अनौपचारिक साक्षी दिएर यहोवाको प्रशंसा गर्नुहोस्
१ यहोवाका इमानदार सेवकहरूले दिनहुँ उहाँको प्रशंसा गर्ने मौकाहरू खोज्छन्। (भज. ९६:२, ३; हिब्रू १३:१५) अनौपचारिक साक्षी दिएर हामी यस्तो मौका खोज्न सक्छौं। अनौपचारिक साक्षीमार्फत कसैले आफूलाई राज्य सन्देश सुनाएकोमा आज यहोवाका थुप्रै उपासकहरू कृतज्ञ छन्।
२ कुनै एक व्यक्तिलाई अनौपचारिक साक्षी दिंदा अक्सर त्यस व्यक्तिमार्फत अरूले पनि राज्य सन्देश सुन्ने मौका पाउँछन्। उदाहरणका लागि, याकूबको इनारमा एउटी सामरी स्त्रीसित येशूले गर्नुभएको कुराकानीले गर्दा अन्य थुप्रैले सुसमाचारमा चासो लिए। (यूह. ४:६-३०, ३९-४२) फिलिप्पीमा झ्यालखानमा थुनिंदा पावल र सिलासले झ्यालखानका हाकिमलाई साक्षी दिए अनि तिनका सम्पूर्ण परिवारले सच्चाइ स्वीकारे।—प्रेरि. १६:२५-३४.
३ मौकाहरू: अनौपचारिक साक्षी दिने तपाईंले कस्ता मौकाहरू पाउन सक्नुहुन्छ? कसै-कसैले किनमेल गर्दा, सार्वजनिक यातायातमा यात्रा गर्दा वा डाक्टरलाई भेट्न पर्खिरहेको बेला यस्तो अनौपचारिक साक्षी दिने गर्छन्। अन्य कतिपयले चाहिं काम गर्ने ठाउँ वा स्कूलमा खाजा खानेबेला साक्षी दिएका छन्। कुनै एउटा बाइबल प्रकाशन अरूले देख्ने ठाउँमा राख्दा मात्र पनि त्यसले अरूलाई हाम्रो विश्वासबारे सोधखोज गर्न लगाउन सक्छ।—१ पत्रु. ३:१५.
४ सुरु गर्ने: सबैले प्रचार गर्नु एकदमै महत्त्वपूर्ण छ भनेर एउटी सात वर्षीया लजालु केटीले राज्यभवनमा सुनेकी थिइन्। त्यसकारण, आफ्नी आमासँग किनमेल गर्न जाँदा तिनले झोलामा दुईवटा पुस्तिका हालिन्। आमा पैसा तिर्न व्यस्त भएको बेला यी सानी केटीले एउटी महिलालाई पुस्तिका दिइन् र ती महिलाले पनि यसलाई खुसीसाथ स्वीकारिन्। नचिनेको मान्छेसित कुरा गर्ने साहस कसरी पायौ भनेर सोद्धा ती लजालु केटीले यसो भनिन्: “मनमनै एक, दुई, तीन! भनें अनि सुरु गरें!”
५ अनौपचारिक साक्षी दिन हामी सबैलाई उक्त केटीको जस्तै इच्छुकता चाहिन्छ। हामीलाई कुन कुराले मदत गर्न सक्छ? कुराकानी गर्न साहसको लागि प्रार्थना गर्नुहोस्। (१ थिस्स. २:२) वार्तालाप सुरु गर्न चलाउन सकिने रोचक विषयमा कुनै प्रश्न वा टिप्पणी मनमा राख्नुहोस्। आफ्नो प्रयत्नमा यहोवाले आशिष् दिनुहुनेछ भन्ने कुरामा विश्वस्त हुनुहोस्।—लूका १२:११, १२.
६ दिनहुँ हामीले भेट्ने मानिसहरूलाई अनौपचारिक साक्षी दिंदा यहोवाको महिमा हुनुका साथै यसले हामीलाई आनन्दित बनाउँछ। यसले कुनै न कुनै व्यक्तिलाई अनन्त जीवनको बाटोमा हिंड्न मदत गर्न सक्छ।