के हामी सन् २००० अप्रिललाई आफ्नो सर्वोत्तम महिना बनाउनसक्छौं?
१ बुधबार अप्रिल १९ को साँझ हाम्रो सेवा वर्षको सबैभन्दा महत्त्वपूर्ण दिन हुनेछ। त्यस दिन पृथ्वीभरि जसै सूर्यास्त हुन्छ यहोवाका साक्षीहरूको प्रत्येक मण्डली तथा समूहहरूले ख्रीष्टको मृत्युको स्मरणार्थ उत्सव मनाउनेछन्। हामी संसारको जुनसुकै ठाउँमा बसे पनि येशू ख्रीष्टको बलिदानको स्मरणार्थ उत्सव मनाउनु यस वर्षको सर्वमहत्त्वपूर्ण दिन हुनेछ। स्मरणार्थ उत्सवको दिन सन् २००० यहोवाका साक्षीहरूको क्यालेन्डर-मा चिह्न लगाइएको छ।
२ हामीले अप्रिल महिनाभरि यहोवाले आफ्नो पुत्रको बलिदान मार्फत देखाउनुभएको अनुग्रहको तनमनले मूल्यांकन गर्ने सुअवसर पाउँनेछौं। कसरी? प्रेरित पावलले लेखे: “ख्रीष्टको प्रेमले हामीलाई करमा पार्दछ, किनभने हामी यसरी विचार गर्छौं, कि सबैका निम्ति एक जना मर्नुभएको हुनाले सबै मरे, औ उहाँ सबैका निम्ति मर्नुभयो, र अब बाँच्नेहरूले आफू आफू बाँच्ने होइन, तर उहाँको निम्ति बाँच्नुपर्छ जो तिनीहरूका खातिर मर्नुभयो, र फेरि बिउँतनु पनि भयो।” (२ कोरि. ५:१४, १५) हो, राज्यका सेवकहरूको हैसियतमा अप्रिल महिनालाई आफ्नो सर्वोत्तम महिना बनाउने प्रयास गरेर हामी आफ्नोलागि होइन तर हाम्रो खातिर मर्नु हुनेको निम्ति बाँचिरहेका छौं भनेर प्रदर्शित गर्नसक्छौं!
३ अप्रिल महिनामा सहायक अग्रगामी गहोस्: प्रेरित पावलले निम्न कुरा बताएर हाम्रोनिम्ति उत्कृष्ट नमुना बसाले: “म आफ्नो जिन्दगीलाई कुनै मूल्यको वा प्रिय सम्झदिनँ। परमेश्वरको अनुग्रहको सुसमाचारको साक्षी दिनालाई, म मेरो दौड़ र प्रभु येशूबाट मिलेको सेवा मात्र पूरा गर्नमाग्छु।” (प्रेरि. २०:२४) हामीले पनि यहोवा परमेश्वरको विस्तृत साक्षी दिने सुअवसर पाएका छौं। त्यसैकारण, हामी अप्रिल महिनालाई आफूले सहायक अग्रगामीको कार्य गरेको सबैभन्दा उत्तम महिना बनाउन चाहन्छौं!
४ सन् २००० अप्रिल महिनामा पूरा पाँच सप्ताहन्त हुने भएकोले अग्रगामी गर्न अत्यन्तै राम्रो महिना हो। अप्रिल १९९८ मा अहिलेसम्मको सहायक अग्रगामीहरूको उच्च शिखर संख्या २,१७० पुगेको थियो, जुन प्रकाशकहरूको कुल संख्याको १२ प्रतिशत थियो। त्यसको एक वर्षभन्दा अलिपछि, अगस्त १९९९ मा प्रकाशकहरूको कुल संख्या १७ प्रतिशतभन्दा बढीले वृद्धि भयो। त्यसको अर्थ पहिले भन्दा धेरै अग्रगामीहरू हुनसक्ने हामीसित ठूलो सम्भाव्यता छ। यसबाहेक, पुऱ्याउनुपर्ने घण्टा पनि घटाइएकोले सेवाको यस पक्षमा मण्डलीका अझ थुप्रैले भाग लिनसक्ने भएका छन्। तसर्थ, प्रत्येक बप्तिस्मा प्राप्त प्रकाशकले प्रार्थनापूर्वक यस अप्रिल महिनामा सहायक अग्रगामीको काम गर्न सकिन्छ कि सकिंदैन भनेर विचार गर्नुपर्छ।
५ सन् २००० क्यालेन्डर-मा अप्रिल महिना हेर्दै तालिका बनाउनुहोस्। तपाईं कुन कुन दिन क्षेत्र सेवकाईमा जान सक्नुहुन्छ, निर्णय गर्नुहोस् अनि तपाईंले त्यस महिनाभरि बुझाउन सक्ने घण्टा जोड्नुहोस्। समय जोड्दा तपाईंले औपचारिक र अनौपचारिक साक्षी दुवैमा कति समय बिताउन सक्नुहुन्छ, त्यो पनि समावेश गर्नुहोस्। के जम्मा गर्दा सहायक अग्रगामीहरूले पुऱ्याउनुपर्ने ५० घण्टा पुग नपुग हुन्छ? घण्टा पुग्दैन भने सहायक अग्रगामी गर्न समय निकाल्न तपाईंको तालिकामा अझ अरू कुनै छाँटकाँट गर्न मिल्छ कि? महिनामा ५० घण्टा पुऱ्याउन तपाईंले दिनमा सरदर एक घण्टा ४० मिनेट बिताए पुग्छ।
६ अहिले नियमित अग्रगामीहरूले पुऱ्याउनुपर्ने घण्टा पनि घटाइएकोले के तपाईंले पूर्ण-समय सेवकाई गर्ने विचार गरिरहनुभएको छ? दिन लामो हुँदै जाने भएकोले अग्रगामीको काम सुरु गर्न अप्रिल उत्तम महिना हुनेछ! नियमित अग्रगामीहरूले पुऱ्याउनुपर्ने ७० घण्टा पूरा गर्न सक्छु कि सक्दिनँ पक्का छैन भने अप्रिल महिनामा सहायक अग्रगामीको काम गरेर लक्ष्यचाहिं ७० घण्टा राखे कसो होला? तपाईंलाई गर्नसक्छु जस्तो लागेपछि चाँडोभन्दा चाँडो नियमित अग्रगामीको काम थाल्नको निम्ति आवेदन भर्न जोस जाग्नेछ।—आवर मिनिस्ट्री, पृष्ठ ११३-१४ हेर्नुहोस्।
७ सुसमाचारको प्रकाशकको हैसियतमा पूर्णतया भाग लिनुहोस्: परमेश्वर र छिमेकीहरूप्रतिको साँचो प्रेमले आफ्नो व्यक्तिगत परिस्थितिअनुसार यहोवाको सेवा तनमनले गर्न हामी सबै प्रकाशक तथा अग्रगामीहरूलाई उत्प्रेरित गर्छ। (लूका १०:२७) “हामी परिश्रम र प्रयत्न गर्दछौं, किनभने हाम्रो आशा जीवित परमेश्वरमा राखिएको छ, जो सबै मानिसका, विशेष गरी उहाँमाथि विश्वास गर्नेका, मुक्तिदाता हुनुहुन्छ” भनेर हामीले देखाइरहेका हुनेछौं। (१ तिमो. ४:१०) त्यसैकारण, हामीले अप्रिल महिनामा राज्य प्रचार कार्यमा सबैले शत प्रतिशत भाग लिएको देख्ने आशा गर्नुपर्छ।
८ येशूको सल्लाह पनि हामी नबिर्सौं: “फसल ता साँच्चिनै प्रशस्त छ, तर खेतालाहरू भने थोरै छन्। यसकारण तिमीहरूले फसलका प्रभुलाई उहाँको आफ्नो फसलमा खेतालाहरू पठाइदिऊन् भनी बिन्ती गर।” त्यसो भन्नुभएको तुरुन्तै पछि येशूले आफ्ना १२ प्रेरितहरूलाई बोलाउनुभयो र तिनीहरूलाई प्रचार कार्यमा पठाउनुभयो। (मत्ती ९:३७, ३८; १०:१, ५, ७) त्यसको झन्डै एक वर्षपछि १२ प्रेरितहरू प्रचार कार्यमा सिपालु भएपछि येशूले “अरू सत्तरी जनालाई नियुक्त गर्नुभयो . . . र पठाउनुभयो” अनि तिनीहरूलाई पनि त्यस्तै निर्देशन दिनुभयो: “फसल ता प्रशस्त छ, . . . यसकारण फसलका प्रभुलाई प्रार्थना गर, र उहाँले आफ्नो फसलमा खेतालाहरू पठाइदिऊन्।” (लूका १०:१, २) बाइबलमा, प्रेरितको पुस्तकमा यहोवाले त्यस प्रार्थनाको जवाफ दिनुभएको कुरा बताइएको छ। सा.यु. ३३ पेन्तिकोससम्ममा चेलाहरूको संख्या बढेर झन्डै १२० पुगिसकेको थियो। अनि त्यसपछि क्रमिक रूपमा चेलाहरूको संख्या ३,००० र ५,००० पुग्यो। (प्रेरि. १:१५; २:४१; ४:४) त्यसपछि “चेलाहरूको संख्या . . . अत्यन्तै बढ़यो।” (प्रेरि. ६:७) त्यस्तै गरी आधुनिक समयमा पनि हामीले मालिकलाई अझ धेरै राज्य प्रचारकहरूको निम्ति बिन्ती गरिरहनुपर्छ! हाम्रो प्रार्थनाअनुरूप मण्डलीको प्रत्येक प्रकाशकले हरेक महिना सेवकाईमा भाग लिन खास प्रबन्धहरू गर्नुपर्छ।
९ फेरि एकचोटि सन् २००० क्यालेन्डर-मा अप्रिल महिना राम्रोसित हेर्नुहोस्। महिनाको सुरुको दुई दिन शनिबार र आइतबार पर्ने भएकोले राम्रो सुरुआत गर्न के तपाईं त्यस सप्ताहन्त सेवकाईमा भाग लिने योजना बनाउन सक्नुहुन्छ? के तपाईं यस महिनाभरि आफ्नो मण्डली पुस्तक अध्ययन समूहसित प्रत्येक “पत्रिका वितरण” दिनमा जान सक्नुहुन्छ? प्रत्येक आइतबार सेवकाईमा एक घण्टा वा त्योभन्दा अलि बढी समय बिताए कसो होला? दिन लामो हुने भएकोले साँझसम्म पनि उज्यालै हुन्छ। के तपाईं साँझपख पनि साक्षी कार्यमा भाग लिन सक्नुहुन्छ? अनि जागिर, स्कूल वा अन्य दिनचर्यामा लाग्दा अनौपचारिक साक्षी दिने मौका पाउँदा त्यसको पूरा सदुपयोग गर्न नचुक्नुहोस्। तपाईंले क्षेत्र सेवकाईमा बढी समय बिताउन सक्नुहुने दिनहरूमा चिह्न लगाउनुहोस्। अनि यस महिना सेवकाईमा बिताउनुभएको समयको रेकर्ड राख्न पनि क्यालेन्डर चलाउनुहोस्।
१० प्राचीनहरूबाट बप्तिस्मा अप्राप्त प्रकाशकको रूपमा सेवा गर्ने अनुमति पाएका योग्य व्यक्तिहरूको निम्ति अप्रिल महिना राम्रो समय हो। तपाईं कसैसित बाइबल अध्ययन गर्दै हुनुहुन्छ भने के त्यस व्यक्तिले सुसमाचारको प्रकाशकको हैसियतमा सेवा गर्नका लागि मण्डलीको अध्यक्षसित आग्रह गर्न योग्यको प्रगति गरिसकेको छ? तपाईंको बप्तिस्मा अप्राप्त छोराछोरी छन् भने के तपाईंले तिनीहरूको आध्यात्मिक प्रगतिबारे प्राचीनहरूसित छलफल गर्नुभएको छ? तिनीहरू प्रचारमा जान थाल्नको निम्ति के यो उपयुक्त समय हुनेछैन र?—आवर मिनिस्ट्री, पृष्ठ ९७-१०० हेर्नुहोस्।
११ सन् २००० अप्रिल महिनालाई सर्वोत्तम महिना बनाउन हामी सबैले सेवकाईमा भाग लिनुपर्छ अनि महिनाको अन्तमा क्षेत्र सेवकाई रिपोर्ट खसाल्नुपर्छ। (मर्कूस ६:३० तुलना गर्नुहोस्।) क्षेत्र सेवकाईमा पहिलो चोटि भाग लिने बप्तिस्मा अप्राप्त प्रकाशकहरूलाई समयमै रिपोर्ट खसाल्न प्रोत्साहित गर्नुपर्छ। हामी आफ्नो तर्फबाट सक्दो गरेर अप्रिल महिनाको रिपोर्टमा राम्रो योगदान पुऱ्याउनसक्छौं अनि हाम्रो प्रचार अभियानले यहोवाको भव्य प्रशंसा गर्नेछ।
१२ स्मरणार्थ उत्सवमा अरूलाई पनि लग्नुहोस्: सन् २००० को ख्रीष्टको मृत्युको स्मरणार्थमा उपस्थितिको नयाँ शिखर पुगेमा के हामी रोमाञ्चित हुनेछैनौं र? अवश्य! किनभने यसको अर्थ यहोवा परमेश्वर अनि येशू ख्रीष्टले हाम्रो खातिर देखाउनुभएको प्रेमको महान् अभिव्यक्तिप्रति मूल्यांकन जाहेर गर्न त्यतिखेर सबैभन्दा धेरै मानिसहरू जम्मा हुनेछन्। (यूह. ३:१६; १५:१३) तपाईं अनि तपाईंको परिवार कुनै हालतमा पनि स्मरणार्थ उत्सवमा उपस्थित हुन आवश्यक प्रबन्धहरू मिलाउनुहोस्।
१३ स्मरणार्थ उत्सवको निम्ति मानिसहरूलाई निमन्त्रणा दिन थाल्ने समय पनि अहिल्यै हो। को को उपस्थित भएको चाहनुहुन्छ, सूची बनाउनुहोस्। त्यसमा, पहिला अध्ययन गरेका, अहिले अध्ययन गरिरहेका र तपाईंको पुनःभेट सबैको नाउँ समावेश गर्नुहोस्। अनि तपाईंको काम, स्कूल तथा छरछिमेकका चिनेजानेका मानिसहरूका साथसाथै तपाईंले व्यापार गर्ने मानिसहरूको नाउँ पनि राख्नुहोस्। अन्य परिचित व्यक्तिहरू र नातेदारहरूको नाउँ राख्न पनि नबिर्सनुहोस्। सूची तयार भएपछि प्रत्येकलाई व्यक्तिगत रूपमा निमन्त्रणा दिन थाल्नुहोस्। स्मरणार्थ उत्सव कहाँ र कहिले हुनेछ स्पष्टसित बताउनुहोस्। अनि अप्रिल १९ नजिकै आएपछि तपाईंको सूचीमा भएका मानिसहरूलाई भेटेर वा टेलिफोनबाट सम्झाउनुहोस्। त्यस रात तपाईंसँगै स्मरणार्थ उत्सव जाने प्रस्ताव राख्नुहोस्।
१४ सोसाइटीको पहिलाको निर्देशनअनुरूप प्राचीनहरूको समूहले आफ्नो इलाकामा भएका सबै अनियमित प्रकाशकहरूलाई स्मरणार्थ उत्सवमा उपस्थित हुन प्रोत्साहित गर्न विशेष प्रयास गर्नेछन्। (मत्ती १८:१२-१४) यस सन्दर्भमा प्राचीनहरूले फेब्रुअरी २, १९९९ मा सोसाइटीले पठाएको पत्रको पुनरावृत्ति गर्नसक्छन्। मण्डलीको सचिवले सबै अनियमित प्रकाशकहरूको सूची बनाउनेछ र सेवा निरीक्षकले तिनीहरूलाई भेटेर स्मरणार्थ उत्सवमा उपस्थित हुन आमन्त्रित गर्न प्राचीनहरूलाई खटाउनेछ। सायद प्रोत्साहनजनक गोठालोरूपी भेटले यी अनियमित प्रकाशकहरूलाई क्षेत्र सेवकाईमा अप्रिल महिनादेखि नै पुनः सक्रिय हुन मदत पुऱ्याउनेछ। क्षेत्र सेवकाईमा अनुभवी प्रकाशकहरूसित काम गर्न आमन्त्रित गर्दा तिनीहरू प्रोत्साहित हुनेछन्।
१५ अप्रिल महिनामा पूरा समर्थन गर्न प्रोत्साहित गर्नुहोस्! सन् २००० अप्रिल महिनालाई अहिलेसम्मको सबैभन्दा उत्तम महिना बनाउन प्राचीन, सेवकाई सेवक र परिवारका शिरहरूले राम्रो चाँजोपाँजो मिलाउनु जरुरी हुन्छ। सबै कुरा व्यवस्थित गर्न र अगुवाइ लिन प्राचीनहरू व्यस्त हुनेछन्। (हिब्रू १३:७) सप्ताहन्त र हप्ताका अन्य दिनमा क्षेत्र सेवकाई सभाहरूका लागि व्यवहारिक प्रबन्धहरू मिलाउनुपर्छ। दिउँसो र साँझको प्रचार कार्यको निम्ति पनि थप सभाको प्रबन्ध मिलाउन सकिन्छ। अप्रिल महिनामा योजना गरिएको सम्पूर्ण तालिका सूचना पाटीमा टाँस्नुपर्छ। प्रत्येक सेवकाईको निम्ति सभा सञ्चालन गर्न कसैलाई खटाउनुपर्छ। प्रत्येक समूहलाई पुग्ने पर्याप्त इलाकाको प्रबन्ध गर्नुपर्छ।
१६ अप्रिल महिनामा प्रहरीधरहरा र ब्यूँझनुहोस्! प्रस्तुत गरिनेछ। चासो देखाउने जति सबैलाई चाहनुहुन्छ पुस्तिका प्रस्तुत गरेर गृह बाइबल अध्ययन सुरु गर्ने प्रयास गर्नुपर्छ। तसर्थ, पत्रिका तथा पुस्तिकाहरू पर्याप्त मात्रामा हुनुपर्छ।
१७ महिनाको अन्तमा सबै पुस्तक अध्ययन सञ्चालक तथा तिनीहरूका सहायकहरूले आफ्नो समूहमा पर्ने प्रत्येकलाई महिना मर्ने बित्तिकै क्षेत्र सेवकाई रिपोर्ट खसाल्न प्रोत्साहित गर्नसक्छन्। यसका लागि, आइतबार अप्रिल ३० को दिन छुट्याउन सकिन्छ। अनि सचिवले रिपोर्टहरू दर्ता गर्दा कुनै प्रकाशकले रिपोर्ट नखसालेको पत्ता लागेमा मे ६ तारिख सोसाइटीलाई मण्डलीको रिपोर्ट बुझाउनु अघि नै रिपोर्ट दिन दयालुपूर्वक सम्झाउन सक्छन्। तिनले ती प्रकाशकहरूलाई सम्पर्क गर्न पुस्तक अध्ययन सञ्चालकहरूलाई आग्रह गर्नसक्छन्।
१८ स्मरणार्थको समय परमेश्वरका जनहरूको निम्ति सबैभन्दा महत्त्वपूर्ण समय हो। यहोवाको सेवामा लाग्ने हामी सबैको निम्ति यो अत्यन्तै व्यस्त समय हुनुपर्छ। सुसमाचारको प्रकाशकहरूको हैसियतमा सबैले पूर्णतया भाग लिंदै, सहायक अग्रगामी गर्नसक्नेहरूले अग्रगामी गर्दै ख्रीष्टको मृत्युको स्मरणार्थमा लगनशील भई अरूलाई हाम्रो साथमा ल्यायौं भने पक्कै पनि व्यस्त हुनेछ। यहोवालाई साँचो हृदयले प्रार्थना गर्दै सन् २००० अप्रिल महिनालाई आफ्नो सर्वोत्तम महिना बनाउन प्रयास गरौं जसले परमेश्वरको प्रशंसा र महिमा गर्नेछ!—हिब्रू १३:१५.
[पृष्ठ ३-मा भएको पेटी]
सहायक अग्रगामी
हाम्रो अहिलेसम्मको उच्च शिखर संख्या: २,१७०
(अप्रिल १९९८)
[पृष्ठ ४-मा भएको पेटी]
कुल प्रकाशक
हाम्रो अहिलेसम्मको उच्च शिखर संख्या: २१,२१२
(अगस्त १९९९)
[पृष्ठ ५-मा भएको पेटी]
स्मरणार्थ उपस्थिति
हाम्रो अहिलेसम्मको उच्च शिखर संख्या: ४७,०८१
(१९९९)