Ke’ng Seo se ka re Thušago ge re Belaela?

1-2. (a) Ke dipotšišo dife tšeo bahlanka ba bangwe ba Jehofa ba ka ipotšišago tšona? (b) Re tlo boledišana ka’ng sehlogong se?

KA MOKA ga rena go ka fela go eba le dilo tšeo re belaelago ka tšona. Ka mohlala, nagana ka mogoeledi wa moswa yo a ipotšišago ge eba Jehofa a na le taba le yena. Se se ka dira gore a ipotšiše ge eba a swanetše go kolobetšwa. Goba nagana ka ngwanabo rena yo a ilego a kgetha go hlankela Jehofa e sa le moswa go ena le gore a kitimiše mahumo. Gona bjale o gotše, eupša tšhelete yeo a nago le yona e no kgona go hlokomela fela dinyakwa tša lapa gomme seo se dira gore a ipotšiše ge eba a dirile phetho e botse. Goba go ka ba go na le kgaetšedi yo a godilego yo a se sa nago le matla. A ka ba a nyamišwa ke go se sa kgona go dira dilo tšeo a bego a di dira nakong e fetilego. Na o kile wa ipotšiša dipotšišo tša go swana le gore: ‘Na Jehofa o na le taba lenna? Na dilo tšeo ke ilego ka di dira gore ke kgone go hlankela Jehofa di a nkhola? Na Jehofa o ntebelela ke le bohlokwa?’

² Ge eba re sa leke go hwetša dikarabo tša dipotšišo tše, re ka palelwa ke go ba le tumelo e tiilego go Jehofa gomme ra tlogela go mo hlankela. Sehlogong se, re tlo bona kamoo Beibele e ka re thušago ka gona ge eba re nagana gore Jehofa ga a na taba le rena, ge eba re nagana gore diphetho tšeo re di dirilego nakong e fetilego ga se tša maleba le ge re ipotšiša ge eba re sa le bohlokwa go Jehofa.

SEO RE KA SE DIRAGO GE EBA RE BELAELA

3. Re ka dira’ng ge eba re thoma go ba le dipotšišo tšeo di ka dirago gore re belaele?

³ Tsela e nngwe yeo e ka re thušago ge eba re na le dipelaelo, ke go bala Lentšu la Modimo gore re hwetše dikarabo tša dipotšišo tšeo re nago le tšona. Ge eba re ka dira bjalo re tlo ba le segwera se sebotse le Jehofa gomme ra kgona go ‘ema re tiile tumelong.’—1 Bakor. 16:13.

4. Re ka dira’ng gore re ‘kgonthišetše dilo tšohle’? (1 Bathesalonika 5:21)

⁴ Bala 1 Bathesalonika 5:21. Beibele e re kgothaletša gore re ‘kgonthišetše dilo tšohle.’ Re ka dira seo bjang? Ge eba re se ra kgodišega ka selo se sengwe seo re se dumelago re ka nyakišiša ka sona ka Beibeleng. A re re moswa o nagana gore Jehofa ga a na taba le yena. Na o swanetše go no tshepa seo a se naganago? Aowa, o swanetše go bala Lentšu la Modimo e le gore a ‘kgonthišetše dilo tšohle.’

5. Re ka dira’ng gore re hwetše dikarabo tšeo di tšwago go Jehofa?

⁵ Jehofa o diriša Beibele go bolela le rena. Re swanetše go šoma ka thata e le gore re kwešiše tsela yeo Jehofa a naganago ka yona. Ge re bala Beibele re swanetše go ithuta ka mangwalo ao a tlago go re thuša ka dilo tšeo re tshwenyegilego ka tšona. Re ka thušwa le ke go dira nyakišišo ka dithulusi tšeo mokgatlo wa Modimo o re neago tšona. (Die. 2:3-6) Re ka kgopela Jehofa gore a re thuše go hwetša dikarabo tša dipotšišo tšeo re nago le tšona. Re ka nyaka melao metheo ya Beibele le dilo tšeo di ka re thušago. Re ka thušwa le ke go ithuta ka dipego tša ka Beibeleng tša bahlanka ba Modimo bao ba bego ba ikwa go swana le rena.

6. Diboka di ka re thuša bjang gore re se sa belaela?

⁶ Jehofa o diriša diboka go bolela le rena. Ge re e ba gona dibokeng ka mehla, re ka kwa go bolelwa ka selo se sengwe ge go newa polelo goba ra kwa go bolelwa se sengwe ge motho a araba ke moka ra kgona go thušega. (Die. 27:17) A re boneng gore re ka hwetša bjang dikarabo tša dipotšišo tšeo di re tshwenyago.

GE EBA O NAGANA GORE JEHOFA GA A NA TABA LE WENA

7. Ba bangwe ba ka ipotšiša dipotšišo dife?

⁷ Na o kile wa ipotšiša gore: ‘Na Jehofa o na le taba lenna?’ Ge eba o ipona o se bohlokwa go Jehofa o ka nagana gore ga go kgonege gore o be mogwera wa gagwe. Kgoši Dafida a ka ba a ile a nagana bjalo. O ile a makatšwa ke go bona kamoo Jehofa a nago le taba le batho ka gona gomme a bolela gore: “Wena Jehofa, motho ke’ng ge o bile o mo tšeela godimo? Ngwana wa motho ke’ng ge o bile o tshwenyega ka yena?” (Ps. 144:3) O ka hwetša kae karabo ya potšišo ye?

8. Ke’ng seo Jehofa a se bonago ge a lebelela batho? (1 Samuele 16:6, 7, 10-12)

⁸ Ge re bala Beibele re ithuta gore Jehofa o na le taba le batho bao ba bonagalago okare ga ba bohlokwa. Ka mohlala, Jehofa o ile a roma Samuele gore a ye ntlong ya Jese a tlotše yo mongwe wa barwa ba gagwe gore e tle e be kgoši ya Isiraele. Jese o ile a bitša barwa ba gagwe gore ba tle ba kopane le Samuele gomme a tlogela Dafida yo e bego e le yo mo nyenyane.a Eupša Jehofa o be a kgethile Dafida. (Bala 1 Samuele 16:6, 7, 10-12.) Jehofa o ile a bona gore Dafida o be a mo rata kudu.

9. Ke ka baka la’ng o ka kgodišega gore Jehofa o na le taba le wena? (Bona le seswantšho.)

⁹ Nagana kamoo Jehofa a go bontšhago gore o bohlokwa ka gona. O go nea dikeletšo tšeo di ka go thušago. (Ps. 32:8) A ka se kgone go go thuša ge eba a sa go tsebe. (Ps. 139:1) Ge o diriša dikeletšo tšeo Jehofa a go neago tšona, o tlo bona gore o na le taba le wena. (1 Dikor. 28:9; Dit. 17:26, 27) Jehofa o bona dilo ka moka tšeo o di dirago gore o mo kgahliše. O go tseba kudu, o nyaka gore o batamele kgauswi le yena. (Jer. 17:10) O nyaka gore o be mogwera wa gagwe.—1 Joh. 4:19.

GE RE NAGANA GORE DIPHETHO TŠEO RE DI DIRILEGO NAKONG E FETILEGO GA SE TŠA MALEBA

10. Re ka ipotšiša dipotšišo dife ge re nagana ka diphetho tšeo re di dirilego nakong e fetilego?

¹⁰ Ba bangwe ba ka ipotšiša ge eba ba dirile diphetho tša maleba. Mohlomongwe ba tlogetše mošomo wa maemo a godimo goba dikgwebo tša bona e le go re ba hlankele Jehofa ka mo go oketšegilego. Ba ka bona batho bao ba ba tlwaetšego goba dithaka tša bona di na le tšhelete e ntšhi goba dilo di ba sepelela gabotse. Mohlomongwe ba ka ipotšiša gore: ‘Na diphetho tšeo ke di dirilego ke tša maleba? Goba na ke dirile phošo ka go etiša go hlankela Jehofa pele?’

11. Mongwadi wa Psalme 73 o be a tshwenyega ka’ng?

¹¹ Ge eba le wena o na le dipotšišo tšeo di swanago, nagana kamoo mongwadi wa Psalme 73 a bego a ikwa ka gona. O be a bona eka batho ba bangwe ba ipshina ka bophelo e bile dilo di ba sepelela gabotse. (Ps. 73:3-5, 12) Seo se dirile gore a bone okare o sentše nako ka go hlankela Jehofa. O be a “tlaišega letšatši ka moka” ka baka la dilo tšeo a bego a di nagana. (Ps. 73:13, 14) O ile a thušwa ke’ng?

12. Mongwadi wa Psalme 73 o ile a thušwa ke’ng? (Psalme 73:16-18)

¹² Bala Psalme 73:16-18. Mopsalme o ile a ya sekgethweng sa Jehofa moo go bego go na le khutšo. Ge a be a le moo o be a kgona go nagana gabotse. O ile a kwešiša gore le ge ba bangwe ba bonagala ba be ba ipshina ka bophelo, ba be ba se na kholofelo ya go phela ka mo go sa felego. Ka baka la seo o ile a ba le khutšo ya monagano gomme a bona le gore go hlankela Jehofa ke phetho e kaone kudu go di phala ka moka. Seo se mo thušitše gore a ikemišetše go dula a hlankela Jehofa.—Ps. 73:23-28.

13. O ka thušwa ke’ng ge eba o itshola ka diphetho tšeo o di dirilego nakong e fetilego? (Bona le seswantšho.)

¹³ Go swana le mopsalme, le wena o ka fetola tsela yeo o naganago ka yona. Bjang? Dula o gopola dilo tše dibotse tšeo Jehofa a go direlago tšona le go gopola gore Jehofa ga a thekge batho bao ba sa mo hlankelego. Batho bao ba sa hlankelego Jehofa ba tšea mešomo ya bona e le e bohlokwa kudu ka gobane ga ba tsebe gore go tlo direga eng nakong e tlago. Ge o ka dula o botega, Jehofa o tlo go direla dilo tše dibotse gona bjale le nakong e tlago. (Ps. 145:16) O ka thušwa le ke go nagana gore ge nkabe o ile wa dira diphetho tše di fapanego bophelo bja gago bo be bo tlo ba bjang. Seo se thabišago kudu ke go tseba gore batho bao ba ratago Jehofa le batho ba bangwe ba dula ba thabile.

GE EBA O IPOTŠIŠA GORE O SA LE BOHLOKWA GO JEHOFA

14. Batho ba bangwe ba lebeletšane le eng, gona seo se ka dira gore ba ipotšiše’ng?

¹⁴ Bahlanka ba bangwe ba Jehofa ga ba sa kgona go hlankela Modimo ka tsela yeo ba bego ba tlwaetše ka yona ka gobane ba tšofetše goba ba a babja. Seo se ka ba nyamiša. Ba ka ipotšiša gore, ‘na ke sa le bohlokwa go Jehofa?’

15. Mongwadi wa Psalme 71 o be a kgodišegile ka’ng?

¹⁵ Mongwadi wa Psalme 71 le yena o ile a ipotšiša ge eba a sa le bohlokwa go Jehofa. Ke ka baka leo a ilego a rapela ka gore: “O se ke wa ntlogela ge ke felelwa ke matla.” (Ps. 71:9, 18) Eupša mopsalme yoo o be a tseba gore ge a ka dula a botegela Jehofa, Jehofa o tlo dula a mohlahla le go mo thekga. Mopsalme yo o ile a ithuta gore Jehofa o thabišwa ke batho bao ba dirago sohle seo ba ka se kgonago go mo hlankela le ge go na le dilo tšeo di ba šitišago.—Ps. 37:23-25.

16. Jehofa o ikwa bjang ka batho bao ba godilego? (Psalme 92:12-15)

¹⁶ Ge eba o tšofetše nagana gore Jehofa o ikwa bjang ka wena. O tlo go thuša gore o tšwele pele o mo hlankela le ge go na le dilo tšeo di go šitišago. (Bala Psalme 92:12-15.) O se ke wa dulela go nagana kudu ka dilo tšeo o se sa kgonago go di dira. O ka thuša batho ba bangwe ka mohlala wa gago o mo botse wa go dula o botega le ka go bontšha gore o na le taba le batho ba bangwe. O ka botša batho ba bangwe kamoo Jehofa a ilego a go thuša ka gona ge o dutše o mo hlankela le go ba botša gore o fela pelo ya go bona a dira dilo tšeo a di tshepišitšego. Le gona, o se ke wa lebala gore go rapelela batho ba bangwe go bohlokwa kudu. (1 Pet. 3:12) Go sa šetšwe gore maemo a rena ke afe, ka moka ga rena re ka kgona go hlankela Jehofa le go thuša batho ba bangwe.

17. Ke ka baka la’ng re se ra swanela go ipapetša le batho ba bangwe?

¹⁷ Ge eba o nyamišwa ke gore ga o sa kgona go hlankela Jehofa kamoo o bego o tlwaetše ka gona, dula o gopola gore Jehofa o sa tšeela godimo seo o kgonago go mo direla sona gona bjale. O se ke wa ipapetša le batho ba bangwe! Ka baka la’ng? Ka gobane Jehofa le yena ga a re bapetše le batho ba bangwe. (Bagal. 6:4) Ka mohlala, Maria o ile a tlotša Jesu ka makhura a go tura a monko o bose. (Joh. 12:3-5) Mohlologadi yo a bego a diila o ile a neela ka ditšheletiana tša tšhipi tše pedi. (Luka 21:1-4) Eupša Jesu o bone dimpho tšeo ka moka di le bohlokwa. Jesu o be a ekiša Jehofa. Ka gona re ka kgodišega gore Jehofa o tšeela godimo dilo ka moka tšeo re kgonago go mo direla tšona ka gobane re mo rata.

18. Ke’ng seo se ka re thušago gore se sa hlwa re belaela? (Bona lepokisi leo le rego, “Jehofa a ka go Thuša Gore o se sa Hlwa o Belaela.”)

¹⁸ Ka moka ga rena re fela re belaela. Eupša re ithutile gore Beibele e ka re thuša gore re se sa ba le dipelaelo. Dira sohle seo o ka se kgonago, go hwetša dikarabo tša dipotšišo tšeo o ka bago o na le tšona e le gore o se sa belaela. Kgodišega gore Jehofa o go tseba gabotse. O leboga dilo ka moka tšeo o mo direlago tšona e bile o tlo dula a go šegofatša. Jehofa o rata bahlanka ba gagwe ka moka e bile o ba bona ba le bohlokwa.