Lenaneo le Lefsa la Kopano ya Tikologo

Re a tseba gore Jehofa Modimo o swanelwa ke lerato la rena le boineelo bja rena bjo bo feletšego. Lega go le bjalo, lefase le nyaka go re goketša gore re se ke ra kgomarela tswalano ya rena ya kgaufsi le yena. (Joh. 17:14) Go matlafatša lerato la rena la go rata Jehofa le go re matlafatša gore re lwantšhane le dilo tša lefase tšeo di beago boemo bja rena bja moya kotsing, lenaneo le lefsa la kopano ya tikologo bakeng sa ngwaga wa tirelo wa 2001 le tla ba le sehlogo se se rego, “Rata Modimo—E Sego Dilo tša Lefase.”—1 Joh. 2:15-17.

Lerato la rena le le tseneletšego la go rata Jehofa le re tutueletša go nea bohlatse ka yena. Gaešita le ge go le bjalo, tirelo ya tšhemo ga e bonolo bakeng sa batho ba bantši ba Modimo. Karolong ya “Lerato la go Rata Modimo le re Tutuetša Bodireding bja Rena,” re tla ithuta ka palo ya bao ba ilego ba fenya go lewa ke dihlong le mapheko a mangwe e le gore ba be le karolo ka mo go tletšego modirong wo.

Ditekanyetšo tšeo di theogago tša lefase di re tutuetša bjang? Ditiro tšeo nakong e nngwe di bego di lebelelwa e le tše kgopo ga bjale di bitšwa boitshwaro bjo bo tlwaelegilego. Polelo e rego, “Barati ba Jehofa ba Hloile Bobe” le tšhiedišano e rego, “Dilo Tšeo di Lego Lefaseng—Re di Lebelela Bjang?” di tla tiiša boikemišetšo bja rena bja go gana dikganyogo tše fošagetšego.

Mohlala wa Sekolo sa Bodiredi sa Pušo ya Modimo le Seboka sa Tirelo di tla akaretšwa lenaneong, gaešita le kakaretšo ya sehlogo sa thuto ya Morokami bakeng sa beke yeo. Polelo ya phatlalatša e rego, “Kamoo Lerato le Tumelo di Fenyago Lefase ka Gona,” e tla re thuša go ekiša Jesu go lwantšheng dikgateletšo tša lefase. (Joh. 16:33) Kgonthišega gore o laletša barutwana ba gago ba Beibele gore ba be gona. Yo mongwe le yo mongwe yo a ratago go kolobetšwa o swanetše go botša molebeledi yo a okamelago ka pela-pela ka mo go ka kgonegago e le gore go ka dirwa dithulaganyo tše di swanetšego.

Kopano ye ya tikologo, e tla lebiša tlhokomelo ya rena go seo ge e le gabotse lerato la rena le swanetšego go thewa go sona e le gore re thabele ditšhegofatšo tša Jehofa tšeo di humilego. O se ke wa lahlegelwa ke karolo le ge e le efe ya yona!