Lenaneo Le Lefsa La Kopano Ya Tikologo
1 Lenaneo le lefsa la kopano ya tikologo leo le thomago ka September le tla godiša sehlogo se se rego, “Hwetša Lethabo le Legolo ka go Nea.” (Dit. 20:35) Lethabo le hlaloswa e le “boemo bja katlego le kgotsofalo.” Batho ba bantši lehono ba phamola boipshino le ge e le bofe bjo ba ka bo hwetšago bophelong, gomme ge ba bo hwetša, gantši e ba bja nakwana. Leo ga se lethabo la kgonthe. Lega go le bjalo, Jehofa o re ruta kamoo re ka ikholago ka gona ka mo go sa felego. (Jes. 48:17; 1 Joh. 2:17) Lenaneo le lefsa la kopano ya tikologo le tla gatelela kamoo re ka hwetšago lethabo le legolo ka gona ka go nea ka tsela ya moya.
2 Re tla ithuta ditsela tše di šomago tšeo ka tšona re ka ikgafago bodireding. Tše dingwe tša dipolelo tšeo di tlago go newa ke balebeledi ba basepedi di na le dihlogo tše di rego: “Go Dira Bagwera ka Mamona e sa Lokago,” “Hlompha Tokišetšo ya Modimo ya ‘Dimpho Tšeo e Lego Banna’” le “Hwetša Dibopego tše Dintši tša Lethabo la Kgonthe.” Bao ba kganyogago go kolobetšwa kopanong ba tla rata go bolela le molebeledi yo a okamelago e le gore a ka rulaganyetša gore bagolo ba babedi ba boeletše dipotšišo tša kolobetšo le bona. Go hlankela Jehofa tswalanong e hlwekilego go tla tlišetša batho bao ba sa tšwago go kolobetšwa lethabo le legolo.
3 Tlhompho e swanetšego ya go hlompha matla a taolo a Jehofa le yona e tliša lethabo la kgonthe le polokego. Batho ka moka ba swanetše go tseba se. Ka gona, polelo ya phatlalatša kopanong ya tikologo e tla godiša sehlogo se se rego, “Kopana le Batho ba Thabilego ba Modimo.” Kgonthišega gore o laletša bohle bao ba ilego ba bontšha kgahlego therešong gore ba tle polelong ye. Ga se ba hwetša polokego ya kgonthe le lethabo le le swarelelago ka tlase ga pušo ya motho lefaseng le leo le rapaletšego matleng a Sathane. (Mmo. 8:9) Eupša a lethabo le lekaakang leo ba tlago go le hwetša ka go kopanela le batho ba thabilego ba Jehofa!—Ps. 144:15b.
4 Go sa šetšwe maemo a senyegelago pele tshepedišong ye ya dilo, bao ba hwetšago lethabo le legolo kudu ka go nea moyeng le ka mohla ba ka se ke ba nyamišwa ke Modimo yo a thabilego. (1 Tim. 1:11) Lenaneo le lefsa la kopano ya tikologo le tla bontšha gore se ke therešo. O se ke wa le foša!