Baŵa si Felendrua

Hadia tola isusugi niha si no mate Yehowa? Tola, börö me yaʼia andrö no ’Fondrege Zabölö’. (Fam. 1:8) Tola ikalaisi fefu nudunia, tefarahu ba daʼö faʼamate. (1 Ko. 15:26) Hadia nasa zamaduhuʼö ba dödöda wa tola isusugi niha si no mate Lowalangi? Tola ifuli itörö tödö Lowalangi gofu hadia ia. Tola ikaoni ndröfi moloʼö töira zamösana. (Yes. 40:26) Baero daʼö, tola itörö tödönia fefu niha si no mate. (Yob. 14:13; Luk. 20:38) Lö olifu ia irugi ba wondrege zide-ide sanandrösa ba niha nisusuginia, tefarahu ba daʼö zikhala, amuata, si no irai alua, hegöi fangera-ngerara. Tola faduhu dödöda ba mbuʼusa li Yehowa sanandrösa ba wanusugi, börö me taʼila wa omasi ia ba tola ifalua daʼö. Nehegö hadia dane-dane tanö böʼö wa tola mufaduhusi tödö mbuʼusa li Lowalangi sanandrösa ba wanusugi: No irai isusugi niha si no mate Yehowa. Ba götö Zura Niʼamoniʼö, no ibeʼe waʼabölö ba zi hadauga genoninia, tefarahu ba daʼö Yesu, ba wanusugi niha si no mate. w23.04 9-10 ¶7-9

Na tahaogö-haogö wameʼe fanema li si fao faʼatua-tua, abölö adöni dödö niha wamondrongo ba omasi ira na tatohugö wahuhuosa. Tatu manö, lö omasi ita tatohugö wahuhuosa ba niha si fabuʼa-buʼa mazui sangoʼaya nifaduhusida tödö. (Amd. 26:4) Hizaʼi, lö fefu niha simane daʼö. Ato nasa niha somasi mamondrondrongo. Sindruhu sa, oya mbuania na taforege wangoromaʼö amuata falöʼalio mofönu. Börö daʼö, angandrö khö Yehowa enaʼö lö tebulö öhaogö-haogö wameʼe fanema li ba niha sanofu mazui sanandrawaisi nifaduhusimö tödö. Törö tödöu, na lö alio mofönu ita, lö alua wabuʼa-buʼasa. Ba na tahaogö-haogö wameʼe fanema li si fao famosumange, tola terou dödö niha ba wombulöʼö fangera-ngerara sanandrösa khöda hegöi sindruhu moroi ba Zura Niʼamoniʼö. Börö daʼö, ’böi mamalö-malö tafaʼanö ita ba wameʼe fanema li’ ba ’tahaogö wameʼe fanema li si fao sumange’. (1 Fe. 3:15) Yalötebulö taʼokhögö gamuata falöʼalio mofönu sangabölöʼö yaʼita! w23.09 19 ¶18-19

Nehegö hewisa wangoromaʼöda faʼebolo dödö ba zi öfa lala andre. Si oföna, lö alio mofönu niha sebolo tödö. Na so niha sangandrö fönunia, ihöna khönia wanaha tödö, ba lö isulöni nifaluara. Lö ilau mbakhu dödönia ba niha hewaʼae no fawuka gera-erania. (2 Mo. 34:6) Si dua, niha sebolo tödö so khönia wombaloi ba fanaha tödö. Na ara alua nidöna-dönania, iforege enaʼö lö khönia faʼaombö dödö ba lö alio aukhu ia. (Sango. 7:8) Si tölu, niha sebolo tödö lö ihalö gangetula ba waʼaösö. Na so halöwö si tohude, niha si so faʼebolo dödö lö iʼanemaiʼö ifalua daʼö ba waʼaösö. Hizaʼi, ibeʼe ginötönia ba woʼangeragö hadia zinangea ifalua. Ba lö göi iʼasiwai halöwö andrö ba waʼaösö. Itatugöi enaʼö sökhi wamaluania halöwö andrö. Si öfa, niha sebolo tödö lö mokökö-kökö ia ba ginötö alua khönia gabula dödö. Ifalua wondrege zi sökhi ba wangai halöwö khö Yehowa si fao faʼomuso dödö. (Kol. 1:11) Fefu nono mbanua Yehowa, moguna laʼoʼö zi öfa lala andre ba wangoromaʼö faʼebolo dödö. w23.08 20-21 ¶3-6

Sambua dane-dane si tohude hana wa moguna tarorogö dödöda yaʼia daʼö börö me Yehowa zamareso tödö. Iʼila hewisa ita zindruhunia, tenga ha soroma moroi baero. Iʼomasiʼö ita na tafoʼösi wangera-ngerada faoma mene-menenia satua-tua, si tola manolo yaʼita ba wanöndra faʼauri si lö aetu. (Yoh. 4:14) Tola möi folumöʼöda daʼö moroi ba wondrönisi dödö nifaʼema Zatana hegöi ulidanönia, si tola mamakiko amuatada hegöi famatida. (1 Yo. 5:​18, 19) Na lö tebulö tahatöʼö ita khö Yehowa, itugu taʼomasiʼö ba tafosumange ia. Börö me lö omasi ita taʼafökhöiʼö dödö namada, lö taʼangeraigö ba wamalua horö. Samösa dalifusöda ira alawe moroi ba Kroasia sotöi Marta, no irai tedönisi dödönia ba wamalua amuata fohorö. Imane, ”Abua sibai ba wangokhögö fangera-ngera si sökhi ba wolawa isö-isö dödö si fasala. Hizaʼi, tola telumöʼö ndraʼo börö me uʼataʼufi Yehowa.” Hewisa wa tola möi folumöʼö Marta wangataʼufinia Yehowa? Imane Marta wa iʼangeragö hadia lua-luania na iʼoʼö gisö-isö dödö si fasala andrö. Simane nifalua Marta, moguna taʼangeragö daʼö enaʼö tola talawa wondrönisi dödö. w23.06 20-21 ¶3-4

Iʼila Yesu wa omasi Yehowa na teʼamoniʼö döinia, mazui muheta ba hulunia fefu zi lö duhu niböbögö ba döinia andrö. Andrö wa ifahaʼö ndra soloʼö khönia Yesu ba wangandrö, ”He Ama khöma si so ba zorugo, yateʼamoniʼö döimö.” (Mat. 6:9) Iʼila Yesu wa daʼa gamadöniwa sabölö ebua ba gomböila dangania maʼafefu. Ba zi sagörö ulidanö, abölö oya noro dödö Yesu ba wangamoniʼö töi Yehowa. Ba wamaiginia, no horö fondrege zebua na laʼoʼaya mazui laböbögö zi lö duhu ba döi Namania. Hizaʼi, me laraʼu ia, hadia niböbögö khönia? Laböbögö khönia wa no iʼoʼaya Lowalangi! Daʼö mbörö wa ”abu sibai dödönia” lö ara fatua lö laraʼu ia. Tefakao dödönia börö me ba zi lö ara tö laböbögö khönia zi lö duhu andrö.—Luk. 22:​41-44. w24.02 11 ¶11

Ba wagohisa wogamö faʼauri, moguna abölö taʼomasiʼö Yehowa hegöi Yesu moroi ba nösi nomoda. (Mat. 10:37) Hizaʼi, tenga daʼö geluahania wa taʼosiwawöi noro dödöda yomo ba nomo. Enaʼö tola taʼomusoiʼö dödö Lowalangi hegöi Keriso, moguna tafalua noro dödöda yomo ba nomo. (1 Ti. 5:​4, 8) Na tafalua daʼö, hasambalö tasöndra waʼomuso dödö. Hadia mbörö? Börö me iʼila Yehowa wa hasambalö so waʼomuso dödö yomo ba nomo na foʼomo ira matua hegöi ira alawe faoma laʼomasiʼö ba lafosumange nawöra, na laʼomasiʼö ba lafahaʼö ndraonora ira satua, ba iraono laʼoʼö niwaʼö zatuara. (Ef. 5:33; 6:​1, 4) Gofu hadia noro dödöu yomo ba nomo, abölö sökhi na öfaduhusi tödö wanuturu lala moroi ba Zura Niʼamoniʼö. Böi odaligö hadia zi so ba dödömö, sasese mufalua ba mbanuamö mazui niwaʼö niha sogonekhe. Ogunaʼö publikasida si teʼodane-dane ba Zura Niʼamoniʼö. Tola taʼila ba daʼö wanuturu lala sanolo yaʼita ba woloʼö goi-goi Zura Niʼamoniʼö. w23.08 28 ¶6-7

Ira alawe niha Keriso, moguna lafahaʼö ira ba nekhe-nekhe danga. So ösa nekhe-nekhe danga nifahaʼö iʼotarai ba waʼide-ide, ba moguna daʼö sandrohu faʼaurira. Duma-dumania, fahaʼö ndraʼugö enaʼö itugu onekhe ba wombaso hegöi ba wanura. Ba zi hauga soi, lö toʼölö ba ndra alawe na lafahaʼö ira ba wombaso hegöi manura. Hizaʼi sindruhunia, moguna sibai daʼö ba niha Keriso maʼafefu. (1 Ti. 4:13) Börö daʼö, böi tehegö so zi tobali taha-tahamö ba wamahaʼö yaʼugö ba wombaso hegöi manura. Hadia mbuania na onekhe ndraʼugö wamalua daʼö? Aoha khöu ba wanöndra halöwö, ba sökhi wamaluamö halöwömö. Tola tobali ndraʼugö nifahaʼö ba samahaʼö si sökhi ba Daromali Lowalangi. Ba sabölö tohude, börö me tola öbaso ba öʼangerönusi Daromali Yehowa, tola itugu ahatö ndraʼugö khönia.—1 Ti. 4:15. w23.12 20 ¶10-11

Andrö wanolo khö Yehowa ba wanimbagö fondrönisi dödö. Börö me lö moʼahonoa ita, moguna taforege ba wolawa fondrönisi dödö ba wamalua sala. Iforege sibai Satana enaʼö tola awuwu ita ba wondrönisi dödö. Duma-dumania, iʼogunaʼö hiburan si lö sökhi ba wamakiko fangera-ngerada. Hiburan simane daʼö zamatumbuʼö ba wangera-ngerada ngawalö zi lö tefaudu, si tola manaʼunöisi yaʼita irege ba gafuriata tafalua horö sebua. (Mrk. 7:​21-23; Yak. 1:​14, 15) Moguna khöda wanolo moroi khö Yehowa enaʼö mofozu ita ba wolawa fondrönisi dödö. Oroma daʼö moroi ba wangandrö Yesu. Ifahaʼö ita ba wangandrö: ”Böi ohe ndraʼaga ba wanandraigö, efaʼöga moroi ba zi lö sökhi.” (Mat. 6:13) Omasi Yehowa ba wanolo yaʼita, hizaʼi moguna yaʼita samösa zangandrö tolo khönia. Moguna göi tafaudugö nifaluada simane fangandröda. w23.05 6-7 ¶15-17

Na laʼameʼegö tödö wahuwusara khö Yehowa, daʼö zamarou yaʼira ba woloʼö mene-menenia. Buania, tola latimbagö mazui laʼasiwai gabula dödö si tola mangalösi faʼomasira. Baero daʼö, laforege sibai ira niha samati ba woloʼö Yehowa hegöi amuatania, simane faʼasökhi dödö, faʼebolo dödö, ba omasi wangefaʼö sala. (Ef. 4:32–5:1) Na laʼokhögö gamuata simane daʼö si sambua fongambatö, itugu aro waʼomasira khö nawöra zamösana. Imane talifusöda ira alawe sotöi Lena, si no 25 fakhe no mongambatö, ”Aoha ba wangomasiʼö hegöi ba wamosumange niha samati.” Nehegö sambua duma-duma ba Zura Niʼamoniʼö. Me ifili zi sambua fongambatö Yehowa tobali satua Mesia, ifili Yosefo hegöi Maria ba gotalua ngaʼötö Dawido. Hadia mbörö? Börö me fahuwu sibai Yosefo hegöi Maria khö Yehowa, ba aboto ba dödö Yehowa wa laʼofönaiʼö ia ba wongambatöra. w23.05 21 ¶3-4

Moʼahonoa Yesu, hizaʼi lö moʼahonoa niha nifataronia tobali sondröniaʼö ba gulidanö. Te itaria abua khöda woloʼö niwaʼöra, mendrua manö na laʼandrö khöda zi lö omasi ita tafalua. No irai abua khö Wetero ba wangoromaʼö amuata foloʼö. Me iʼandrö khönia malaʼika enaʼö iʼa gö si raʼiö moloʼö Oroisa Moze, lö omasi Wetero. Itimbagö daʼö ofeta tölu kali! (Hal. 10:​9-16) Hadia mbörö? Lö fatema ba dödönia niwaʼö malaʼika andrö. Hizaʼi iʼoʼö Faulo me laʼandrö khönia ira sondröniaʼö niha Keriso ba Yeruzalema enaʼö iʼohe daöfa ndra matua ba gosali ba lafalua gowasa fangehao boto, tandra wa iʼoʼö Goroisa Moze. Sindruhunia, aboto ba dödö Waulo wa tenga saʼae barö Goroisa Moze so niha Keriso. Lö hadöi sala nifaluania. Hizaʼi, lö fatandro Waulo. ”Mahemolunia, iʼohe niha si daöfa daʼö Faulo ba lafalua gowasa fangamoniʼö boto.” (Hal. 21:​23, 24, 26) No irorogö wahasara dödö ba mbanua niha Keriso Faulo börö gamuata foloʼö niforomaʼönia.—Rom. 14:​19, 21. w23.10 10 ¶15-16

Te lö irai tumbu ba wangera-ngeramö wa moguna sibai waʼataʼu ba wondrorogö fahuwusa si sökhi. Hizaʼi, dozi somasi mangokhögö fahuwusa saro khö Yehowa moguna ’laʼataʼufi ia’. Hewaʼae na no ara mangai halöwö ita khö Yehowa, fefu ita moguna tarorogö waʼataʼu soroi ba dödö khönia. Hizaʼi, hadia geluahania fangataʼufi Lowalangi? Niha sangokhögö faʼataʼu si tefaudu khö Lowalangi, laʼomasiʼö ia ba lö lafalua zi möi famakiko fahuwusara khönia. So khö Yesu wangataʼufi Lowalangi. (Heb. 5:7) Tenga faʼataʼu si hokha mbu nirasoinia khö Yehowa. (Yes. 11:​2, 3) Hizaʼi, irasoi waʼomasi soroi ba dödö ba iʼoʼö niwaʼö Lowalangi. (Yoh. 14:​21, 31) Simane Yesu, ahöli-höli dödöda khö Yehowa ba tafosumange ia börö me Lowalangi safönu faʼomasi, atua-tua, atulö ba abölö. Aboto ba dödöda wa iʼomasiʼö sibai göi ita Yehowa, ba iʼameʼegö tödö hewisa wanemaʼöda fanuturu lala moroi khönia. Tola afökhö dödö Yehowa tabeʼe, ba tola göi taʼomusoiʼö dödönia.—Si. 78:41; Amd. 27:11. w23.06 14 ¶1-2; 15 ¶5

Me itugu monönö waʼabölö Razo Usia, olifu ia wa Yehowa zameʼe khönia faʼabölö hegöi ngawalö zi sökhi. Hadia wamahaʼö nihalöda? Böi olifu ita wa Yehowa zameʼe ngawalö zi sökhi ba waʼaurida hegöi halöwö ba wamosumange yaʼia. Moroi na fayawa ita ba zi no takhamö, abölö sökhi na taʼandrö saohagölö khö Yehowa börö wanolo nitemada moroi khönia. (1 Ko. 4:7) Na so khöda wangide-ngideʼö, tafaduhuʼö wa lö moʼahonoa ita ba moguna khöda degu-tegu. Imane talifusöda si no töra 60 fakhe, ”Moguna ufahaʼö ndraʼo enaʼö böi alio tetutu dödögu mazui ide-ide dödögu na so zamatunö khögu sala nifaluagu. Itaria na ufalua zala side-ide ba labeʼe khögu degu-tegu, utemaʼö daʼö ba lö tebulö ufalua zabölö sökhi khö Yehowa.” Sindruhunia, na taʼoʼö Yehowa ba lö tebulö taʼokhögö wangide-ngideʼö, hasambalö tarasoi waʼomuso dödö sindruhu ba waʼauri.—Amd. 22:4. w23.09 10 ¶10-11

Moguna anau gölö niha Keriso me abad sifoföna. Hadia mbörö? Börö me tenga ha abula dödö simane nitaögö niha sato nitaögöra. Hizaʼi lataögö göi gabula dödö tanö böʼö börö me tobali ira niha Keriso. Ato ba gotaluara nifakao ndra sondröniaʼö agama niha Yahudi, ira samatörö Romawi, hegöi ösi nomora. (Mat. 10:21) Itaria göi ba mbanua niha Keriso, moguna lalawa wamahaʼö moroi ba niha si no mondröi sindruhu somasi mamoto fahasara dödö. (Hal. 20:​29, 30) Hewaʼae simanö, tola laforomaʼö waʼanau gölö. (Fam. 2:3) Hadia zanolo yaʼira? Laʼangerönusi duma-duma si so ba Zura Niʼamoniʼö sangoromaʼö faʼanau gölö. (Yak. 5:​10, 11) Baero daʼö, laʼandrö waʼabölö moroi khö Yehowa. (Hal. 4:​29-31) Ba laʼosambuaʼö dödöra ba howu-howu nitemara moroi khö Yehowa na lö tebulö so khöra waʼanau gölö. (Hal. 5:41) Tola göi anau gölöda na lö tebulö tabaso ba taʼangerönusi duma-duma niha si lö faröi ba Zura Niʼamoniʼö hegöi ba publikasida. w23.07 3 ¶5-6

Lö iröi ita Yehowa hegöi Yesu. Me no iʼosilöʼögö Yesu Fetero, moguna ihalö gangetula si tohude. Hadia awuwu ia mazui lö iböhöli tobali soloʼö khö Keriso? No mangandrö Yesu khö Yehowa enaʼö lö awuwu wamati Wetero. No göi ifatunö khö Wetero wangandrönia andrö, ba iforomaʼö waʼafaduhu dödö wa tola ibeʼe wamarou dödö Fetero khö ndra talifusönia. (Luk. 22:​31, 32) Ba gafuriata tatu manö teʼaroʼö Wetero me ifuli itörö tödönia wehede Yesu! Hadia wamahaʼönia? Ba ginötö tahalö gangetula si tohude, tola manö iʼogunaʼö Yehowa ndra satua sokubaloi safönu faʼomasi ba wameʼe khöda famarou dödö enaʼö lö faröi ita. (Ef. 4:​8, 11) Na taʼofönaiʼö wamalua halöwö fanuriaigö, hasambalö ibönökhi zoguna khöda Yehowa simane nifaluania khö Wetero hegöi ira sinengenia tanö böʼö. w23.09 24-25 ¶14-15

Inehegö Yehowa fefu zi sökhi si no tafalua ba niha böʼö, hewaʼae no ide-ide daʼö ba wamaigida. Hulö zumange sebua böli daʼö ba wamaiginia ba amaedola no tabeʼe nifalali khö Yehowa, ba hasambalö isulöni khöda. Na no irai labeʼe khöu halöwö tobali enoni mazui satua sokubaloi, lö olifu Yehowa wamorege si no öfalua mböröta hegöi faʼomasi si no öforomaʼö ba wamalua yaʼia. (1 Ko. 15:58) Iʼila göi waʼomasi si no öfalua irugi iadaʼa. Omasi Yehowa na itugu taʼomasiʼö ia hegöi ira talifusöda. Tola itugu tedou waʼomasida khö Yehowa na tabaso Daromalinia, taʼangerönusi, ba lö mamalö mangandrö ita khönia. Tola itugu tedou waʼomasida khö ndra talifusöda na taʼalui lala ba wanolo yaʼira. Na itugu tedou waʼomasida, itugu aro wahuwusada khö Yehowa hegöi khö ndra talifusöda. Fahuwusa simane daʼö lö aetu ia sagötö faʼara! w23.07 10 ¶11; 11 ¶13; 13 ¶18

Dozi niha Keriso moguna lahalö samösa gangetula sanandrösa ba wamadöhö fökhö. Ba Zura Niʼamoniʼö, lö oya goroisa sanandrösa ba wamadöhö fökhö sinangea laʼoʼö ira niha Keriso, yaʼia daʼö oroisa ba wangaröuʼö yaʼira sanandrösa ba ndro hegöi fakelemusa. (Hal. 15:20; Gal. 5:​19, 20) Tanö böʼönia, moguna lahalö samösa gangetula. Ba so ösa zamili lala tanö böʼö ba wamadöhö fökhöra. Hewaʼae na taʼila wa so gunania mazui möi famaʼala khö ndra talifusöda lala ba wamadöhö wökhö nifilira, moguna taʼameʼegö tödö gangetula nihalöra. Törö tödöu zi öfa ngawalö andre: (1) Ha Famatörö Lowalangi zi tola mamadöhö fefu wökhö sagötö faʼara. (Yes. 33:24) (2) Moguna ”sindruhu-ndruhu faduhu dödö” niha Keriso ba gangetula nihalöra. (Rom. 14:5) (3) Böi öhuku ira mazui tobali ndraʼugö fangala khöra. (Rom. 14:13) (4) Moguna laforomaʼö waʼomasi ba laʼofönaiʼö wahasara dödö ba mbanua niha Keriso moroi ba gangetulara samösa.—Rom. 14:​15, 19, 20. w23.07 24 ¶15

Hadia öʼameʼegö tödö wahuwusau khö Yehowa? Tatu manö! (Si. 104:​33, 34) Ato ba gotaluara zanehegö faʼauri hegöi okhötara ba wamosumange Yehowa. Duma-dumania niha Naziri ba götö ndraono Gizaraʼeli me föna mazui niha nifasambua. Tefaudu sibai wehede daʼa ba woʼamaedolagö iraono Gizaraʼeli sanehegö faʼaurira ba wangai halöwö khö Yehowa ba lala si tohude. Barö Goroisa Moze, ira matua mazui ira alawe tola lafazökhi mbuʼusa li si tohude khö Yehowa enaʼö tobali ira niha Naziri irugi ginötö si no latatugöi. (4 Mo. 6:​1, 2) Ba ginötö ifazökhi mbuʼusa li daʼö si samösa niha, eluahania ifabuʼu wa soroi ba dödönia iʼoʼö gamakhoita si lö moguna lafalua iraono Gizaraʼeli tanö böʼö. Hana wa so zomasi fawuʼu li tobali niha Naziri? Tatu börö me sindruhu-ndruhu laʼomasiʼö Yehowa ba laʼandrö saohagölö ba waʼafahöna howu-howu nibeʼenia.—5 Mo. 6:5; 16:17. w24.02 14 ¶1-2

Ba Zura Niʼamoniʼö, ngawua wehede ”faʼalöfaröi” mazui ”faʼomasi si lö faröi” ba li Heberaiʼo, eluahania amakhaita saro ba safönu faʼomasi. Asese muʼogunaʼö daʼö ba wanutunö faʼomasi niforomaʼö Lowalangi ba niha samosumange yaʼia hegöi faʼomasi ba gotalua nono mbanua Lowalangi. (2 Sa. 9:​6, 7) Tola itugu tedou ba aro waʼalöfaröida. Nehegö hewisa wa tola itugu aro waʼalöfaröi Danieli. Asese tetandraigö waʼalöfaröi Danieli khö Yehowa sandrohu faʼaurinia. Hizaʼi, fanandraigö sabölö ebua, alua ia te mato 90 fakhe ndröfinia. Niha sohalöwö ba gödo razo, fatuwu ira khö Danieli ba lö lafosumange Lowalangi Danieli. Börö daʼö, laʼalui lala ba wamunu Danieli. Lafazökhi gamakhoita si no iteka razo ba wangiʼila hadia abölö irorogö waʼalöfaröinia khö Lowalanginia mazui khö razo. Enaʼö oroma waʼalöfaröi Danieli khö razo ba lö faböʼö ia moroi ba niha böʼö, tobönö na ha iböhöli wangandrö sagötö ba zi 30 hari. Hizaʼi, ihalö gangetula Danieli ba wondrorogö faʼalöfaröinia khö Yehowa.—Dan. 6:​12-15, 20-22. w23.08 5 ¶10-12

Iʼandrö khöda Yehowa enaʼö lö tebulö taʼomasiʼö ndra talifusöda. Na so zamalua khöda si lö sökhi, faduhu dödöda wa sindruhunia omasi ira laʼoʼö goi-goi Zura Niʼamoniʼö, ba tenga daʼö gohitö dödöra ba wangafökhöiʼö tödöda. (Amd. 12:18) Iʼomasiʼö nono mbanuania Yehowa hewaʼae lö moʼahonoa ira. Ba ginötö tafalua zala, lö abao dödönia sagötö faʼara ba lö ifandröndröu ia khöda. (Si. 103:9) Tatu taʼandrö sibai saohagölö khö Namada börö me omasi ia iʼefaʼö zalada. Börö daʼö, dataʼoʼö nifaluania, dataʼefaʼö göi zala niha böʼö! (Ef. 4:32–5:1) Böi olifu ita göi wa no itugu ahatö gamozua götö danö andre ba monönö waʼabölö-bölö wamakao. Börö daʼö, böi tebulö ahatö ita khö ndra talifusöda. Tola manö labeʼe ita ba gurunga börö wamatida. Ba ginötö daʼö, tatu moguna sibai khöda ndra talifusöda töra moroi ba zilalö.—Amd. 17:17. w24.03 15-16 ¶6-7

Ba Zura Niʼamoniʼö, so ayati sanutunö waö-waö ndra si bohou ebua tanö böʼö si fahuwu khö Yehowa, sangomusoiʼö tödönia, mazui si no mofozu ba waʼauri. Duma-dumania simane Dawido. Hewaʼae awuyu-wuyu ia, ihalö gangetula ba wamosumange Lowalangi ba tobali ia razo si lö faröi. (1 Ra. 3:6; 9:​4, 5; 14:8) Tola teʼabölöʼö ba tefarou dödömö na öfahaʼö ndraʼugö ba waö-waö waʼauri Dawido hegöi faʼalöfaröinia ba wamosumange Lowalangi. Mazui tola öfahaʼö ndraʼugö ba duma-duma Mareko hegöi Timoteo. Labörötaigö lafosumange Yehowa me awuyu-wuyu nasa ira ba lö tebulö larorogö waʼalöfaröira. Lala wangogunaʼömö faʼaurimö iadaʼa, tola molua-lua ia ba waʼaurimö ba zi so miföna. Na öʼodaligö Yehowa tenga faʼatua-tuamö samösa, daʼö zanolo yaʼugö ba wangai angetula si sökhi. Tola ösöndra waʼohahau dödö ba so mbuania khöu. Törö tödöu wa hasambalö iʼameʼegö tödö Yehowa fefu zi no öfalua khönia. Lö hadöi lala waʼauri sabölö sökhi baero wamosumange Amada Yehowa si so ba zorugo safönu faʼomasi! w23.09 13 ¶18-19

Aboto ba dödö Waulo wa lö moʼahonoa ndra talifusönia. Duma-dumania, lö ara me no farahu ia ba mbanua niha Keriso, so ndra talifusö sanahö-nahö tödö khönia. (Hal. 9:26) Ba gafuriata, so zamatou-tou yaʼia ba zi lö sökhi si möi fangobousi döinia. (2 Ko. 10:10) No göi irai iʼila Faulo samösa zatua sokubaloi sangai angetula si lö tefaudu irege tobali fangala ba niha böʼö. (Gal. 2:​11, 12) Ba no irai afatö dödö Waulo ibeʼe Mareko, si fahuwu khönia. (Hal. 15:​37, 38) Tola manö ihalö gangetula Faulo wa lö saʼae fariawö ia khöra, hizaʼi lö tebulö iʼokhögö lala wangera-ngera satulö sanandrösa khö ndra talifusönia ba lö iböhöli wangai halöwö khö Yehowa. Hadia mbörö wa tola anau gölö Waulo? Iʼomasiʼö ndra talifusönia Faulo. Daʼö mbörö wa tola iʼosambuaʼö dödönia ba gamuatara si sökhi, tenga ba zoʼamböta ira. Faʼomasi göi zanolo Faulo ba wangefaʼö sala niha böʼö simane nitutunö ba ayati maʼökhö andre. w24.03 15 ¶4-5

Oya ayati ba Zura Niʼamoniʼö sanutunö hawaʼatohude gamuata falöʼalio mofönu. Datafaigi duma-duma Gizaʼaki. Me toröi ia ba mbanua Gerara si so ba Wilisiti, ira niha si falazi omo khönia safökhö tödö, laduhö mbaʼa nidanö nikhao ndra sawuyu namania. Moroi na itandro ba khönia, ihalö gangetula Izaʼaki ba wanawa nahia tanö böʼö. Iʼohe zoroi yomonia ba ifuli ikhao khönia mbaʼa si bohou ba daʼö. (1 Mo. 26:​12-18) Hizaʼi, lawaʼö zui ira niha Wilisiti wa khöra nasa nidanö si so ba nahia daʼö. Hewaʼae simanö, lö tebulö irorogö waʼatulö Izaʼaki. (1 Mo. 26:​19-25) Hadia zanolo yaʼia ba wangoromaʼö falöʼalio mofönu hewaʼae na so niha böʼö zanandrawaisi yaʼia? Tatu manö iʼoʼö duma-duma ndra satuania. Ifahaʼö ia ba nifalua Gaberahamo ba wondrorogö faʼatulö, hegöi ba ’waʼahono-hono ba fangide-ngideʼö’ niforomaʼö Zara.—1 Fe. 3:​4-6; 1 Mo. 21:​22-34. w23.09 15 ¶4

Ifatenge nononia siaʼa ba gulidanö Yehowa ba wamahaʼö yaʼita sanandrösa ba Wamatörö andrö, aefa daʼö itehegö nosonia Yesu ba wangöhöli yaʼita moroi ba horö hegöi faʼamate. Lö ara, tesusugi Yesu ba manahae ia ba zorugo, mamatörö ia tobali Razo ba Wamatörö Lowalangi andrö. Tuho siföföna Zura Niʼamoniʼö yaʼia daʼö fangamoniʼö töi Yehowa ba ginötö ifalua gohitö dödönia ba gulidanö barö Wamatörö nidöniaʼö Keriso. Tebai tebulö gohitö dödö Yehowa. No ifabuʼu wa hasambalö ifalua. (Yes. 46:​10, nisura ba gahe zura; Heb. 6:​17, 18) Samuza inötö dania, tobali Faradaiso gulidanö andre ba awena dania moʼahonoa fefu ngaʼötö Gadamo ba ’lasöndra waʼauri sagötö faʼara’. (Si. 22:26) Hizaʼi tenga ha daʼö gohitö dödö Yehowa. Omasi ia na teʼosambuaʼö fefu genoninia si so ba zorugo hegöi ba gulidanö. Aefa daʼö, mangalulu ira fefu khö Yehowa me daʼö zamatörö yaʼira ba lö faröi ira ba wamosumange yaʼia. (Ef. 1:​8-11) Tatu adöni dödöu me no öʼila zahöli-höli dödö nifalua Yehowa ba wamalua ohitö dödönia. w23.10 20 ¶7-8

Lö ara me no larugi Yeruzalema ira niha Yahudi sangawuli moroi ba Mbabilona, alua khöra gabula dödö ba wombönökhi soguna ba nösi nomora inönö nasa waʼafawuka salua ba mbanua nirugira börö wolohi moroi ba nudu. Börö daʼö, so ösa zi lö mangila mangosambuaʼö tödöra ba wamazökhi mangawuli osali Yehowa. Ifatenge darua zamaʼeleʼö khönia Yehowa sotöi Hagaʼi ba Zakharia enaʼö ifuli tefarou dödö niha sato me luo daʼö. (Hag. 1:1; Zak. 1:1) Arakhagö 50 fakhe aefa daʼö, moguna zui wamarou dödö khö ndra niha Yahudi si no mangawuli moroi ba Mbabilona. Börö daʼö, Esera samösa sonekhe ba wanura Oroisa Moze, mofanö ia moroi ba Mbabilona numalö ba Yeruzalema ba ibeʼe wamarou dödö ba nono mbanua Lowalangi enaʼö laʼofönaiʼö wamosumange satulö. (Esr. 7:​1, 6) Famaʼeleʼö nifaʼema Hagaʼi hegöi Zakharia, daʼö zanolo ono mbanua Lowalangi ba götö föna enaʼö lö tebulö lafaduhusi tödö Yehowa sagötö alua khöra gabula dödö. Famaʼeleʼö daʼö göi zi tobali fanolo khöda iadaʼa enaʼö lö tebulö tafaduhusi tödö Yehowa na alua khöda gabula dödö.—Amd. 22:19. w23.11 14-15 ¶2-3

Hewisa wangoromaʼöda faʼomasi khö ndra talifusöda si sara lala wamati? Sambua lala si tola tafalua yaʼia daʼö na tabeʼe khöra wondrara dödö. ’Lö taböhöli wameʼe fondrara dödö khö ndra talifusöda’ na so khöda waʼahakhö dödö. (1 Te. 4:18) Hewisa enaʼö lö tebulö taʼomasiʼö ndra talifusöda? Yaʼia daʼö na taforege ba wangefaʼö sala nifaluara. Hana wa moguna taforomaʼö waʼomasi khö ndra talifusö töra-töra ba ginötöda andre? Datanehegö hadia niwaʼö Wetero, ”No ahatö gamozua fefu hadia ia. Andrö . . . faoma miʼomasiʼö nawömi soroi ba dödö.” (1 Fe. 4:​7, 8) Börö me no itugu ahatö gamozua gulidanö si lö sökhi andre, hadia zi tola manö alua khöda? No ifaʼeleʼö Yesu ba imane khö ndra nifahaʼönia, ”Dozi soi fatiu dödöra khömi börö döigu andrö.” (Mat. 24:9) Enaʼö anau gölöda hewaʼae so zi fatiu tödö khöda, moguna tarorogö wahasara dödö. Hewaʼae na iforege Satana enaʼö awuwu ita, hizaʼi teʼosambuaʼö ita ba waʼomasi.—Fil. 2:​1, 2. w23.11 13 ¶18-19

Sindruhu si so ba Daromali Lowalangi ebua sibai lua-luania daʼö. Na tafahaʼö niha sanandrösa khö Yehowa hegöi bua-buania, tola taʼila mbua sahöli-höli dödö. Lö saʼae balunö ira ba walimosa Zatana, ba tola laʼila wa Yehowa andrö Ama safönu faʼomasi, fagölö simane nirasoida. Ahöli-höli dödöra börö waʼabölö Yehowa si lö ola. (Yes. 40:26) Ibörögö faduhu dödöra khönia börö waʼatulönia soʼahonoa. (5 Mo. 32:4) Oya wamahaʼö nihalöra moroi ba waʼatua-tuania sebua. (Yes. 55:9; Rom. 11:33) Ba adöni sibai dödöra me laʼila wa Lowalangi andrö no faʼomasi. (1 Yo. 4:8) Na itugu aboto ba dödöra sanandrösa khö Yehowa, itugu faduhu dödöra wa tola auri ira sagötö faʼara tobali iraononia. Sindruhu wa no töi sebua khöda ba wanolo niha böʼö enaʼö aboto ba dödöra sanandrösa khö Namara! Ba ginötö tafalua daʼö, ba wamaigi Yehowa no ”si falulu fohalöwö” ita khönia.—1 Ko. 3:5. w24.02 12 ¶15

Na no öfahaʼö ndraʼugö iadaʼa ba Zura Niʼamoniʼö mazui laʼebuaʼö ndraʼugö ira satuamö si no tobali Samaduhuʼö Yehowa, hadia no öʼangeragö enaʼö tebayagö ndraʼugö idanö? Daʼö no ohitö dödö si sökhi! Hizaʼi fatua lö öbayagö ndraʼugö idanö, moguna ölulu waʼaurimö khö Yehowa. Hewisa lalamö ba wolulu faʼaurimö khö Yehowa? Moguna mangandrö ndraʼugö khönia ba öfabuʼu wa ha yaʼia nifosumangemö ba lö tebulö öʼofönaiʼö gohitö dödönia. Öfabuʼu khönia wa lö tebulö öʼomasiʼö Yehowa ”moroi siʼaikö ba dödöu, nosou maʼasambua, era-erau ba faʼabölöu maʼafefu”. (Mrk. 12:30) Folulu faʼauri ha yaʼugö zangila faoma Yehowa. Hizaʼi famayagö idanö, mufalua ia föna niha sato irege fefu niha laʼila wa no ölulu waʼaurimö khö Yehowa. Tebai öʼaohasi ba dödö buʼusa li nifaluamö me ölulu waʼaurimö khö Yehowa. Omasi ia na öfalua mbuʼusa limö andrö ba moguna öhalö gangetula ba wamalua yaʼia sandrohu faʼaurimö.—Sango. 5:4. w24.03 2 ¶2; 3 ¶5

Lö hadöi fongambatö soʼahonoa. No ihaogö wangombakha khöda Sura Niʼamoniʼö wa niha si no mangowalu oya itörö ia ”famakao mboto”. (1 Ko. 7:28) Hadia mbörö? Börö me lö moʼahonoa woʼomo ira matua hegöi foʼomo ira alawe. Amuata, si toʼölö lafalua, hegöi lala waʼaurira ba zilalö no faböʼö-böʼö. Ngawalö zomasi ira hegöi si lö omasi ira te lö fagölö. Me no aefa mangowalu ira, awena aboto ba dödöra wa so gamuata si lö omasi ira khö ngambatöra si lö oroma ba zilalö. Fefu daʼö, tola iʼasogö gabula dödö. So ösa zi no mongambatö faoma latahi-tahigö nawöra hewaʼae sindruhunia so zalara zamösana. Lö omasi ira falulu fohalöwö ba wangasiwai abula dödö, hizaʼi lahalö gangetula wa abölö sökhi na fabali ira. Hadia angetula si tefaudu daʼö? Tenga. Iʼandrö Yehowa khö woʼomo ira matua hegöi ira alawe enaʼö laʼaroʼö wongambatöra hewaʼae na abua wamalua daʼö. w24.03 16 ¶8; 17 ¶11

Me no ölulu waʼaurimö ba öfabayagöʼö ndraʼugö idanö, moguna nasa itugu tedou waʼaboto ba dödömö sanandrösa khö Yehowa ba öʼomasiʼö ia irege aro dötönafömö ba waʼauri si lö aetu ba gulidanö faradaiso. (Heb. 5:13–6:1) Te no irai alua khömö zimane nitutunö ba Roma 5:​2-4. No oya wamakao salua khöu, hizaʼi no öforomaʼö waʼanau gölö ba örasoi wa omuso dödö Yehowa ba nifaluamö. Daʼö zangaʼaroʼö tödöu wa hasambalö ötema hadia zi no ifabuʼu Yehowa. Itugu aro dötönafömö töra moroi ba zilalö. Hulö zi no alua ia. Ebua sibai lua-luania daʼö ba ngawalö nifaluamö, duma-dumania, itolo ndraʼugö ba wombulöʼö amuatamö ba nösi nomomö, ba wangai angetula hegöi ba wangogunaʼö inötö. No itutunö Faulo wa tola taʼokhögö dötönafö na taʼomusoiʼö dödö Lowalangi. Hizaʼi, inönö nasa wangombakha khöda wa hasambalö alua dötönaföda.—Rom. 15:13. w23.12 12-13 ¶16-19

Na göna ita abula dödö sebua, tola manö molua-lua daʼö ba lala wangera-ngerada, nirasoida, hegöi nifaluada. Tola manö hulö nifadaulu-daulu wangera-ngerada. Hewisa wameʼe Yehowa khöda fanolo na arakhagö ahöndrö ita börö gabula dödö salua? Ifaduhuʼö ba dödöda wa hasambalö ibeʼe khöda ’waʼahono dödö’. Tola göi mufoʼeluaha wehede daʼa tobali ”sangaʼaroʼö”. Na abölö-bölö mbade tola manö tobali göfa. Börö daʼö, oya göfa iadaʼa sangogunaʼö tambua gamaudu tanö tou göfa ba gabera hegöi ba gambölö. Daʼö mbörö wa lö abua dambai göfa andrö irege tola mofanö ba ohahau dödö zanörö köfa. Hizaʼi, awena oroma hadia gunania dambua andrö na no mofanö göfa. Simane daʼö göi iadaʼa, awena ibeʼe khöda waʼaro dödö Yehowa na lö taböhöli ba wamosumange yaʼia gofu hadia ia zalua khöda. w24.01 22 ¶7-8

Ba ginötö örasoi waʼataʼu, sofu khöu samösa, ’Hadia zi no ifalua khögu Yehowa?’ Tandraigö angerönusi niwöwöinia. Duma-dumania, ”haogö wamaigi” hewisa woʼameʼegö tödö Yehowa wofo ba dalu mbanua hegöi ngawalö mbunga, hewaʼae tenga si fakhili-khili khönia daʼö ba tebai lafosumange ia. Tatu abölö iʼameʼegö tödö ita Yehowa! Na taʼangerönusi fefu daʼö, itugu aro waʼafaduhu dödöda khönia. (Mat. 6:​25-32) Angeragö göi hadia zi no ifalua Yehowa ba niha samosumange yaʼia. Tola öfahaʼö ndraʼugö ba duma-duma niha si so ba Zura Niʼamoniʼö sangoromaʼö famati saro, mazui öbaso duma-duma salua khö ndra Samaduhuʼö Yehowa iadaʼa. Baero daʼö, angerönusi hadia zi no ifalua Yehowa ba wondrorogö yaʼugö. Duma-dumania: Hewisa wanolonia yaʼugö enaʼö aboto ba dödöu zindruhu? (Yoh. 6:44) Hewisa wameʼenia fanema li ba wangandrömö? (1 Yo. 5:14) Hadia manö mbua nitemamö ero maʼökhö börö höli nibeʼe Nono niʼomasiʼönia?—Ef. 1:7; Heb. 4:​14-16. w24.01 4 ¶6; 7 ¶17