Kansi Yehova okondwela namwe?

1. Kansi atumiki ayakine a Yehova angolimbana na maganizo otyani?

N’VOTANG’ISHA ngako kuziŵa kuti Yehova okondwela na ŵanthu ŵake monga gulu! Baibolo yunena kuti: “Yehova osangalala na ŵanthu ŵake.” (Sal. 149:4) Koma olo n’tetyo, nthawe ziyakine ŵanthu okhumudwa ndipo olikonsha kuti, ‘Kansi newo paneka nine wofunika kwa Yehova?’ Kufumila kale-kale, atumiki okhulupilika a Yehova olimbana na maganizo olingana na amene aŵa nthawe ziyakine.—1 Sam. 1:6-10; Yobu 29:2, 4; Sal. 51:11.

2. Kansi ni ŵanthu otyani ŵakukondwela nawo Yehova?

² Baibolo yuwonesha luweme kuti ŵanthu aliye ungwilo angakwanishe kumukondwelesha Yehova nonkhala ovomelejeka kuli yove. Kansi tingachite tyani vamene ivi? Tufunika kuwonesha chikhulupililo mwa Yesu Khilisitu nobatizika. (Yoh. 3:16) Tikochita vamene ivi tuwonesha patuŵa kuti talapa machimo ŵasu ndipo tulonjeza kuti tikochita chifunilo cha Mulungu. (Mach. 2:38; 3:19) Yehova osangalala ngako sewo tikachita vamene ivi pofuna kuti tivwendele ngako kuli yove. Keno tuchita vonse vatingakwanishe kuti tikwanilishe lumbilo yasu, tizankhale ŵanthu ovomelejeka pamenso pa Yehova ndipo tizankhale naye paushamwali wotang’a.—Sal. 25:14.

3. Kansi tikambilane chinji munkhani ino?

³ Lomba kansi n’chinji chuchitisha ŵanthu ayakine kuganiza kuti Yehova okondwelalini nawo? Kansi Yehova ochita tyani powonesha kuti okondwela nase? Ndipo n’chinji chingatiyavye kuti tikokhulupilila ngako kuti Mulungu okondwela nase?

CHIFUKWA CHAKE ŴANTHU AYAKINE OKAIKILA KUTI YEHOVA OKONDWELA NAWO

4-5. Olo kuti kufumila muli mwana muliwona kuti nimwe osafunika, kansi mufunika kukhulupilila chinji?

⁴ Anyinji asewo tankhala tuvutika na maganizo oliwona kuti nise osafunika kufumila tili ŵana. (Sal. 88:15) M’bale muyakine zina yake Adrián enena kuti: “Nankhala nuliwona kuti nine munthu watyala-tyala kufumila kale-kale. Nukumbukila kuti penze nikali ntontho, nemusenga Mulungu m’pemphelo kuti ayavye aliyense m’banja mwasu kuti akaloŵe mu chalo chanyowani. Koma olo n’tetyo, newo nenzeliwona lini kuti nine munthu woyenelela kuloŵa m’Paladaiso.” Tony, wamene aliyekulile m’chonadi enena kuti: “Makolo ŵangu aliyeniujeko kuti onikonda kapena kuti nine wofunika kuli ove. Koma nthawe zonse ove enzeniuja kuti ningakwanishe kunkhala munthu muweme.”

⁵ Keno thawe ziyakine muliwona kuti nimwe osafunika, mukokumbukila kuti Yehova ngaye-ngaye niye wamene ekudonsani kuti mukomutumikila, osati munthu muyakine. (Yoh. 6:44) Yove owona viweme kuli aliyense wa sewo. Yove oziŵa mwaulili ntima wasu. Ndipo otiziŵa luweme ngako kupambana mwatuliziŵila seka. (1 Sam. 16:7; 2 Mbiri 6:30) Tetyo, Yehova akawonesha kuti okuwonani kuti nimwe ofunika ngako, osati mukokaikila.—1 Yoh. 3:19, 20.

6. Kansi Paulo enzekumvwa tyani akaganizila machimo ŵechichita kuvuli?

⁶ Petenze tikaliyephunzila chonadi, ayakine asewo tenzechita vinthu vamene tingoliimba navo mulandu mpaka pano. (1 Pet. 4:3) Olo ŵanthu amene atumikila Yehova mokhulupilika kwa nthawe itali angolimbana mphela na vinthu viyakine vakuphoniyesha. Lomba tyani ponena za mwewo? Kansi nthawe ziyakine mukaikila kuti Yehova wakukhululukilani? Pa nkhani yamene iyi, mungachite luweme kukumbukila kuti olo atumiki okhulupilika a Yehova olimbana na maganizo nonga ni amene aŵa. Mwachisanzo, ntumwi Paulo enzekhumudwa ngako akaganizila vinthu venzephoniyesha. (Alo. 7:24) N’chendi kuti Paulo elapa machimo ŵake ndipo pavuli pake ebatizika. Koma olo n’teyo, yove enzeliwona kunkhala “ntontho ngako pa atumwi onse” komasoti “wochimwa ngako.”—1 Ako. 15:9; 1 Tim. 1:15.

7. Kansi tufunika kukumbukila chinji?

⁷ Yehova elonjeza kuti akotikhululukila sewo tikalapa machimo ŵasu. (Sal. 86:5) Tetyo, tikokhulupilila kuti mawu ŵechilaŵila Yehova ni achendi komasoti kuti yove otikhulukila.—Akol. 2:13.

8-9. Kansi tingalimbane tyani na maganizo akuti Yehova angakondwelelini nase chifukwa chakuti tumuchitila vitontho?

⁸ Tonse tufuna kuchita vonse vatingakwashe potumikila Yehova. Koma olo n’tetyo, ŵanthu ayakine angaganize kuti Yehova okondwelalini nawo chifukwa chakuti okwanishalini kumuchitila vinyinji. Mulongo muyakine zina yake Amanda, enena kuti: “Newo nuganiza kuti kuchita vonse vaningakwanishe potumikila Yehova kutanthauza kuchita vinyinji nthawe zonse. Chifukwa cha vamene ivi, newo nuyeja kuchita vinyinji kupambana vaningakwanishe. Pavuli pake nikakangiwa, nuliimba mulandu ngako ndipo nuyamba kuganiza kuti naye Yehova wakhumudwa nane.”

⁹ Kansi n’chinji chingatiyavye kupewa kuganiza kuti Yehova okondwela lini nase chifukwa chakuti tukwanishalini kumuchitila vinyinji? Mukokumbukila kuti Yehova ni Mulungu wololela. Ndipo oyembekezelalini kuti tikomuchitila vinyinji kupambana vatingakwanishe. Yove otembeja vonse vatumuchitila, malingana keno tuvichita na ntima wonse. Komasoti mukoganizila visanzo va m’Baibolo va ŵanthu amene enzetumikila Yehova na ntima wawo wonse. Ganizilani za Paulo. Yove ekata ntchito mwakhama kwa vyaka vinyinji, eyenda misenga ya makilomita masauzande anyinji, komasoti eyavya ponkhazikisha mipingo inyinji. Koma vinthu pevichinja pamoyo wake noleka kuchita vinyinji monga ni mwenzechitila poyamba, kansi Yehova eyamba kuwona ntchito zake kunkhala zatyala-tyala? Yayi. Paulo epitilija kuchita vangakwanishe, ndipo Yehova emudalisa. (Mach. 28:30, 31) Molingana na vamene ivi, vinthu vatukwanisha kuchita potumikila Yehova vingachinje m’kupita kwa nthawe. Koma chinthu chofunika ngako ni ntima wofuna kutumikila Mulungu. Tiyeni tikambilane njila ziyakine zakuwoneshela Yehova kuti okondwela nase.

KANSI YEHOVA OWONESHA TYANI KUTI OKONDWELA NASE?

10. Kansi tingachite tyani kuti ‘timvwe’ mawu a Yehova owonesha kuti okondwela nase? (Yohani 16:27)

¹⁰ Kupitila m’Baibolo. Yehova nthawe zonse osakila njila zowoneshela atumiki ŵake kuti oŵakonda komasoti osangalala na vakuchita. Baibolo yunena za maulwendo aŵili amene Yehova euja Yesu kuti ni Mwana wake wokondewa komasoti kuti osangalala naye. (Mat. 3:17; 17:5) Kansi mungasangalale kumvwa mawu a Yehova monga ni amene aŵa? Masiku ŵano Yehova olaŵilalini na ŵanthu mwasiteleti, koma okatishila ntchito Mawu ŵake Baibolo. Sewo ‘tingamvwe’ mawu a Yehova owonesha kuti okondwela nase tikoŵelenga mawu a Yesu opezeka m’Mabuku authenga uweme. (Ŵelengani Yohani 16:27.) Yesu enzekonkheja luweme ngako minkhalidwe iweme ya Atata ŵake. Tetyo, tikoŵelenga mawu owonesha kuwama ntima amene ŵenzekatishila ntchito Yesu polaŵila na ŵanthu aliye ungwilo, tikowona kuti ni Yehova ngaye-ngaye wamene otiuja mawu amene awo.—Yoh. 15:9, 15.

11. Ndaŵa yanji tinganene kuti mavuto otanthauzalini kuti Yehova waleka kukondwela nase? (Yakobo 1:12)

¹¹ Kupitila mu vinthu vakutichitila. Yehova nthawe zonse ni wokonzeka kutiyayva, mwachisanzo, yove niwokonzeka kutipasa vinthu vatufunikila mwakuthupi. Nthawe ziyakine, Yehova angalole kuti tikumane na vuto iyakine molingana na mwevinkhalila pa moyo wa Yobu. (Yobu 1:8-11) Koma keno tukumana na mavuto vutanthauzalini kuti Mulungu waleka kukondwela nase. Koma mosiyana ngako na vamene ivi, mayeselo otipasa mwayi wowonesha kuti tumukonda ngako Mulungu komasoti tumudalila. (Ŵelengani Yakobo 1:12.) Ndipo panthawe ya mayeselo, tizakwanishe kuwona kuti Mulungu otikonda komasoti otiyavya kuti tikwanishe kupilila.

12. Kansi tingaphunzile chinji pa chisanzo cha Dmitrii?

¹² Ganizilani vechitikila m’bale muyakine waku Asia zina yake Dmitrii. Yove echosewa pa ntchito ndipo pepita myezi akaliyefwana iyakine. Tetyo, yove eganiza zoyangijila utumiki wake, ndipo pochita vamene ivi yove ewonesha kuti odalila Yehova. Myezi inyinji ipita yove akaliyefwana ntchito. Pavuli pake, yove elwala matenda akulu ndipo ekatiwa adimiti. Monga mutu wa banja komasoti tata wa ŵana, yove eyamba kulikonsha keno Yehova enze akalimukonda. Nsiku iyakine usiku, mwana wake mwanakazi eluta pam’bedi penzeyone yove nomupasa pepa yamene penzelembe mawu apa Yesaya 30:15 onena kuti: “Muzaŵe a mphamvu mukaleka chita wowa komasoti mukankhala na chikhulupililo.” Yove eleta pepa yamene iyo pa bedi ya atata ŵake nonena kuti, “Atata, mukokumbukila vayunena lemba yamene iyi mukakhumudwa.” Dmitrii eziŵa kuti Yehova, enzeyavya banja yake kufwana chakulya chokwanila, vovwala, komasoti ng’anda. Yove efotokoza kuti: “Newo nenzegofunika tyala kunkhala chelele nopitilija kudalila Mulungu.” Keno namwe mukumana na mavuto monga ni amene aŵa, mukokhulupilila kuti Yehova azakusamalileni komasoti kukuyavyani kuti mukwanishe kupilila.

13. Kansi Yehova angakatishile ntchito ŵani pofuna kutiwonesha kuti okondwela nase?

¹³ Kupitila muli abale na alongo. Yehova angakatishile ntchito abale na alongo powonesha kuti okondwela nase. Mwachisanzo, Mulungu angachitishe kuti munthu muyakine atiuje mawu aweme pa nthawe yatufunikila. Vamene ivi, niye vechitikila mulongo muyakine waku Asia pa nthawe yenzelimbana na vuto iyakine ikulu. Yove enze echosewa pa ntchito komasoti elwala matenda akulu ngako. Pavuli pake, mwanalume wake echita chimo ikulu ngako ndipo emuchosa pa udindo wake monga nkulu. Mulongo wamene uyo enena kuti: “Newo nenzeziŵalini chifukwa chake vinthu vonse vamene ivi venzechitika, komasoti neyamba kuganiza kuti payakine nephoniyesha chinthu chiyakine ndipo Yehova wakhumudwa nane.” Mulongo wala emusenga Yehova m’pemphelo kuti amuwoneshe keno enzemukonda chendi. Kansi Yehova echita tyani? Yove efotokoza kuti: “Akulu amupingo ewela kuzanitandaja ndipo enisimikijila kuti Yehova onikonda ngako.” Pavuli pa masiku atontho tyala, yove esengasoti Yehova kuti amuyavye? Yove enena kuti: “Nsiku imo na imo yamene yenipemphela kwa Yehova, nelondela kalata yofumila kuli abale amumpingo mwasu. Pa nthawe yenenzeŵelenga kalata yotonthoja, neziŵa kuti Yehova wayankha pemphelo yangu.” Kulaŵila chendi, nthawe zinyinji Yehova owonesha kuti okondwela nase pochitisha ŵanthu ayakine kuti atiuje mawu aweme.—Sal. 10:17.

14. Kansi Yehova okatishila soti ntchito njila yotyani pofuna kuti tiziŵe kuti okondwela nase?

¹⁴ Yehova owonesha soti kuti okondwela nase ngako pokatishila ntchito abale ŵasu kuti atipase malangizo pakafunikila. Mwachisanzo, Yehova ekatishila ntchito ntumwi Paulo kuti alembe makalata 14 oujiliwa noŵatumija kumipingo. M’makalata amene aŵa, Paulo elembasoti malangizo amphamvu, koma achikondi. Ndaŵa yanji Yehova eujila Paulo kuti alembe malangizo amene aŵo? Chifukwa chakuti Yehova ni Tata muweme ntima ngako, ndipo opeleka malangizo kuli “munthu wakukonda.” (Miy. 3:11, 12) Tetyo tikalondela malangizo ofumila m’Baibolo vutanthauzalini kuti Yehova waleka kukondwela nase, mmalo mwake vuwonesha kuti Mulungu otikonda. (Ahe. 12:6) Kansi ni njila ziyakinesoti zotyani zakuwoneshela Yehova kuti okondwela nase?

UMBONI UYAKINE WAKUTI YEHOVA OKONDWELA NASE

15. Kansi ni ŵanthu otyani ŵakupasa mzimu wake Yehova, ndipo ndaŵa yanji vamene ivi n’votang’isha chikhulupililo?

¹⁵ Yehova opeleka mzimu utuŵa kuli ŵanthu amene ŵakukondwela nawo. (Mat. 12:18) Tingachite luweme kulikonsha kuti: ‘Kansi pa moyo wangu nuwonesha iyakine mwa minkhalidwe ya mzimu utuŵa?’ Kansi palipano nimwe oleza ntima ngako kupambana kale mukaliyenkhala wa Mboni za Yehova? Mukakulisha minkhalidwe ya mzimu utuŵa wa Mulungu, mukokhulupilila ngako kuti Yehova okondwela namwe!—Onani bokosi yakuti “Minkhalidwe yakunkhala nayo ŵanthu moyavyiwa na mzimu . . . ”

16. Kansi Yehova okatishila ntchito ŵani polalikila uthenga uweme, ndipo mwewo mukumvwa tyani mukaganizila vamene ivi? (1 Atesalonika 2:4)

¹⁶ Yehova opeleka ntchito yofunika yolalikila uthenga uweme kuli ŵanthu tyala ŵakukondwela nawo. (Ŵelengani 1 Atesalonika 2:4.) Onani mwechipindulila mulongo muyakine zina yake Jocelyn chifukwa chokata nawo ntchito yolalikila. Nsiku iyakine, Jocelyn euka ali wokhumudwa ngako. Yove enena kuti: “Nenze niliye mphamvu iliyonse ndipo nenzeliwona kuti nine watyala-tyala. Koma panthawe yamene iyo nenze mpainiya ndipo nenzefunika kuluta muutumiki. Tetyo, nepeleka pemphelo noluta muutumiki wakumunda.” Mmawa pansiku yamene iyo letu, Jocelyn ekumana na mwanakazi muyakine muweme ntima zina yake Mary, wamene evomela kuti akophunzila naye Baibolo. Papita myezi itontho, Mary euja Jocelyn kuti enzepemphela kwa Mulungu posenga thandizo yove pechigogoza chiseko chang’anda yake. Kansi Jocelyn ephunzilapo chinji pachochitika chamene ichi? Yove enena kuti: “Venze monga kuti Yehova oniuja kuti ‘Nukondwela nawe.’” N’chendi kuti ni ŵanthu lini onse amene angamvwishile uthenga wasu, koma tikokhulupilila kuti Yehova osangalala ngako keno sewo tuchita vonse vatingakwanishe poujako ayakine uthenga uweme.

17. Kansi muphunzila chinji pa vechinena Vicky pa nkhani ya dipo? (Salimo 5:12)

¹⁷ Yehova epeleka nsembe ya dipo pofuna kuyavya ŵanthu ŵakukondwela nawo. (1 Tim. 2:5, 6) Lomba tyani keno mukhulupilila lini kuti Yehova okondwela namwe olo kuti nsembe ya dipo muikhululila ndipo mwebatizika? Ganizilani ivi: tikopewa kudalila maganizo ŵasu nthawe zonse, koma tikodalila Yehova. Kwa Mulungu, ŵanthu amene okhulupilila dipo angaŵawone kuti ni olungama, komasoti yove olonjeza kuti ŵanthu otetyo azalondele madaliso. (Ŵelengani Salimo 5:12; Alo. 3:26) Mulongo muyakine zina yake Vicky ewona kuti kuganizila ngako za kufunika kwa dipo kwemuyavya ngako. Yove efotokoza kuti: “Mosayembekezeleka, neziŵa kuti Yehova wankhala ochita nane vinthu moleza ntima kwa nthawe itali. . . . Koma olo n’tetyo, venze monga nenzemuuja kuti: ‘Chikondi chamuniwonesha n’chasakwanila. Nsembe ya Mwana wanu ni yosakwanila kuti iziŵilije machimo ŵangu.’” Vicky pechiganizila kukula kwa mphaso ya dipo yechipeleka Mulungu, eyamba kuwona kuti Yehova omukonda ngako. Nase tingakwanishe kuziŵa kuti Yehova otikonda ndipo okondwela nase keno tuganizila za dipo.

18. Tikapitilija kukonda Atata ŵasu akululu, kansi tingankhale osimikijila za chinji?

¹⁸ N’chendi kuti olo kuti tikoyeja-yeja mwakhama kukonkheja vataphunzila munkhani ino, nthawe ziyakine tingakhumudwe noyamba kukaikila kuti Yehova okondwela nase. Vamene ivi vikakuchitikilani, osaluŵa kuti Yehova okondwela na ŵanthu “amene opitilija kumukonda.” (Yako. 1:12) Tetyo, pitilijani kuvwendela ngako kwa Yehova, komasoti mukoyeja-yeja kuwona njila zakukatishila ntchito yove powonesha kuti okondwela namwe. Ndipo mukokumbukila kuti Yehova ‘alilini kutali na aliyense wa sewo.’—Mach. 17:27.