ख्रीष्टियान सेवकहरूका लागि गरिएको एउटा प्रबन्ध
१. सन् १९३८ मा कुन एउटा नयाँ प्रबन्ध गरियो र त्यसको उद्देश्य के थियो?
१ सन् १९३८ मा यहोवाको संगठनले एउटा नयाँ प्रबन्ध गऱ्यो। अहिले क्षेत्रीय सम्मेलन भनिने प्रान्तीय सम्मेलनहरू धाउन मण्डलीहरूलाई आमन्त्रित गरियो। केको लागि? जनवरी १९३९ को इन्फर्मेन्ट-ले (अहिले हाम्रो राज्य सेवकाई) यस्तो जवाफ दियो: “यहोवाको ईश्वरतान्त्रिक संगठनले राज्य सेवालाई अघि बढाउन यस्ता सम्मेलनहरूको प्रबन्ध गरेको हो। आफूलाई सुम्पिएको काम राम्ररी गर्न त्यहाँ दिइने निर्देशनहरू अत्यावश्यक छन्।” सन् १९३८ मा राज्य प्रकाशकहरूको कुल संख्या ५८,००० थियो भने सन् २००९ मा त्यो संख्या बढेर ७०,००,००० भन्दा धेरै भयो। यो वृद्धिलाई विचार गर्दा एउटा कुरा स्पष्ट हुन्छ: सेवकहरूलाई “सुम्पिएको काम” गर्न मदत दिने उद्देश्यमा क्षेत्रीय सम्मेलन सफल भएको छ।
२. नयाँ सेवा वर्षको क्षेत्रीय सम्मेलनमा कस्ता जानकारीहरू दिइनेछन्?
२ आगामी वर्षको मूल विषय: सेप्टेम्बरदेखि सुरु हुने कार्यक्रम र त्यसबाट प्राप्त हुने प्रोत्साहनको हामी प्रतीक्षा गर्छौं। त्यस कार्यक्रमको मूल विषय “तिमीहरू यस संसारका होइनौ” यूहन्ना १५:१९ मा आधारित छ। ख्रीष्टियान सेवकहरूले पक्कै लाभ उठाउने केही भाषणका विषय कस्ता छन्? पहिलो दिनमा हामी “पूर्ण-समय सेवाले कसरी हाम्रो सुरक्षा गर्छ?” भन्ने विषयमा भाषण सुन्नेछौं। सोही दिन “यी कुराहरूबाट दूषित नहुनुहोस् . . . ” “जङ्गली जनावर,” “महा-वेश्या” र “व्यापारीहरू” भन्ने तीन भागको गोष्ठीबाट पनि आनन्द उठाउनेछौं। दोस्रो दिन “यहोवालाई प्रेम गर्नुहोस्, संसारलाई होइन” भन्ने विषयमा एउटा गोष्ठी सुन्नेछौं। “‘प्रवासी र परदेशीजस्तै’ भइरहनुहोस्” र “साहस गर्नुहोस्! तपाईंले संसारलाई जित्न सक्नुहुन्छ” भन्ने विषयहरूमा पनि भाषणहरू दिइनेछन्।
३. क्षेत्रीय सम्मेलनमा उपस्थित हुँदा हामी कस्ता लाभहरू उठाउन सक्छौं?
३ हालसालै भएको एउटा क्षेत्रीय सम्मेलन धाएपछि सेवाको काममा सुस्ताएकी एक बहिनीले त्यो कार्यक्रमले आफ्नो अवस्था पुन: केलाएर हेर्न र “बहाना बनाउन छोडेर सेवामा लाग्ने” अठोट गर्न बाध्य तुल्यायो भनेर लेखिन्। निस्सन्देह, आगामी सेवा वर्षको क्षेत्रीय सम्मेलनले हामी सबैलाई संसारलाई नभई यहोवालाई प्रेम गर्न मदत गर्नेछ। (१ यूह. २:१५-१७) ख्रीष्टियान सेवकहरूका लागि गरिएको यस प्रबन्धबाट पूरापूर लाभ उठाउन तपाईं त्यहाँ पक्कै उपस्थित हुनुहोस् र ध्यान दिएर सुन्नुहोस्!