यहोवाको प्रेमको निम्ति मूल्यांकन देखाउँदा पाइने आशिष्हरू —भाग २
१ गत महिना यस विषयअन्तर्गत हामीले सेवकाईमा यहोवाको प्रेमको निम्ति मूल्यांकन देखाउन सकिने चारवटा पक्षलाई प्रकाश पाऱ्यौं। (१ यूह. ४:९-११) हामी यहाँ थप पाँचवटा पक्षलाई उल्लेख गर्नेछौं। अरूलाई आध्यात्मिक तवरमा मदत गर्न पूर्ण रूपले भाग लिंदा हामीले आशिष् पाउनेछौं।
२ अनौपचारिक साक्षी: धार्मिकताको निम्ति भोकाएका र तिर्खाएका व्यक्तिहरूलाई खोज्ने अनि तिनीहरूलाई मदतकारी साहित्यहरू वितरण गर्ने यो एउटा प्रभावकारी तरिका हो। ‘समयको पूरा सदुपयोग गर्नु’ अनि हर अवसरमा र भेटेका जति सबैलाई साक्षी दिनु बेस हो। (एफि. ५:१६, नयाँ संशोधित संस्करण) यसरी साक्षी दिन हामीले भएभरको साहस बटुल्नुपर्ने हुनसक्छ तर यदि हामी परमेश्वरको प्रेमको मूल्यांकन गर्छौं र मानिसहरूको खाँचोलाई बुझ्छौं भने, हर अवसरमा हामी साक्षी दिन तत्पर हुनेछौं।—२ तिमो. १:७, ८.
३ ट्याक्सीमा आफूसँगै बसेको सहयात्रीसित कुराकानी सुरु गर्दा एक जना पूर्ण समय सेवकले ठूलो इनाम पाए। त्यस मानिसले चासो देखाए। पुनःभेट गरियो र बाइबल अध्ययन थालियो। उक्त मानिसले सच्चाइ स्वीकारे अनि प्रगति गरेर मण्डलीको प्राचीनसम्म भए!
४ चिठी लेख्ने: शारीरिक अशक्तता वा प्रतिकूल मौसमको कारण हामी घर-घरको प्रचार कार्यमा जान नसकौंला। तथापि, आफूले चिनेजानेका व्यक्तिहरू; जस्तै: प्रियजन गुमाएकाहरू, घरमा नभेटिएकाहरूलाई चिठी लेखेर हामी उनीहरूलाई छोटकरीमा साक्षी दिन सक्छौं। चिठीसँगै एउटा रोचक बाइबल सन्देश भएको समसामयिक पर्चा राख्न सक्छौं र कुनै प्रश्न छन् भने पत्राचार गर्न प्रोत्साहन दिन सक्छौं। ठेगाना प्रयोग गर्दा आफ्नो निजी वा राज्यभवनको ठेगाना प्रयोग गर्नुहोस्; कृपया शाखा कार्यालयको ठेगाना प्रयोग नगर्नुहोस्।
५ टेलिफोन साक्षी: घर-घरको सेवकाईमा भेट्न नसकेका मानिसहरूलाई साक्षी दिने यो एउटा अति उत्तम तरिका हो। दयालु, चतुर साथै कौशलतासाथ विवेकी हुँदै यसो गऱ्यौं भने, हामीले निकै राम्रा प्रतिक्रियाहरू प्राप्त गर्न सक्नेछौं। फ्रेबुअरी २००१ को हाम्रो राज्य सेवकाई, पृष्ठ ५-६ ले कसरी उत्तम परिणामहरू प्राप्त गर्न सकिन्छ भन्ने सन्दर्भमा व्यावहारिक सल्लाहहरू दिन्छन्।
६ टेलिफोनबाट साक्षी दिने क्रममा एउटी बहिनीले एउटी महिलालाई ‘के तपाईंले आफ्नो र आफ्नो परिवारको भविष्यबारे गम्भीरतासाथ सोच्ने गर्नुभएको छ’ भनेर प्रश्न गरिन्। ती महिलाले सोच्ने गरेकी छु भनेर जवाफ दिइन्। आफू एकदमै निराश भएकीले दिक्क मान्दै घरमा एक्लै धुमधुमती बसिरहने गरेको कुरा तिनले व्यक्त गरिन्। बहिनीले ती महिलाप्रति साँचो चासो देखाएकी हुनाले तिनी बहिनीसित नजिकैको पसलमा भेट्न राजी भइन्। फलतः ती महिला बाइबल अध्ययन गर्न राजी भइन्!
७ अपरिचितहरूलाई स्वागत गर्ने: हामी आफ्नो छिमेकीलाई प्रेम गर्छौं भने, हाम्रो सभामा आउने कुनै पनि अपरिचित व्यक्तिलाई ठम्याइहाल्छौं र उसलाई स्वागत गर्न सजग हुनेछौं। (रोमी १५:७) त्यस व्यक्तिलाई उसको आध्यात्मिक सुस्वास्थ्यप्रति निष्कपट चासो देखाउने मानिसहरूको माझमा बसिरहेको महसुस गराउनुहोस्। हाम्रो निष्कपट चासो अनि व्यक्तिगत बाइबल अध्ययन गर्ने प्रस्तावले उसलाई हाम्रो मदत स्वीकार्न उत्प्रेरित गर्नसक्छ।
८ हाम्रो असल आचरण: आफ्नो असल चालचलनद्वारा हामी सच्चाइको शोभा बढाउँछौं। (ती. २:१०) सांसारिक मानिसहरूले यहोवाका साक्षीहरूको हैसियतमा हाम्रो प्रशंसा गर्दा तिनीहरूले परमेश्वरको महिमा गरिरहेका हुन्छन्। (१ पत्रु. २:१२) यसले पनि अरूलाई जीवनको बाटोमा हिंड्न मदत गर्नसक्छ।
९ यहोवाले हामीप्रति देखाउनुभएको महान् प्रेमको मूल्यांकनस्वरूप यी पाँचवटा तरिकालाई पुनः अध्ययन गरेर व्यवहारमा उतारे कसो होला? (१ यूह. ४:१६) यसो गर्नुभएको खण्डमा तपाईंले धेरै लाभ उठाउनुहुनेछ।