परिवारका शिरहरू हो—राम्रो आध्यात्मिक तालिका कायम राख्नुहोस्
१ दशकौंसम्म बेबिलोनको मूर्तिपूजा र भ्रष्टाचारबीच बस्नुपरे तापनि दानियल यहोवाको “निरन्तर” सेवा गर्ने व्यक्तिको रूपमा चिनिन्थे। (दानि. ६:१६, २०) तिनले कसरी आफ्नो आध्यात्मिकता कायम राखे? साँचो उपासनासित सम्बन्धित गतिविधिहरू पूरा गर्ने तिनको व्यवस्थित तालिका थियो भनेर बाइबल रेकर्डले बताउँछ। उदाहरणका लागि, तिनले आफ्नो आदतअनुसार कौसीको कोठाबाट दिनमा तीनपल्ट प्रार्थना गर्थे। (दानि. ६:१०) निस्सन्देह, तिनले अन्य आध्यात्मिक गतिविधिहरू, जस्तै: व्यवस्था पढ्ने बानी पनि बसालेका थिए। यसप्रकार, जीवनलाई नै खतरामा पार्ने परीक्षाको सामना गर्नुपर्दा समेत दानियल यहोवाप्रतिको आफ्नो भक्तिमा अलिकति पनि ढलपल भएनन् र तिनलाई चमत्कारी ढंगमा बचाइयो।—दानि. ६:४-२२.
२ त्यस्तै गरी आज पनि “हर समय . . . सतर्क” रहन हामीले उत्कट प्रयत्न गर्नै पर्छ। (एफि. ६:१८) हामी बाँचिरहेको संसार “दुष्टको अधीनमा परेको छ।” (१ यूह. ५:१९) विरोध वा परीक्षाहरू अचानक आइपर्न सक्छन् र हाम्रो विश्वासको परीक्षा हुन सक्छ। महा संकष्टको दौडान परमेश्वरका सेवकहरूलाई मागोगको गोगले भीषण आक्रमण गर्नेछन्, जुन आक्रमणबाट उम्कने कुनै बाटो नदेखिन सक्छ। यसको लागि यहोवामा पूर्ण भरोसा राख्नु खाँचो छ।—इज. ३८:१४-१६.
३ “एउटा महत्त्वपूर्ण तरिका हो, प्रभावकारी पारिवारिक बाइबल पढाइ, अध्ययन तथा छलफललाई जीवनको अभिन्न भाग बनाउनु।” सन् १९९८ जिल्ला अधिवेशनको “परिवारहरू हो—दिनहुँ बाइबल पढ्ने बानी बसाल्नुहोस्!” भन्ने नाटकको सुरुमा यसो भनिएको थियो। त्यहाँ अझै यसो भनिएको थियो: “परिवारहरूले नियमित तवरमा यसो गरेको खण्डमा र बाइबल पढाइलाई अझ जीवन्त बनाउन सके भने यसले परिवारमाथि ठूलो प्रभाव पार्न सक्छ। यसले हाम्रो ज्ञान बढाउँछ, विश्वासलाई बलियो बनाउँछ। अनि यसमा पुरातन समयका अत्यन्तै विश्वासी पुरुष तथा स्त्रीहरूका उदाहरणहरू पनि पाइन्छ जसले हामीलाई सत्यको पक्षमा दृढ भई खडा रहन उत्प्रेरित गर्छ।” राम्रो आध्यात्मिक तालिकाका विभिन्न पक्षहरूबारे छलफल गर्दा, परिवारका शिरहरूले आफ्नो परिवारको आध्यात्मिक कार्यक्रमलाई सुधार्ने एक दुईवटा तरिका विचार गर्नुपर्छ।
४ परमेश्वरको वचन दिनहुँ पढ्नुहोस्: “परमेश्वरको राज्यले निर्विरोध राज्य गर्न थालेपछि अनि उहाँको इच्छा स्वर्गमाझैं यस पृथ्वीमा पनि पूरा हुँदा, कुनै पनि हिंस्रक मानिस अनि जनावरहरूले समेत ‘केही हानि न नोक्सानी’ नै गर्नेछन्। (यशै. ११:९; मत्ती ६:९, १०)” यी शब्दहरू सन् २००१ को दिनहुँ धर्मशास्त्र जाँच्ने पुस्तिकामा सेप्टेम्बर ११ को लागि शास्त्रपदअन्तर्गको टिप्पणीमा दिइएको थियो। यो सम्झौटा कत्ति सान्त्वनादायी साबित भएको छ! परिवारको शिरको हैसियतमा के तपाईं आफ्नो परिवारसँग दिनहुँ बाइबल पद जाँच्ने र टिप्पणी छलफल गर्ने गर्नुहुन्छ? यसो गर्नु एकदमै लाभदायी छ। यदि बिहान सबै जना भेला हुन सम्भव छैन भने, साँझपख तपाईं यसो गर्न सक्नुहुन्छ होला। एक जना बुबाले यसो भने: “हाम्रोलागि दैनिक बाइबल पद छलफल गर्ने उपयुक्त समय साँझको खाना खाने समय भएको छ।”
५ पारिवारिक रूपमा तपाईंले दैनिक पद छलफल गरिरहनुभएको छ भने, तपाईं प्रशंसायोग्य हुनुहुन्छ। दैनिक पद छलफलका साथै बाइबलको केही अंश पढेर पनि तपाईं थप लाभ उठाउन सक्नुहुन्छ होला। कसै-कसैले दैनिक पद लिइएको पूरै अध्याय पढ्ने गर्छन्। अरू कतिपयले चाहिं क्रमबद्ध रूपमा आफूलाई मनपर्ने बाइबलका पुस्तकहरू छनौट गरेर पढ्ने गर्छन्। दिनहुँ बाइबल पढाइले तपाईंको परिवारलाई, यहोवालाई दुःखी नतुल्याउने स्वास्थ्यकर भय खेती गर्न र उहाँको इच्छा गर्ने उनीहरूको चाहनालाई अझ गहिरो बनाउनेछ।—व्यव. १७:१८-२०.
६ दिइएको जानकारीको उपयोगिताबारे छलफल गर्न अलिकति समय निकाल्न सक्नुभयो भने, तपाईंको पारिवारिक बाइबल पढाइ कार्यक्रम र दैनिक पद छलफल झनै लाभदायी हुनेछ। मिनिस्ट्री स्कूल पाठ्यपुस्तक, पृष्ठ ६० मा यस्तो सल्लाह दिइएको छ: “तपाईं साप्ताहिक बाइबल पढाइका केही पदहरू छान्न . . . सक्नुहुन्छ, तिनीहरूको अर्थबारे छलफल गर्न सक्नुहुन्छ अनि यस्ता प्रश्नहरू गर्न सक्नुहुन्छ: ‘यसले कसरी हाम्रोलागि निर्देशन प्रदान गर्छ? हामी कसरी यी पदहरू सेवकाईमा प्रयोग गर्न सक्छौं? यसले यहोवा र उहाँले कामहरू गर्नुहुने तौरतरिकाहरूबारे के प्रकट गर्छ अनि त्यसले कसरी उहाँप्रतिको हाम्रो मूल्यांकन बढाउँछ?’ ” यस्तो आध्यात्मिक कुराकानीले तपाईंको परिवारका सबैलाई “प्रभुको इच्छा के रहेछ, सो [बुझ्न]” मदत गर्नेछ।—एफि. ५:१७.
७ पारिवारिक अध्ययन: हरेक हप्ता नियमित तवरमा पारिवारिक अध्ययन सञ्चालन गर्नु परिवारका शिरहरूको निम्ति आफ्ना छोराछोरीलाई आध्यात्मिक कुराले प्राथमिकता पाउनुपर्छ भनेर देखाउने उत्तम तरिका हो। एक जना जवान मानिस यसप्रकार सम्झन्छन्: “कहिलेकाहीं बुबा कामबाट यति साह्रो थाकेर आउनुहुन्थ्यो कि उहाँ मुस्किलले मात्रै आँखा उघारेर बस्न सक्नुहुन्थ्यो तर त्यस्तो हुँदा-हुँदै पनि पारिवारिक अध्ययन हुन्थ्यो र यसले हामीलाई अध्ययनको गम्भीरतालाई बुझ्न मदत गऱ्यो।” यस्तो प्रबन्धलाई सफल बनाउन केटाकेटीले पनि योगदान पुऱ्याउन सक्छन्। नौ जना छोराछोरी भएको एउटा परिवारलाई अरू बेला समय नै नमिल्ने भएकोले पारिवारिक अध्ययन गर्न उनीहरू नियमित रूपमा पाँच बजे उठ्थे।
८ पारिवारिक अध्ययनलाई प्रभावकारी बनाउन परिवारको शिर ‘आफ्नो शिक्षाको विषयमा होसियार हुनै पर्छ।’ (१ तिमो. ४:१६) मिनिस्ट्री स्कूल पाठ्यपुस्तक, पृष्ठ ३२ यसो भन्छ: “प्रभावकारी पारिवारिक अध्ययनको लागि पहिला आफ्नो परिवारको आवश्यकतालाई राम्ररी बुझ्नु जरुरी छ। तपाईंको परिवारका सदस्यहरूले आध्यात्मिक तवरमा कस्तो प्रगति गरिरहेका छन्? . . . आफ्ना छोराछोरीसित क्षेत्र सेवकाईमा जानुहुँदा, के उनीहरूले आफ्ना साथीहरूको अगाडि आफूलाई यहोवाका साक्षीहरूको रूपमा चिनाउन हिचकिचाउँछन्? के उनीहरूले तपाईंले सञ्चालन गर्नुहुने पारिवारिक बाइबल पढाइ र अध्ययनको कार्यक्रमबाट आनन्द उठाउँछन्? के उनीहरूले साँच्चै यहोवाको मार्गलाई आफ्नो जीवनको मार्ग बनाइरहेका छन्? परिवारको शिरको हैसियतमा तपाईंले परिवारका प्रत्येक सदस्यको मनमा आध्यात्मिक गुणहरू स्थापित तथा बढाउन के गर्नुपर्छ भनी ध्यान दिएर हेर्नुभयो भने थाह पाउनुहुनेछ।
९ मण्डलीका सभाहरू: मण्डलीका सभाहरूको लागि तयारी गर्नु र उपस्थित हुनु तपाईंको साप्ताहिक तालिकाको महत्त्वपूर्ण भाग हुनुपर्छ। (हिब्रू १०:२४, २५) कहिलेकाहीं, सबै परिवार मिलेर कुनै-कुनै सभाहरूको लागि तयारी गर्न सक्नुहुन्छ। अन्तिम घडीमा आएर तयारी गर्नुभन्दा, के तपाईं पहिल्यै राम्ररी तयार गर्न समय मिलाउन सक्नुहुन्छ? यस सन्दर्भमा तपाईंले आफ्नो तालिका राम्ररी मिलाउनुभएको छ भने, त्यसले तपाईंको तयारी अनि सभाहरूबाट तपाईंले उठाउनुहुने लाभ दुवैको गुणस्तर बढाउनेछ।—हितो. २१:५.
१० गुणस्तर र नियमितता प्रभावकारी आध्यात्मिक तालिकाको चिनारी हुन्। सबै सभाहरूको लागि तयारी गर्न परिस्थितिले दिएन भने नि? मिनिस्ट्री स्कूल पाठ्यपुस्तक, पृष्ठ ३१ मा यस्तो सुझाव दिइएको छ: “सबै तयारी गर्न समयले भ्याउँदैन भन्दै हतार-हतार विषयवस्तु खरखर मात्र हेर्ने वा अध्ययन नै नगर्ने खतरादेखि जोगिनुहोस्। बरु, तपाईं कति अध्ययन गर्न सक्नुहुन्छ निधो गर्नुहोस् र यसलाई राम्ररी अध्ययन गर्नुहोस्। हरेक हप्ता यसै गर्नुहोस्। समयमा, आफ्नो अध्ययन तालिकामा अरू सभाहरूको तयारी पनि समावेश गर्ने कोसिस गर्नुहोस्।
११ परिवारहरू सभामा चाँडै आउँदा, त्यसले उनीहरूलाई यहोवाको प्रशंसा गर्न र उहाँले प्रदान गर्नुहुने निर्देशनबाट लाभ उठाउन सही मनोभावसहित तम्तयार रहन मदत गर्छ। के तपाईंको परिवारको यस्तो बानी छ? यसको लागि राम्रो योजना र परिवारका सबैले सहयोग गर्नु आवश्यक छ। यदि तपाईंले आफ्नो परिवार जहिले पनि हतारमा भएको र सभा हुने रात तनावमा भएको पाउनुभयो भने, के तपाईंको तालिकामा काँटछाँट गर्न सकिन्छ? पहिल्यै गर्न सकिने त्यस्ता कुनै कुराहरू पो छन् कि? यदि परिवारको एक जना सदस्य कामको भारले लादिएको छ भने, अरूले मदत गर्न सक्छन् कि? सबै जना सभाको लागि केही मिनेट चाँडो हिंड्दा कतै यसले तनाव कम गर्छ कि? राम्रो योजनाले परिवार तथा मण्डलीमा शान्तिको आत्मा छाउन योगदान पुऱ्याउँछ।—१ कोरि. १४:३३, ४०.
१२ क्षेत्र सेवा: सेवकाईमा भाग लिन निश्चित समय छुट्याउनु पनि राम्रो आध्यात्मिक तालिकाको अर्को भाग हो। जेसन नाउँ गरेका एक जना जवान सम्झन्छन्: “मेरो परिवारमा, शनिबार बिहान सबै जना क्षेत्र सेवामा जान्थे। मेरोलागि यो एकदमै राम्रो कुरा थियो किनभने जति बढी म सेवकाईमा गएँ, त्यति नै यसले गर्दा हुने असल नतिजाहरू देख्नुका साथै अझ आनन्दित भएँ।” त्यस्तै गरी, साक्षी परिवारमै हुर्केबढेका धेरैले हरेक हप्ता सेवकाईको लागि निश्चित समय छुट्याउँदा त्यसले उनीहरूलाई मसीही सेवकहरूको हैसियतमा प्रगति गर्न मदत गरेको याद गरेका छन्।
१३ व्यवस्थित तालिकाले तपाईंको परिवारले क्षेत्र सेवामा बिताउने समय अझ आनन्ददायी तथा फलदायी बनाउन पनि मदत गर्छ। कसरी यसो गर्न सकिन्छ? जुलाई १, १९९९ को प्रहरीधरहरा, पृष्ठ २१ मा यस्तो सल्लाह दिइएको छ: “के तपाईं कहिलेकाहीं पारिवारिक अध्ययनको बेला परिवारका सदस्यहरूलाई साप्ताहिक क्षेत्र सेवकाईका लागि तयारी गर्ने मदत दिनुहुन्छ? यसो गर्नु निकै फाइदाजनक हुन सक्छ। (२ तिमोथी २:१५) यसो गर्नाले तिनीहरूले सेवकाई अर्थपूर्ण र फलदायी बनाउने मदत पाउनेछन्। कहिलेकाहीं पूरै अध्ययन सेवकाईको तयारी गर्नका लागि छुट्याउन सक्नुहुन्छ। पारिवारिक अध्ययनको अन्तमा अथवा हप्ताको कुनै समयमा क्षेत्र सेवकाईबारे तपाईंले अक्सर छोटो छलफल गर्न सक्नुहुन्छ।” के तपाईंको परिवारले यसो गरिहेरेको छ?
१४ प्रगति गरिरहनुहोस्: यस छलफलपछि, तपाईंको परिवारले कुन क्षेत्रमा राम्रो गरिरहेको रहेछ, के तपाईंले याद गर्नुभयो? परिवारको सराहना गर्नहोस् र यी क्षेत्रहरूमा उन्नति गरिरहने प्रयत्न गर्नुहोस्। धेरै क्षेत्रमा सुधार गर्नुपर्ने आवश्यकता देख्नुभयो भने, सुरुमा एक दुईवटा क्षेत्र छानेर त्यसमा काम गर्नुहोस्। त्यो तपाईंको आध्यात्मिक तालिकाको भाग भइसकेपछि अर्को एक दुईवटा क्षेत्रमा काम गर्नुहोस्। सकारात्मक र व्यावहारिक हुनुहोस्। (फिलि. ४:४, ५) आफ्नो परिवारको लागि राम्रो आध्यात्मिक तालिका स्थापित गर्न निकै मेहनत गर्नुपर्छ तर यो मेहनत त्यसै खेर जाँदैन किनभने यहोवा हामीलाई यस्तो आश्वासन दिनुहुन्छ: “आफ्नो मार्ग सुधार्नेलाईनै परमेश्वरबाट हुने उद्धार म देखाउनेछु।”—भज. ५०:२३.