्म तिर्न सक्नुहुन्छ उल्लेख गर्नुहुँदा कृपया यो कुरा याद राख्नुहोस्। यदि तपाईंको बस्ने प्रबन्ध भाइहरूको घरमा मिलाइएको छ भने, ती स्थानीय परिवारले देखाउने अथिति सत्कारलाई कृपया हल्कासित नलिनुहोस्। बरु, उनीहरूले गर्ने थप खर्चमा केही सहयोग गर्नुहोस्।
७ मण्डलीमा यताउता हेर्नुहोस्: यदि कुनै भाइ वा बहिनीलाई शारीरिक वा भौतिक आवश्यकताको कारण अधिवेशनमा उपस्थित हुन गाह्रो भइरहेको कुरा हामीलाई थाह भयो भने, के हामी हाम्रो प्रेममा “ठूला मनका” भएर केही मदत गर्न सक्छौं? (२ कोरि. ६:१२, १३; व्यव. १५:७) दोस्रो कोरिन्थी ८:१४ मा पावलले यस्तो मनोभाव राख्न प्रोत्साहित गरे। यस्ताहरूलाई आफूसँगै अधिवेशन जान किन निम्तो नदिने? यदि उनीहरू अग्रगामीहरू हुन् भने यात्राको दौडान उनीहरूले धेरै राम्रा-राम्रा अनुभवहरू सुनाउन सक्छन्। यदि उनीहरू मण्डलीका वृद्ध सदस्यहरू हुन् भने, उनीहरूसित हामीले कहिल्यै नसुनेका अद्भुत ईश्वरतान्त्रिक इतिहास हुन सक्छन्। के यस्ता भाइ तथा बहिनीहरूसित संगत गर्दा तपाईंलगायत तपाईंको परिवारमा राम्रो असर पर्दैन र? तपाईंको उदार मनोभावको उनीहरूले निश्चय नै मूल्यांकन गर्नेछन् र यहोवाले पनि तपाईंलाई इनाम दिनुहुनेछ।—हितो. २८:२७; मत्ती १०:४२.
८ स्वयम्सेवकको हैसियतमा खुसीसाथ काम गर्ने: अधिवेशन हुने शहरहरूमा अधिवेशन हुनुभन्दा धेरै दिनअघि स्थानीय मण्डलीहरूले अधिवेशन स्थल तयार पार्न सहयोग गर्ने विशेष सुअवसर पाउन सक्नेछन्। आफ्नो परिवारसित “युनाइटेड बाइ डिभाइन टिचिङ” भन्ने भिडियो हेरेर बृहत् कार्य योजनामा सहयोग गर्न किन कम्मर नकस्ने? हुन त यसको लागि थप बिदाको आवश्यकता पर्न सक्छ तर त्यसमा सहयोग पुऱ्याउनेहरूले प्रचुर मात्रामा आशिष् पाउनेछन्। अधिवेशनको दौडान विभागहरू सुचारुरूपले चलाउन पनि सयौं स्वयम्सेवकहरूको आवश्यकता पर्नेछ। हलभित्र हुने परिचारकहरूले बस्ने ठाउँहरू देखाइदिनेछन् र सफाइ विभागले अस्थायी उपासना स्थललाई प्रयोग गर्नुअघि भन्दा प्रयोग गरिसकेपछि झनै सफासुग्घर छोडेर सफाइको सन्दर्भमा हाम्रो जुन नाम चलेको छ त्यसलाई कायमै राख्ने सुअवसर पाएको छ। हाम्रो सहयोगको खाँचो पर्ने यी वा अन्य विभागहरूमा के हामी मदत पुऱ्याउन सक्छौं? के तपाईं आफ्ना भाइहरूसित “काँधमा काँध मिलाएर” सेवा गर्न स्वेच्छासाथ मदत गर्नुहुनेछ?—सप. ३:९, नयाँ संशोधित संस्करण।
९ के मानिसहरूले हामीले गर्ने काम साँच्चै याद गर्छन्? गत वर्षको जिल्ला अधिवेशनको दौडान झन्डै २० वर्षअघि यहोवाका साक्षीहरूसित अध्ययन गर्न छाडेका एक जना मानिस होटलमा काम गरिरहेका थिए। तिनले केही साक्षीहरूलाई आफू फेरि बाइबल अध्ययन सुरु गर्न र सभाहरूमा जान विचार गरिरहेको कुरा बताए। किन? किनभने होटलमा बसेको बेला साक्षीहरूले तिनलाई राम्रो व्यवहार गरेका थिए। हामीले येशूको यस आज्ञालाई पालन गरेको देख्नुहुँदा यसले हाम्रो स्वर्गमा हुनुहुने पितालाई कत्ति खुसी तुल्याउँछ होला: “उसरीनै तिमीहरूको ज्योति मानिसहरूका सामु चम्कोस्, र तिनीहरूले तिमीहरूका सुकर्म देखून्, र स्वर्गमा हुनुहुने तिमीहरूका पिताको महिमा गरून्”!—मत्ती ५:१६.
१० हामी पनि राजा दाऊदको जस्तै मनोभाव झल्काऔं, जसले यहोवाको उपासना गर्ने भवनमा जान आनन्दपूर्वक प्रतीक्षा गरेका थिए। हाम्रा जिल्ला अधिवेशनहरू आध्यात्मिक भोजनको महत्त्वपूर्ण स्रोत हुन् भने मायालु सरसंगतिबाट लाभ उठाउने अतुलनीय सुअवसर हो। त्यसैकारण यस वर्षको “परमेश्वरको राज्यका जोसिला उद्घोषहरू” विषयक जिल्ला अधिवेशनका तीनै दिनका कार्यक्रमहरूमा उपस्थित हुनका लागि प्रबन्धहरू मिलाउन थाल्न हामी तपाईंहरूलाई जोडदार आमन्त्रित गर्दर्छौं!
अधिवेशन हुने शहरहरू
नोभेम्बर १-३
सिकन्दरबाद अंग्रेजी
नोभेम्बर ८-१०
सिकन्दरबाद तेलगु
सिमोगा कन्नाडा
डिसेम्बर २७-२९
चेन्नाइ तामिल
कोची मल्यालम
मुम्बई हिन्दी
जनवरी ३-५
जमसेदपुर हिन्दी/अंग्रेजी
कोज्हीकोडे मल्यालम
नयाँ दिल्ली हिन्दी
अन्य अधिवेशनहरू
अक्टोबर २४-२६
काठमाडौं नेपाली
नोभेम्बर ६-८
ढाका बंगाली
नोभेम्बर २२-२४
ताहान मिजो