शिष्ट तालिकाअनुसार प्रगतिशील भएर हिंड्नुहोस्
१ फिलिप्पीको मण्डली स्थापना गर्नमा प्रेरित पावलको महत्त्वपूर्ण योगदान भएको हुनाले त्यस मण्डलीप्रति उनको विशेष स्नेह थियो। तिनीहरूले दिएका मायालु भौतिक प्रबन्धहरूको लागि पावल कृतज्ञ थिए र तिनीहरू राम्रा उदाहरण हुन् भनी उनले भने।—२ कोरि. ८:१-६.
२ गहिरो प्रेमले गर्दा फिलिप्पीहरूलाई पत्र लेख्न पावल प्रेरित भएका थिए। इन्साइट पुस्तक, खण्ड २, पृष्ठ ६३१ ले यस्तो रिपोर्ट दिन्छ: “सम्पूर्ण पत्रभरि तिनले फिलिप्पीको मण्डलीलाई उत्तम मार्गमा लागिरहन, अझ बढी विवेकको खोजी गर्न, जीवनको वचनलाई बलियो गरी पक्री राख्न, दह्रो विश्वास अनि पछि पाउने इनाममा आशा राख्दै अघि बढ्न प्रोत्साहन दिए।” तिनीहरूले यो प्रोत्साहनलाई खुशीसाथ स्वीकारे अनि प्रेरितहरूसित दरिलो प्रेमको बन्धन बाँधे। पावलका शब्दहरूले आज हाम्रो लागि विशेष अर्थ राख्छ। विशेषगरि यसले हामीलाई फिलिप्पी ३:१५-१७ मा उल्लिखित उनको सल्लाहलाई ध्यानपूर्वक मनन गर्ने राम्रो कारण दिन्छ।
३ परिपक्व मानसिक मनोवृत्ति अत्यावश्यक छ: फिलिप्पी ३:१५ मा पावलले वर्षौंको अनुभवी मानिसलेझैं लेखे। तिनीहरू सही मानसिक मनोवृत्ति भएकाहरू हुन् भनेर प्रशंसा गर्दै पावलले तिनीहरूको आध्यात्मिक प्रगति मानी लिए। जबसम्म तिनीहरूको मानसिक मनोवृत्तिमा येशूले प्रदर्शन गर्नुभएको विनम्रता र मूल्याङ्कन झल्कन्थ्यो तबसम्म तिनीहरूले “निष्खोट र सुधा भएर . . . जीवनको वचन” बलियो गरी समाती राख्न सक्थे। (फिलि. २:१५, १६) हामीले पावलका शब्दहरू पढ्दा पावलले हामीसित कुरा गरिरहेको जस्तो लाग्नुपर्ने हो। यसप्रकार हामी साँच्चै नै येशूको जस्तै मानसिक मनोवृत्ति कायम राख्दै आफूले पाएका अवसरहरूप्रति विनम्र मूल्याङ्कन जाहेर गर्ने इच्छा राख्छौं। यो र अन्य विषयहरूमा मदतको लागि हामी निरन्तर यहोवालाई प्रार्थनामा बिन्ती गर्छौं।—फिलि. ४:६, ७.
४ फिलिप्पी ३:१६ ले सङ्केत गरेझैं हामी प्रत्येकले प्रगति गर्ने प्रयास गर्नुपर्छ। “प्रगति” शब्दको अर्थ “अगि बढ्नु, उन्नति गर्नु” हो। प्रगतिशील व्यक्तिहरूले “नयाँ विचारहरू, आविष्कारहरू अथवा अवसरहरूमा चासो” राख्छन्। मसीहीत्व कहिल्यै अचल रहँदैन र त्यसलाई पछ्याउनेहरू सधैं अगि बढिरहनु पर्छ भनी फिलिप्पीहरूले बुझेको पावल चाहन्थे। आफूलाई जाँच्न इच्छुक हुनु, आफ्ना कमजोरीहरू मानी लिनु, अझ बढी गर्ने अवसरहरू खोज्नु अथवा आफूले गरिरहेको सेवाको गुणस्तर बढाउनु जस्ता कार्यहरूले तिनीहरूको प्रगतिशील मनोभावलाई प्रदर्शन गर्नेथियो। आफ्नो क्रियाकलापलाई अझ विस्तृत गर्दै र परमेश्वरको वचनलाई बुझ्दै आज यहोवाको पार्थिव सङ्गठन प्रगतिशील ढङ्गमा अघि बढ्दैछ। यसका सम्पूर्ण प्रबन्धहरूको फाइदा उठाउँदै यसको कार्यमा पूर्णतया भाग लिएर हामी सबै जना सङ्गठन सङ्गसङ्गै हिंड्नुपर्छ।
५ प्रगति गर्न शिष्ट तालिकाको खाँचो हुन्छ: शिष्ट तालिकामा पहिले हिंडेझैं ‘त्यहीबमोजिम चल्न’ आफ्ना भाइहरूलाई आग्रह गर्दै पावलले आफ्नो कुरा अगि बढाए। (फिलि. ३:१६) शिष्ट हुन हामीले आफ्ना कामकुराहरू तथा व्यक्तिहरूलाई तिनीहरूको उचित स्थानमा राख्नुपर्छ र भद्र हुनुपर्छ। यहोवाको सङ्गठन र एकअर्कासित नजिक रहेर फिलिप्पीका मसीहीहरूले आफूलाई उचित स्थानमा राखे। तिनीहरूको जीवन प्रेमको व्यवस्थाद्वारा सञ्चालित थियो। (यूह. १५:१७; फिलि. २:१, २) तिनीहरूको “चाल ख्रीष्टको सुसमाचारको योग्य होस्” भनी पावलले आग्रह गरे। (फिलि. १:२७) आज पनि शिष्टता र भद्र चाल मसीहीहरूको लागि उत्तिकै महत्त्वपूर्ण छ।
६ तालिका भनेको तय गरिएको तरिकाअनुसार काम गर्ने बानी हो। तसर्थ, चल्दै आएको रीतअनुसार गर्नुसित यो सम्बन्धित छ। तालिका हुनु हाम्रै फाइदाको लागि हो किनभने कुनै अर्को कदम चाल्नु पर्दा त्यसअघि निर्णय गर्न रोकेर विचार गरिरहनु आवश्यक हुँदैन। हामीले एउटा पद्धति बसालिसकेका हुन्छौं र त्यो पछ्याउने बानी परिसकेको हुन्छ।
७ ईश्वरतान्त्रिक शिष्ट तालिकामा स्वस्थकर, फाइदाजनक तथा ईश्वरीय बानी तथा चलनहरू समाविष्ट हुन्छ र त्यसको उद्देश्य आफूलाई आध्यात्मिकतामा बढाउँदै लैजानु, अरूलाई मदत दिनु अनि सम्भव भएमा यहोवाको सेवामा अझ बढी गर्नु हो। यी लक्ष्यहरू प्राप्त गर्न व्यक्तिगत अध्ययन गर्ने, सभाहरूमा नियमित उपस्थित हुने र प्रचार-कार्यमा सहभागी हुने जस्ता कुराहरू समाविष्ट भएको तालिका बनाउन अनि त्यसमा लागिरहन खाँचो पर्छ।
८ शिष्ट तालिकामा चाहिने अत्यावश्यक तत्त्वहरू: एउटा अत्यावश्यक तत्त्व “ज्ञान र सबै विवेक” हो। (फिलि. १:९) व्यक्तिगत अध्ययनले हाम्रो विश्वासलाई बलियो बनाउँछ, सत्यप्रति हाम्रो मूल्याङ्कन बढाउँछ र असल कार्यहरू गर्न उत्प्रेरित गर्छ। तर अध्ययन गर्ने बानीमा एकरूपता ल्याउन कसै कसैलाई गाह्रो परेको छ। त्यसो हुनुको एउटा प्रमुख कारण, समयको अभाव हो।
९ दैनिक बाइबल पढाइको फाइदाबारे जति भने पनि पर्याप्त हुँदैन। यसका निर्देशनहरू हर किसिमले “उपयोगी” छन्। (२ तिमो. ३:१६, १७) हाम्रो दैनिक तालिकामा बाइबल अध्ययन गर्ने समय कसरी निकाल्न सक्छौं? आफ्नो मन जागा हुँदा केही मिनेट छिटो उठेर प्रत्येक बिहान पढ्न केहीले समय निकाल्छन्। अरूले भने राती सुत्नुअघि केही मिनेट पढ्नु बेस पाएका छन्। दिनभरि घरमै हुने पत्नीहरूले घरका सदस्यहरू काम अथवा स्कूलबाट फर्किनुअघि दिउँसो अलिकता समय निकाल्न सक्छन्। नियमित बाइबल पढाइको अलावा कसै कसैले प्रोक्लेमर्स पुस्तकको पढाइलाई पनि आफ्नो नियमित साप्ताहिक तालिकामा समावेश गरेका छन्।
१० हामीले नयाँ बानीहरू बसाल्दा त्यसले पुराना बानीहरूसित टक्कर खाने सम्भावना त अवश्य हुन्छ। बितेको समयमा अनावश्यक क्रियाकलापहरूमा हाम्रो समय खेर गइरहेको हुन सक्छ। त्यस्ता बानीहरू छोड्नु सजिलो हुँदैन। हाम्रो अध्ययन गर्ने बानी यस्तै हुनुपर्छ भनी कसैले भन्नेछैन; न ता यस सम्बन्धमा हामीले कसैलाई लेखा नै दिनुपर्छ। हाम्रो अध्ययन गर्ने बानीको एकरूपता मुख्यतया “उच्च कुराहरू” प्रति हाम्रो मूल्याङ्कन र “समयको अवसर” विचार गर्ने हाम्रो इच्छुकतामा निर्भर गर्छ।—फिलि. १:११; एफि. ५:१६.
११ आवश्यक निर्देशन र प्रोत्साहन दिएर हाम्रो आध्यात्मिक प्रगतिमा मसीही सभाहरूले महत्त्वपूर्ण भूमिका खेल्छन्। यसर्थ, सभाहरूमा उपस्थित हुनु हाम्रो शिष्ट तालिकाको अर्को महत्त्वपूर्ण भाग हो। पावलले यसको महत्त्वमाथि जोड दिए। मसीही सभाहरूमा उपस्थित हुनु हाम्रा छनौटहरूले निर्धारित गर्ने विकल्प होइन।—हिब्रू १०:२४, २५.
१२ हामीले आफ्नो साप्ताहिक क्रियाकलापहरूको योजना बनाउँदा शिष्टता कसरी प्रदर्शन गर्न सकिन्छ? कसै कसैले व्यक्तिगत कामकुराहरूको निम्ति खास समय तोकेर बाँकि भएको समयमा सभामा जाने समय मिलाउँछन् तर हुनुपर्ने त ठीक उल्टो हो। हाम्रा साप्ताहिक सभाहरूलाई प्राथमिकता दिनुपर्छ अनि बाँकि समयमा अन्य क्रियाकलापहरू मिलाउनुपर्छ।
१३ सभामा नियमित तवरमा उपस्थित हुन राम्रो योजना र पारिवारिक सहयोग आवश्यक हुन्छ। हप्ताभरि धेरैको व्यस्त तालिका हुने हुनाले समय निकाल्न निकै गाह्रो हुन्छ। तसर्थ, सम्भव भएमा परिवार एकसाथ बसेर खान, तयार हुन र सभा सुरु हुन अगावै पुग्न बेलुकाको खाना अलि छिट्टै खाने तालिका बनाउनुपर्छ। त्यसो गर्न परिवारका प्रत्येक सदस्यहरूले बेग्लाबेग्लै ढङ्गमा सहयोग पुऱ्याउन सक्छन्।
१४ शिष्ट तालिकाअनुसार प्रगतिशील ढङ्गमा हिंड्ने हो भने नियमित तवरमा क्षेत्र सेवकाईमा भाग लिनु अपरिहार्य छ। राज्य समाचार प्रचार गर्ने गहन जिम्मेवारीलाई हामी सबैले स्पष्टसित बुझेका छौं। वास्तवमा त्यसले गर्दा नै हामीहरू यहोवाका साक्षीहरू भएका हौं। (यशै. ४३:१०) अहिले भइरहेकोमध्ये सबैभन्दा जरूरी र फाइदाजनक काम भएकोले हाम्रो दैनिक तालिकाको यस भागलाई भइपरिआउने कार्यको रूपमा हेर्नु मिल्दैन। पावलले यस्तो सल्लाह दिए: “उहाँद्वारानै हामी निरन्तर स्तुतिको बलिदान परमेश्वरलाई चढ़ाऔं, जो उहाँको नाउँ स्वीकार गर्ने हाम्रो ओठको फल हो।”—हिब्रू १३:१५.
१५ हप्ताभरिको क्रियाकलापको योजना बनाउँदा क्षेत्र सेवकाईको लागि खास समय छुट्याउनुपर्छ। हुनसक्छ, मण्डलीले हप्तामा धेरै चोटि सेवकाईको लागि सभा प्रबन्ध गरेको होला। त्यस अवस्थामा तपाईंले कुन चाहिंमा भाग लिने भनी छाने मात्र पुग्छ। पत्रिकाहरू अथवा अन्य साहित्यहरू चलाएर घर-घरको सेवा, पुनःभेटहरू र बाइबल अध्ययन सञ्चालन गरेर सेवकाईको हरेक पक्षमा भाग लिने प्रयास गर्नु राम्रो हो। साहित्यहरू आफूसित राखेर र वार्तालाप सुरु गर्ने अवसरप्रति सजग भएर हामीले अगावै अनौपचारिक साक्षीका लागि समेत तयारी गर्न सक्छौं। हामी क्षेत्र सेवकाईमा प्रायजसो एक्लै जाँदैनौं, अतः आफूसित जाने व्यक्तिको तालिकाबारे सोधपूछ गर्नुपर्छ। यसो गऱ्यौं भने दुवैको निम्ति अनुकूल प्रबन्ध मिलाउन सकिन्छ।
१६ प्रचार गरिने इलाकामा मानिसहरूले देखाएको बेवास्ताको बावजूद हाम्रो प्रचार तालिकालाई कायम राख्नु पर्छ। थोरैले मात्र सुन्नेछन् भनी हामीलाई पहिले नै थाहा छ। (मत्ती १३:१५; २४:९) इजकिएललाई ‘विद्रोही, जिद्दी र अट्टेरी’ मानिसहरूकहाँ गएर प्रचार गर्ने जिम्मा लगाइएको थियो। तिनलाई “तिनीहरूजस्तै जिद्दीवाल र हठी” तुल्याएर अर्थात् तिनको “निधार दर्शन ढुङ्गाभन्दा कड़ा पत्थरतुल्य” पारिदिएर इजकिएललाई मदत गर्ने प्रतिज्ञा यहोवाले गर्नुभयो। (इजकि. २:३, ४; ३:७-९) तसर्थ, सेवकाईको नियमित तालिका बनाउन अनवरत चेष्टाको खाँचो हुन्छ।
१७ अनुकरण गर्नका लागि असल उदाहरणहरू: अगुवाइ लिने कोही हुँदा हामीमध्ये धेरै जना सेवकाईमा राम्ररी भाग लिन सक्छौं। पावल र उनका सहचरहरूले राम्रो उदाहरण बसाले र उनको अनुकरण गर्न अरूलाई आग्रह गरे। (फिलि. ३:१७) आध्यात्मिक तवरमा बलियो रहन अत्यावश्यक सबै तत्त्वहरू उनको तालिकामा समाविष्ट थियो।
१८ त्यस्तैगरि, आज पनि हामीसित असल उदाहरणहरू छन्। हिब्रू १३:७ मा पावलले यसप्रकार आग्रह गरे: “तिमीहरूका अगुवाहरूलाई सम्झ र तिमीहरूका जीवनको नतिजालाई विचार गरेर तिनीहरूको विश्वासको देखा-सिकी गर।” निस्सन्देह, येशू हाम्रो लागि सबैभन्दा उत्कृष्ट उदाहरण हुनुहुन्छ तापनि हामीले अगुवाइ गर्नेहरूको विश्वासको देखासिकी गर्न सक्छौं। अरूको लागि असल उदाहरण हुनुपर्ने खाँचोप्रति प्राचीनहरू पावल जस्तै सजग हुनुपर्छ। तिनीहरूका व्यक्तिगत परिस्थितिहरू बेग्लाबेग्लै हुन सक्छन् तापनि राज्य सम्बन्धी कामकुराहरूलाई प्रथम स्थानमा राख्न तिनीहरूले शिष्ट तालिका कायम गरिरहेका छन् भनी देखाउन सक्नु पर्छ। सांसारिक र पारिवारिक जिम्मेवारीहरूको बावजूद व्यक्तिगत अध्ययन गर्न, सभामा उपस्थित हुन र क्षेत्र सेवकाईमा अगुवाइ लिन प्राचीनहरूले सुस्थापित बानीहरू बसालेको हुनुपर्छ। “आफ्नो घर राम्ररी चलाउनसक्ने” भनी प्राचीनहरूले प्रमाण दिंदा मण्डलीका सबै जना शिष्ट तालिकामा हिंड्न प्रोत्साहित हुनेछन्।—१ तिमो. ३:४, ५.
१९ नयाँ सेवा वर्षको लागि लक्ष्यहरू: हाम्रो व्यक्तिगत तालिकालाई केलाएर हेर्ने उपयुक्त समय नयाँ सेवा वर्षको सुरुआत हो। गत वर्षमा हाम्रो क्रियाकलापको पुनरावृत्तिले के देखाउँछ? के हामीले आफ्नो क्रियाकलापको स्तरलाई कायम राख्न अथवा सम्भवतः बढाउन सक्यौं? शायद हामीले व्यक्तिगत अध्ययन नियमित रूपमा गर्न सक्यौं होला। बढी नियमिततासाथ सेवामा उपस्थित भयौं होला अथवा सहायक अग्रगामी सेवामा भर्ती भएर क्षेत्र सेवकाईलाई बढाउन सक्यौं होला। शायद हाम्रो मण्डली अथवा परिवारको खातिर कुनै दयापूर्ण मसीही कार्य गऱ्यौं होला। यदि हो भने, परमेश्वरलाई खुशी तुल्याउने बाटोमा हिंड्यौं भनेर आनन्दित हुन सक्ने र त्यसमा “झन् बढ़दै” जाने हामीसित बलियो कारण छ।—१ थिस्स. ४:१.
२० तर हाम्रो तालिका अनियमित अथवा आक्कलझुक्कल मात्र भएको भए नि। आध्यात्मिक तवरमा हामीमाथि कस्तो असर पऱ्यो? के कुनै कारणले गर्दा हाम्रो प्रगतिमा अवरोध पुग्यो? यहोवासित मदतको आग्रह प्रगतिको सुरुआत हो। (फिलि. ४:६, १३) परिवारका अन्य सदस्यहरूसित आफ्ना आवश्यकताहरू छलफल गर्नुहोस् अनि आफ्नो तालिकामा छाँटकाँट गर्न तिनीहरूको मदत माग्नुहोस्। तपाईंको कुनै समस्या छ भने प्राचीनहरूसित मदत माग्नुहोस्। हामीले साँचो प्रयास गऱ्यौं र यहोवाका निर्देशनहरू सुन्यौं भने “बेकम्मा र निष्फल” हुनबाट जोगिनेछौं भनी ढुक्क हुन सक्छौं।—२ पत्रु. १:५-८.
२१ शिष्ट तालिकाअनुसार हिंड्नाले आशिष्हरू ल्याउँछ जसले गर्दा तपाईंका प्रयासहरू सार्थक हुन्छन्। शिष्ट तालिकाअनुसार प्रगतिशील भएर हिंड्न कटिबद्ध हुनु भएपछि ‘प्रयत्न गर्नामा अल्छी नहुनुहोस्, आत्मामा जोशिलो हुनुहोस्, प्रभुको [यहोवाको, न्यु व.] सेवा गर्दै रहनुहोस्।’ (रोमी १२:१)—यस विषयमा अझ विस्तृत छलफलको लागि मे १, १९८५ को द वाचटावर, पृष्ठ १३-१७ हेर्नुहोस्।