Lenaneo le Lefsa la Kopano ya Tikologo

Jehofa o swanelwa ke go newa letago. Re nea Jehofa letago bjang? Ke ditlhohlo dife tšeo ba bangwe ba lebeletšanago le tšona mabapi le se? Ke ditšhegofatšo dife tšeo di tlelago bao ba neago Modimo letago gona bjale? Lenaneo la kopano ya tikologo la ngwaga wa tirelo wa 2008 le tla nea dikarabo tše di kgotsofatšago dipotšišong tše. Le na le sehlogo se se rego “Dirang Dilo Tšohle Bakeng sa Letago la Modimo.” (1 Bakor. 10:31) Ela hloko seo se re letetšego matšatšing a mabedi ao a tlago a tlhahlo ya moya.

Molebeledi wa selete o tla nea dipolelo tša dihlogo tše di rego “Ke ka Baka la’ng re Swanetše go Nea Modimo Letago?” le “E-ba Mohlala Tabeng ya go Dira Tšeo di Nyakwago ke Modimo.” O tla nea polelo ya phatlalatša e nago le sehlogo se se rego, “Ke Batho Bafe Bao ba Neago Modimo Letago?” le polelo ya go phetha ya sehlogo se se rego, “Go Nea Modimo Letago re le Batee Lefaseng ka Bophara.” Le gona o tla swara le Sekolo sa Bodiredi sa Pušo ya Modimo. Molebeledi wa tikologo o tla nea dipolelo tša dihlogo tše di rego “Thabela go Bonagatša Letago la Modimo,” “Go Ela Hloko tše di Nyakegago tša Tikologo,” le “Dula o ‘Tsemile ka go Tia Therešong,’” e lego sehlogo seo se theilwego go 2 Petro 1:12. Go oketša moo, re tla ithuta kamoo “Bodiredi bja Bobulamadibogo bo Neago Modimo Letago” ka gona. Tšhiedišano ya mathomo go tše pedi e šišinyago kgopolo yeo e nago le sehlogo se se rego “Go Nea Modimo Letago Dibopegong ka Moka tša Bophelo bja Rena,” e tla ahla-ahla go tsenelela ga tlhaloso ya mantšu a buduletšwego ao a hwetšwago go 1 Bakorinthe 10:31. Tšhiedišano yeo e rego “Go Dira Tirelo e Kgethwa Bakeng sa go Tumiša Jehofa” e tla bolela ka dibopego tše di fapa-fapanego tša borapedi bja rena. Ka Sontaga re tla thabela kakaretšo ya Morokami le go ahla-ahlwa ga temana ya letšatši le letšatši. Go tla ba gape le sebaka sa bao ba yago kolobetšong.

Batho ba bantši ba gana go dumela go Modimo. Ba bantši ba šitišwa kudu ke maano a batho gore ba se ke ba naganišiša ka letago la Jehofa. (Joh. 5:44) Eupša rena re kgodišegile ka bohlokwa bja go fetša nako re nagana kamoo re ka “[Dirago] Dilo Tšohle Bakeng sa Letago la Modimo.” Rulaganya gore o be gona le go tlo holega ka mo go tletšego mananeong ka moka a mane.