‘परमेश्वरको नाम पवित्र पारियोस्’
१. सेवा वर्ष २०१२ को क्षेत्रीय सम्मेलनको मूल विषय के हो र यो केमा आधारित छ?
१ ब्रह्माण्डको सार्वभौम यहोवाको नाम वहन गर्न पाउनु हाम्रो लागि कत्ति ठूलो सम्मान! यो नाम वहन गर्ने जिम्मेवारी यहोवा स्वयम्ले हामीलाई दिनुभएको हो अनि विशेषगरि सन् १९३१ देखि हामी यहोवाका साक्षीहरू भनिने विशिष्ट नामबाट परिचित छौं। (यशै. ४३:१०) परमेश्वरको एक मात्र छोरा येशू ख्रीष्टले नमुना प्रार्थनामा आफ्नो बुबाको नामलाई प्राथमिकता दिंदै यस नामलाई सबैभन्दा उच्च स्थानमा राख्नुभयो। (मत्ती ६:९) सेवा वर्ष २०१२ को क्षेत्रीय सम्मेलनको मूल विषय येशूको त्यही प्रार्थनामा आधारित छ। त्यो हो—“परमेश्वरको नाम पवित्र पारियोस्।”
२. सम्मेलनमा हामी के-कस्ता कुराहरू सुन्न सक्नेछौं?
२ के-कस्ता कुराहरू सुन्न सकिनेछ: शुक्रबारको दिन “पूर्ण-समय सेवकहरूको हैसियतमा परमेश्वरको नाम प्रकट गर्नुहोस्” भन्ने विषयमा भाषण दिइनेछ। उक्त भाषणमा पूर्ण-समय सेवा गर्नु किन जीवनको इनामदायी मार्ग हो भनेर छलफल गरिनेछ। “यहोवाको नाममा कलङ्क लगाउनदेखि होसियार हुनुहोस्” भन्ने गोष्ठीले हामीलाई पासोमा पार्न सक्ने चार वटा खतरादेखि अलग रहन मदत गर्नेछ। “परमेश्वरको नामलाई किन पवित्र पार्नै पर्छ?” भन्ने विषयको भाषणमा यी प्रश्नहरूको जवाफ पाउनेछौं—खासै चासो नदेखाउने मानिसहरू भेटिंदा हामीलाई प्रचारकार्यमा जोसिलो भइरहन केले मदत गर्नेछ? हाम्रो प्रचारकार्यलाई प्रभावकारी बनाउन केले मदत गर्नेछ? शनिबारको दिन चार भागमा दिइने गोष्ठीमा हाम्रो सोचाइ, बोलीवचन, निर्णय र आचरणले कसरी परमेश्वरको नाम पवित्र पार्न सक्छौं, स्पष्ट पारिनेछ। “यहोवाले आफ्नो महान् नाम आरमागेडोनमा पवित्र पार्नुहुनेछ” भन्ने विषयको जनभाषण विशेषगरि नयाँ श्रोताहरूको लागि लाभदायक हुनेछ।
३. हामीसित कस्तो सुअवसर छ र यस सम्मेलनले हामीलाई के गर्न मदत गर्नेछ?
३ यहोवाले आफ्नो नाम पवित्र पार्न चाँडै कदम चाल्नुहुनेछ। (इज. ३६:२३) तर त्यतिन्जेल, यहोवाको पवित्र नामले प्रतिनिधित्व गर्ने सबै कुरालाई समर्थन गर्ने महान् सुअवसर हामीले पाएका छौं। यस क्षेत्रीय सम्मेलनका कार्यक्रमहरूले परमेश्वरको नाम वहन गर्ने गम्भीर जिम्मेवारी पूरा गर्न हामी प्रत्येकलाई मदत गर्नेछ भन्ने कुरामा हामी विश्वस्त छौं।