Baŵa si Felezara

Na so ndraonomö, tolo ira ba wamaʼanö mbua gera-era si tefaudu ba ndröfira. Itaria, so duho nitutunö ba gangowuloa sanandrösa ba gabula dödö ba wangowalu, mazui sanandrösa ba gamuata si lö raʼiö. Hewaʼae simanö, te so sambua mazui dombua ngenoli zi tola labeʼe mbua gera-erara iraono. Tolo ndraonomö enaʼö aboto ba dödöra hadia mbörö wa lö asese latuyu ira na labeʼe yawa dangara. Na öfalua daʼö, lö afatö dödöra hewaʼae na lö latuyu ira. (1 Ti. 6:18) Fefu ita, tola tafaʼanö mbua gera-era si möi mamolakhömi töi Yehowa hegöi famarou dödö ndra talifusöda ba wamati. (Amd. 25:11) Itaria tatutunö zi no irai alua khöda. Hizaʼi, moguna taforege enaʼö lö talafo oya tatutunö sanandrösa khöda. (Amd. 27:2; 2 Ko. 10:18) Si sökhinia, taforege enaʼö taʼosambuaʼö dödöda khö Yehowa, Taromalinia, hegöi ono mbanuania.—Fam. 4:11. w23.04 24-25 ¶17-18

Faʼomasi zanolo yaʼita enaʼö lö mörö ba wamati. (Mat. 22:​37-39) Börö me taʼomasiʼö Lowalangi lö tebulö manuriaigö ita hewaʼae na alua khöda waʼabasaki. (2 Ti. 1:​7, 8) Ba börö me taʼomasiʼö nawöda niha, lö tebulö manuriaigö ita, ba taʼogunaʼö telefo mazui sura. Lö göi taya wanötönada wa samuza inötö dania tebulö waʼauri niha ba lafalua zatulö. (Hez. 18:​27, 28) Börö me taʼomasiʼö ndra talifusöda, andrö wa faoma ’taʼaroʼö ba tafarou dödö nawöda’. (1 Te. 5:11) Simane ira saradadu si falulu fohalöwö ba samorege ba wasuwöta, simane daʼö göi ita. Lö taʼodödögö ba wangafökhöiʼö tödö ndra talifusöda mazui tasulöni khöra na lafalua khöda zi lö atulö. (1 Te. 5:​13, 15) Taforomaʼö göi waʼomasi na taʼameʼegö tödö ndra talifusöda sondröniaʼö ba mbanua niha Keriso.—1 Te. 5:12. w23.06 10 ¶6; 11 ¶10-11

Sambua lala si tola tafalua ba wangaʼaroʼö famatida yaʼia daʼö na taʼangerönusi höli. Höli andrö zi tobali weʼe-weʼe dödöda wa hasambalö alua nifabuʼu Lowalangi. Na tahaogö taʼangerönusi hadia mbörö wa ibeʼe khöda höli Lowalangi, ba hawaʼebua zi no itehegö, daʼö zanolo yaʼita ba wangaʼaroʼö famatida wa hasambalö alua nifabuʼu Lowalangi sanandrösa ba waʼauri si lö aetu ba gulidanö sabölö sökhi. Hana wa tola tawaʼö zimanö? Hadia zi farahu ba höli? Ifatenge Nono niʼomasiʼönia Yehowa ba sabölö ahatö khönia enaʼö möi ba gulidanö tobali niha soʼahonoa. Me so Yesu ba gulidanö, anau gölönia ba wanaögö faʼabasaki. Ebua sibai mböli zi no itehegö Yehowa! Lowalangida sebua faʼomasi, lö itehegö tefakao ba mate Nononia ha enaʼö tasöndra waʼauri sabölö sökhi ba zi sabata. (Yoh. 3:16; 1 Fe. 1:​18, 19) Börö me ebua sibai mböli zi no ibeʼe Yehowa, itatugöi enaʼö sindruhu-ndruhu tasöndra waʼauri si lö aetu ba gulidanö si bohou. w23.04 27 ¶8-9

Hadia omasi Yehowa ba wanusugi niha si no mate? Omasi. Ibeʼe wanuturu lala ba zi hadauga niha sanura Sura Niʼamoniʼö ba wanura buʼusa linia sanandrösa ba wanusugi. (Yes. 26:19; Fam. 20:​11-13) Na no fawuʼu li Yehowa, hasambalö ifalua daʼö. (Yos. 23:14) Ba omasi ia na alio isusugi niha si no mate. Angeragö atö wehede Yobi. Hewaʼae na mate ia, omasi sibai Yehowa na ifuli auri ia. (Yob. 14:​14, 15) Ba simane daʼö göi nirasoi Yehowa ba nono mbanuania si no mate. Omasi sibai ia ba wanusugi yaʼira enaʼö laʼokhögö mboto si sökhi ba larasoi waʼohahau dödö. Hewisa niha si miliaran faʼato si lö fakhamö mamahaʼö yaʼira sanandrösa khö Yehowa fatua lö mate ira? Lowalangida sebua faʼomasi, omasi göi ia ba wanusugi yaʼira. (Hal. 24:15) Omasi ia na tebeʼe khöra ginötö enaʼö tola tobali si fahuwu khönia ba auri ira sagötö faʼara ba gulidanö.—Yoh. 3:16. w23.04 9 ¶5-6

Hadia nifaluamö ba wangaʼaroʼö tötönafömö andrö? Duma-dumania, na ba gulidanö so dötönaföu, baso waö-waö nisura ba Zura Niʼamoniʼö sanandrösa ba Waradaiso ba angerönusi daʼö. (Yes. 25:8; 32:​16-18) Khalaigö hewisa waʼaurimö ba gulidanö si bohou. Na takhalaigö waʼaurida ba gulidanö si bohou, tola aboto ba dödöda wa lö abölö-bölö ba lö arara wamakaoda andrö. (2 Ko. 4:17) Tötönafö nibeʼe Yehowa zameʼe khöu faʼabölö. No ihenaigö fefu zoguna khöda Yehowa enaʼö abölö ita. Börö daʼö, na moguna khöu wanolo ba wamalua halöwömö, na alua gabula dödö, mazui enaʼö lö tebulö öʼokhögö waʼomuso dödö, hatöʼögö khö Yehowa ba wangandrö soroi ba dödö ba alui wanuturu lala moroi khönia ba ginötö öfalua wamahaʼö samösa. Tema wanolo moroi khö ndra talifusö si sara lala wamati. Khalaigö dötönaföu ba zi so miföna. Na öfalua daʼö, tola ötema ’waʼabölö moroi ba gehehania solakhömi, irege anau gölömö ba wanaögö fefu hadia ia si fao faʼebolo dödö ba faʼomuso dödö’.—Kol. 1:11. w23.10 17 ¶19-20

Ba ginötö mangandrö ita, oya zinangea taʼandrö saohagölö khö Yehowa. Tola taʼandrö saohagölö ba ngawalö zi sökhi si no tatema, börö me fefu mbuala si sökhi moroi khönia daʼö. (Yak. 1:17) Duma-dumania, taʼandrö saohagölö khönia börö me no ibeʼe khöda gulidanö si sökhi famaigi hegöi niwöwöinia tanö böʼö sahöli-höli dödö. Taʼandrö göi saohagölö khö Yehowa börö me no ibeʼe khöda waʼauri, ösi nomo, si fahuwu, hegöi tötönafö. Baero daʼö, taʼandrö göi saohagölö khö Yehowa börö me no itehegö khöda tobali si fahuwu khönia. Enaʼö tola taʼandrö saohagölö khö Yehowa, moguna tahaogö woʼangeragö hadia manö zi no ifalua khöda zamösana. Hadia mbörö? Börö me toröi ita ba gulidanö si lö mangila mangandrö saohagölö. Ato niha ha somasi-masi dödöra niʼangeragöra, ba lö laʼangeragö ba wangandrö saohagölö ba zi no laʼokhögö. Na ibörögö tedönisi dödöda ba lala wangera-ngera simane daʼö, tola manö olifu ita ba wangandrö saohagölö. Enaʼö lö alua daʼö, böi taböhöli ba woʼameʼegö tödö fefu zi no ifalua Yehowa ba taʼandrö saohagölö khönia.—Luk. 6:45. w23.05 4 ¶8-9

Börö me Ama sebua faʼomasi Yehowa, andrö wa lö omasi ia na göna ita famakao. (Yes. 63:9) Hewaʼae simanö, lö itimbagö fefu ngawalö wamakao salua khöda si no amaedola nungo nidanö mazui hola-hola galitö. (Yes. 43:2) Hizaʼi, no ifabuʼu wa hasambalö itolo ita enaʼö tola tataögö zalua andrö. Lö itehegö göna ita fanandraigö si tola mangetuʼö fahuwusada khönia. Ibeʼe khöda gehehania niʼamoniʼö enaʼö tola anau gölöda. (Luk. 11:13; Fil. 4:13) Buania, tola taʼokhögö waʼafaduhu dödö wa ibeʼe khöda wanolo enaʼö lö faröi ita ba anau gölöda wamosumange yaʼia. (Heb. 11:6) Itaria tawaʼö tödöda wa talafo abua wamakao nitaögöda. Tola manö ibörögö taʼaombösi tödö hadia itolo ita Yehowa mazui löʼö. Hizaʼi, ifaduhuʼö khöda Sura Niʼamoniʼö wa tola ’tasawö göli’ börö waʼabölö si otarai Lowalangi. (Si. 18:29) Börö daʼö, moroi na talafo taʼaombösi tödö zalua, sökhi na talau mangandrö si fao famati saro, faduhu dödöda wa hasambalö ibeʼe Yehowa wanema li ba wangandröda.—Yak. 1:​6, 7. w23.11 22 ¶8-9

Daʼö niwaʼö Zura Niʼamoniʼö sanandrösa ba waʼomasi sindruhu. Fehede omasiö andrö tola möi fangaro zi sambua fongambatö: Tola miʼokhögö waʼomasi sindruhu. Hadia tola laʼokhögö waʼomasi sindruhu sandrohu faʼauri zi sambua fongambatö? Mangawuli daʼö ba wamorege nifaluara. Duma-dumania, enaʼö lö tebulö mohola galitö ba ndrundrunga mbaho geu, moguna munönö geu khönia. Na löʼö, itugu ara mate galitö andrö. Hulö simane daʼö göi, enaʼö lö taya waʼomasi ba zi sambua fongambatö, moguna laʼaroʼö gamakhaitara khö nawöra zamösana. Itaria, foʼomo ira matua hegöi ira alawe, larasoi wa no alö waʼomasira khö nawöra zamösana. Mendrua manö na lataögö gabula dödö ba zoguna, fökhö mboto, mazui abula dödö ba wangebuaʼö iraono. Börö daʼö ba wondrorogö ”hola-hola galitö Yehowa” enaʼö lö tebulö mohola, moguna laʼokhögö wahuwusa saro khö Yehowa si sambua fongambatö. w23.05 20-21 ¶1-3

Hadia zinangea tafalua ba wondrouʼö faʼabarani? Tola manö laʼokhögö waʼabarani ira satuada ba lafarou ita enaʼö taʼoʼö daʼö. Hizaʼi, tenga daʼö geluahania wa iʼanemaiʼö barani ita simane yaʼira. Mangokhögö faʼabarani hulö simane na tafahaʼö ita ba nekhe-nekhe danga si bohou. Tola onekhe ita na tahaogö wamaigi nifalua zamahaʼö yaʼita ba taʼoʼö duma-duma nifaluania. Simane daʼö göi, tola itugu barani ita na tahaogö wamaigi hadia nifalua niha böʼö ba wangoromaʼö bua-bua andrö ba taʼoʼö duma-dumara. Simane Danieli, moguna sindruhu-ndruhu aboto ba dödöda Daromali Lowalangi. Moguna göi taʼotomosi wahuwusada khö Yehowa, taʼaseseʼö fahuhuo khönia ba tatutunö nösi dödöda. Datafaduhusi tödö wa hasambalö itolo ita Yehowa. Na tafalua daʼö fefu, tola taʼokhögö waʼabarani ba ginötö tetandraigö wamatida. Tola lafosumange ita niha tanö böʼö na taforomaʼö waʼabarani, ba daʼö göi zamarou yaʼita ba wanolo niha böʼö enaʼö lafahaʼö ira sanandrösa khö Yehowa. Tatu manö, oya mbua si sökhi nitemada na taforomaʼö waʼabarani. w23.08 2 ¶2; 4 ¶8-9

Ngawua wehede Yunani ”fareso” laʼogunaʼö ia ba woʼamaedolagö niha samareso loga ba wotatugöi hezo so zindruhu ganaʼa mazui firö. Börö daʼö, moguna tatatugöi hadia sindruhu nibasoda andrö mazui nirongoda. Ba itugu moguna khöda iadaʼa me arakhagö alua wamakao sabölö-bölö. Lö tafaduhusi tödö fefu niwaʼö niha, hizaʼi taʼogunaʼö wangera-ngerada ba wamatimbaisi hadia nibasoda mazui nirongoda ba zi no ifahaʼö Sura Niʼamoniʼö hegöi organisasi Yehowa. Na tafalua daʼö, lö telimo ita ba wehede famaelungu nifazawili malaʼika si lö sökhi. (Amd. 14:15; 1 Ti. 4:1) Aboto ba dödöda wa tola teʼorifi zi sambua ngawawa ono mbanua Yehowa moroi ba wamakao sabölö-bölö. Hizaʼi, yaʼita samösa, lö taʼila hewisa waʼaurida mahemolu. (Yak. 4:14) Hewaʼae teʼorifi ita moroi ba wamakao sabölö-bölö mazui mate ita fatua lö alua daʼö, tola tatema waʼauri si lö aetu na lö faröi ita. Yalötebulö taʼosambuaʼö dödöda ba dötönafö si tohude andre, ba tola tefaʼanö ita ba wanaögö ngaluo Yehowa! w23.06 13 ¶15-16

So ösa wamaʼeleʼö ba Zura Niʼamoniʼö si lö taʼila hewisa sibai waʼaluania. (Dan. 12:​8, 9) Hizaʼi, na lö taʼila sibai hewisa waʼalua zi sambua famaʼeleʼö, tenga daʼö geluahania wa lö alua ia. Faduhu dödöda wa hasambalö itolo ita Yehowa enaʼö taʼokhögö waʼaboto ba dödö ba ginötö si tefaudu, simane si no ifalua ba zilalö. Lö ara tö lawaʼö niha, ”No atulö, no ahono!” (1 Te. 5:3) Aefa daʼö, fefu zamatörö ba gulidanö andre, lasuwö ba ladudugö agama sofaya. (Fam. 17:​16, 17) Lasuwö göi nono mbanua Lowalangi. (Hez. 38:​18, 19) Daʼö dania mbörö wa alua wasuwöta Hamagedo. (Fam. 16:​14, 16) Faduhu dödöda wa lö ara tö alua daʼö. Gasa-gasa wombaloi faʼaluania, dataʼosambuaʼö dödöda ba wamaʼeleʼö Zura Niʼamoniʼö ba tatolo niha böʼö wamalua daʼö, irege tola taforomaʼö wangandrö saohagölö khö Namada sebua faʼomasi si so ba zorugo. w23.08 13 ¶19-20

Me itutunö Faulo sanandrösa ba wamati, fanötöna, ba faʼomasi, iwaʼö wa ”sebuara waʼomasi”. (1 Ko. 13:13) Hadia mbörö? Ba zi so miföna, lö saʼae moguna mamati ita mazui tadöna-döna nifabuʼu Lowalangi sanandrösa ba gulidanö si bohou, börö me no ahori alua daʼö. Hizaʼi, lö tebulö taʼomasiʼö Yehowa hegöi awöda niha. Sindruhunia, itugu tedou waʼomasida khöra irugi zi lö aetu. Faʼomasi göi zi tobali tandra niha Keriso sindruhu. Imane Yesu khö ndra nifahaʼönia, ”Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.” (Yoh. 13:35) Baero daʼö, na taʼomasiʼö nawöda no tarorogö wahasara dödö. Iwaʼö Faulo wa ”faʼomasi andrö wamaböbö soʼahonoa”. (Kol. 3:14) Imane sinenge sotöi Yohane, ”Sangomasiʼö Lowalangi lö tola löʼö iʼomasiʼö dalifusönia.” (1 Yo. 4:21) Na taʼomasiʼö nawöda niha, no taforomaʼö wa taʼomasiʼö Lowalangi. w23.11 8 ¶1, 3

Ifaedogö waʼaurida andre Sura Niʼamoniʼö hulö simane watandrisa. Niha sofozu ba wagohisa irugi gamozua, latema waʼauri si lö aetu. (2 Ti. 4:​7, 8) Moguna so wamorege nifaluada ba wagohisa, mendrua manö me no so ba duduma höröda gamozuania. Ifatunö khöda sinenge sotöi Faulo hadia zanolo yaʼita enaʼö tola mofozu. Ifarou ita enaʼö ’tatouʼö tou noroda ba yaʼanau gölöda wagohisa ba watandrisa si no muhenaigö khöda’. Hadia daʼö geluaha niwaʼö Waulo wa sindruhu-ndruhu lö hadöi noro dödöda tobali niha Keriso? Tenga. Hizaʼi, eluahania moguna tatouʼö tou noro dödö si lö moguna taluʼi. Noro simane daʼö, tola tobali taha-tahada ba tola marase ita. Enaʼö anau gölöda, moguna alio taʼila hawaʼabua noro niʼoheda ba anemaiʼö touʼö ia tou. Börö daʼö, moguna göi taʼila hadia noro sinangea taʼohe. Hizaʼi, na lö taʼohe noro andrö, tebai saʼae fao ita ba watandrisa.—2 Ti. 2:5. w23.08 26 ¶1-2

Na lö fatandro ita, tola taʼameʼegö tödö lala wangera-ngera niha böʼö. Duma-dumania, so ösa ndra talifusöda ira alawe somasi mangogunaʼö gama-gama ba wonönö faʼasökhi mbotora, tanö böʼönia lö omasi ira. So ösa niha Keriso somasi mamadu tuo, ba so göi zi lö omasi. Fefu niha Keriso omasi ira na lö mofökhö, hizaʼi no faböʼö-böʼö lala nifilira ba wondrorogö botora. Na tamane tödöda wa no satulö fefu nifilida, ba taforege enaʼö laʼoʼö daʼö ira talifusöda, tola tobali fangala ita khöra ba lö khöda fahasara dödö. (1 Ko. 8:9; 10:​23, 24) Duma-dumania, lö nitatugöi Yehowa hewisa lagu wonukhada, hizaʼi ibeʼe khöda goi-goi si tola taʼoʼö. Yaʼita ono mbanua Lowalangi moguna tafake nukha soadu ba sinangea. Böi fatandro ita ba taʼogunaʼö ’lala wangera-ngera si sökhi’ ba wangai angetula sanandrösa ba wonukha. (1 Ti. 2:​9, 10) Lö omasi ita na teʼosambuaʼö wangera-ngera niha ba khöda samösa. Goi-goi Zura Niʼamoniʼö tola möi fanolo khö ndra satua sokubaloi enaʼö lö lafazökhi gamakhoitara samösa sanandrösa ba lagu wonukha hegöi gaya mbu. w23.07 23 ¶13-14

Ifatunö khöda Yehowa hewisa enaʼö tola taʼokhögö waʼowua-wua dödö ba zi so miföna. Niha sanemaʼö fogaoni moroi ba ”ndra alawe si bodo” labiniʼö wamalua amuata wohorö hulö ”ami sibai” wamaigira. Imane Sura Niʼamoniʼö, ba gafuriatania möi ira ba ”Lewatö sabakha”. (Amd. 9:​13, 17, 18) No aröu faehu ba niha sanemaʼö fogaoni moroi ba ”waʼatua-tua sindruhu”. (Amd. 9:1) Moguna tafahaʼö ita ba wangomasiʼö niʼomasiʼö Yehowa, ba fatuwu ita ba zi fatuwu ia. (Si. 97:10) Omuso göi dödöda börö me tola takaoni niha böʼö ba wanema mbua moroi ba ”waʼatua-tua sindruhu”. Hulö na ’muʼao ita moroi ba nahia salawa ba mbanua sebua, haniha zi lö faʼatua-tua, miʼaine ba daʼa’. ’Faʼatua-tua sindruhu’ tenga ha iadaʼa moguna ia khöda. Ba zi so miföna, tola auri ita sagötö faʼara hegöi niha samondrondrongo yaʼita, ba lö tebulö ’tatörö lala sadölö saekhu ba waʼatua-tua’.—Amd. 9:​3, 4, 6. w23.06 24 ¶17-18

Hadia nirasoimö na so nawöu wohalöwö mazui awöu sekola sanofu khömö sanandrösa ba nifaduhusimö tödö? Hadia moʼugu-ugu dödömö? Ato zorasoi simane daʼö. Moroi ba wanofu-nofura, tola taʼila hadia zi so ba wangera-ngerara mazui nifaduhusira tödö, irege aoha khöda ba wamatunö khöra turia somuso dödö. Itaria, manofu zi samösa niha börö me lö fao dödönia ba nifaduhusida tödö mazui börö me omasi ia fabuʼa-buʼa. Sasesenia lafalua daʼö börö me so duria si fasala nirongora sanandrösa ba nifaduhusida tödö. Tatu lö tokea ita na alua daʼö. (Hal. 28:22) Börö me ba ”ngaluo safuria” so ita, ato niha ”si lö fahasara dödö” ba ”safaito”. (2 Ti. 3:​1, 3) Te ömane tödöu, ’Na so niha somasi fabuʼa-buʼa sanandrösa ba nifaduhusigu tödö, hewisa enaʼö uhaogö-haogö manö wehedegu?’ Hadia zanolo yaʼugö? Yaʼia daʼö faʼebolo dödö. Lö alio mofönu niha sebolo tödö, hizaʼi so khönia wanaha tödö töra-töra na fawuka gera-erania mazui na so zangandrö fönunia. w23.09 14 ¶1-2

Itaria, fanuturu lala nibeʼe Yehowa yaʼia daʼö mene-mene solumöʼö yaʼita. Duma-dumania, muʼamenesi ita enaʼö lö taʼomasiʼö gefe mazui ngawalö zi tola mondrönisi tödöda ba wanawö oroisa Lowalangi. (Yes. 48:​17, 18; 1 Ti. 6:​9, 10) Sagötö wamakao sabölö-bölö ofeta Wamatörö si Saribu Fakhe, lö tebulö iʼogunaʼö Yehowa niha gulidanö tobali salahinia ba wondröniaʼö ono mbanuania. Hadia lö taböhöli woloʼö fanuturu lala nitemada? Abölö aoha khöda wamalua daʼö na iʼotarai iadaʼa taʼoʼö wanuturu lala moroi khö Yehowa. Tobali, yalötaböhöli woloʼö fanuturu lala moroi khö Yehowa, farahu ba daʼö nifaʼemania khö ndra talifusöda ira matua si no mufataro ba wondrorogö yaʼita. (Yes. 32:​1, 2; Heb. 13:17) So dane-dane saro waʼafaduhu dödöda khö Zondröniaʼö yaʼita sotöi Yehowa, si lö tebulö manolo yaʼita enaʼö lö teʼala wamatida ba tola takhamö gohitö dödöda: faʼauri si lö aetu ba gulidanö si bohou! w24.02 25 ¶17-18

Owua-wua dödö Waulo ba halöwö fanuriaigö, hizaʼi oya göi waʼabasaki nitaögönia. Asese möi Waulo ba danö saröu ba lö aoha wamalua daʼö. Ba wofanönia, itaria ’falukha ia gametaʼuö ba nungo nidanö’ hegöi ”khö ndra sorabu”. Itaria göi laböbözi ia ira niha si fatiu tödö khönia. (2 Ko. 11:​23-27) Baero daʼö, so ndra talifusö si lö mangila mangandrö saohagölö ba wamorege si no ifalua Faulo ba wanolo yaʼira. (2 Ko. 10:10; Fil. 4:15) Hadia zanolo Faulo irege lö iböhöli wangai halöwö khö Yehowa? Moroi ba Mbuku Niʼamoniʼö hegöi salua khönia samösa, ifahaʼö ia sanandrösa ba gamuata Yehowa. Itugu faduhu dödö Waulo wa iʼomasiʼö ia Yehowa. (Rom. 8:​38, 39; Ef. 2:​4, 5) Andrö wa itugu iʼomasiʼö göi Yehowa. Iforomaʼö Faulo waʼomasinia khö Yehowa me ’mangai halöwö ia ba niha niʼamoniʼö ba lö iböhöli wamalua yaʼia’.—Heb. 6:10. w23.07 9 ¶5-6

Ato niha si faduhu tödö wa moguna so zamatörö ba moguna taʼoʼö ösa gamakhoita nifakhoi ndra ”samatörö”. Hizaʼi, so ösa niha si lö omasi ba woloʼö amakhoita börö me lö tefaudu daʼö ba zomasi ira mazui lö atulö daʼö wangumaʼöra. Ifaduhuʼö khöda Sura Niʼamoniʼö wa ira samatörö ba gulidanö andre zamobörö fangabu dödö, so ira barö wamatörö Zatana, ba lö ara tö tehori. (Si. 110:​5, 6; Sango. 8:9; Luk. 4:​5, 6) Hizaʼi, imane göi Sura Niʼamoniʼö, ”Haniha zolawa ira samatörö, no ilawa nifakhoi Lowalangi.” No itehegö khöra Yehowa ba wamatörö ulidanö andre enaʼö toföfö, ba omasi ia na taʼoʼö niwaʼöra. ’Tabeʼe göi zi tobali tana khöra’, simane pajak, famosumange, ba foloʼö. (Rom. 13:​1-7) Te tawaʼö tödöda wa amakhoita nibeʼera andrö lö atulö, abua wamalua yaʼia, mazui fangohori gefe. Hizaʼi, iʼandrö khöda Yehowa enaʼö tafalua niwaʼöra sagötö lö laʼandrö khöda ba wanawö oroisania.—Hal. 5:29. w23.10 8 ¶9-10

Me tumbu Zimesono, niha Wilisiti zamatörö ba samakao iraono Gizaraʼeli. (Sangu. 13:1) Tefakao sibai waʼaurira börö waʼalösökhi niha Wilisiti. Andrö wa ifili Zimesono Yehowa ba ’wangefaʼö iraono Gizaraʼeli moroi ba danga niha Wilisiti’. (Sangu. 13:5) Ba wamalua halöwö andre, moguna iʼodaligö Yehowa. Samuza inötö, möi ndra saradadu Wilisiti ba wondraʼu yaʼia ba Lehi, te ba Yehuda. Ataʼu sibai niha Yehuda irege labeʼe Zimesono ba danga nudu. Laböbö ia ira niha si sambua soi khönia faoma sinali si bohou dua rozi, ba laʼohe ia ba niha Wilisiti. (Sangu. 15:​9-13) Hizaʼi, ”iʼabölöʼö ia eheha Yehowa” ba tola iʼefaʼö ia moroi ba mböbö andrö. Aefa daʼö, ”isöndra sambua döla zimbi galide si matua si bohou mate”, ihalö daʼö ba iʼogunaʼö ba wamunu 1.000 ndra matua Wilisiti!—Sangu. 15:​14-16. w23.09 2-3 ¶3-4

No izara-zara Yehowa wamatunö, hadia manö ”gohitö dödönia götö-götö waʼara”. Hasambalö alua gohitö dödö Yehowa hewaʼae so daha-taha. Tola iʼogunaʼö gofu hadia lala ba wamalua ohitö dödönia. Yaʼia ”zamazökhi fefu hadia ia börö gohitö dödönia”. (Amd. 16:4) Buania lö tebulö sagötö faʼara. Fanofunia iadaʼa: Hadia gohitö dödö Yehowa, ba hadia nifaluania enaʼö aʼozu gohitö dödönia andrö? No ifatunö gohitö dödönia Lowalangi khö Gadamo hegöi Khawa. Imane khöra, ”Miʼoʼono ba miʼoyaʼö ami, mifoʼösi gulidanö ba mifatörö . . . gurifö sauri ba dete danö.” (1 Mo. 1:28) Me mamadaö Gadamo faoma Khawa, lua-luania fefu ngaʼötöra ahori aekhu ba horö. Hizaʼi hasambalö ifalua gohitö dödönia Yehowa hewaʼae na iʼogunaʼö lala tanö böʼö. Iʼanemaiʼö ihonogöi ba wamasindro Famatörö ba zorugo samalua ohitö dödönia ba niha hegöi ulidanö.—Mat. 25:34. w23.10 20 ¶6-7

Tola itolo ita Yehowa enaʼö anau gölöda. Tola manö abua wamalua daʼö mendrua manö na tataögö gabula dödö si lö iʼila aetu. Itaria abölö abua daʼö moroi ba nitaögö Wetero. Hizaʼi, tola ibeʼe khöda waʼabölö Yehowa enaʼö lö awuwu ita. (Si. 94:​18, 19) Duma-dumania, so samösa dalifusöda si no ara mamalua homoseks fatua lö ifahaʼö ia ba zindruhu. Ihalö gangetula ba wombulöʼö faʼaurinia ba ifaudugö moloʼö Sura Niʼamoniʼö. Hewaʼae simanö, itaria zui adöni dödönia ba wamalua daʼö. Hadia zanolo yaʼia enaʼö lö ifuli ifalua? Imane, ”Yehowa zameʼe khögu faʼabölö. . . . Börö geheha Yehowa . . . , ufahaʼö ndraʼo wa tola ufaudugö lala waʼaurigu ba zomasi Yehowa . . . Hewaʼae lö moʼahonoa ndraʼo, lö tebulö iʼogunaʼö ndraʼo Yehowa ba ibeʼe khögu waʼabölö.” w23.09 23 ¶12

Ira talifusöma ono matua, tatu so niforegemi enaʼö tobali ami niha Keriso saro ba wamati. Moguna mifili duma-duma si sökhi sinangea miʼoʼö, miforege wangokhögö fangera-ngera si sökhi, tola mufaduhusi tödö, mifahaʼö ami ba waʼonekhe mazui ba nekhe-nekhe danga, ba mifaʼanö ami wamalua halöwö nitemami ba zi so miföna. Na öʼangeragö noro dödö nitemau dania ba zi so miföna, tola manö öwaʼö tödöu wa abua wamalua yaʼia. Hizaʼi, hasambalö tola öfalua daʼö. Törö tödöu wa omasi sibai Yehowa wanolo yaʼugö. (Yes. 41:​10, 13) Tatu latolo göi ndraʼugö ira talifusöda ba gangowuloa. Na tobali ndraʼugö ono matua niʼomasiʼö Yehowa, hasambalö örasoi waʼomuso dödö ba faʼahono dödö ba waʼauri. Maʼomasiʼö sibai ami, yaʼami ira talifusöma ono matua! Yafahöna howu-howu nibeʼe Yehowa khömi sagötö miforege tobali niha Keriso saro ba wamati. w23.12 29 ¶19-20

Khalaigö duma-duma andre. Samuza inötö fao ndraʼugö khö ndra talifusöda weʼamöi manörö-nörö ba fakoda ami. Hizaʼi me no önehegö, so samösa dalifusöda samakuru röngö-röngönia. Ö-hapus koda daʼö börö me so dua ngaʼörö tö kodami. Fefu zi so ba koda andrö ahori laboho mbawara, farahu ba daʼö dalifusöda no mege. Omasi ita ba wangiröʼö ba dödöda ngawalö zi sökhi sagötö wefaoda khö ndra talifusöda. Hizaʼi samuza inötö, so samösa dalifusöda sangafökhöiʼö tödöda ba wehede mazui ba nifaluania. Hadia zinangea öfalua? Hadia omasiʼö öʼolifugö zala nifaluania simane me ö-hapus koda si lö baga no mege? (Ef. 4:32) Tola tatayaigö ba dödöda daʼö börö me oya ngawalö zi sökhi niʼokhögöra sagötö wefaoda khöra. Daʼö zi sökhi ba sebua böli somasi ita taʼiröʼö ba dödöda. w23.11 12 ¶16-17

Ngawua wehede Yunani niʼogunaʼönia, daʼö zangoromaʼö wa ira alawe niha Keriso moguna lahaogö enaʼö sökhi lagu wonukhara ba laʼangeragö hewisa dödö niha böʼö. Tasuno sibai ndra talifusöda ira alawe soloʼö mene-mene daʼa! Fefu ndra talifusöda ira alawe saro ba wamati, moguna göi laʼokhögö wangera-ngera si sökhi. Eluahania, laʼokhögö waʼatua-tua ba wangiʼila hezo zatulö ba hezo zi fasala, ba ifili ba wamalua satulö. Nehegö duma-duma Abigaila. So gangetula si lö sökhi nifalua woʼomonia ba ebua sibai lua-lua gangetula daʼö ba nösi nomonia. Iʼanemaiʼö so nifalua Abigaila. Börö me iʼokhögö wangera-ngera si sökhi, ihalö gangetula si tobali fangorifi nösi nomonia. (1 Sa. 25:​14-23, 32-35) Faʼatua-tua simane daʼö zanolo yaʼita ba wangiʼila hawaʼara fahuhuo ita ba hawaʼara talau zi lö hede-hede. Daʼö göi zanolo yaʼita ba ginötö fahuhuo ba niha böʼö enaʼö böi tazofu-zofu zi tenga urusada mazui ngawalö zi lö omasi ira latutunö.—1 Te. 4:11. w23.12 20 ¶8-9

Isura daʼa Faulo ba mbanua niha Keriso ba Roma. Ira talifusöda si so ba daʼö, no lafahaʼö ira sanandrösa khö Yehowa hegöi khö Yesu, no laforomaʼö wamati ba no tobali ira niha Keriso. Andrö wa ifotöi ira Lowalangi ’no atulö börö wamati’, ba ibayoini ira faoma eheha niʼamoniʼö. (Rom. 5:1) No laʼokhögö dötönafö saro ba sahöli-höli dödö. Lö ara aefa daʼö, ifaʼoheʼö zurania Faulo khö ndra niha nibayoini ba Nefeso sanandrösa ba dötönafö nibeʼe Lowalangi khöra, yaʼia daʼö ”ondröita ba niha niʼamoniʼö”. (Ef. 1:18) Ifatunö göi Faulo khö ndra niha Keriso ba Golose hezo so dania latema dötönaföra andrö. Iwaʼö wa daʼö ’wanötöna nihenaigö khöra ba zorugo’. (Kol. 1:​4, 5) Eluahania, tötönafö niʼokhögö niha Keriso si no mubayoini yaʼia daʼö tesusugi dania ira ba wanöndra faʼauri si lö aetu ba zorugo, ba fao ira mamatörö awö Keriso.—1 Te. 4:​13-17; Fam. 20:6. w23.12 9 ¶4-5

Ngawua wehede ”irorogö” ba li sindruhunia muʼogunaʼö daʼö ba halöwö nifalua ndra saradadu mazui sanaro ba wondrorogö si sambua banua enaʼö telumöʼö moroi ba nudu. Ahono dödö niha mbanua wemörö, börö me laʼila wa so zanaro ba göli mbanua. Simane daʼö göi waʼohahau dödö moroi khö Lowalangi, irorogö dödö awö gera-erada irege tarasoi waʼahono dödö börö me taʼila wa so zondrorogö yaʼita. (Si. 4:8) Simane zalua khö Khana, hewaʼae lö iʼanemaiʼö sökhi zalua hasambalö tola tarasoi waʼahono dödö. (1 Sa. 1:​16-18) Na tarasoi waʼahono dödö, taʼokhögö lala wangera-ngera si sökhi ba tola tahalö gangetula si tefaudu. Hadia zinangea tafalua? Na lö sökhi-sökhi dödömö, moguna ökaoni zi no amaedola zanaro. Hadia geluahania? Angandrö irege örasoi waʼohahau dödö moroi khö Lowalangi. (Luk. 11:9; 1 Te. 5:17) Na alua khöu gabula dödö, böi böhöli wangandrö enaʼö örasoi waʼohahau dödö moroi khö Yehowa sondrorogö tödömö awö gera-eramö.—Rom. 12:12. w24.01 21 ¶5-6

Ba wangamoniʼö töi Namania, anau gölö Yesu hewaʼae laböbögö khönia zi lö duhu, göna ia famakao, folohi hegöi fangoʼaya. Iʼila wa lö tebulö iʼoʼö niwaʼö Namania ba lö moguna aila ia. (Heb. 12:2) Iʼila göi wa iforege Satana ba wolawa yaʼia ba ginötö sabua andrö. (Luk. 22:​2-4; 23:​33, 34) Tatu itötöna Satana wa tola idönisi dödö Yesu irege faröi ia. Hizaʼi, lö mofozu Zatana! Ifaduhuʼö Yesu wa Satana andrö si falimo fondrege zi lö sökhi, ba so genoni Yehowa si lö faröi khönia hewaʼae göna ira fanandraigö sebua! Hadia omasiʼö öʼomusoiʼö dödö Razoda? Na simanö, böi böhöli wanuno töi Yehowa. Tolo niha böʼö enaʼö laʼila hewisa ia andrö sindruhunia. Na öfalua daʼö, no öʼoʼö duma-duma Yesu. (1 Fe. 2:21) Omusoiʼö dödö Yehowa ba faduhuʼö wa udunia Satana, no si falimo si lö faʼaila! w24.02 11 ¶11-13

Sagötö zi lima fakhe andre, töra sazuta niha nibayagö idanö tobali Samaduhuʼö Yehowa. Ba ginötö ölulu waʼaurimö khö Yehowa, no öfili tobali nifahaʼö Yesu Keriso hegöi ba wangofönaiʼö ohitö dödö Lowalangi ba waʼaurimö. Hewisa lalania? Imane Yesu, ”Na so zomasi moloʼö yaʼo, yamuʼositengagö ia.” (Mat. 16:24) Ngawua wehede Yunani ”yamuʼositengagö ia” tola göi mufoʼeluaha tobali ”mangumaʼö löʼö ba khönia samösa”. Na no ölulu waʼaurimö khö Yehowa, moguna ötimbagö fefu zi lö tefaudu ba gohitö dödö Lowalangi. (2 Ko. 5:​14, 15) Farahu ba daʼö ba wanimbagö amuata fohorö hegöi ngawalö ”mbua-mbua nösi”. (Gal. 5:​19-21; 1 Ko. 6:18) Hadia tobali noro sabua khöu na öʼositengagö ndraʼugö? Na öʼomasiʼö Yehowa ba faduhu dödöu wa fefu goroisa nibeʼenia si sökhi khöu, tatu lö tobali noro sebua daʼö.—Si. 119:97; Yes. 48:​17, 18. w24.03 2 ¶1; 3 ¶4

Ibeʼe Yehowa gehehania niʼamoniʼö ba niha sangomusoiʼö tödönia. (Mat. 12:18) Angeragö atö wanofu-nofu daʼa, ’Hadia no uforomaʼö mbua-bua geheha ba waʼaurigu sero maʼökhö?’ Hadia abölö öforomaʼö waʼebolo dödö iadaʼa moroi me lö niʼokhögömö faʼaboto ba dödö sanandrösa khö Yehowa? Sindruhunia, na lö tebulö ödouʼö wangoromaʼö mbua-bua geheha niʼamoniʼö, hasambalö itugu aboto ba dödömö wa omuso dödö Lowalangi khömö! Ihenaigö höli Yehowa ba wangefaʼö sala niha sangomusoiʼö tödönia. (1 Ti. 2:​5, 6) Hizaʼi, hewisa na tarasoi wa lö omuso dödö Yehowa khöda, hewaʼae no mamati ita ba höli ba no tebayagö ita idanö? Törö tödöu wa lö ero-ero tola tafaduhusi tödö hadia nirasoida. Ha Yehowa zi lö mamalö tafaduhusi tödö. Iʼameʼegö tödö niha samati ba höli, tobali ira niha satulö ba wamaiginia ba ifabuʼu wa ifahowuʼö ira.—Si. 5:12; Rom. 3:26. w24.03 30 ¶15; 31 ¶17