सार्वजनिक साक्षी दिंदा ध्यान दिनुपर्ने कुराहरू

मानिसहरूलाई बाइबलको सत्य ज्ञानतर्फ डोऱ्‍याउन टेबुल वा ट्रली चलाएर गरिएको साक्षीकार्य उपयोगी माध्यम भइरहेको छ। (यूह. ६:४४) त्यसैले धेरै मानिस आवतजावत गर्ने ठाउँमा सार्वजनिक साक्षीकार्यको प्रबन्ध मिलाउन एल्डरहरूलाई निर्देशन दिइएको छ। ट्रली गुडाउन मिल्ने भएकोले स्थानीय अख्तियारबाट अनुमति लिइरहन आवश्‍यक नहुन सक्छ। सार्वजनिक साक्षीकार्यमा क-कसले भाग लिन सक्छन्‌? राम्रोसँग कुराकानी गर्न सक्ने, सुझबुझ चलाउन सक्ने र आफूलाई मर्यादित ढङ्‌गमा प्रस्तुत गर्न सक्ने प्रकाशकले भाग लिन सक्छन्‌। तल दिइएका ‘के गर्नु हुन्छ?’ र ‘के गर्नु हुँदैन?’ भन्‍ने शीर्षक अन्तर्गतका बुँदाहरूलाई ध्यान दिंदा सार्वजनिक साक्षीकार्यमा अझ प्रभावकारी हुन मदत पाउनेछौं।

के गर्नु हुन्छ?

बाटोमा हिंड्‌ने मानिसहरूलाई सजिलो महसुस हुने तरिकामा र आदरणीय ढङ्‌गमा व्यवहार गर्नुहोस्‌। केही प्रकाशकहरूले न्यानो मुस्कानसहित अभिवादन गर्छन्‌। आवतजावत गरिरहेका मानिसले हाम्रा प्रकाशनहरू हेर्छन्‌ भने तपाईं यसो भन्‍न सक्नुहुन्छ: “तपाईंलाई मनपर्छ भने लिन सक्नुहुन्छ।”
टेबुल वा ट्रलीबाट केही दूरीमा उभिनुहोस्‌। यसो गरेर कुनै कुनै ठाउँमा प्रकाशकहरूले राम्रो नतिजा हासिल गरेका छन्‌। तर कसै-कसैले यसो गर्दा पनि मानिसहरूलाई रोकिन अप्ठ्‌यारो लागेको पाएका छन्‌। त्यसैले तिनीहरू अझ टाढा उभिन्छन्‌ अनि कसैले हाम्रा प्रकाशनहरू हेर्न नरोकिन्जेल पर्खिन्छन्‌। हाम्रो प्रकाशनहरू हेर्न कोही व्यक्‍ति आएर रोकिन्छन्‌ भने तिनीसित कुराकानी गर्नुहोस्‌। तपाईं यसो भन्‍न सक्नुहुन्छ: “त्यस प्रश्‍नबारे तपाईंले कहिल्यै सोच्नुभएको थियो?”
सकेसम्म धेरै पटक बाइबल चलाउनुहोस्‌।
बाइबलले सिकाउँछ किताबजस्तै अध्ययन सञ्चालन गराउने प्रकाशन कसैले लिन्छन्‌ भने तिनीहरूलाई बाइबल अध्ययनको प्रबन्धबारे बताउनुहोस्‌। बाइबल अध्ययन कसरी गरिन्छ? भन्‍ने भिडियो देखाउन सकिन्छ कि भनेर सोध्नुहोस्‌।
सम्भव भएसम्म चासो दिने मानिसको सम्पर्क ठेगाना लिनुहोस्‌। ती व्यक्‍ति तपाईंको मण्डलीको इलाकामा बस्दैनन्‌ भने कृपया भेट्‌नुहोस्‌ (S-43) फाराम भरेर आफ्नो मण्डलीको सचिवलाई दिनुहोस्‌।

के गर्नु हुँदैन?

दबाब दिनु, जिद्दी गर्नु वा जबरजस्ती गर्नु हुँदैन। टेबुल वा ट्रलीको छेउमा पाले जस्तै उभिनु हुँदैन।
सार्वजनिक साक्षीकार्यमा भाग लिंदा साहित्यहरू दिने मात्र हो भनेर सोच्नु हुँदैन। हाम्रो उद्देश्‍य बाइबल अध्ययन सुरु गर्नु हो। त्यसैले मानिसहरूसित कुराकानी गर्ने कोसिस गर्नुपर्छ।
टेबुल वा ट्रलीलाई छेक्नु हुँदैन। साथीसँग कुराकानी गर्नुमै मस्त हुनु हुँदैन। व्यक्‍तिगत कामको लागि मोबाइल चलाउन परे टेबुल वा ट्रलीबाट अलिक टाढा गएर चलाउनु राम्रो हुनेछ।
विरोधीहरूसित वाद विवाद नगर्नुहोस्‌। तिनीहरू रिसाएमा वा आक्रामक हुन खोजेमा अर्कै ठाउँमा जानु राम्रो हुन्छ।