कुराकानी थाल्न “परमेश्वरको वचनको छोटो परिचय” भन्ने भाग प्रयोग गर्नुहोस्
१. प्रचारको लागि नयाँ साधन के हो?
१ नयाँ संसार अनुवाद-को (अङ्ग्रेजी) संशोधित संस्करणको सुरुमा “परमेश्वरको वचनको छोटो परिचय” भन्ने भाग छ। प्रचारको लागि प्रस्तुति तयार पार्दा यो नयाँ साधनलाई कसरी चलाउन सक्छौं? धर्मशास्त्रबाट तर्क गर्ने किताबमा भएजस्तै यस भागमा पनि बाइबलसित सम्बन्धित विभिन्न विषयहरूमा थुप्रै बाइबल पदहरू दिइएका छन्। त्यसैले कुराकानी थाल्न यो भाग निकै प्रभावकारी हुन सक्छ।
२. “परमेश्वरको वचनको छोटो परिचय” भन्ने भागलाई हामी प्रचारमा कसरी चलाउन सक्छौं?
२ उदाहरणको लागि तपाईं प्रश्न न. ८ चलाउँदै यसो भन्न सक्नुहुन्छ: “हामी आफ्ना छिमेकीहरूलाई भेटेर छोटो कुराकानी गर्दै छौं। किनभने मानिसहरूका मनमा थुप्रै प्रश्न छन्, जस्तै: ‘के मानिसहरूले भोगिरहेको दुःखकष्टको कारण परमेश्वर नै हुनुहुन्छ?’ [कुनै-कुनै इलाकामा घरधनीलाई यो प्रश्न देखाउनु अझ प्रभावकारी हुन सक्छ।] तपाईंलाई कस्तो लाग्छ? [जवाफ दिने मौका दिनुहोस्।] बाइबलले यस प्रश्नको चित्तबुझ्दो जवाफ दिन्छ।” छापिएको एक वा दुई शास्त्रपद पढेर छलफल गर्नुहोस्। घरधनीले चासो देखाएमा परिचयको भागको २० वटा प्रश्नको सूची देखाउनुहोस् र घरधनीलाई अर्को पटक छलफल गर्ने विषय रोज्न दिनुहोस्। अथवा तपाईंले छलफल गर्नुभएको विषयबारे थप जानकारी भएको बाइबल अध्ययनको लागि प्रयोग गरिने प्रकाशन दिन सक्नुहुन्छ।
३. ख्रीष्टियन पृष्ठभूमि नभएका व्यक्तिहरूको इलाकामा प्रचार गर्दा हामी “परमेश्वरको वचनको छोटो परिचय” भन्ने भाग कसरी प्रयोग गर्न सक्छौं?
३ ख्रीष्टियन पृष्ठभूमि नभएका व्यक्तिहरू बस्ने इलाकामा विशेषगरि प्रश्न न. ४ अनि १३ देखि १७ उपयुक्त हुन सक्छ। उदाहरणका लागि प्रश्न न. १७ मा दिइएको जानकारी चलाउँदै तपाईं यस्तो भन्न सक्नुहुन्छ: “हामी सबै परिवारका लागि एउटा लाभदायी जानकारी दिंदै छौं। अहिलेका थुप्रै परिवारले विभिन्न चुनौतीहरू सामना गरिरहेका छन् जस्तो तपाईंलाई पनि लाग्छ कि? [जवाफ दिने मौका दिनुहोस्।] थुप्रै दम्पतीले यी शब्दहरू मदतकारी साबित भएको महसुस गरेका छन्: “पत्नीले पनि आफ्नो पतिको गहिरो आदर गरोस्।” [एफिसी ५:३३ बाट लिइएको हो भनेर बताउनु आवश्यक छैन। तपाईंको घरधनी महिला हो भने एफिसी ५:२८ का शब्दहरू बाइबल नखोली भन्न सक्नुहुन्छ।] तपाईंलाई कस्तो लाग्छ? यो सल्लाह लागू गऱ्यौं भने वैवाहिक सम्बन्ध राम्रो हुँदैन र?”
४. कुराकानी टुङ्ग्याउनुअघि तपाईं के गर्न सक्नुहुन्छ?
४ कुराकानी टुङ्ग्याउनुअघि अर्को पटक छलफल जारी राख्ने प्रबन्ध मिलाउनुहोस्। तपाईंले चलाउनुभएकै प्रश्नको अर्को शास्त्रपद छलफल गर्ने योजना बनाउन सक्नुहुन्छ। कुनै उपयुक्त समयमा घरधनीलाई आफूले बताएका बुद्धिले भरिएका कुराहरू बाइबलको हो भनेर बताउन सक्नुहुन्छ। पहिला गरिएको छलफल वा घरधनीको बाइबलप्रतिको दृष्टिकोणलाई विचार गर्दै तिनको चासो जगाउने खालको प्रकाशन दिन सक्नुहुन्छ।—हाम्रो राज्य सेवा, डिसेम्बर २०१३ को परिशिष्ट हेर्नुहोस्।