Omikanda Viokulilongesa Omukanda Wovilinga Omwenyo Wetu Woukilisitau
© 2024 Watch Tower Bible and Tract Society of Pennsylvania
6-12 YA KAPEPO
OLUMONO LUKAHI MONDAKA YA HUKU OVIIMBO 36-37
“Wahanumane Mokonda Yonondingavivi”
Omutala Womulavi 4/2017 pefo 10 § 4
Ovipuka Patyi Vihamakalako Vali Tyina Ouhamba wa Huku Wameya?
4 Oñgeni ovanthu onondingavivi vetukalesa hono? Apostolu Paulu wapopia okuti kononthiki mbahulila makukeya “omuvo wepuiya.” Ayawisako okuti: “Onondingavivi no vomatutu mavakavilapo unene.” (2 Timotiu 3: 1-5, 13) Ovipuka ovio kavikahi nokumoneka hono? Ovanthu ovanyingi ponthue tuamonesuale ononkhumbi no nondingavivi, nokulingwa onya mokonda yotyivala tyetu. Ovanthu vamwe kavaholeka ovipuka ovivi valinga. Vamwe velikembesa ngatyina vahanda okukuatesako vakuavo, mahi muaina onondingavivi. Namphila hamwe katunemoswe ononkhumbi novanthu onondingavivi, mahi ovipuka valinga vitukalesa notyiho. Tyituihama unene tyina tuameivi onkhalelo ovana no nombuale novanthu ovakuavo vehetyivili okuliyakulila, valingwa onya no nondingavivi. Onondingavivi ovakalavi ngovinyama viomohika ine ngo vilulu. (Tiaku 3:15) Tyihambukiswa okunoñgonoka okuti Ondaka ya Jeova ituavela ekevelelo.
Omutala Womulavi 6/2022 pefo 10 § 10
Siovaa Uyamba Vana Vaevela
10 Okupakela vakuetu onkhongo tyituetela vala ovitateka. Siovaa uhanda tukale nehambu lituka kokulityilika okupakela vakuetu onkhongo. (Tanga Ova Efesu 4:31, 32.) Siovaa utupopila “tuyekepo onyengo nokunumana.” (Ovii. 37:8) Otyipuka otyo okutyitavela onondunge. Okupakela vakuetu onkhongo tyipondola okutuetela ovitateka mekongoko lietu. (Omih. 14:30) Ngokuti okupakela vakuetu onkhongo kamatyeetela vala vakuetu ovitateka mahi mwene nonthwe matyituetela ovitateka. Ngotyo tyina tuevela vakuetu, nonthwe muene tupolako ouwa. (Omih. 11:17) Tyina tuevela vakuetu tukala nombembua nehambu lituka kokuumbila Siovaa.
Omutala Womulavi 1/12/2003 pefo 14 § 20
“Vasa Ehambu Enene Mu Siovaa”
20 Naina, “onondalawa mavakapiñgana ohi.” (Ovii. 37:11a) Mahi “onondalawa” ovalie? Ondaka yapitiywa “onondalawa” yelikwata nonondaka “okuhulilwa, okulivondela, okuvovapo.” “onondalawa” ovanthu vana veliola omutima vakevelela umwe vala ku Siovaa atetulule ovitateka vakondya navio. “Avakakala-ko nehambu enene nombembwa onene.” (Ovii. 37:11b) Nopehepano ovanthu ovo vena-le ombembwa mokonda veli Meongano lya Huku.
Olumono Lwa Huku
Perspicaz Vol. 2 pefo 410
OMPHUNDA
Okwapama, okutwalako ine okwaya peulu. Onomphunda mbupopiwa okuti mbapama mbutwalako. (Isa. 54:10; Hamb. 3:6; tyeeleka Ovii. 46:2.) Naina, etyi omwiimbi apopia okuti ouviuki wa Huku ukahi ‘ngonomphunda ononene,’ (Ovii. 36:6) ankho ukahi nokupopia okuti ouviuki wa Siovaa kaupiluluka. Mokonda onomphunda mbaya peulu, otyo tyilekesa okuti ouviuki wa Huku waya vali peulu tyipona wovanthu. (Tala Isa. 55:8, 9.) Etyi onoandyu mbauyulila kombanda yohi ovilindo epandu-vali vionyengo ya Huku, omukanda Eholololo 16:20 wati: “Onomphunda ambahamonwa.” Otyo tyilkesa okuti novipuka ovinene vilifwe ponomphunda kamavihupu konyengu ya Huku. — Tala Sele. 4:23-26.
13-19 YA KAPEPO
OLUMONO LUKAHI MONDAKA YA HUKU OVIIMBO 38-39
Yeka-po Okulivela Onombei
Omutala Womulavi 11/2020 pefo 27 §§ 12-13
“Tala Vala Komutwe”
12 Tanga 1 Swau 3:19, 20. Okulivela katyapengele. Mongeleka, vamwe velivela mokonda yovipuka valingaile, etyi vehenelilongese otyili. Ovakuavo velivela, mokonda yovipuka valinga etyi vambatisalwa-le. Okulivela hatyipukako otyivi. (Loma 3:23) Tyotyili etyi onthue tuahanda, okulinga etyi tyaviuka. Mahi ovanthu “atuho tualinga-linga-le oviponyo.” (Tia. 3:2; Loma 7:21-23) Namphila okulivela tyiihama, mahi tyipondola okutukuatesako. Ñgeni ngotyo? Okulivela tyituviyula, atuovola okuahawane vali okulinga etyi tyapenga. — Hemb. 12:12, 13.
13 Mahi tyesukisa okulunguka, mokonda pamwe upondola okulivela unene onombei — oyeke otyipuka walingile tyitualeko okukuihama ngwe welivela-le iya Siovaa wekuevela-le. Okulivela ngotyo, tyipondola okukunyona. (Ovii. 31:10; 38:3, 4) Ñgeni ngotyo? Soka ongeleka yomuhikuena ankho ulivela unene onombei mbonkhali alingile. Wati: “Ame ankho ndyisoka okuti tyafwa ndyitupu vali omuvo wokulivela, himetavelwale vali lietaka.” Ovanyingi vapondola okusoka, ngomuhikuena oo. Mahi otyiwa okulityilika okulivela unene onombei. Tyehe-otyo vala, Satanasi mahambukwa unene ine tusoka okuti kamatutyivili vali — ngwe ankho Siovaa wesuka umwe nonthue! — Tala 2 Ova Kolindu 2:5-7, 11.
Omutala Womulavi 15/11/2002 pefo 20 §§ 1-2
Oityi Tuna Okulinga Opo Tuhambukiswe Huku?
Omwenyo wetu kausete okupwa. Otyo Ndaviti elikwambelele okuti: “Siovaa, nkhwateseko-vo ndyinoñgonoke apa mandyihulila, na apa pelifwe ononthiki mbange, opo ndyinoñgonoke ousupi womwenyo wange. Tyotyili, ononthiki wampha kambuhi. Komaiho ove, omwenyo wange utupu-ale apa uvasa.” Etyi ankho Ndaviti ahanda okulinga, ovipuka mavihambukiswa Huku, tyilinge movipuka alinga tyilinge movipuka asoka. Mokonda ankho utei umwe vala ku Huku, apopi okuti: “O kwoove vala ndyikevelela.” (Ovii. 39:4, 5, 7) Siovaa emutehelela umwe, atale umwe nawa ovipuka alinga emuyambe.
Mokonda yovitateka viouye, pamwe tupondola umwe okulitala ngatyina tuna ovilinga ovinyingi twehena-le omuvo. Pamwe mokonda yovipuka ovinyingi tuna okulinga momuvo wike vala tupondola okusoya. Mahi pahe okuti nga Ndaviti, noonthwe tusuka umwe nokulinga ovipuka vihambukiswa Huku? Siovaa utala ovipuka kese munthu alinga. Sombe omulume umwe ankho una onthilo na Huku, wakaleleko omanima 3.600 konyima, wapopile okuti Siovaa utala ovipuka alinga nokuvalula ononthambo mbae ambuho. Otyo elipulile okuti: “Haa mandyilingi ñgeni kumbi Huku andyendela?” ( Som. 31:4-6, 14) Matuhambukiswa vala Huku tyina tupaka pomphangu yotete ovilinga viae, nokutavela ovitumino viae, na tyina twahanyane nomuwo wetu. Naina, tala umwe nawa ine ukahi nokulinga ovipuka ovio.
Omutala Womulavi 10/2021 pefo 15 § 4
Pameka Oupanga Wove na Siovaa
Likuambela apeho ku Siovaa. Siovaa utyii okuti okulivela onombei matyikulingisa ohelikuambela kwe. (Loma 8:26) Namphila molivele onombei, mahi linga ononkhono ‘mbokulikuambela’ ku Siovaa omupopila okuti uhanda okulinga epanga liae. (Loma 12:12) Omukulu umwe utiwa o Andrej wati: “Ame ankho tyinkhundisa okulikuambela. Mahi ankho apeho tyina namelikuambela tyinkhalesa nawa. Ndyitula omutima.” Inkha utala onondaka mopopi pokulikuambela utupu, tanga vala elikuambelo lya Daviti, elikuambelo alingile etyi elivela livasiwa mo Oviimbo 51 neli lili mo 65.
Olumono Lwa Huku
Omutala Womulavi 9/2022 pefo 13 § 16
Kala Omunthu Uyumbwa Onthumbi
16 Inkha tuhanda vakwetu vetuyumbe onthumbi tuna okuyunga nawa evi tupopia. Okuyunga nawa evi tupopia matyitukuatesako okuhayandyanesa ovipuka atee tyina pena vamwe vetupula-vio. (Tanga Omihe 10:19.) Haunene tyipondola okutupuiya okuyunga nawa evi tupopia tyina tuli mo internete. Inkha katulunguka tupondola okuyandyanesa ovipuka vihapondola okuivala kovanthu ovanyingi. Ovipuka tupaka mo internete kavikala vali vietu, ovanthu vapondola okulinga navio evi vahanda, Iya otyo tyipondola okutuetela ovitateka. okuyunga nawa evi tupopia, tupu tyipondola okutukwatesako atuahapopila onondyale mbetu tyina vetupula ovipuka vipondola okupaka vakuetu motyiponga. Inkha motyilongo tyetu ovilinga vietu viailikwa otyo pamwe tyipondola okumonekapo tyina omakakunye etupula. Motyipuka ngotyo onthue tuna okuendela monondaka ombu mbati: “Mandyikutu komulungu wange.” (Ovii. 39:1) Tyilinge mombunga yetu, tyilinge komapanga etu, tyilinge mewaneno aa kovanthu ovakwavo vali, apeho tuesukisa okulekesa okuti tuyumbwa onthumbi. Opo tukale ovanthu vayumbwa onthumbi tuesukisa okuyunga nawa ovipuka tupopia.
20-26 YA KAPEPO
OLUMONO LUKAHI MONDAKA YA HUKU | OVIIMBO 40-41
Tukwatesilako-tyi Vakwetu?
Omutala Womulavi 8/2018 pefo 19-20 §§ 16-18
Okukala Notyali Tyieta Ehambu
16 Omunthu una otyali kakevelela okukondolelwa. Jesus wati: “Tyina mulinga ovipito, kongei ovahepi novilema, novamphoki, iya onwe mamukala nehambu mokonda vetupu natyike mavemukondolela.” (Luka 14:13, 14) Ombimbiliya yati: “Omunthu wokuna otyali makayambwa.” Tupu yati: “Una usuka novahepi una ombembwa.” (Omihe 22:9; Oviimbo 41:1) Matukala nehambu liotyotyili tyina tukuatesako vakuetu.
17 Etyi Paulu apopia onondaka mba Jesus mbati “okuava tyihambukiswa vali tyipona okupewa,” ankho kekahi vala nokupopia konthele yokuavela vakuetu ovipuka. Tupu, onthue tupondola okupameka vakuetu, nokuveavela onondonga mbapolwa Mombimbiliya iya nokuvekuatesako movipuka vesukisa. (Ovilinga 20:31-35) Ovipuka Paulu alinga nevi apopia, vitulongesa okuti tyakolela unene okuavela vakuetu omuvo wetu, nononkhono, nokuvetehelela iya nokulekesa okuti tuvehole.
18 Ovanongo vamwe vaimbuka okuti okuava tyikalesa nehambu. Omukanda umwe wapopia okuti ovanthu vahambukwa unene tyina valingilako vakuavo ovipuka oviwa. Ovanongo ovo vapopia okuti tyina tukuatesako vakuetu, tulitehelela okuti omuenyo wetu ukahi vali nawa. Tupu, vehole okulunda ovanthu okulingilako vakuavo ovipuka oviwa, opo vakale nekongoko likahi nawa, nehambu. Etyi ovanongo ovo vapopia katyituhuvisa mokonda Jeova, Omutungi wetu, wetyipopia-le okuti okuava tyituetela ehambu. — 2 Timotiu 3:16, 17.
Omutala Womulavi 15/12/2015 pefo 24 § 7
Jeova Mekukuatesako
7 Mahi inkha wavela, Jeova mekupameka iya mekukuatesako, ngetyi alingile ovaumbili vae vokohale. Ohamba David wahoneka okuti: “Una wasuka novahepi una ombembwa. Jeova memuyovola monthiki yononkhumbi; Jeova memuholeka iya atualako nomuenyo.” (Oviimbo 41:1, 2) Mahi, David kapopile okuti ovanthu ovawa vakaleleko pomuvo opo vakuatesileko ovahepi, kavankhile. Ngotyo, oñgeni Jeova akuatesako ovanthu ovawa? David wahangununa okuti: “Jeova mekupameka tyina ukahi poula nokuvela. Tyotyili ove mopilulula onkhalelo yae aiho tyina avela.” (Oviimbo 41:3) Jeova wii nawa ovaumbili vae vamona ononkhumbi, iya kevelimbwa. Upondola okuveavela ounongo, nomutima wakola. Jeova tupu walinga olutu luomunthu monkhalelo ilekesa okuti lupondola okuveluka aluike.
Omutala Womulavi 9/2017 pefo 14 § 17
Hetekela Okankhenda ka Jeova
17 Namphila okulekesa okankhenda ouwa pala onthue, mahi onkhalelo onkhuavo tulekesila okankhenda omokonda tuhanda okuhetekela Jeova iya nokumuetela omunkhima. Jeova Ondyivi-ndyivi yohole nokankhenda. (Provérbios 14:31) Tupu ongeleka yetu yavilapo. Moluotyo, tuna okulinga atyiho tuvila opo tuhetekele Jeova mokulekesa okankhenda. Matyipameka vali oupanga wetu novakuatate no nomphange, nokukala nawa no vomunthele yetu.— Ova Ngalasiya 6:10; 1 Swau 4:16.
Olumono Lwa Huku
Perspicaz Vol. 2 pefo 49
Siovaa
Ombimbiliya aiho ipopia vala okusukukisa enyina lwa Huku. Otyipuka Siovaa Huku esuka vali natyo, okusukukisa enyina liae. Otyo tyakutikinya okusukukisa enyina liae komatutu aeho vemutendeleya. Tupu ovipuka aviho viokwatungwa tyilinge keulu tyilinge pano pohi, vina okuhilivika enyina olio likola. Otyo tyilekesa okuti ovipuka aviho vina omwenyo, tyilinge pano pohi tyilinge keulu, vina okunoñgonoka okuti Siovaa oe watamo mokutumina nokulingwa onthilo, mahi vina umwe okutyilinga mokonda yokumuhole. Elikwambelo lya Ndaviti lili m’Oviimbo 40:5-10, lipopia umwe nawa okunkhimanekwa kwenyina lya Huku. (Tala etyi apositolu Paulu aviukisa otesito ei y’Oviimbo mu Sesusi Kilisitu m’Ova Hembeleu 10:5-10.)
27 YA KAPEPO ATEE 2 PEPO LINENE
OLUMONO LUKAHI MONDAKA YA HUKU | OVIIMBO 42-44
Pola Ouwa Kondongeso ya Huku
Omutala Womulavi 1/6/2006 pefo 9 § 4
Etyi Tyipopia Omukanda wa vali w’Oviimbo
42:4, 5, 11; 43:3-5. Ine pamwe tukala notyitateka tyimwe atukala ehimbwe tyahai komaliongiyo, okuhinangela ehambu tukala nalio tyina ankho twenda komaliongiyo tyipondola okutupameka. Namphila pamwe tupondola okusoya mokonda yokwahaende komaliongiyo, okusoka kwotyo matyituhinangelesa okuti omu Huku yetu vala tuna okuholama etukukwateseko.
Omutala Womulavi 15/1/2012 pefo 15 § 2
Oityi Una Okulinga Opo Unoñgonoke Umwe Etyi Ukahi Nokulilongesa M’ombimbiliya?
1 ELIKWAMBELO: Otyipuka tyotete una okulinga okulikwambela. (Ovii. 42:8) Omokonda yatyi? Omokonda tyina tuli nokulilongesa ondaka ya Huku ngootyo tukahi nokumufenda. Otyo twesukisila okwiita ku Huku etwavele ononkhono mbae mbutukwateseko okunoñgonoka etyi tukahi nokulilongesa. (Luka 11:13) Barbara omisionaliu, wapopia okuti: “Apeho tyina ndyitanga Ombimbiliya tete nkhele ndyilikwambela. Tyina ndyilinga ngootyo, ndyilitehelela okuti Siovaa uli umwe ponthele yange ya wahambukwa.” Tyina nkhele tulikwambela pokwehenelilongese Ombimbiliya, tyitukwatesako okunoñgonoka etyi matulilongesa atutyilingi umwe.
Omutala Womulavi 9/2016 pefo 6 §§ 11-12
“Wahayendyelese Omaoko Ove”
11 Jeova tupu utupameka nondongeso etuavela momaliongiyo no movionge, no monosikola Mbouhamba. Ondongeso oyo itukuatesako okuumbila Huku monkhalelo yaviuka, nokuovola ovilinga Meongano, nokufuisapo nawa ovilinga ovinyingi tuna meongano. (Oviimbo 119:32) Okuti ukahi nokupamekwa nondongeso itunda ku Jeova?
12 Jeova wakuatesileko ovanthu vae okufinda ova Amalekita nova Etiopia, iya aavela Neemia nova Judeu ononkhono mbo kupindulapo ovimato vio Jerusalei. Tyelifwa notyo, Huku metuavela ononkhono opo tutualako novilinga vietu viokuivisa namphila tusukalala nokuyelwe novanthu ine kavahande okututehelela. (1 Petulu 5:10) Jeova kamalingi omahuviso opo tuhakale novitateka. Mahi tuna okulinga etyi tuvila. Ñgeni? Tuesukisa okutanga Ondaka ya Huku ononthiki ambuho, nokupongiya nokuenda komaliongiyo onosimano ambuho, nokulinga elilongeso lioulike nefendelo lio mbunga nokulikuambela apeho ku Jeova. Tuhayekei natyike tyitupumbiswe ovipuka aviho Jeova etuavela opo vitupameke nokutulunda. Inkha ulitehelela okuti omavoko ove ekahi nokuyendyelela ita opo Huku ekukuateseko. Konyima tala oñgeni ospilitu ya Huku “mayuundapa mokati kove, opo ikuavele ehando, no nonkhono mbo kutyilinga.” (Ova Filipu 2:13) Oñgeni upondola okupameka omavoko avakuenyi?
Olumono Lwa Huku
Perspicaz Vol. 1 pefo 479
Ovimbandye
Movihonekwa, ovimbandye vina etyi viaelekwa natyo. Sombe pokwapopia ononkhumbi ankho ekahi nokumona watile: “Ame pahe nalinga ondenge yovimbandye.” (Som. 30:29) Etyi ovanthu va Huku valwisilwe nonondyale mbavo, Ndaviti pokwasoka ko vimbandye vilia onohitu mbomafwalali okwaipawa movilwa, wapopile okuti: (tala Ovii. 68:23; 44:19) “Ove utumiangaulila apa pakala ovimbandye.” (Ovii. 44:19) Mo 607 P.K.E, etyi omafwalali Ombambilonia eliseta nepunda-umbo lyo Selusalem, ovanthu avaliwilwamo nondyala, avahimbika okutekula onya ovana vavo. Mokonda mokutala na Selemiya wakalelepo, wapopile okuti: “Wotyilongo tyange” vatekula onya ovana vavo ngovimbandye. — Ong. 4:3, 10.
3-9 YA PEPO LINENE
OLUMONO LUKAHI MONDAKA YA HUKU | OVIIMBO 45-47
Otyiimbo Tyotyinepo Tyohamba
Omutala Womulavi 15/2/2014 pefo 10 §§ 8-9
Hambukilwa Otyinepo Tyondyona!
8 Tanga Oviimbo 45:13, 14a. Ondombwa “yefiwa nawa,” itualwa pala otyinepo tyohamba. Momukanda Eholololo 21:2, ondombwa yaelekwa nepunda-umbo, o Jelusalei Omphe. Epunda-umbo olio keulu liliaima “nenkhimano lia Huku” iya “lielifwa nemanya liakolela, lielifwa nemanya litiwa jaspe liliaima ngovitulu.” (Ehol. 21:10, 11) Ouwa wo Jelusalei Omphe wahonekua nawa momukanda w’Eholololo. (Ehol. 21:18-21) Ondombwa oyo, ‘omuwa unene’ ngatyi! Okuti otyo, hatyo tukevelela kotyinepo tyohamba keulu?
9 Ondombwa itualwa Komphunga yayo, Ohamba Mesiya. Ohamba ipongiya ondombwa ‘nokuikoha nomeva ondaka.’ “Yakala osandu nokuhena osilo.” (Efe. 5:26, 27) Ondombwa yae ina okuvala nawa pala otyipito. Iya yavala umwe nawa! “Ovikutu viae viefiwisua noolu,” iya “matualwa kohamba novikutu viatungwa nawa.” Pala otyinepo Tyondyona, “wapeua opo avale omuvalo omungonga, wayela, utunda nawa too, mokonda otyo tyilekesa ovilinga viaviuka vio no sandu.” — Ehol. 19:8.
Omutala Womulavi 5/2022 pefo 17 §§ 10-12
Etyi Omukanda Eholololo Upopia Ouwa Patyi Matyiketuetela Komutwe Wandyila?
10Okuti Siovaa una etyi malingi tyina ovanthu vae vamautukilwa? Siovaa wapopia okuti: “Onyengo yange onene maiteme.” (Isek. 38:18, 21-23) Omukanda Eholololo okapitulu 19 utupopila etyi matyikamoneka-po. Siovaa makatuma Omona Wae, aamene ovanthu Vae konondyale mbavo. Sesusi meya ‘nomafualali o keulu,’ kumwe novo 144.000. (Ehol. 17:14; 19:11-15) Ovilwa ovio mavieta-tyi? Okunyimako ovanthu aveho onondingavivi, nomaongano aeho ankho eyele Siovaa. — Tanga Eholololo 19:19-21.
11 Nkhele soka kehambu ovaumbili va Siovaa mavakakala nalio mokonda yokuahupa kehanyauno lionondyale mba Huku! Matyikakala otyipuka tyimwe tyihambukiswa unene! Namphila keulu makukala ehambu enene tyina Ombambilonia Onene yamahanyuako, mahi pena otyipuka otyikuavo matyikaeta vali ehambu enene. (Ehol. 19:1-3) Otyipuka otyo matyikahambukiswa unene, “otyinepo Tyondyona.” — Ehol. 19:6-9.
12 Onalupi otyinepo otyo matyilingwa? Tyina o Alumagedom nkhele yehenehimbike, aveho vo 144.000 opo veli-ale keulu. Mahi pomuvo opo, hapoko mapalingwa otyinepo Tyondyona. (Tanga Eholololo 21:1, 2.) Otyinepo Tyondyona matyilingwa vala tyina o Alumagedom yalambale iya opo onondyale ambuho mba Huku mbanyimuako-ale. — Ovii. 45:3, 4, 13-17.
Perspicaz Vol. 1 pefo 1099
Ovilwa
Tyina ovilwa ovio viamalambe, Ohi maikakala nombembwa omanima mili. Omukanda Oviimbo upopia okuti: “[Siovaa] ukahi nokumana-ko ovilwa kombanda yohi aiho. Uteya onkhondyi, ateya-teya eonga, uyoka omatemba ovakwa-vita notupia.” Omukanda oo tete wafwisilwepo etyi Huku ahanyako onondyale mbova Isilayeli, pahe avakala umwe nombembwa. Tyina Sesusi Kilisitu amahanyeko ovanthu vana vokweeta-ko ovilwa, Ohi pahe maikala umwe nombembwa. (Ovii. 46:8-10) Ovanthu mavakakala nomweenyo wahapu, ovo vana vala ‘mavakanthila omitunga viavo avikala omatemo, omaonga avo, avekeenthila onotisola mbokulombolola omiti, vahakalongeswa vali okulwa.’ “Mokonda o Siovaa womambamba ovita wetyipopia.” — Isa. 2:4; Mik. 4:3, 4.
Olumono Lwa Huku
Omutala Womulavi 4/2017 pefo 12-13 § 9
Ovipuka Patyi Vihamakalako Vali Tyina Ouhamba wa Huku Wameya?
9 Oityi matyikapinga pomaongano omouye? Konyima yo Armagedom, okuti makuhupu eongano limwe kombanda yohi? Ombimbiliya yati: “Kuna eulu epe noohi omphe tukahi nokukevelela ngetyi Huku alaa, muna mamukakala ouviuki.” (2 Petulu 3:13) Eulu ekulu nohi vilekesa ovatumini vomouye novanthu vatumina. Tyina eulu ekulu liamapu, oityi matyipingipo? “Eulu epe nohi omphe.” Eulu epe tyilekesa outumini omupe Wouhamba wa Huku mautuminwa na Jesus Kristu novo 144.000. Ohi omphe tyilekesa ovanthu mavakatuminwa Nouhamba wa Huku. Jesus no 144.000 mavahetekela nawa-nawa Jeova Huku, Huku waongana. (1 Ova Kolindu 14:33) Otyo tyilekesa okuti “ohi omphe” maiyonganekwa. Mamukakala ovalume opo vaonganeke ovipuka. (Oviimbo 45:16) Ovalume ovo mavakahongolelwa na Kristu novo 144.000. Soka komuvo oo, tyina omaongano aeho omouye maapinguako neongano like vala, eongano lihamamonesa ononkhumbi ovanthu!
10-16 YA PEPO LINENE
OLUMONO LUKAHI MONDAKA YA HUKU | OVIIMBO 48-50
Vohe Yovana — Kwateseiko Ovana Vayumbe Onthumbi Meongano lya Siovaa
Omutala Womulavi 3/2022 pefo 22 § 11
Efendelo Liotyotyili Malikukuatesako Okukala Nehambu
11 Tufenda Siovaa tyina tulilongesa Ondaka yae, na tyina tuiilongesa ovana vetu. Otyasapalo ankho tyikuatesako ova Isilayeli okuyekapo ovilinga viavo vya nthiki-na-nthiki, avakala vala nomuvo wokupameka oupanga wavo na Siovaa. (Oku. 31:16, 17) Ovohe ankho valongesa ovana vavo ovitumino vya Siovaa, tupu ankho vevelongesa ovipuka oviwa Huku evelingila. Hono, nonthwe tuovola omuvo wokutanga nokulilongesa Ondaka ya Huku. Otyo tyilinga onthele yefendelo tulingila Siovaa, iya tyitukuatesako okukala noupanga wapama nae. (Ovii. 73:28) Iya tyina tulilongesa Ondaka ya Huku mombunga, otyo tyikuatesako ovana vetu okukala noupanga wapama na Tate yetu wokeulu Siovaa. — Tanga Oviimbo 48:13.
Omutala Womulavi 15/3/2011 pefo 19 §§ 5-7
Ove una Ovipuka Ovinyingi Vikuhambukiswa
“Talei nawa onondondelo mbatyo. Talei nawa ovimato viatyo viokwapama. Opo haa mutyivile okutyihipululila ava mavekeya komutwe wandyila.” (Ovii. 48:12, 13) Omwiimbi ou pokwapopia onondaka ombu, ankho ukahi nokwavela ondundo Ova Isilayeli opo vatale umwe nawa ondywo ya Huku mo Selusale. Pahe Soka oñgeni ankho ova Isilayeli novana vavo vakala tyina ankho venda ko Selusalei vakalinga ovipito vilingwa like menima, otyo vatala ondywo ya Huku yehiwa nawa! Otyipuka otyo ankho tyivehambukiswa, ‘nokutyihipululila ava mavekeya komutwe wandyila,’ pahe opo katyikevepwiyale vali.
Pahe soka konkhai-hamba yo ko Sambaa, potete nkhele ankho yehetavelele omukhima wa Salomau. Omokonda yatyi konyima pahe yetavelele? Ngwe yapopia okuti: “Netavela vala ku etyi neiva, etyi neya, andyilitalela-ko nomaiho ange mwene.” (2 Ehi. 9:6) Naina, ovipuka onthwe tutala ‘nomaiho etu mwene’ vipondola okutuhika komutima.
Oityi ovohe vena okulinga vakwateseko ovana vavo okutala ovipuka Eongano lya Siovaa lilinga ‘nomaiho avo mwene?’ Ine apa mukala pena Ombetele, twaleiko ovana venyi. Ovo Mandy na Bethany, ankho vakala katutu kokule Nombetele yopotyilongo tyavo, mahi apeho ankho ovo tate yavo valinga ononkhono opo vevetwale Mombetele, haunene umwe pweeetyi ovana. Vapopia okuti: “Etyi tweheneende Kombetele ankho tusoka okuti Ombetele omphangu imwe ipwiya okukala, mukala vala onombwale. Mahi etyi pahe twayako atuvasiko ovakwendye vaundapela unene Siovaa, ya vahambukwa okukala Mombetele. Atulimonena-ko umwe okuti Eongano lya Siovaa hapapako vala tukala. Apeho tyina ankho tweenda Kombetele tuhambukwa unene.” Mokonda ovo Mandy na Bethany vatala umwe nomaiho avo etyi Eongano lya Siovaa lilinga, avelipake umwe movilinga vya Huku avakala ovakokoli-ndyila, konyima pahe ovakongwa vakaundape onohanyi mbumwe Mombetele.
Omutala Womulavi 1/8/2012 pefo 19 § 5
Tyindei Omuenyo Ulekesa Okuti Muvatyitua Tyilongo Vouhamba!
5 Okulilongesa ehipululo. Omunthu uhanda okukala omunatyilongo, una okulilongesa omahipululo amwe konthele yovatumini votyilongo otyo. Tupu, vana vahanda okukala ovanatyilongo Vouhamba, vesukisa okulilongesa atyiho konthele Youhamba wa Huku. Tala ongeleka yovana va Koraa, ankho vaundapa momphangu yefendelo mo Isilayeli kohale. Ankho vehole o Jelusalei, nomphangu yefendelo nokupopia konthele yomahipululo epundaumbo, ha mokonda vala ankho ongwa, mahi omokonda ankho “epundaumbo lio Hamba omunene,” Jeova. Ankho omo mulongesilwa Ovitumino via Jeova. Vana vatuminwa Nohamba yo Jelusalei ankho ovanthu vapandwa nokuholwe na Jeova. (Tanga Oviimbo 48:1, 2, 9, 12, 13.) Ngovana va Koraa, nove uhanda okulilongesa, nokuhipulula konthele yeongano lia Jeova likahi pano pohi? Tyina ulilongesa vali konthele yeongano lia Huku, noñgeni Jeova avatela ovanthu vae, Ouhamba wa Huku maukala vali wotyotyili kuove. Ehando liove liokuivisa onondaka onongwa Mbouhamba maliliyawisa vali. — Selemiya 9:24; Luka 4:43.
Olumono Lwa Huku
Perspicaz Vol. 2 pefo 858
Omalumono
Ova Isilayeli ankho vapondola okulia ovikuna viavo, nokunwa, (1 Oha. 4:20; Omup. 5:18, 19) ya tupu ovipako viavo ankho vivekwatesako tyina vena ovitateka. (Omih. 10:15; Omup. 7:12) Namphila Siovaa evepopile okuti vena okulia nokunwa nokuhambukilwa ovilinga viavo, (tyeeleka Omih. 6:6-11; 20:13; 24:33, 34) mahi tupu wevepopile okuti ine vayumba unene onthumbi momalomono avo, matyiveetela ovitateka. (Epal. 8:7-17; Ovii. 49:6-9; Omih. 11:4; 18:10, 11; Sele. 9:23, 24) Wevepopilile okuti omalumo kaasete okupwa, (Omih. 23:4, 5) kaapondola okuyovola omunthu kononkhia, (Ovii. 49:6, 7) ya tupu tyina omunthu amankhi omalumono ae weesapo. (Ovii. 49:16, 17; Omup. 5:15) Vapopililwe okuti okuhumba unene omalumono tyipondola okuvelingisisa okulinga vala ovipuka ovivi, avanumanesa Siovaa. (Omih. 28:20; Tyeeleka na Sele. 5:26-28; 17:9-11.) Tupu vapopililwe okuti vena ‘okuhilivika Siovaa neevi vena-vio oviwa.’ — Omih. 3:9.
17-23 YA PEPO LINENE
OLUMONO LUKAHI MONDAKA YA HUKU | OVIIMBO 51-53
Viukisa Ovipuka Wahalinge Etyi Tyapenga
Omutala Womulavi 1/2019 pefo 15 § 4-5
Oñgeni Upondola Okuyakulila Omutima Wove?
4 Momukanda Omihe 4:23, ondaka “omutima” ipopia etyi tyikahi “mokati komunthu.” (Tanga Oviimbo 51:6 nokatoi.) Ondaka oyo ihangununa omalusoke, nonkhalelo tulitehelela, nomokonda yatyi tulingila ovipuka iya nomahando etu. Omutima onkhalelo tuatuwa mokati, hatyetyi vakuetu vamona kondye.
5 Tala oñgeni ekongoko lietu lilekesa omokonda yatyi tyakolela okuyunga etyi tyikahi momutima. Tete, opo tutualeko nekongoko ewa, tuna okuholovona nawa etyi matuli, nokuhataika apeho. Tupu, opo tutualeko noupanga wapama na Huku, apeho tuna okutanga Ombimbiliya, nomikanda vietu, nokulekesa apeho okuti tuna ekolelo mu Siovaa. Matulekesa okuti tuna ekolelo tyina tuendela muetyi tulilongesa, nokupopila vakuetu etyi tuanoñgonoka. (Loma 10:8-10; Tia. 2:26) Vali, tupondola okulitala iya atusoko okuti tuna ekongoko, mahi naina mokati tuna ouvela. Tyelifwa notyo, tupondola okutala kovipuka tulinga movilinga vya Huku atusoko okuti tuna ekolelo liapama, mahi naina omahando omavi ekahi nokukulila momutima wetu. (1 Kol. 10:12; Tia. 1:14, 15) Tuna okuhinangela okuti Satanasi uhanda okutunyona nomalusoke ae. Oñgeni aovola okutyilinga? Iya oñgeni tupondola okuliyakulila?
Omutala Womulavi 15/6/2015 pefo 15 § 5-6
Tupondola Okutualako Tyasukuka
5 Jeova metukuatesako okuluisa omahando omavi putyina tutualako okuita melikuambelo opo etukuateseko. Jeova utuavela ospilitu sandu itukuatesako okutualako tyasukuka. Momalikuambelo etu, tupondola okupopila Jeova okuti tuhanda okukala nomalusoke emuhambukiswa. (Oviimbo 19:14) Nokueliola omutima tumuita opo atale momutima wetu inkha muna omahando omavi apondola okutulingisa onkhali. (Oviimbo 139:23, 24) Tualako okuita Jeova ekukuatesako okulityilika oundalelapo nokulinga etyi tyaviuka alo umwe tyina tyahapepukile. — Mateusi 6:13.
6 Etyi tuhenelilongese konthele ya Jeova, ankho tulinga ovipuka eyele, iya pahe hamwe tukahi nokulwa nomahando oo omavi. Mahi Jeova upondola okutukuatesako okupiluluka nokulinga etyi tyimuhambukiswa. Mongeleka, konyima yetyi Ohamba David alinga oundalelapo na Bateseba, elivele iya aiti Jeova emuavele “omutima wasukuka” nokumukuatesako okukala omutaveli. (Oviimbo 51:10, 12) Ngotyo inkha tukahi nokulwa nomahando okulinga oundalelapo, Jeova upondola okutukuatesako okukala nehando liokumutavela nokulinga etyi tyaviuka. Jeova upondola okutukuatesako okulityilika omalusoke etu oukuankhali. — Oviimbo 119:133.
Olumono Lwa Huku
Perspicaz Vol. 1 pefo 719
Ndowenge
Ndowenge ankho Omu Endoo umwe ulisa ovipako vio hamba Saulu, oe ankho omululiki wovanthita va Saulu. (1 Sam. 21:7; 22:9) Ndowenge Ankho welipakula ku Siovaa. Mokonda ankho “kapondola okutunda kotyipala tya Siovaa” ko Nombe, tyipondola hamwe omokonda yomphango imwe alinga, ine hamwe una kotyitumino tyimwe aliatela, etyimono tyina omunakwa Aimeleke aavela onombolo mbukola Ndaviti, nomutunga wa Ngoliya. Konyima etyi pahe Saulu akapopia novaundapi vae evepopila okuti kavakalele ovakwatyili kwee, Ndowenge apopila Saulu etyi amona ko Nombe. Saulu atumu okwihana Aimeleke novanakwa aveho voko Nombe, apopila ovaundapi vae opo veveipae mahi ovaundapi vae avehetavela. Ndowenge etavela umwe okwiipaa ovanakwa vena 85. Konyima pahe ahanyepo umwe epunda-umbo aliho liono Nombe, okuti umwe ovalume novakai, novana nomalukembe, nonongombe, novimbulu, nonongi. — 1 Sam. 22:6-20.
Ngeetyi tyilekesa onondaka mbokonthyimbi yomukanda Oviimbo 52, Ndaviti wapopia konthele ya Ndowenge okuti: “Elaka liove lialipikwa ngonkhiki yokukulula, lipanga okulinga ovivi tupu likemba. Ove uhole vali ovivi tyipona otyiwa. Kwoove hahe vali okukemba tyipona okupopia otyili. Ove uhole onondaka ambuho mbokunyona, ove welaka liokukemba!” — Ovii. 52:2-4.
24-30 YA PEPO LINENE
OLUMONO LUKAHI MONDAKA YA HUKU | OVIIMBO 54-56
Huku Una Ove
Omutala Womulavi 1/8/2006 pefo 22-23 §§ 10-11
Kala Omunongo Mokutila Owoma Huku
10 Onthiki imwe Ndaviti wakahatekele nokotyilongo tya Akisi, ohamba yo Ngate, oku ankho kukala Ngoliya. (1 Sam. 21:10-15) Ovaundapi vohamba avemupopila okuti Ndaviti ondyale yetu. Oityi Ndaviti alingile? Welikwambelele ku Siovaa. (Ovii. 56:1-4, 11-13) Namphila Ndaviti elilingisa ngotyova opo eliyovole, mahi wetyimwene okuti wetyivila tupu okuyovoka o Siovaa wemukwatesako. Mokonda Ndaviti wayumbile onthumbi mu Siovaa nomutima auho, alekesa umwe okuti una onthilo na Huku. — Ovii. 34:4-6, 9-11.
11 Nga Ndaviti, Noonthwe matulekesa vala okuti tuna owoma na Huku tyina tumuyumba onthumbi mweetyi apopia okuti metukwatesako okulambela movitateka tukala navio. Ndaviti wapopia okuti: “Ondyila yove ipakula ku Siovaa. Yumba onthumbi mwe ngwe mekukwatesako.” (Ovii. 37:5) Mahi otyo katyilekesa okuti pahe tuna vala okukevelela ku Siovaa tyelikwata omukondo. Ndaviti kelikwambelele vala ku Huku ahalingi natyike. Ngwe walingile umwe tyimwe opo Siovaa emukwateseko. Ndaviti ankho utyii okuti kapondola vala okuyumba onthumbi mokukwateswako novanthu. Noonthwe otyo tuna kulinga ngootyo. Tyina twamalingi umwe atyiho tuvila, pahe opo tuna vala okuyekela otyitateka tyetu pomaoko a Siovaa. Mahi pamwe ovitateka vimwe tukala navio kamatuvivili umwe, tuna umwe vala okuviyekela pomaoko a Siovaa. Otyo tyilekesa okuti okutila owoma Siovaa tyitei komunthu na munthu. Onondaka Ndaviti apopia mbokwati: “Vena oupanga omunene na Siovaa, ovo vana vemutila owoma,” mbutupameka unene. — Oviimbo 25:14.
Achegue-se a Jeová pefo 243 § 9
“Petupu-ale etyi Tyityivila Okutuhondovola Kolwembia lwa Huku”
9 Siovaa upanda unene ononkhono tulinga mbokukoleleya. (Mat. 24:13) Hinangela okuti etyi Satanasi esuka natyo okuti ñgeno uyeka-po Siovaa. Naina kese nthiki ukakatala mu Huku, opo ngootyo ukahi nokukwatesako Siovaa okukumbulula omatutu a Satanasi. (Omih. 27:11) Mahi okukakatela mu Huku, hapeho tyapepuka, mokonda yonombela, noluhepo, novitateka ovikwavo vali. Otyipuka otyikwavo tyipondola okutwihamesa omutima okutala okuti evi twapangaile okulinga katwevilingile. (Omih. 13:12) Tyina tukoleleya umwe atwahayekepo Siovaa, ngwe uhambukwa okutala ononkhono tulinga mbokukoleleya. Otyo Ndaviti aitile ku Huku opo aholeke ononkhuka mbae “monthenda yombandwa.” Tupu ati vali: “Okuti kambahonekelwe momukanda wove?” (Ovii. 56:8) Naina Siovaa uhambukwa unene tyina atala ononkhono tulinga opo tumuhambukiswe.
Omutala Womulavi 6/2022 pefo 18 §§ 16-17
Oluembia Lutukuatesako Okufinda Owoma
16 Satanasi utyii okuti onthue tuhole omuenyo wetu. Mahi ngwe wapopia okuti ovanthu vapondola okuyekapo etyi vena opo vahupe, atee umwe vapondola okuyekapo okufenda Siovaa. (Som. 2:4, 5) Mahi otyipuka otyo Satanasi apopia omatutu. Mokonda Satanasi oe una ounongo wokueta ononkhia, oe ukuatelela mowoma tuna nononkhia opo etuyondye iya etuyapula ku Siovaa. (Hemb. 2:14, 15) Pamwe Satanasi uhongiliya ovanthu opo vapopie okuti ine tufenda Siovaa mavetuipa. Tupu pamwe tyina tuvela Satanasi omo aendelela, pahe onondotolo no vamwe mombunga yetu avetukuluminya tupakwe ohonde, otyipuka Siovaa eyele. Iya tupu pamwe vetukuluminya umwe vala opo tukahakulwe kovimbanda.
17 Namphila onthue tuhahande okunkhia, mahi tutyii okuti Siovaa kametuyekepo atee umwe tyina tuamankhi. (Tanga Ova Loma 8:37-39.) Tyina omunthu epanga lya Siovaa, atee umwe tyina ankhia Siovaa kemulimbwa, kwe ongatyina umwe vala ena omuenyo. (Luka 20:37, 38) Vokuankhia Siovaa mekevekondola vali komuenyo. (Som. 14:15) Siovaa unale etyii afeta opo tukakaleko nomuenyo uhapu (Swau 3:16) Tutyii okuti Siovaa utuhole unene iya ututekula nawa. Ngotyo tyina tuamahongwa, natyina tuavela unene, onthue tuyumba onthumbi mu Siovaa iya atumuiti ounongo. Otyo, otyo umwe Valérie nomulume wae valingile. — Ovii. 41:3.
Olumono Lwa Huku
Perspicaz Vol. 2 pefo 708
Okutala etyi matyimoneka komutwe
Etyi Sunda Isikaliyote alingile tyokweenda konyima Sesusi, tyafwisilepo amaulo Ombimbiliya tupu tyalekesa okuti ovo Siovaa na Sesusi, vetyivila umwe okutala ovipuka maviya komutwe. (Ovii. 41:9; 55:12, 13; 109:8; Ovil. 1:16-20) Mahi hakuti Siovaa ovipuka ngavikaenda ngootyo oe wevilulikile, mokonda Omaulo Ombimbiliya apopile vala okuti umwe pomapanga a Sesusi mekemweenda konyima, mahi kaapopile olie omunthu oo. Ine Huku wapopile evi Sunda malingi, opo ñgeno tyapotakana-po ovitumino viae. Apositolo Paulo wapopile okuti: “Wahalumbane oyambeka liwa omavoko komunthu; wehelipake mononkhali mba vakwenyi; ove kala tyasukuka.” (1 Tim. 5:22; Tyeeleka no 3:6.) Mokonda Sesusi ankho wahanda umwe okukoya nawa ava mavakala ovatumwa 12, akala otyinthiki atyiho tyilikwambela ku tate yae. (Luka 6:12-16) Inkha ankho Sunda wiiwale okuti oe maende konyima Sesusi, opo otyo katyelikwatele nononkhono mba Huku, mokonda ine ankho Huku utyiiyale okuti Sunda oe matyitukilapo Sesusi opo onkhali yalinga Sunda nae weilinga.
Naina etyi Sunda akoywa akale omutumwa, ankho nkhele omunthu ukahi nawa. Sunda wayeka momutima wae ‘mutumbe omwii una oukola’ otyo atyimulingisisa ahapunge, ehetavela vali etyi Huku ahanda, mahi ahulu kokutavela k’Eliapu, aloo ekehika kokuvaka nokweenda konyima Sesusi. (Hemb. 12:14, 15; Swau 13:2; Ovil. 1:24, 25; Tia. 1:14, 15; veja JUDAS N.º 4.) Mokonda pahe ankho tyimoneka-le nawa, Sesusi utyivila okutala komutima, apopi okuti mekemweenda konyima. — Swau 13:10, 11.