“ख्रीष्टको पछि लाग्नुहोस्” यहोवाका साक्षीहरूको जिल्ला अधिवेशन सन् २००७
१, २. (क) सँगै भेला भएर लाभ उठाउन मोशाले इस्राएलीहरूलाई कसरी प्रोत्साहन दिए? (ख) अहिल्यैदेखि हामीले कस्तो तयारी गर्न थाल्नुपर्छ?
१ मोशाले सबै इस्राएली र प्रवासीहरूलाई व्यवस्थाको पुस्तक सुन्न सात वर्षको एक चोटि एकै ठाउँमा भेला हुन निर्देशन दिए। किन? “तिनीहरूले सुनेर . . . सिकून्” भनेर। (व्यव. ३१:१०-१२) यसबाट देखिन्छ, आफ्ना जनहरू ठूलो समूहमा भेला हुनुको महत्त्व यहोवालाई थाह छ। चाँडै, यहोवाका जनहरू “ख्रीष्टको पछि लाग्नुहोस्” विषयको तीन दिने जिल्ला अधिवेशनको लागि भेला हुँदैछन्।
२ के तपाईंले यसको लागि तयारी गर्न थालिसक्नुभयो? तपाईंले आफ्नो काम गर्ने ठाउँमा छुट्टी माग्नु पर्छ कि? आफ्ना बाइबल विद्यार्थीहरू वा बेग्लै धर्म मान्ने परिवारका सदस्यहरूलाई तपाईंसितै अधिवेशनमा लैजान केही गर्नुपर्ने छ कि? मण्डलीका अरू कसैलाई अधिवेशनमा उपस्थित हुन सहयोगको खाँचो छ कि? के तपाईं आफ्नो मण्डलीलाई खटाइएको नभई अर्कै अधिवेशनमा उपस्थित हुने योजना बनाउँदै हुनुहुन्छ? के तपाईंलाई होटेल चाहिन्छ? तल दिइएको जानकारीले तपाईंलाई आवश्यक तयारी गर्न मदत दिनेछ।
३. (क) यशैया २५:६ मा बताइएको कुन कुरा अहिले पूरा हुँदैछ? (ख) पहिलो दिनको उपस्थिति संख्या कस्तो हुने गरेको छ र हामीले व्यक्तिगत रूपमा के गर्नुपर्छ?
३ तीनै दिन उपस्थित हुनुहोस्: यहोवाले आफ्ना जनहरूलाई प्रशस्त आध्यात्मिक आहार दिनुहुन्छ। (यशै. २५:६) वर्षको एक पटक हुने अधिवेशनहरूमा दिइने आध्यात्मिक भोज पनि यसैको एउटा भाग हो। अधिवेशनको पहिलो दिनको उपस्थिति बाँकी अरू दुई दिनको भन्दा निकै कम हुने गरेको छ। यहोवाको संगठनले हाम्रो लागि तयार पारेको स्फूर्तिदायी अधिवेशनमा तीनै दिन उपस्थित हुने लक्ष्य राख्नुहोस्। तपाईंले आफ्नो हाकिमसित छुट्टी माग्नुपर्ने छ भने यसलाई प्रार्थनामा राख्नुहोस्। त्यसपछि अधिवेशनको मिति घोषणा हुने बित्तिकै ‘निर्भयी’ भएर हाकिमसित कुरा गर्नुहोस्। (१ थिस्स. २:२; नहे. २:४, ५) वर्षको एक चोटि हुने अधिवेशन हाम्रो उपासनाको भाग हो भनेर बताउनु राम्रो हुन सक्छ। जति सक्दो चाँडो छुट्टी माग्दा, तपाईंको हाकिमलाई सबै चाँजोपाँजो मिलाएर तपाईंलाई छुट्टी दिन सजिलो हुन्छ।
४. आफ्ना बाइबल विद्यार्थीहरू र बेग्लै धर्म मान्ने परिवारका सदस्यहरूलाई अधिवेशनको लागि कसरी तयार पार्न सक्छौं?
४ तपाईंका बाइबल विद्यार्थीहरू र परिवारलाई तयार पार्ने: हाम्रा विद्यार्थीहरूलाई अधिवेशन जस्तो “ठूलो सभामा” न्यानो मसीही भ्रातृत्वको अनुभव गराउन पाउनु कत्ति खुसीको कुरा हो! (भज. २२:२५) उनीहरूलाई पहिल्यै खबर गर्नुभयो भने अधिवेशनमा उपस्थित हुनको लागि समय छुट्याउन सक्नेछन्। अधिवेशनहरूमा उपस्थित हुन तपाईंलाई किन रमाइलो लाग्छ, बताउनुहोस्। अधिवेशनमा के-के हुन्छ भनेर देखाउन विद्यार्थीहरूलाई हाम्रा भिडियोहरूमा भएका अधिवेशनका दृश्यहरू र विशेष गरी युनाइटेड बाइ डिभाइन टिचिङ भिडियो देखाउन सक्नुहुन्छ। बेग्लै धर्म मान्ने आफ्नो परिवारका सदस्यहरूलाई पनि आफ्नो योजना बताउनुहोस्। सायद, तिनीहरू पनि नाटक हेर्न वा कमसेकम एक दिन भने पनि तपाईंसितै अधिवेशनमा उपस्थित हुन सक्छन्।
५, ६. (क) पहिलो तिमोथी ६:१८ मा बताइएको उदार मनोभाव हामी कसरी देखाउन सक्छौं? (ख) बस्ने ठाउँको प्रबन्ध मिलाउन सहयोग चाहिनेहरूको लागि कस्तो व्यवस्था गरिएको छ?
५ भाइबहिनीहरूलाई सहयोग गर्ने: प्रेरित पावलले भौतिक तवरमा सम्पन्न मसीहीहरूलाई यस्तो सल्लाह दिए: “तिनीहरूले असल गरून्, तिनीहरू असल काममा उदारचित्त भएर धनवान होऊन्, बाँडचुड गर्नामा तत्पर होऊन्।” (१ तिमो. ६:१७, १८) मण्डलीका वृद्ध र अशक्त, पूर्ण-समय सेवामा लागेका, आमा वा बुबा मात्र भएका परिवार अनि अधिवेशनमा उपस्थित हुन सहयोगको अवश्यकता पर्न सक्ने अरू सदस्यहरूको ख्याल गरेर पावलले बताएको जस्तो उदार मनोभाव देखाउन सकिन्छ। यस्ता व्यक्तिहरूलाई मदत गर्ने पहिलो जिम्मेवारी सच्चाइमा भएका आफन्तहरूकै हो तर आवश्यकताअनुसार प्राचीनहरू र अरूले पनि विवेक चलाउँदै मदत गर्न सक्छन्।—गला. ६:१०; १ तिमो. ५:४.
६ मण्डलीको कसैलाई बस्ने ठाउँको प्रबन्ध मिलाउन सहयोग चाहिन्छ भने ती प्रकाशक स्पेशल निड्स रूम रिक्वेस्ट फाराम भर्न योग्य छन् कि छैनन् भनेर मण्डलीको सेवा समितिले पक्का गर्नुपर्छ। अधिवेशनको आवास विभागलाई यो फाराम पठाउनुअघि फाराममा भएको निर्देशन र डिसेम्बर १४, २००६ को मितिमा प्राचीनहरूका सम्पूर्ण निकायहरूलाई पठाइएको पत्र हेर्नुपर्छ।
७. (क) हामी किन आफ्नो मण्डलीलाई खटाइएकै अधिवेशनमा उपस्थित हुनुपर्छ (ख) कारणवश अर्कै अधिवेशनमा उपस्थित हुनु परेमा के गर्नुपर्छ?
७ अर्कै अधिवेशनमा उपस्थित हुने: यस लेखमा भारतमा हुने अधिवेशनहरूको सबै सम्भाव्य ठाउँको सूची दिइएको छ। आरामसित बसेर कार्यक्रम सुन्न, विमोचित प्रकाशनहरू पाउन र बसोबासको उचित व्यवस्था तथा अन्य सुविधाहरू लिन मण्डलीलाई खटाइएकै अधिवेशनमा उपस्थित हुनु बेस हुन्छ। कारणवश अर्कै अधिवेशनमा उपस्थित हुनु परेमा मण्डलीको सचिवसित जानकारी लिनुहोस्। सिफारिस गरिएका होटलहरूको सूची र अन्य जानकारी माग्दा आफ्नो ठेगाना लेखेर टिकटसमेत टाँसिएको रित्तो खाम पनि सँगै पठाउन नबिर्सनुहोस्। एउटै सहरमा एकभन्दा धेरै अधिवेशन आयोजना हुँदैछ भने पत्रमा आफू उपस्थित हुने अधिवेशनको मिति उल्लेख गर्नुहोस्।
८. होटेल बुकिङ गर्दा बिर्सन नहुने कुरा के-के हुन्? (“होटेल बुकिङ गर्ने तरिका” भन्ने पेटी हेर्नुहोस्।)
८ होटेल बुकिङ: अधिवेशन समितिले सिफारिस गरेका होटेलहरूको सूची मण्डलीको सूचनापाटीमा अधिवेशनको मितिभन्दा धेरै अघि नै टाँसिनेछ। “होटेल बुकिङ गर्ने तरिका” भन्ने पेटीमा दिइएका निर्देशनहरू पछ्याउनुहोस्। सूचीमा भएका कुनै पनि होटेलमा कोठा खाली छैन भने अथवा होटेलसित सम्बन्धित कुनै समस्याको लागि आफ्नो मण्डलीको सचिवलाई खबर गर्नुहोस्। सचिवले होटेलको सूचीमाथि दिइएको जानकारीअनुसार आवास विभागमा सम्पर्क गर्नुपर्छ। शाखा कार्यालयमा सम्पर्क नगर्नुहोस्। सूचीमा दिइएको कुनै पनि होटेलमा कोठा खाली छैन भने सूचीमा नभएको होटेल खोज्नुको सट्टा अर्को सूची नपाउन्जेल कृपया धैर्य गर्नुहोस्।
९, १०. (क) हामी अधिवेशन स्थलमा पुग्नुअघि नै कस्ता तयारीहरू गरिसकेको हुन्छ? (ख) हाम्रो खातिर गरिएका सबै कामहरूको लागि हामी कसरी कृतज्ञता देखाउन सक्छौं? (हिब्रू १३:१७ पढ्नुहोस्।)
९ प्रबन्धलाई सहयोग गर्नुहोस्: अधिवेशन स्थलभित्र छिर्दा, अधिवेशनको तयारीको लागि हाम्रा भाइबहिनीहरूले कत्ति मेहनत गरेका रहेछन् भनेर हामी महसुस गर्छौं। परिचारकको रूपमा सेवा गर्ने मायालु भाइहरूले हामीलाई स्वागत गर्छन्, प्रोग्राम दिन्छन् अनि सिट भेट्टाउन मदत गर्छन्। हल सफा गर्न अनि मञ्च सजाउन पनि भाइबहिनीहरूले त्यत्तिकै मेहनत गरेका हुन्छन्। अनि भाषण, अन्तरवार्ता तथा प्रदर्शनहरू तयार पार्ने, होटेलसित कुरा मिलाउने र यस्तै खाले हामीले नदेख्ने महत्त्वपूर्ण कामहरू त कति छन् कति!
१० प्रत्येक अधिवेशनको लागि आवश्यक प्रबन्ध मिलाउन महिनौं अघिदेखि थुप्रै व्यक्तिहरू खटिएका हुन्छन् अनि यसको लागि समय निकाल्न मदत गरेर तिनीहरूको परिवारले पनि त्याग गरेका हुन्छन्। हाम्रो फाइदाको लागि गरिएका यस्ता त्यागहरूको के हामी कदर गर्दैनौं? यस लेखमा दिइएका र अधिवेशनअघि हामीले प्राप्त गर्ने अन्य निर्देशनहरू पालन गरेर आफ्नो कृतज्ञता देखाउन सक्छौं। (हिब्रू १३:१७) इच्छुक भई सबैले सहयोग गरेमा “सबै काम शिष्ट रूपले र नियमपूर्वक” गर्न सम्भव हुनेछ।—१ कोरि. १४:४०.
११. अधिवेशन स्थलमा हाम्रो मसीही आचरण कुन शास्त्रपद अनुरूप हुनुपर्छ?
११ मसीही आचरण—प्रेमको प्रमाण: केही भाइबहिनीहरूले परिचारकहरूलाई असहयोग गरेको र मसीहीहरूलाई नसुहाउने बोलीवचन गरेको समेत पाइएको छ। मपाईं मनोवृत्ति पक्कै पनि असल व्यक्तिको चिनारी होइन अनि यसले यहोवा परमेश्वरको प्रशंसा पनि गर्दैन। त्यसैले हामी मायालु, धीरजी र सहयोगी होऔं। (गला. ५:२२, २३, २५) साथै, सिटहरू ओगट्ने सन्दर्भमा अझै सल्लाह दिनु परिरहेको छ। बिहान ८:०० बजे अधिवेशन भवनको ढोका खुल्ने बित्तिकै केही भाइबहिनीहरू “राम्रो” सिट ओगट्न ठेलमठेल गर्दै दौडिरहेको देखिन्छ। यसरी धकेलाधकेल गर्दा चोटपटक लागेको छ। केही भाइहरूले आफ्नो पूरै परिवार लिएर चाँडै अधिवेशन स्थलमा पुगे तापनि अधिकांश सिट पहिल्यै ओगटिसकेकोले सिट नपाएको गुनासो गरेका छन्। केही व्यक्तिहरू आफू एक्लै बिहान ढोका खुल्ने बित्तिकै पुग्छन् र ढिलासम्म सुत्ने आफ्नो परिवार र साथीहरूका लागि पूरै लाइन सिट रोकेर राख्छन्। कोही-कोही त आफूसित भएको सबै सामान नसिद्धिउन्जेलसम्म सिट रोक्छन्। प्रेम निस्वार्थ हुन्छ भनेर बताइएको छ। निस्वार्थ प्रेम नै आफ्ना चेलाहरूको चिनारी हो भनेर येशू ख्रीष्टले पनि बताउनुभएको छ। (यूह. १३:३५) थुप्रो सिटहरू रोकेर राख्नु यस्तो ईश्वरीय प्रेमको राम्रो उदाहरण हो र? मसीही प्रेमले हामीलाई ख्रीष्टले दिनुभएको यो आज्ञा पालन गर्न उत्प्रेरित गर्नुपर्छ: “यसकारण मानिसहरूले तिमीहरूलाई जे जसो गरून् भन्ने तिमीहरू चाहन्छौ, तिमीहरूले पनि तिनीहरूलाई त्यसै गर।”—मत्ती ७:१२.
१२. (क) हाम्रो समयमा यहोवाका जनहरू एक साथ भेला हुनु किन झनै महत्त्वपूर्ण भएको छ? (ख) हामी सबैले अहिल्यैदेखि के गर्न सक्छौं?
१२ “दिन नजिक-नजिक आइपुगेको” हामीले देखेकै हुनाले परमेश्वरका जनहरू एक साथ भेला हुनु झनै महत्त्वपूर्ण भएको छ। (हिब्रू १०:२५) हाम्रा मसीही अधिवेशनहरूमा विश्वासी र बुद्धिमान् दास वर्गले दिने जानकारीले हामीलाई यहोवाका ‘सबै आज्ञा होसियारीसाथ पालन गर्न’ मदत गर्छ। (व्यव. ३१:१२) “ख्रीष्टको पछि लाग्नुहोस्” जिल्ला अधिवेशनको तीनै दिन उपस्थित भएर त्यहाँ पाइने सबै आध्यात्मिक निर्देशन र रमाइलो संगतिबाट लाभ उठाउन अहिल्यैदेखि योजना बनाऔं!
[पृष्ठ ३-मा भएको पेटी]
कार्यक्रमको समय
पहिलो र दोस्रो दिन
बिहान ९:२० देखि साँझ ५:०५ सम्म
तेस्रो दिन
बिहान ९:२० देखि दिउँसो ४:१० सम्म
[पृष्ठ ४-मा भएको पेटी]
होटेल बुकिङ गर्ने तरिका:
१. मण्डलीको सूचनापाटीमा टाँसिएको सिफारिस गरिएका होटेलहरूलाई मात्र कार्यालय समयमा फोन गर्नुहोस्।
२. होटेललाई यहोवाको साक्षीहरूको अधिवेशनमा उपस्थित हुँदै हुनुहुन्छ भनी बताउनुहोस्।
३. होटेलमा कहिलेदेखि बस्ने र कहिले होटेल छोड्ने मिति र समय स्पष्ट बताउनुहोस्।
४. फोन गरेको होटेलमा कोठा खाली छैन भने सूचीकै अर्को होटेललाई फोन गर्नुहोस्।
५. सूचीमा दिएको भन्दा बढ्ता पैसा नतिर्नुहोस्।
६. बुकिङ गरेपछि बुकिङ भयो/भएन पक्का गर्न नबिर्सनुहोस्।
७. दस दिन भित्रमा क्रेडिट कार्ड, चेक अथवा मनी अर्डरबाट धरौटी रकम भुक्तानी गर्नुहोस्। नगद नपठाउनुहोस्। धरौटी रकम चेक वा मनी अर्डरबाट पठाउने हो भने अगाडिपट्टि बुकिङबारे थप जानकारी लेख्न नबिर्सनुहोस्।
कृपया ध्यान दिनुहोस्:
◼ सूचीमा दिएको जति मात्र पैसा तिर्नुहोस्।
◼ जो बस्ने हो, उसैको नाउँमा कोठा बुकिङ गर्नुहोस्।
◼ कोठा खाली छैन भनेर मण्डलीको सचिवलाई खबर गर्नुअघि सूचीमा भएका सबै होटेलहरूलाई फोन गर्नुहोस्।
◼ बुकिङ गरेकै होटेलमा बस्नुहोस्।—मत्ती ५:३७.
◼ बुकिङ रद्द गर्नै पर्ने भएमा जति सक्दो चाँडो गर्नुहोस्। रद्द गर्दा रसिद लिन नबिर्सनुहोस्।