Go Hlagolela go Boifa Modimo

“O boife Jehofa, gomme o tlogele bobe.”—DIEMA 3:7, PK.

1. Diema e be e ngwaletšwe bomang?

PUKU ya Beibele ya Diema e na le lehumo la keletšo ya moya. Jehofa o ile a lokišetša puku ye ya tlhahlo mathomong bakeng sa go ruta setšhaba sa gagwe seo se mo emelago sa Isiraele. Lehono e nea dipolelo tše bohlale go setšhaba sa gagwe se sekgethwa sa Bakriste, ‘ba ba fihletšwego ke bofelo bja mabaka.’—1 Ba-Korinthe 10:11; Diema 1:1-5; 1 Petro 2:9.

2. Ke ka baka la’ng temošo yeo e lego go Diema 3:7 e le nakong kudu lehono?

² Ge re bula go Diema 3:7 (PK), re bala gore: “O se ke wa itshema yo bohlale, eupja o boife Jehofa, gomme o tlogele bobe.” Ga e sa le go tloga mehleng ya batswadi ba rena ba pele, ge Noga e be e goketša Efa ka kholofetšo ya gore ba tla “tseba botse le bobe,” bohlale feela bja motho bo paletšwe ke go phetha dinyakwa tša batho. (Genesi 3:4, 5; 1 Ba-Korinthe 3:19, 20) Ga go na lebaka la nako historing leo ka lona se se bilego molaleng go swana le lekgolong le la bo-20 la nywaga—‘mehla ye ya bofelo’ moo batho ba bunago dienywa tša boila-Modimo, dikgopolo tša tlhagelelo, ba hlaselwago ke bomorafo, bošoro le mohuta o mongwe le o mongwe wa boitshwaro bjo bo gobogilego. (2 Timotheo 3:1-5, 13; 2 Petro 3:3, 4) Ke ‘tlhakatlhakano ya lefase le lefsa’ yeo UN goba madumedi a aroganego a lefase a ka se kgonego go e lokiša.

3. Ke ditiragalo dife tšeo di ilego tša porofetwa bakeng sa mehla ya rena?

³ Lentšu la Modimo la boporofeta le re tsebiša gore madira a batemona a ile go “dikxoši tša lefase ka moka, [a] di rapa xo ya ntweng ya mohla-moxolo wa Modimo Ra-matla-ohle . . . felô mo xo bitšwaxo Haramagedone.” (Kutollo 16:14, 16) Go se go ye kae letšhogo la go tšhoga Jehofa le tla aparela dikgoši tšeo goba babuši. E tla ba poifo e swanago le yeo e ilego ya wela ba-Kanana ge Jošua le ba-Isiraele ba be ba phetha kahlolo go bona. (Jošua 2:9-11) Eupja lehono ke yo a swantšheditšwego ke Jošua, e lego Kriste Jesu—“Kxoši ya maxoši, Morêna wa marêna”—yo a tlago go ‘otla ditšhaba ka molamo wa tšhipi’ e le go bontšha “boxale bya Modimo le . . . kxalefo ya Modimo Ra-matla-ohle.”—Kutollo 19:15, 16.

4, 5. Ke bomang bao ba tlago go phološwa, gomme ka baka la’ng?

⁴ Ke bomang bao ba tlago go phologa ka nako yeo? Bao ba tlago go phološwa e ka se be bao ba wetšwego ke letšhogo, eupja e tla ba bohle bao ba hlagoletšego tlhompho ya borapedi ya go boifa Jehofa. Go e na le go ba bohlale mahlong a bona, batho ba ba ‘tlogela bobe.’ Ka boikokobetšo ba fepa menagano ya bona ka seo se lokilego, e le gore se sebe se tlošwe monaganong wa bona. Ba tšeela godimo tlhompho e botse ya go hlompha Morena yo a Phagamego Jehofa, “Moahlodi wa lefase ka moka,” yo a lego kgaufsi le go bolaya yo mongwe le yo mongwe yo a kgomarelago bobe, go etša ge a ile a fediša ba-Sodoma ba ba gobogilego. (Genesi 18:25) Ka kgonthe, go batho ba Modimo ka noši “xo šia Morêna ké mothôpô wa bophelô; O efoxa merêô ya lehu.”—Diema 14:27.

⁵ Mehleng ye ya kahlolo ya Modimo, bohle bao ba ineelago ka mo go feletšego go Jehofa ka poifo ya go boifa gore le ka mohla ba se mo nyamiše, ba tla thoma go lemoga therešo yeo e boletšwego ka mokgwa wa seswantšhetšo go Diema 3:8, (NW): “A [go boifa Jehofa] e be phodišo mokhubong wa gago le tapološo marapong a gago.”

Go Godiša Jehofa

6. Ke’ng seo se swanetšego go re tutueletša go kwa Diema 3:9?

⁶ Poifo ya rena yeo e nago le tebogo ya go boifa Jehofa, gotee le lerato le matla la go mo rata, di swanetše go re tutueletša go kwa Diema 3:9: “Loba Morêna ka khumô ya xaxo, le ka di-thaka-ngwaxa tša punô ya xaxo ka moka.” Ga re gapeletšwe go godiša Jehofa ka dibego tša rena. Se se swanetše go dirwa ka go ithapa, bjalo ka ge go bontšhwa ka makga a ka bago 12 go Ekisodo 35:29 go ya go Doiteronomio 23:23 mabapi le dihlabelo Isiraeleng ya bogologolo. Dithaka-ngwaga tše tšeo di neelwago Jehofa e swanetše go ba dimpho tše phalago tšohle tšeo re ka di neelago, ka go lemoga go loka le botho bjo lerato tšeo re di hweditšego seatleng sa gagwe. (Psalme 23:6) Di swanetše go bontšha boikemišetšo bja rena bja ‘go tsoma mmušo pele le go loka ga gagwe.’ (Mateo 6:33) Go direga’ng ge re godiša Jehofa ka mahumo a rena? “’Me dišexo tš’axo di tlo tlala lehumo, dinkxô tša fofoma mananose a morara.”—Diema 3:10.

7. Ke dithaka-ngwaga dife tšeo re swanetšego go di nea Jehofa, gomme mafelelo e tla ba afe?

⁷ Tsela e kgolo yeo Jehofa a re šegofatšago ka yona ke ya moya. (Maleaki 3:10) Ka gona, dithaka-ngwaga tšeo re mo neelago tšona kudu-kudu e swanetše go ba tša moya. Re swanetše go diriša nako ya rena, mafolofolo a rena le matla a bohlokwa go direng thato ya gagwe. Se le sona se tla re fepa ka tsela e swanago le yeo modiro o bjalo e bilego “sejô” se matlafatšago ka gona go Jesu. (Johane 4:34) Dišego tša rena tša moya di tla tlala, gomme lethabo la rena, leo le swantšhetšwago ke beine e mpsha, le tla phophoma. Go oketša moo, ge re dutše re rapelela dijo tše lekanego tša nama tša letšatši le lengwe le le lengwe ka potego, re ka tlaleletša ka mo go tšwelago pele go seo re nago le sona bakeng sa go thekga modiro wa Mmušo wa lefaseng ka bophara. (Mateo 6:11) Selo se sengwe le se sengwe seo re nago le sona, go akaretša le mahumo a dilo tše di bonagalago, di tlile go rena di e-tšwa go Tatago rena wa legodimong. O tla tšholla ditšhegofatšo tše oketšegilego, go ya ka tekanyo yeo ka yona re dirišago dilo tše tša bohlokwa bakeng sa go mo tumiša.—Diema 11:4; 1 Ba-Korinthe 4:7.

Dikgalemelo tša Lerato

8, 9. Re swanetše go lebelela bjang tsholo le tayo?

⁸ Go ditemana 11 le 12, Diema kgaolo 3 tem 11, 12 gape e bolela ka tswalano e thabišago ya tate le morwa yeo e lego gona malapeng ao a boifago Modimo, gotee le magareng ga Jehofa le bana ba gagwe ba rategago ba moya mo lefaseng. Re bala gore: “Ngwan’a-ka! Se nyatšê thsôlô ya Morêna; O se tsôtê kôtlô ya xaxwe. Xobane Morêna ó ôtla moratwa wa xaxwe, byalo ka tata-xo-motho xe a ôtla morwa’axwe moratwa.” Batho ba lefase ba hloile tsholo. Batho ba Jehofa ba swanetše go e amogela. Moapostola Paulo o ile a tsopola mantšu a go tšwa go Diema, a re: “Ngwan’a-ka! Se nyatšê thsôlô ya Morêna; O se tsôtê kôtlô ya xaxwe. Xobane Morêna ó sôla moratwa wa xaxwe; ó ôtla ngwana ofe le ofe yo a mo amoxêlaxo . . . xo laiwa xohle, xa xo thabiše xe motho à sa laiwa, xo byalo ka e ke ké xo hlokofatšwa; fêla, ka moraxo xo tšweletša seenywa sa tokô le leaxô xo bao ba tlwaetšwaxo xo laiwa.”—Ba-Hebere 12:5, 6, 11.

⁹ Ee, kgalemelo le tayo ke dikarolo tša bohlokwa tša tlwaetšo ya yo mongwe le yo mongwe wa rena, go sa šetšwe gore re e amogela e e-tšwa go batswadi, ka phuthego ya Bokriste goba ge re dutše re naganišiša ka Mangwalo nakong ya thuto ya rena ya motho ka noši. Ke taba ya bophelo le lehu go rena go theetša tayo, ka ge Diema 4:1, 13 le yona e re: “Hee Ban’a-ka! kwang tayô ya rra-weno! Theetšang, Le ithutê thlaloxanyô. Xomarêla thutô! Se e lahlê! E bolokê. Ké yôna bophelô bya xaxo.”

Lethabo le Legolo Kudu

10, 11. Dibopego tše dingwe tša mantšu a thabišago go Diema 3:13-18 ke dife?

¹⁰ Bjale go latela dipolelo tse botse gakaakang, tšeo ruri e lego ‘mantšu a rategago le a therešo’! (Mmoledi 12:10) Mantšu a a buduletšwego a Salomo a hlalosa lethabo la kgonthe. Ke mantšu ao re swanetšego go a tloka dipelong tša rena. Re bala gore:

¹¹ “Lehlôxônôlô le n’e khwetša-bohlale, mo-tlêlwa-ke-temoxô. Mošabô wa bohlale o phala wa lehumô; bo ruiša motho tše di fetišaxo thsipi e khwibidu. Bohlale bo feta le pheta ya thaxa; le talama tša xaxo tšohle xa di bo fihlêle. Bo swere bolelele bya bophelô ka ’atla sa le letona; ka sa ntsôxôšô bo swere khumô le kxodišô. ’Tsela tša byôna ké ’tsela-thatexi; ’me yohle mebila ya byôna ké ya kaxišô. Bohlale ké sehlare sa bophêlô sa ba bo swerexo; wà swara wa tiiša, O tlo ba wa mahlatse.”—Diema 3:13-18.

12. Bohlale le temogo di swanetše go re hola bjang?

¹² Bohlale—a kamoo bo bolelwago gantši ka gona ka pukung ya Diema, e lego ka makga a 46 ka kakaretšo! “Mathômô a bohlale ké xo boifa Morêna.” Ye ke poifo ya go boifa Modimo, e lego bohlale bjo bo šomago bjo bo theilwego tsebong ya Lentšu la Modimo bjo bo dirago gore batho ba gagwe ba kgone go latela tsela e šireletšegilego gare ga madimo a kotsi ao a fokago lefaseng la Sathane. (Diema 9:10) Temogo yeo e bolelwago ka makga a 19 go Diema (NW), e sepedišana le bohlale, e re thuša go lwantšha maano a Sathane. Tabeng ya go hlohleletša ditiro tša lona tša bohwirihwiri, Lenaba le legolo le na le phihlelo ya nywaga e dikete-kete. Eupja re na le selo sa bohlokwa kudu go feta phihlelo yeo e lego morutiši—temogo ya poifo ya go boifa Modimo, e lego bokgoni bja go kgetholla se se lokilego go se se fošagetšego le go kgetha tsela e nepagetšego yeo e swanetšego go latelwa. Se ke seo Jehofa a re rutago sona ka Lentšu la gagwe.—Diema 2:10-13; Ba-Efeso 6:11.

13. Ke’ng seo se ka re šireletšago dinakong tše thata tša tša boiphedišo, gomme bjang?

¹³ Tlhaka-hlakano ya tša boiphedišo lefaseng la lehono ke seka sa go phethagala ga boporofeta bja Hesekiele 7:19: “Silifêra ya bôná ba tlo e lahlêla mekxobeng; xauta ya bôná e tlo ba maudi; xobane mohla wa boxale bya Morêna silifêra ya bôná le xauta ya bôná di ka se hlakodiše.” Mahumo ka moka a dilo tše di bonagalago le gatee di ka se bapišwe le matla a phološago a bohlale le temogo. Kgoši Salomo yo bohlale lebakeng le lengwe o boletše gore: “Bohlale ke tšhireletšo, tšhelete le yona ke tšhireletšo; eupja tsebo ke e phalago, gobane e tsebiša motho ge bohlale bo nea mong wa bjona bophelo.” (Mmoledi 7:12, PK) Ka kgonthe lehono go thaba bao ba sepelago ka ditsela tša Jehofa tša go loka le bao ba kgethago ka bohlale “botelele bja matšatši,” (PK) e lego bophelo bjo bo sa felego bjo e lego mpho ya Modimo go yo mongwe le yo mongwe yo a bontšhago tumelo sehlabelong sa topollo sa Jesu!—Diema 3:16; Johane 3:16; 17:3.

Go Hlagolela Bohlale bja Kgonthe

14. Ke ka ditsela dife Jehofa a bontšhitšego bohlale bjo bo beago mohlala?

¹⁴ Ke mo go swanetšego gore rena batho, bao ba bopilwego ka seswantšho sa Modimo, re katanele go hlagolela bohlale le temogo, e lego dika tšeo Jehofa ka noši a ilego a di bontšha ge a dira mediro ya gagwe e makatšago ya tlholo. “Bohlale, Morêna ó theile ’fase lohle ka byôna; ó thekxile maxodimo ka yôna thlaloxanyô.” (Diema 3:19, 20) O ile a tšwela pele go bopa dibopiwa tše phelago, e sego ka mogato wa tlhagelelo ya sephiri woo o sa hlalosegego, eupja ka ditiro tše lebanyago tša tlholo, se sengwe le se sengwe sa tšona “di e-ya ka mehuta ya tšôna” le bakeng sa morero o bohlale. (Genesi 1:25) Ge mafelelong motho a be a tšweletšwa a e-na le tlhaologanyo le bokgoni bjo bo fetago bja diphoofolo kgole, magofsi a barwa ba Modimo bao e lego barongwa a swanetše go ba a ile a kwala leboelela magodimong. (Bapiša le Jobo 38:1, 4, 7.) Ponelo-pele ya Jehofa e nago le temogo, bohlale bja gagwe le lerato la gagwe di bonwa gabotse dilong tša gagwe ka moka tšeo a di tšweleditšego mo lefaseng.—Psalme 104:24.

15. (a) Ke ka baka la’ng go se gwa lekana go fo hlagolela bohlale? (b) Ke kholofelo efe yeo Diema 3:25, 26 e swanetšego go e tsoša ka go rena?

¹⁵ Ga se ra swanela feela go hlagolela dika tša Jehofa tšeo e lego bohlale le temogo, eupja re bile re swanetše go di kgomarela, le ka mohla re sa nyefiše go ithuteng ga rena Lentšu la gagwe. O re opeletša ka gore: “Ngwan’a-ka! Bohlale a bo se Xo široxêlê; ipolokêlê thlaloxanyô le pelo-keledi. Ké tšôna di phedišaxo môya w’axo, di Xo apeša pheta molaléng.” (Diema 3:21, 22) Ka gona re ka sepela ka polokego le ka khutšo ya monagano, gaešita le nakong ya go batamela bjalo ka lehodu ga “tshenyego ya ka bjako” (NW) yeo e tlago go wela lefase la Sathane. (1 Ba-Thesalonika 5:2, 3) Nakong ya masetla-pelo a magolo ka bowona, “o se šiê xo ka wêlwa ke tše di thšošaxo, le mohla xo tlaxo kotsi ya xo senya ba babe. Xobane O bôʹta Morêna; Yêna ó efoša ’oto l’axo morêô.”—Diema 3:23-26.

Lerato la go Dira se se Lokilego

16. Ke mogato ofe woo o nyakegago go Bakriste go tlaleletša go phišego bodireding?

¹⁶ Ye ke mehla ya go bontšha phišego go boleleng ditaba tše tše di lokilego tša Mmušo gore e be bohlatse go ditšhaba ka moka. Eupja modiro wo wa go nea bohlatse o swanetše go thekgwa ke modiro o mongwe wa Bokriste, bjalo ka ge o hlaloswa go Diema 3:27, 28: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira. Se bolêlê le wa xeno wa re: Tloxa byale; O boê ke Xo neê ka moswana! etšwe Ò na nasô’.” (Bapiša le Jakobo 2:14-17.) Ka ge bogolo bja lefase bo le dinaleng tša bodiidi le tlala, ruri go bile le go nyakega mo go akgofilego ga gore re thuše magagabo rena, kudu-kudu banababo rena ba moya. Dihlatse tša Jehofa di ile tša arabela bjang?

17-19. (a) Ke senyakwa sefe seo se bego se nyakega ka mo go akgofilego seo se ilego sa kgotsofatšwa ka 1993, gomme go bile le karabelo efe? (b) Ke’ng seo se bontšhago gore banababo rena bao ba tlaišegago ba ‘tšwa ba fentše’?

¹⁷ Tšea mohlala o tee: Ngwageng o fetilego kgopelo e akgofilego bakeng sa thušo e ile ya tla e-tšwa go yeo e bego e le Yugoslavia. Banababo rena dinageng tša baagišani ba ile ba arabela ka mo go makatšago. Nakong ya dikgwedi tša go tonya kudu tša marega a fetilego, go ile gwa kgonega gore bafelegetši ba tša tlhakodišo ba tsene lefelong la ntwa, ba iša dipuku tše difsa, diaparo tše borutho, dijo le dihlare go Dihlatse tšeo di diilago. Lebakeng le lengwe banababo rena ba ile ba dira kgopelo ya sa go iša ditone tše 15 tša dithušo tša tlhakodišo, eupja ge ba hwetša tumelelo, e be e le ya ditone tše 30! Dihlatse tša Jehofa kua Austria ka bjako di ile tša romela dilori tše dingwe tše tharo. Ka kakaretšo, ke ditone tše 25 tšeo di ilego tša fihla mo di bego di reretšwego go išwa gona. Banababo rena ba be ba thabile gakaakang ge ba amogela ditokišetšo tše tše dintši-ntši tša moya le tša nama!

¹⁸ Baamogedi bao ba ile ba arabela bjang? Mathomong a ngwaga wo, mogolo yo mongwe o ngwadile gore: “Banababo rena le dikgaetšedi Sarajevo ba sa phela gabotse, gomme sa bohlokwa kudu ke gore re sa dutše re tiile moyeng go ka kgotlelela ntwa ya bošilo. Boemo bo be bo le thata kudu mabapi le dijo. Eka Jehofa a ka le šegofatša le go le putsa bakeng sa boiteko bjo le bo dirilego bakeng sa rena. Babuši ba hlompha Dihlatse tša Jehofa ka mo go kgethegilego ka baka la tsela ya bona ya bophelo yeo e beago mohlala le ka baka la go hlompha ga bona babuši. Re bile re leboga dijo tša moya tšeo le re tlišeditšego tšona.”—Bapiša le Psalme 145:18.

¹⁹ Bana ba babo rena ba lego kotsing le bona ba bontšhitše tebogo ka bodiredi bja bona bja tšhemo bjo bo dirwago ka phišego. Magagabo bona a mantši a tla go bona go tlo kgopela dithuto tša legae tša Beibele. Motseng wa Tuzla, moo ditone tše tlhano tša dijo tša tlhakodišo di ilego tša išwa, bagoeledi ba 40 ba begile palo-gare ya diiri tše 25 tirelong bakeng sa kgwedi, ka thekgo e botse ya babulamadibogo ba senyane ba ka phuthegong. Ba bile le palo e kgahlišago ya ba 243 ba bilego gona Segopotšong sa lehu la Jesu. Bana ba babo rena ba rategago ruri ‘ba fenya moka ka yo a ba biditšego.’—Ba-Roma 8:37.

20. Ke “xo lekanthša” gofe mo go ilego gwa direga go yeo e bego e le Soviet Union?

²⁰ Go fa kudu mo go bontšhitšwego ka mekgobo e mentši ya dijo tša tlhakodišo le diaparo tše borutho tšeo di ilego tša romelwa go seo e bego e le Soviet Union, go ile gwa ba gwa sepedišana le phišego ya banababo rena ba moo. Ka mohlala, kua Moscow bao ba bilego gona Segopotšong lenyaga e bile ba 7 549, ge ba bapišwa le ba 3 500 ngwagola. Lebakeng le le swanago la nako, diphuthego tša motseng woo di ile tša oketšega go tloga go tše 12 go ya go tše 16. Go seo e bego e le Soviet Union ka moka (ka ntle le Baltic States), koketšego ya diphuthego e bile 14 lekgolong, ya bagoeledi ba Mmušo e bile 25 lekgolong, gomme ya babulamadibogo ya ba 74 lekgolong. A moya wa phišego le boikgafo! Se se gopotša motho lekgolong la pele la nywaga ge go be go e-na le “xo lekanthša.” Bakriste bao ba bego ba e-na le mahumo a moya le a dilo tše di bonagalago ba ile ba neela dimpho tše botho go bao ba bego ba le mafelong ao a nago le tlhaelelo, mola phišego ya bao ba tlaišegago e ile ya tliša lethabo le kgothatšo go banei.—2 Ba-Korinthe 8:14.

Hloya Bobe!

21. Batho ba bohlale le ba mašilo ba fapantšhwa bjang mantšung a go phetha a Diema kgaolo 3?

²¹ Kgaolo ya boraro ya Diema 3 se se latelago e nea lelokelelo la diphapano gotee le temošo gomme ya phetha ka temošo ye: “Wa mexabaru O se mo kxanyoxê; O se ithlaolêle tsela xo tša xaxwe ’tsela. Xobane Morêna o hlaswa sehlôla, ó kwana le baloki. Lapa la yo mobe, Morêna ó tlo le hlolêla kotsi; ó tlo šexofatša motse wa yo boló. Bakweri, à lebana nabô, ó a kwêra; ba bolêta ó a ekêlêla. Ba-bohlale, bohwa bya bôná ké tlôtlô; boxolo bya mašilo ké xo kwêrwa.”—Diema 3:29-35.

22. (a) Re ka phema bjang go balelwa gare ga mašilo? (b) Ke’ng seo ba bohlale ba se hloyago, gona ke’ng seo ba se hlagolelago, gomme moputso ke ofe?

²² Re ka phema bjang go balelwa gare ga mašilo? Re swanetše go ithuta go hloya bobe, ee, go hlaswa seo Jehofa a se hlaswago—ditsela ka moka tše di fapogilego tša lefase le le le nago le bošoro le molato wa madi. (Bona gape le Diema 6:16-19.) Ka mo go fapanego, re swanetše go hlagolela seo se lokilego—go tsepama, toko le boleta—e le gore ka boikokobetšo le poifo ya go boifa Jehofa re tle re hwetše ‘moputso le go retwa le go phela.’ (Diema 22:4) Se e tla ba moputso go rena ka moka bao ka potego re dirišago temošo ye: “Bota Jehofa ka pelo ya gago ka moka.”

Tlhaloso ya Gago ke Efe?

◻ Temana ya sehlogo sa thuto ye e šoma bjang lehono?

◻ Re ka godiša Jehofa bjang?

◻ Ke ka baka la’ng re sa swanela go nyatša tayo?

◻ Lethabo le legolo kudu le ka hwetšwa kae?

◻ Re ka rata bjang go loka gomme ra hloya bobe?

[Pictures on page 18]

Bao ba neelago sehlabelo sa bona se se phalago tšohle go Jehofa ba tla šegofatšwa kudu