Jehofa o Araba Bjang Dithapelo tša Rena?

1-2. Ke’ng seo re ka ipotšišago sona ka dithapelo tša rena?

NA O kile wa ipotšiša ge e ba Jehofa a araba dithapelo tša gago? Ge e ba go le bjalo, ga o noši. Bana babo rena le dikgaetšedi ba bantši ba ipotšiša potšišo ye, kudukudu ge ba na le mathata. Le rena ge re na le mathata re ka bona eka Jehofa ga a arabe dithapelo tša rena.

² A re boneng gore ke ka baka la’ng re ka kgodišega gore Jehofa o araba dithapelo tša bahlanka ba gagwe. (1 Joh. 5:15) Re tlo boledišana le ka dipotšišo tše: Ke ka baka la’ng ka dinako tše dingwe go ka bonagala eka Jehofa ga a arabe dithapelo tša rena? Jehofa o araba bjang dithapelo tša rena lehono?

JEHOFA A KA NO SE ARABE DITHAPELO TŠA RENA KA TSELA YEO RE LETETŠEGO KA YONA

3. Ke ka baka la’ng Jehofa a nyaka gore re mo rapele?

³ Beibele e re kgonthišetša gore Jehofa o re rata kudu e bile re ba bohlokwa kudu go yena. (Hag. 2:7; 1 Joh. 4:10) Ke ka baka leo a re kgothaletšago gore re mo kgopele thušo ka thapelo. (1 Pet. 5:6, 7) O nyaka go re thuša gore re batamele kgauswi le yena le go re thuša go fenya mathata ao re kopanago le ona.

4. Re tseba bjang gore Jehofa o araba dithapelo tša bahlanka ba gagwe? (Bona le seswantšho.)

⁴ Gantši ka Beibeleng re bala gore Jehofa o be a araba dithapelo tša bahlanka ba gagwe. Nagana ka mohlala wa Kgoši Dafida. O ile a kopana le manaba a mantši a kotsi bophelong bja gagwe gomme a kgopela Jehofa gore a mo thuše. Ka nako e nngwe o ile a kgopela Jehofa gore: “Ekwa thapelo ya ka, hle Jehofa; ntshekegele tsebe ge ke go lopa. Nkarabe go ya ka potego ya gago le toko ya gago.” (Ps. 143:1) Jehofa o ile a araba thapelo yeo ya Dafida. (1 Sam. 19:10, 18-20; 2 Sam. 5:17-25) Dafida o ile a bolela a kgodišegile gore: “Jehofa o kgauswi le bohle bao ba mmitšago.” Le rena re ka kgodišega ka seo.—Ps. 145:18.

5. Na Jehofa o be a dula a araba dithapelo tša bahlanka ba gagwe ka tsela yeo ba bego ba letetše ka yona? Nea mohlala. (Bona le seswantšho.)

⁵ Jehofa a ka no se arabe dithapelo tša rena ka tsela yeo re letetšego ka yona. Seo se ile sa diragalela moapostola Paulo. O ile a kgopela Modimo gore a tloše “mootlwa nameng” ya gagwe. Paulo o ile a rapela ka bothata bjoo ka makga a mararo. Na Jehofa o ile a araba dithapelo tšeo? Ee, o ile a di araba, eupša e sego ka tsela yeo Paulo a bego a letetše ka yona. Jehofa o ile a mo nea matla a gore a kgone go tšwela pele a mo hlankela ka go botega go e na le go tloša bothata bjoo.—2 Bakor. 12:7-10.

6. Ke ka baka la’ng ka dinako tše dingwe go ka bonagala eka Jehofa ga a arabe dithapelo tša rena?

⁶ Ka dinako tše dingwe le rena re ka hwetša karabo yeo re bego re sa e letela. Re ka kgodišega gore Jehofa o tseba tsela e kaonekaone ya go re thuša. Ge e le gabotse a ka “dira go feta kudu ka kua ga tšohle tšeo re di kgopelago goba re di naganago.” (Baef. 3:20) Ka baka leo, dikarabo tša dithapelo tša rena di ka tla ka nako goba ka ditsela tšeo re sa di letelago.

7. Ke ka baka la’ng re ka swanelwa ke go fetoša seo re se rapelelago? Nea mohlala.

⁷ Re ka swanelwa ke go fetoša seo re se rapelelago ge re dutše re lemoga seo thato ya Modimo e lego sona. Nagana ka mohlala wa Martin Poetzinger. Ka moragonyana ga gore ngwanabo rena Poetzinger a nyale, o ile a swarwa gomme a išwa kampeng ya Nazi yeo batho ba bego ba tlaišetšwago go yona. Mathomong o ile a kgopela Jehofa gore a lokollwe kampeng yeo e le gore a kgone go yo hlokomela mosadi wa gagwe le go tšwela pele ka go bolela ditaba tše dibotse. Eupša ka morago ga dibeke tše pedi o ile a lemoga gore Jehofa ga se a araba thapelo yeo ka tsela yeo a bego a letetše ka yona. Ka gona o ile a thoma go rapela ka go re: “Jehofa, hle mpontšhe seo o nyakago ke se dira.” Ke moka, o ile a thoma go nagana ka seo bana babo rena ba bangwe bao ba lego kampeng ba se kgotleletšego. Ba bantši ba bona ba be ba tshwenyegile ka basadi ba bona le bana ba bona. Ngwanabo rena Poetzinger o ile a rapela ka gore: “Jehofa ke leboga kabelo ya ka e mpsha. Nthuše gore ke matlafatše le go kgothatša bana bešo.” O ile a fetša mengwaga e senyane a le dikampeng a dira sona seo!

8. Re swanetše go dula re gopola eng ge re rapela?

⁸ Re swanetše go gopola gore Jehofa o tlo phethagatša dikholofetšo tša gagwe ka nako yeo a e beilego. Dikholofetšo tšeo di akaretša go fediša mathata a batho ka mo go feletšego, go swana le dikotsi tša tlhago, bolwetši le lehu. Jehofa o tlo diriša Mmušo wa gagwe go phethagatša morero wa gagwe. (Dan. 2:44; Kut. 21:3, 4) Eupša ga bjale o sa dumeletše Sathane gore a buše lefase le.b (Joh. 12:31; Kut. 12:9) Ge Jehofa a be a ka rarolla mathata a batho gona bjale, go be go tlo bonagala eka Sathane o kgona go buša. Le ge gona bjale re sa dutše re letetše gore Jehofa a phethagatše dikholofetšo tša gagwe, seo ga se bolele gore ga a re thuše. A re boledišaneng ka ditsela tšeo Jehofa a re thušago ka tšona.

JEHOFA O ARABA BJANG DITHAPELO TŠA RENA LEHONO?

9. Jehofa a ka re thuša bjang ge re dira diphetho? Nea mohlala.

⁹ O re nea bohlale. Jehofa o holofetša go re nea bohlale bjo re bo hlokago gore re kgone go dira diphetho tše dibotse. Re hloka bohlale bjo bo tšwago go Jehofa ge re dira diphetho tšeo di ka amago maphelo a rena, go swana le ge e ba re swanetše go tsena lenyalong goba aowa. (Jak. 1:5) Nagana ka phihlelo ya kgaetšedi Maria yo a sego a nyalwa.c Nakong ya ge a be a kopana le ngwanabo rena yo mongwe, o be a thabela go šoma bjalo ka mmulamadibogo wa ka mehla. O re: “Ge segwera sa rena se dutše se gola, le maikwelo a rena a lerato a ile a thoma go gola. Ke be ke tseba gore ke swanetše go dira phetho. Ke ile ka rapela kudu ka taba ye. Ke be ke hloka tlhahlo ya Jehofa, eupša ke be ke tseba gore Jehofa a ka se ntirele diphetho.” O bone gore Jehofa o arabile dithapelo tša gagwe tša gore a mo nee bohlale. Bjang? Ge a dutše a dira nyakišišo ka dikgatišong tša rena, o ile a hwetša dikgatišo tšeo di mo thušitšego go hwetša dikarabo tša dipotšišo tšeo a bego a na le tšona. Le gona o ile a theetša keletšo e bohlale yeo e tšwago go mmagwe yo a botegago. Keletšo yeo e ile ya thuša Maria go lemoga gore o ikwa bjang ka ngwanabo rena yoo. Mafelelong o ile a kgona go dira phetho e bohlale.

10. Go ya ka Bafilipi 4:13, Jehofa o tlo dira’ng go thuša bahlanka ba gagwe? Nea mohlala. (Bona le seswantšho.)

¹⁰ O re nea matla a go kgotlelela. Go no swana le ge Jehofa a ile a nea moapostola Paulo matla a go kgotlelela, le rena o tlo re nea matla a go kgotlelela mathata a rena. (Bala Bafilipi 4:13.) Bona kamoo Jehofa a ilego a thuša ngwanabo rena Benjamin go kgotlelela mathata. Ge Benjamin e be e sa le mofsa, yena le lapa la gabo ba be a dula dikampeng tša bafaladi Afrika. Benjamin o re: “Ke be ke dula ke rapela Jehofa ke mo kgopela gore a nnee matla a go dira dilo tšeo di mo kgahlago. Jehofa o ile a araba dithapelo tša ka ka go nnea khutšo ya monagano, sebete sa go bolela ditaba tše dibotse le dikgatišo gore ke dule ke na le segwera se sebotse le yena.” O tšwela pele ka gore: “Go bala ka diphihlelo tša bana babo rena le dikgaetšedi le go bona kamoo Jehofa a ba thušitšego gore ba kgotlelele mathata, go dira gore ke ikemišetše go nyaka go dula ke botega.”

11-12. Jehofa a ka diriša bjang bana babo rena le dikgaetšedi go araba dithapelo tša rena? (Bona le seswantšho.)

¹¹ O diriša bana babo rena le dikgaetšedi. Bošegong bja pele ga ge Jesu a ka hwa, o ile a rapela ka mo go tseneletšego. O ile a kgopela Jehofa gore a se ke a dumelela batho ba mo latofatša ka gore o rogaka Modimo. Go e na le gore Jehofa a dire seo, o ile a romela morongwa gore a matlafatše Jesu. (Luka 22:42, 43) Le rena Jehofa a ka re thuša a diriša bana babo rena le dikgaetšedi gore ba re kgothatše goba go re etela. Ka moka ga rena re ka nyaka dibaka tša go botša bana babo rena le dikgaetšedi “lentšu le lebotse.”—Die. 12:25.

¹² Nagana ka phihlelo ya kgaetšedi yo a bitšwago Miriam. Dibeke tše mmalwa ka morago ga gore monna wa Miriam a hlokofale o ile a ikwa a le noši, a nyamile e bile a gateletšegile. O be a dula lla e bile a hloka motho yo a ka bolelago le yena. O re: “Ke be ke se na matla a go founela motho, eupša ke ile ka rapela Jehofa. Ge ke dutše ke lla e bile ke rapela, founo ya ka e ile ya lla. E be e le mogolo yoo a nago le bogwera.” Mogolo yoo le mosadi wa gagwe ba ile ba homotša Miriam. Le gona, o be a kgodišegile gore Jehofa ke yena a dirilego gore ngwanabo rena yoo a mo founele.

13. Nea mohlala wo o bontšhago gore Jehofa a ka diriša batho bao ba sa mo hlankelego go araba dithapelo tša rena.

¹³ A ka diriša le batho bao ba sa mo hlankelego. (Die. 21:1) Ka dinako tše dingwe Jehofa o diriša le batho bao ba sa mo hlankelego go araba dithapelo tša bahlanka ba gagwe. Ka mohlala, o ile a diriša Kgoši Arithasasitha gore a dumelele Nehemia gore a boele Jerusalema gore a kgone go yo thuša go tsošološa motse woo. (Neh. 2:3-6) Le lehono Jehofa a ka diriša batho bao ba sa mo hlankelego go thuša bahlanka ba gagwe ge ba hloka thušo.

14. Phihlelo ya Soo Hing e go kgothaditše bjang? (Bona le seswantšho.)

¹⁴ Kgaetšedi yo a bitšwago Soo Hing o bone ge Jehofa a mo thuša a diriša ngaka ya gagwe. Morwa wa gagwe o na le malwetši a mmalwa a monagano. Ka morago ga go hwetša kotsi e šoro ya koloi, yena le monna wa gagwe ba ile ba tlogela mošomo gore ba kgone go hlokomela morwa wa bona. Ka lebaka la se, ba ile ba ba le mathata a tša ditšhelete. Soo Hing o re o ile a ikwa eka a ka se sa kgona go kgotlelela mathata a gagwe. O ile a rapela Jehofa go tšwa pelong gomme a mo kgopela thušo. Ngaka ya Soo Hing e ile ya nyaka tsela ya go thuša yena le lapa la gagwe. Seo se ile sa dira gore mmušo o ba thuše gomme ba hwetše madulo ao a sa turego kudu. Ka morago ga moo, Soo Hing o itše: “Re bone kamoo Jehofa a re thušitšego ka gona. Ruri ke ‘Mokwi wa dithapelo.’”—Ps. 65:2.

GO NYAKEGA TUMELO GORE RE AMOGELE DIKARABO TŠEO JEHOFA A RE NEAGO TŠONA

15. Kgaetšedi yo mongwe o thušitšwe ke’ng go lemoga gore Jehofa o araba dithapelo tša gagwe?

¹⁵ Gantši Jehofa ga a arabe dithapelo tša rena ka tsela yeo re letetšego ka yona. Eupša dikarabo tšeo a re neago tšona di re thuša gore re dule re mmotegela. Ka gona dula o ntšhitše mahlo dinameng go bona kamoo Jehofa a arabago dithapelo tša gago ka gona. Kgaetšedi yo a bitšwago Yoko o be a bona eka Jehofa ga a arabe dithapelo tša gagwe, ka gona o ile a thoma go ngwala dilo tšeo a di kgopetšego Jehofa. Ka morago ga nako o ile a lebelela ka pukung ya gagwe ke moka a bona gore Jehofa o arabile dithapelo tša gagwe tše dintši tšeo a mo kgopetšego tšona gotee le tšeo a bego a šetše a lebetše ka tšona. Le rena re swanetše go dula re nagana kamoo Jehofa a arabago dithapelo tša rena ka gona.—Ps. 66:19, 20.

16. Re ka bontšha bjang gore re na le tumelo ge re rapela? (Baheberu 11:6)

¹⁶ Ga se ra swanela go no bontšha tumelo ya rena feela ka go rapela Jehofa eupša re swanetše go e bontšha le ka go amogela tsela yeo a arabago dithapelo tša rena ka yona. (Bala Baheberu 11:6.) Bona mohlala wa Mike le mosadi wa gagwe Chrissy. Ba be ba nyaka go hlankela Bethele. Mike o re: “Re ile ra fetša mengwaga e mentši re dira kgopelo ya go ya Bethele e bile re dula re rapela Jehofa ka taba yeo, eupša ga se ra ka ra laletšwa.” Mike le Chrissy ba be ba kgodišegile gore Jehofa o be a tseba gore o be a nyaka go ba diriša kae tirelong ya gagwe. Ba ile ba tšwela pele ba hlankela e le babulamadibogo ba ka mehla mo go nago le tlhokagalo e bile ba thekga modiro wa go aga meago ya mokgatlo wa Jehofa. Lehono ba modirong wa bosepedi. Mike o re: “Ga se ka mehla Jehofa a bego a araba dithapelo tša rena ka tsela yeo re bego re letetše ka yona, eupša o be a dula a di araba go feta ka tsela yeo re bego re nagana ka yona.”

17-18. Go ya ka Psalme 86:6, 7, re swanetše go kgodišega ka’ng?

¹⁷ Bala Psalme 86: 6, 7. Mopsalme Dafida o be a kgodišegile gore Jehofa o kwele dithapelo tša gagwe le go di araba. Le rena re ka ba le kgodišego yeo e swanago le ya gagwe. Mehlala ye re boletšego ka yona sehlogong se e re nea kgodišego ya gore Jehofa a ka re nea bohlale le matla ao re a hlokago gore re kgone go kgotlelela. A ka re thuša a diriša bana babo rena le dikgaetšedi goba batho bao ba sa mo hlankelego.

¹⁸ Le ge Jehofa a ka no se arabe dithapelo tša rena ka tsela yeo re letetšego ka yona, eupša re a tseba gore o tlo di araba. O tlo re nea seo re se hlokago ka nako ya maleba. Ka gona tšwela pele o rapela o kgodišegile gore Jehofa o tlo araba thapelo ya gago e bile o tlo go hlokomela gona bjale. Le gona, o tla “kgotsofatša kganyogo ya sephedi se sengwe le se sengwe” lefaseng le lefsa nakong e tlago.—Ps. 145:16.