Inga-kghani UJehova Uzoyiphendula Imithandazwami?

1-2. Kubayini singazizwa ngasuthi uJehova akayiphenduli imithandazwethu?

“FUMANA ithabo elikhulu kuJehova, yena uzokunikela iimfiso zehliziywakho.” (Rhu. 37:4) Qala bona sithembiso esikarisa kangangani lesi! Kghani kufuze silindele bona uJehova asinikele koke esimbawa khona ngesikhatheso? Kubayini kuqakathekile ukubuza umbuzo lo? Cabanga ngeembonelo ezilandelako. Udade ongakatjhadi uthandazela ukuya esiKolweni sabaTjhumayeli bomBuso. Kodwana kwadlula iminyaka eminengi angabizwa. Umfowethu osesemutjha ubawa uJehova bona amsize aphole ekuguleni kwakhe okubuhlungu ukwenzela bona akghone ukwenza okungeziweko ebandleni. Kodwana akabi ngcono. Ababelethi abamaKrestu bathandazela ukuthi umntwanabo ahlale aseqinisweni. Kodwana umntwanabo uqunta ukulisa ukulotjha uJehova.

² Kungenzeka nawe khewabawa uJehova okuthileko kodwana akhenge ukufumane. Ngebanga lalokho, ungaphetha ngokuthi uJehova uyayiphendula imithandazo yabanye kodwana akayiphenduli yakho. Namkha ungacabanga ukuthi kukhona into embi oyenzileko. Udadwethu u-Janiceb wazizwa ngendlela leyo. Yena nendodakhe bathandaza kuJehova ngombana bebafuna khulu ukuyokulotjha e-Bethel. Uthi: “Bengiqiniseka ukuthi ingasi kade sizabe sise-Bethel.” Kodwana kwadlula iminyaka eminengi bangababizi. U-Janice uthi: “Ngazizwa ngidanile begodu ngihlangahlangene. Ngazibuza ukuthi khuyini engiyenzileko ukudanisa uJehova. Ngathandaza khulu kuJehova ngokuya e-Bethel. Kubayini angakhenge aphendule imithandazwami?”

3. Yini esizokucoca ngayo esihlokwenesi?

³ Ngezinye iinkhathi singazibuza ukuthi inga-kghani uJehova uyayilalela imithandazwethu. Ngitjho namanye amadoda athembekileko wekadeni azibuza into efanako. (Job. 30:20; Rhu. 22:2; Rhab. 1:2) Yini engakuqinisekisa ukuthi uJehova uzoyizwa imithandazwakho? (Rhu. 65:2) Ukukusiza uphendule umbuzo loyo, kuzokufuze siphendule imibuzo elandelako: (1) Yini esingayilindela kuJehova? (2) Yini uJehova ayilindele kithi? (3) Kubayini kungatlhogeka ukuthi sitjhugulule iimbawo zethu?

YINI ESINGAYILINDELA KUJEHOVA?

4. NgokwakaJoromiya 29:​12, yini uJehova ayithembisako?

⁴ UJehova uthembisa ukuyilalela imithandazwethu. (Funda uJoromiya 29: 12.) UZimethu uyasithanda ngombana simlotjha ngokuthembeka, yeke uzokuhlala azitjheja iimbawo zethu. (Rhu. 10:17; 37:28) Nanyana kunjalo, lokho akutjho ukuthi uzosinikela koke esikubawako. Kungenzeka kuzokutlhogeka silinde bekube liphasi elitjha ngaphambi kobana sifumane izinto esizibawileko.

5. Yini uJehova ayicabangako lokha nakalalela imithandazwethu? Hlathulula.

⁵ UJehova nakalalela imithandazwethu ucabanga ngomnqophwakhe. (Isa. 55:​8, 9) Enye yezinto azifunako kukobana iphasi lizale abantu abamlalela bathabile njengoMbusabo. Kodwana uSathana uthi abantu bazokuthaba nabazibusako. (Gen. 3:​1-5) Ukutjengisa ukuthi uDeveli uleya amala, uJehova uvumele abantu ukuthi bazibuse. Kodwana ukubusa kwabantu ngikho okubangele imiraro yabantu esiqalana nayo namhlanjesi. (UMtj. 8:9) Siyazi ukuthi uJehova angekhe ayisuse yoke imiraro le nje. Nange angayirarulula nje, abanye bangaphetha ngokuthi babantu abararulule imiraro leyo. Bangacabanga ukuthi abantu bangakghona ukuzibusa ngokuphumelelako.

6. Kubayini kufuze siqiniseke ukuthi uJehova uzokuhlala enza izinto ngethando nangobulungiswa?

⁶ UJehova angaphendula imithandazo efanako ngeendlela ezihlukahlukeneko. Ngokwesibonelo, lokha iKosi uHezekiya igulela ukufa, yancenga uJehova bona ayisize iphole. UJehova waphendula umthandazwayo, wayilapha. (2 Kho. 20:​1-6) Ngakelinye ihlangothi, lokha umpostoli uPowula nakancenga uJehova bona asuse “iliva enyameni,” okungenzeka bekumraro wepilo, uJehova akhenge awususe umraro loyo. (2 Kor. 12:​7-9) Cabanga nangesibonelo sabapostoli uJakopo noPitrosi. Bobabili uHerode iKosi bekafuna ukubabulala. Ibandla lathandazela uPitrosi noJakopo. Kodwana uJakopo wabulawa, uPitrosi yena wasindiswa ngokusimangaliso. (IzE. 12:​1-11) Singazibuza, ‘Kubayini uJehova asindisa uPitrosi kodwana ingasi uJakopo?’ IBhayibheli alitjho.c Esingaqiniseka ngakho kukobana iindlela zakaJehova “zibulungiswa.” (Dut. 32:4) Siyazi ukuthi uJehova bekabathanda bobabili uPitrosi noJakopo. (IsAm. 21:14) Ngezinye iinkhathi kungenzeka uJehova angaphenduli imithandazwethu ngendlela esilindele ngayo. Kodwana ngombana siyaqiniseka ukuthi uJehova uhlala enza izinto ngethando nangobulungiswa, asinghonghoyili ngendlela akhetha ukuphendula imithandazwethu ngayo.—Job. 33:13.

7. Yini esilinga ukuyibalekela begodu kubayini?

⁷ Silinga ukungamadanisi ubujamo bethu nebabanye. Ngokwesibonelo, singabawa uJehova asisize ngendlela ethileko kodwana singakufumani esikubawileko. Ngokukhamba kwesikhathi, sizwa ukuthi omunye uthandazele into efanako begodu uJehova wawuphendula umthandazwakhe. Udade u-Anna wakhe wenzakalelwa yinto enjalo. Wathandazela ukuthi indodakhe u-Matthew iphole njengombana beyiphethwe yikankere. Ngesikhathi esifanako, bekunabodade ababili esele baluphele nabo ebebaphethwe yikankere. U-Anna wathandazela u-Matthew nabodadwethwaba khulu. Abodade baphola, kodwana u-Matthew wahlongakala. Ekuthomeni, u-Anna wazibuza ukuthi kghani abodade labo baphola ngombana uJehova abasizile? Nangabe kunjalo, kubayini uJehova angakhenge aphendule imithandazwakhe yokuthi indodakhe ibe ngcono? Kuliqiniso ukuthi asazi bona abodade laba baphola njani. Esikwaziko kukuthi uJehova uzokuqeda koke ukutlhaga kwethu begodu ukhanukela ukubavusa abangani bakhe abahlongakeleko.—Job. 14:15.

8. (a) Ngokwaka-Isaya 43:​2, uJehova usisekela njani? (b) Umthandazo ungasisiza njani nasiqalene neentjhijilo ezibudisi? (Bukela ividiyo ethi, Umthandazo Usisiza Sikghodlhelele.)

⁸ UJehova uzokuhlala asisekela. NjengoBabethu onethando, uJehova akafuni ukusibona sizwa ubuhlungu. (Isa. 63:9) Nanyana kunjalo, akayikhandeli yoke imiraro esiqalana nayo, engafaniswa nemilambo namkha amalangabi womlilo. (Funda u-Isaya 43:2.) Nanyana kunjalo, usithembisa ukuthi uzosisiza ‘sikhambe hlangana’ nazo. Nanyana ngiziphi iinlingo esiqalana nazo nje, uzokuqinisekisa ukuthi azisenzi sibhalelwe kumlotjha. Godu uJehova usinikela umoyakhe ocwengileko onamandla osisiza sikghodlhelele. (Luk. 11:13; Flp. 4:13) Ngebanga lalokho, singaqiniseka ukuthi sizokuhlala sinakho koke esikutlhogako bona sikghodlhelele begodu sihlale sithembekile kuye.d

YINI UJEHOVA AYILINDELE KITHI?

9. Ngokuvumelana noJakopo 1:​6, 7, kubayini kufuze sithembe ukuthi uJehova uzosisiza?

⁹ UJehova ulindele bona simthembe. (Heb. 11:6) Ngezinye iinkhathi iintjhijilo zethu zingabonakala zibudisi khulu. Kungenzeka sithome ukuzaza ukuthi uJehova uzosisiza. Kodwana iBhayibheli lisiqinisekisa ukuthi ngamandla kaZimu ‘singakhwela iboda.’ (Rhu. 18:29) Kunokobana sivumele ukuzaza okunjalo kukhule, kufuze sithandaze ngokukholwa, sibe nethemba lokuthi uJehova uzoyiphendula imithandazwethu.—Funda uJakopo 1:​6, 7.

10. Fanekisa indlela esingenza ngayo ngokuvumelana nemithandazwethu.

¹⁰ UJehova ulindele bona senze ngokuvumelana nemithandazwethu. Ngokwesibonelo, umfowethu angabawa uJehova bona amsize afumane amalanga emsebenzinakhe wokuziphilisa, ukwenzela bona abe khona emhlanganweni wesifunda. UJehova angawuphendula njani umthandazo loyo? Anganikela umfowethu isibindi sokukhuluma nomqatjhakhe. Kodwana umfowethu kusazokutlhogeka aye kumqatjhakhe ayombawa. Kungenzeka kuzokutlhogeka ambawe ngokubuyelelweko. Angabawa nokutjhintjhana nomunye asebenza naye bona asebenze ngelanga azabe angekho ngalo. Nakutlhogekako anganyula nokuthi angabhadelwa ilanga azabe angekho ngalo emsebenzini.

11. Kubayini kufuze sithandaze ngokubuyelelweko ngezinto ezisitshwenyako?

¹¹ UJehova ulindele bona sithandaze ngokubuyelelweko ngezinto ezisitshwenyako. (1 Thes. 5:17) UJesu wathi ezinye zeembawo zethu angekhe sizifumane khonokho. (Luk. 11:9) Yeke ungapheli amandla! Thandaza ngokusuka ehliziyweni begodu ubuyelele. (Luk. 18:​1-7) Nasiragela phambili ngendaba ethileko, sitjengisa uJehova ukuthi isibawo sethu siqakathekile. Sitjengisa nokuthi siyakholwa ukuthi uzokukghona ukusisiza.

KUBAYINI KUNGATLHOGEKA UKUTHI SITJHUGULULE IIMBAWO ZETHU?

12. (a) Ngimuphi umbuzo okufuze sizibuze wona malungana neembawo zethu begodu kubayini? (b) Singaqinisekisa njani ukuthi imithandazwethu itjengisa ihlonipho ngoJehova? (Qala ibhoksi elithi, “Inga-kghani Iimbawo Zami Zitjengisa Ihlonipho NgoJehova?”)

¹² Nange singakufumani esikubawe emthandazweni, singazibuza imibuzo emithathu. Wokuthoma, ‘Kghani engikuthandazelako kulungile?’ Kanengi sicabanga ukuthi siyakwazi okusilungeleko. Kodwana izinto esizibawako kungenzeka zingasizuzisi ekukhambeni kwesikhathi. Nakunomraro esiwuthandazelako, kungaba nesisombululo esingcono sokurarulula umraro loyo kunalesi esisibawako. Ezinye izinto esizibawako kungenzeka zingavumelani nentando kaJehova. (1 Jwa. 5:14) Ngokwesibonelo, cabanga ngesibonelo sababelethi ekukhulunywe ngabo phambilini. Babawe uJehova ukuthi asize umntwanabo ahlale aseqinisweni. Leso kubonakala kusibawo esifaneleko. Nanyana kunjalo, uJehova angeze akatelela nanyana ngubani bona amlotjhe. Ufuna bona soke, kuhlanganise nabantwabethu, sizikhethele ukumlotjha. (Dut. 10:​12, 13; 30:​19, 20) Kunalokho ababelethi bangabawa uJehova bona abasize bafikelele ihliziyo yomntwanabo, ukwenzela bona athande uJehova begodu abe mnganakhe.—IzA. 22:6; Efe. 6:4.

13. NgokwamaHebheru 4:​16, kunini lapho uJehova azosisiza khona? Hlathulula.

¹³ Umbuzo wesibili uthi, ‘Inga-kghani sikhathi esifaneleko sokuthi uJehova anginikele engikubawileko?’ Singazizwa ngasuthi siyitlhoga msinyana ipendulo yomthandazwethu. UJehova usazi kuhle isikhathi sokusiza. (Funda amaHebheru 4:16.) Nasingakufumani msinyana esikubawileko, singacabanga ukuthi ipendulo kaJehova ‘ngu-Awa.’ Kuhlekuhle ipendulwakhe kungaba kukuthi ‘Ingasi nje.’ Ngokwesibonelo, cabanga ngomfowethu osesemutjha owathandazela ukuthi aphole ekuguleni kwakhe. Nange uJehova bekangamlapha ngokusimangaliso, uSathana bekazokuthi umfowethu lo uragela phambili alotjha uJehova kwaphela ngebanga lokuthi uJehova umpholisile. (Job. 1:​9-11; 2:4) Ukungezelela kilokho, uJehova sele abeke isikhathi sokuqeda koke ukugula. (Isa. 33:24; IsAm. 21:​3, 4) Bekube sikhatheso, angeze salindela ukulatjhwa ngokusimangaliso. Nje-ke umfowethu lo angabawa uJehova amuphe amandla nokuthula kwengqondo bona akghodlhelelele ukugula kwakhe begodu aragele phambili alotjha uZimu ngokuthembeka.—Rhu. 29:11.

14. Khuyini oyifundako kilokho okwenzakalela u-Janice?

¹⁴ Cabanga ngalokho okwenzeka ku-Janice, owathandazela ukuya e-Bethel. Kwadlula iminyaka emihlanu ngaphambi kokuthi azwisise bona uJehova uyiphendulile imithandazwakhe. Uthi: “UJehova wasebenzisa isikhatheso ukungifundisa izinto ezinengi nokungisiza ukuthi ngibe mKrestu ongcono. Bengitlhoga ukuthi ngimthembe khudlwana. Indlelami yokwenza isifundo somuntu mathupha beyitlhoga ukuthi ngiyithuthukise. Bengitlhoga ukufunda ukuthi ngingakghona ukuthaba nanyana kukuphi lapha ngilotjha khona uJehova.” Ngokukhamba kwesikhathi u-Janice nendodakhe bamenywa ukuthi bayokukhambela amabandla. Nakaqala emuva, u-Janice uthi: “UJehova wayiphendula imithandazwami, nanyana ayiphendula ngendlela ebengingakayilindeli. Kwangithatha isikhathi eside ukubona ubuhle bependulwakhe kodwana ngiyathokoza ukuthi ngilibonile ithando lakhe nomusakhe.”

15. Kubayini ngezinye iinkhathi kungatlhogeka ukuthi singanqophi khulu emithandazwenethu? (Qala neenthombe.)

¹⁵ Umbuzo wesithathu uthi, ‘Inga-kghani kufuze ngithandazele okhunye?’ Kuhle ukuthi sikutjho ngokunqophileko esikuthandazelako, kodwana ngezinye iinkhathi kungaba kuhle ukuthi okunengi sikutjhiyele kuJehova ukwenzela ukuthi sikghone ukufumana lokho asifunela khona. Cabanga ngesibonelo sakadade ongakatjhadi obekasolo athandazela ukuya esiKolweni sabaTjhumayeli beVangeli bomBuso. Ufuna ukuya esikolweni ngombana ufuna ukuyokusiza la kunetlhogeko ekulu yabarhuweleli. Nje-ke njengombana aragela phambili nokuthandazela ukuthi abizwe esikolweni, angabawa uJehova amsize akghone ukubona ezinye iindlela zokuthuthukisa umsebenzakhe wokutjhumayela. (IzE. 16:​9, 10) Ngemva kwalokho angenza ngokuvumelana nomthandazwakhe ngokubuza umbonisi wesigodi ukuthi ngiliphi ibandla eliseduze elitlhoga amaphayona angeziweko. Namkha angatlolela i-ofisi legatja abuze ukuthi kukuphi la kutlhogeka khona abarhuweleli bomBuso abanengi.e

16. Yini esingaqiniseka ngayo?

¹⁶ Njengombana sifundile, singaqiniseka ukuthi uJehova uzoyiphendula imithandazwethu ngendlela enethando nenobulungiswa. (Rhu. 4:3; Isa. 30:18) Ngezinye iinkhathi kungenzeka singafumani ipendulo esiyilindeleko. Kodwana uJehova angekhe angayinaki imithandazwethu. Usithanda khulu. Angekhe asilahla. (Rhu. 9:10) Nje-ke ragela phambi ‘uthembela kuye ngazo zoke iinkhathi,’ uthululele ihliziywakho kuye ngomthandazo.—Rhu. 62:8.