Omikanda Viokulilongesa Omukanda Wovilinga Omwenyo Wetu Woukilisitau
© 2024 Watch Tower Bible and Tract Society of Pennsylvania
1-7 YA KAKWENYE
OLUMONO LUKAHI MONDAKA YA HUKU | OVIIMBO 57-59
Omphango Yokulwisa Ovanthu Vae Siovaa Wiityopola
Omukanda Ava Oumbangi, pefo 252 §§ 14-15
“Atee Konohika Mbokokule-kule Kombanda Yohi”
14 Etyi Sitevau eheneipawe, wetyivilile okupopia ondaka ya Huku tyakola omutima, tyehena owoma. (Ovil. 6:5; 7:54-60) Pweetyi ovalanduli va Kilisitu ankho vekahi nokuhukaiswa unene, aveliyandyana mo Sundeya no mo Samaliya, ovatumwa vala vesalele mo Selusalei. Mahi otyo katyatalamekele ovilinga viokwivisa. Filipi waile ko Samaliya, “ahimbika okupopila ovanthu Kilisitu,” ovanthu ovanyingi avetavela. (Ovil. 8:1-8, 14, 15, 25) Tupu Ombimbiliya ipopia okuti: “Vana pahe vokwelihanyaukile vala kombanda yokuhukaiswa, tyakatukile umwe pu Sitevau, avaende umwe, atyiti ava vaya no ko Fenisia, ava vaya no ko Sipele, no ko Andiokiya, mahi ankho ondaka veipopila vala ova Sundaa. Mahi vamwe ankho vatunda ko Sipele no vo ko Silene aveya ko Andiokiya, avahimbika okupopila vokupopia elaka lyo Ngeleku, avaivisa oviwa ovipe vipopia Tatekulu Sesusi.” (Ovil. 11:19, 20) Pomuvo pana, etyi ovalanduli va Kilisitu vahahaneswa movilongo, oviwa ovipe navio pahe avihahana umwe.
15 Otyipuka otyo mononthiki mbuno tyalingilwe ko União Soviética. Momanima 1950, Onombangi mba Siovaa ovanyingi vakwatelwe avatwalwa ko Siberia. Pokwatwalwa no mo Siberia, atyiti ou watwalwa nooku ou watwalwa nooku. Otyipuka otyo valinga atyikwatesako okuyandyanesa oviwa ovipe Viouhamba, mokonda ankho Onombangi mba Siovaa ovanyingi ñgeno ankho kavetyivilile okuhika kovilongo ovio viokokule, ngwe otyo ankho paendwa onokilometulu 10.000. Mahi ovatumini avevetwala kovilongo oko. Omukulu umwe Ombangi ya Siovaa wati: “Otyipuka otyo tyalingile ovatumini atyikwatesako umwe ovanthu voko Siberia avanoñgonoka otyili.”
Olumono Lwa Huku
Omutala Womulavi 7/2023 pefo 18-19 §§ 16-17
“Kalei Tyapama, Amuhatengatenga”
16 Pameka omutima. Ohamba Ndaviti watile kamayeke-po onthyole ena Siovaa. Waimbile ati: “Huku yange omutima wange wapama.” (Ovii. 57:7) Noonthwe matukala vala nomutima wapama tyina tuyumba umwe vala onthumbi mu Siovaa. (Tanga Oviimbo 112:7.) Tala vala etyi tyapopile Bob twapopia-le konyima oku. Wati etyi onondotolo mbemuti pena vala okukala ohonde hamwe haa matusuku nayo pokukupelala, ngwe eveti ine naina mamuhande okumphaka ohonde opo muno mandyitundu-mo umwe pehepano ñgana. Konyima oku pahe Bob ati: “Ame mwene ankho ndyityii umwe nawa etyi nahanda okulinga, nii vala ankho hatilile-ale owoma.”
17 Bob wetyivila vala okwaenyena mweei apopia ahatundu, mokonda mwene ankho wetyisoka-le pweetyi eheneende kosipitali. Tete, ankho wahanda okulinga etyi tyihambukiswa Siovaa. Vali, welilongesile umwe nawa etyi Ombimbiliya ipopia, neetyi omikanda vietu vipopia tyiyemba kokuti omwenyo ukola, nohonde ikola. Tatu, ankho utyii umwe okuti okulandula vala etyi Siovaa apopia oe vala upola-ko ouwa. Noonthwe tupondola umwe okupama omutima movitateka aviho vitutumbukila.
8-14 YA KAKWENYE
OLUMONO LUKAHI MONDAKA YA HUKU | OVIIMBO 60-62
Siovaa Utwaamena, Utuyakulila, Utupaka Apa Pakola
Perspicaz Vol. 2 pefo 1143 § 3
OTYIMATO
Tyina tyipopia otyikwavo. Ava vayumba onthumbi mu Siovaa nokumutavela, uveyakulila. Ndaviti waimba okuti: “Ove ove tyiholamo tyange, ove ove etala lindyakulila konondyale.” (Ovii. 61:3) Vana vanoñgonoka etyi tyihangununa enyina lya Siovaa, vayumba umwe onthumbi menyina olio,tupu veliyakulila, vetupu etyi tyivetilisa owoma, mokonda “enyina lya Siovaa otyimato tyapama. Wokulinga oviwa omo ahateka namo, ngamo ahupila”. — Omih. 18:10; tyeeleka na 1Sa 17:45-47.
Perspicaz Vol. 2 pefo 1106 § 1
Ohinge
Pamwe tupu ondaka “ohinge” ipopia otyipuka otyikwavo. Ohinge yomunthu, ankho ondwo yae, omo alangala-po nokupululukwapo. (Ehim. 18:1) Mokonda ankho kohale tyakaka unene okutambula ovaenda, ovanthu ankho vena onthumbi yokuti mavatambulwa nawa tyina vamaende mohinge yomunthu umwe. Omukanda Eholololo 7:15 upopia okuti Huku‘makahandulila ohinge yae, ovanthu ovanyingi-nyingi,’ tyilekesa okuti mekevetambula nawa ekeveyakulila. (Ovii. 61:3, 4) Isaiya wapopia etyi omukai wa Huku, Siyau, ena okulingila ovana makakutula. Omukai oo watiwa: ‘Yawisa kohika yekaka liove’. (Isa. 54:2) Otyo tyilekesa okuti omukai oo, uhandula vali ohika yekaka liae ayakulile ovana vae.
Omutala Womulavi 15/4/2002 pefo 16 § 14
Ovitumino Vya Huku Opala Ouwa Wetu
14 Tyihambukiswa okunoñgonoka okuti ovitumino vya Huku kavipiluluka. Mononthiki mbuno mbepwiya unene, Siovaa omphunda yapama ilikwale tundee kohale. (Oviimbo 90:2) Ngwe welipopia okuti: “Ame, ame Siovaa; hipiluluka.” (Malakiya 3:6) Ovitumino vya Huku tuvasa mondaka yae Ombimbiliya vayumbwa onthumbi — kavielifwile noviovanthu vipilauluka vala. (Tiaku 1:17) Tyimwe tyityilekesa umwe nawa otyetyi: Omanima amwe konyima oku, vokwatanga unene vapakeleko ovitumino vipopia etyi tyina okutekulwa ovana, mahi pahe ovitumino ovio mwene navo vetyimona okuti kavikahi nawa, vapopia okuti vapengesa etyi vakapako ovitumino ovio. Tyina ovanthu vomouye vapakako ovitumino vipopia etyi tyitekulwa ovana vevipilaulula vala. Mahi Ondaka ya Siovaa kaipiluluka. Ombimbiliya yapopiale kohale etyi tyina okutekulwa ovana. Apositulu Paulu wahoneka okuti: “Onwe vokuna ovana, mwahanumanesei ovana venyi, mahi onwe apeho velongei onondunge, velongesei tya Siovaa.” (Ova Efesu 6:4) Tyihambukiswa okunoñgonoka okuti tuna umwe okuyumba onthumbi movitumino vya Huku mokonda kavipiluluka!
Olumono Lwa Huku
Omutala Womulavi 1/6/2006 pefo 11 § 6
Etyi Tyipopia Omukanda wa vali w’Oviimbo
62:11. Huku opo akale nonokhono ketei kotyipuka natyike. Mokonda oe ondyivindyivi yononkhono. ‘Ononkhono o kwe mbutuka.’
15-21 YA KAKWENYE
OLUMONO LUKAHI MONDAKA YA HUKU | OVIIMBO 63-65
“Olwembia Lwove Olunene Lupona Pomwenyo”
Omutala Womulavi 15/10/2001 pefo 15-16 §§ 17-18
Olie Metuyapula Kolwembia lwa Huku?
17 Oñgeni ove utala olwembia lwa Huku? Ulutala umwe ngeetyi Ndaviti ankho elutala? Ndaviti wahoneka okuti: “Mokonda olwembia lwove olunene lupona pomwenyo, omilungu viange mavikuhilivika. Mandyikuhivilika mokweenda kwomwenyo wange auho. Mandyiyelula omavoko ange mokonda yenyina liove.” (Oviimbo 63:3, 4) Okuti mouye uno, muna otyipuka tyesukisa vali tyipona okukala noupanga na Huku? Okuti okukala nomalumono tyikahi vali nawa tyipona okukala nomutima umphumphi nehambu lituka kokukala noupanga na Siovaa? (Luka 12:15) Vamwe tufenda navo, vehikile umwe kokwipawa tyipona okuyeka-po Siovaa. Otyipuka otyo, tyaendele Nonombangi mba Siovaa vapakelwe motyipembe tyononkhwatwa tyo nazistas Movilwa Vya Vali Viouye Auho. Ovakwatate ovo vahulile umwe vala ku Siovaa avehemuyekepo namphila ankho vapondola umwe okwiipaelwa-po. Vana vayumba onthumbi mu Siovaa vapondola okukala nonthumbi yokuti mavakapewa omwenyo wahapu, otyipuka ouye wehevili okupa ovanthu. (Maluku 8:34-36) Mahi hatyo vala tyitulingisa okufenda Huku.
18 Namphila tyehetavela okukala-ko apeho tyehena Siovaa, mahi nkhele soka vala ñgeno tuna omwenyo wahapu tyehena Omutungi wetu. Ñgeno nii vala kausilivila. Siovaa wavela ovanthu vae otyilinga tyimwe otyiwa vena okulinga mononthiki mbuno mbehulililako. Tuna umwe okukala nonthumbi yokuti tyina Siovaa, Wokufwisapo Apeho etyi Apopia, amakapa ovanthu omwenyo wahapu, mavakahambukwa unene, avatwalako okulongesiwa nae. (Omupopi 3:11) Katyesukisile omanima eñgapi matukakalako, nii vala kamatukanoñgokale “ouhona waya kohi wa Huku, nounongo wae, nenoñgonoko liae liaya kohi!” — Ova Loma 11:33.
Omutala Womulavi 12/2019 pefo 28 § 4
“Pandulei Movipuka Aviho”
Haunene tuesukisa okupandula Huku. Tutyii okuti pamwe usoka kovipuka ovinyingi Huku ekuavela, ngetyi omikanda, nokulia, nomuvalo, novikuavo vali. (Deut. 8:17, 18; Ovil. 14:17) Mahi katyituuka vala okusoka kovipuka ovio. Tupu tuesukisa okutaindya omuvo wokusokolola konkhalelo Siovaa ehole okutuyamba kumwe na vana tuhole. Inkha usokolola kovipuka oviwa Omutungi wetu ehole okukuavela, momupandula nomutima auho iya mopameka onthumbi yove yokuti tyotyili Siovaa ukuhole unene. — 1 Swau 4:9.
Omutala Womulavi 15/10/2015 pefo 22-23 § 7
Tualako Okusokolola Kovipuka Via Huku
7 Tyesukisa okulinga ononkhono opo usokolole nokutala vala kuetyi ukahi nokutanga. Ngotyo, hatyiwa okusokolola putyina waponua natyina uli pomphangu paviela pena ovipuka ovinyingi vipondola okututalula. David omuhoneki wono salmu ankho tyina amapahukapo kounthiki usokolola. (Salmo 63:6) Namphila ankho Jesus hamukuankhali, mahi ankho uholovona omphangu yahaviele opo asokolole nokulikuambela. — Luka 6:12.
Omutala Womulavi 15/7/2009 pefo 16 § 6
Hetekela Sesusi — Longesa Nolwembia
6 Onthwe tutyihole tyokupopia ovipuka tuhole. Tyina tupopia otyipuka tyimwe twasoka okulinga, tutyipopia tyahambukwa, tyilimemetela okuyola, atutyihiviswa nawa. Tupu tulinga ngootyo tyina tupopia omunthu umwe tuhole. Pamwe tuhanda umwe okupopila vakwetu ovipuka viwa omunthu oo alinga. Ngwe tumupandula umwe motyipuka otyo alinga, ya ine pena ou umupopia atumwamena. Tulinga ngootyo mokonda twahanda vakwetu vemumone okuti ukahi nawa.
Olumono Lwa Huku
Omutala Womulavi 15/11/2007 pefo 15 § 6
Ove Uhambukiswa Vakwenyi?
Tyipepuka vali okuteya-po ondywo tyipona okwitunga. Otyipuka otyo tyokutunga nokuhanya tupu tutyeeleka nomatompho tukala nao na vakwetu. Mokonda tuvakwankhali atuho pamwe tupengesa. Ohamba Salomau wati: “Kombanda yohi kutupu omunthu nawike uviukisa, ulinga vala etyi tyaviuka, wahalingi onkhali.” (Omupopi 7:20) Tyapepuka unene okumona ovipuka ovivi vakwetu valinga, atuvepolopo vala omapita. (Oviimbo 64:2-4) Mahi pala okukala netompho likahi nawa lipameka, tyesukisa ounongo.
22-28 YA KAKWENYE
OLUMONO LUKAHI MONDAKA YA HUKU | OVIIMBO 66-68
Siovaa Apeho Ututyindisako Omutengi Wetu
Omutala Womulavi 5/2023 pefo 12 § 15
Oñgeni Siovaa Akumbulula Omalikwambelo Etu?
15 Siovaa kalingi omaelema pokukumbulula omalikwambelo etu. Mahi omu eekumbululila tyipondola umwe okutukwatesako atwahayeke-po okumufenda. Naina, apeho tala oñgeni Siovaa akumbulula omalikwambelo ove. Omuhikwena umwe utiwa o Yoko, ankho usoka okuti Siovaa keya-le nokukumbulula omalikwambelo ae. Pahe ahimbika okuhoneka ovipuka aviho aita ku Siovaa. Etyi pakala, atale povipuka ahonaikile, tyina akati ñgana ovinyingi puvio Siovaa wevikumbulula-le, na vina umwe ankho alimbwa-le. Naina otyiwa pamwe tutie atukala atusoko oñgeni Siovaa ekahi nokukumbulula omalikwambelo etu. — Ovii. 66:19, 20.
Omutala Womulavi 1/12/2010 pefo 23 § 6
Suka Novokutekula Ovana Aveke
Siovaa oe watuma okuhoneka omukanda Oviimbo, ova Isilayeli ankho vaimba pokumufenda. Soka kehambu ovahepe nonosona ova Isilayeli ankho vakala nalio tyina vaimba onondaka ombo, ankho mbuvehinangelesa umwe okuti Siovaa o “tate yavo” ya “omukoyesi wavo,” otyo ankho tyivepameka umwe. (Oviimbo 68:5; 146:9) Noonthwe tupondola okupameka vana vatekula aveke ovana. Ngwe vapondola okuhinangaila onondaka twevepopila. Apa Ruth apopilwa nomukulu umwe una ovana okuti “ ove ukahi nokutekula nawa ovana vove, twalako okulinga ngootyo,” palambale omanima 20, mahi na hono nkhele utyihinangela. Ruth wati: “Onondaka mbuna mbamphamekele umwe unene.” Ombimbiliya yati: “Elaka liahiliya, omuti upa ovanthu omwenyo.” Naina onondaka mbukahi nawa mbupameka umwe vakwetu. (Omihe 15:4) Okuti una tyimwe wasoka tyikahi nawa tyipondola okupameka omunthu utekula ovana aike?
Omutala Womulavi 1/4/2009 pefo 31 § 1
O He ya Ava Vehena Ovohe
“O HE ya ava vehena ovohe. . . o Huku ukala apa pakola.” (Oviimbo 68:5) Onondaka ombo mbulekesa okuti Siovaa Huku wesuka na vana vehena ava vevetekula. Tyimwe tyilekesa umwe nawa okuti Siovaa wesuka novana onosona, otyitumino apele ova Isilayeli. Matutale apa Ombimbiliya yapopia tete okuti “o he ya ava vehena ovohe,” momukonda Okutunda 22:22-24.
Omutala Womulavi 1/2023 pefo 19 § 17
Siovaa Mekukuatesako Opo Evi Ulinga Vieende Nawa
17 Tanga Oviimbo 40:5. Omunthu wokulonda onomphunda, etyi ahanda okuhika apa ahanda. Mahi tyina ekahi nokulonda pena ponohika pamwe atalama otyo atala ovipuka oviwa vili momphunda omo. Tyelifwa nootyo, no ove apeho ovola omuvo wokusoka oñgeni Siovaa ekukuatesako namphila pamwe otyitateka tyove katyinelambe. Kese nthiki lipula okuti: ‘Oñgeni Siovaa hono ankhuatesako? Namphila nkhele otyitateka tyange katyinelambe, oñgeni Siovaa ekahi nokunkhuatesako andyikoleleya?’ Ovola okunoñgonoka otyipuka tyike vala Siovaa ekulingila opo ekukuateseko.
Olumono Lwa Huku
Omutala Womulavi 1/6/2006 pefo 10 § 5
Etyi Tyipopia Omukanda wa vali w’Oviimbo
68:18 — Ovalie ‘ovalume ankho vaawa otyali’? Ovalume ovo, ankho ovalume vakwatelwe avakala ovapika pweetyi ova Isilayeli vanyingila Motyilongo Tyalaelwe, konyima pahe avapewa otyilinga tyokukwatesako vomuhoko wa Levii motyilinga tyavo. — Esitala 8:20.
29 YA KAKWENYE ATEE 4 YA KWENYE KUNENE
OLUMONO LUKAHI MONDAKA YA HUKU | OVIIMBO 69
Etyi Tyaendele na Sesusi Tyapopiwa Momukanda Oviimbo 69
Omutala Womulavi 15/8/2011 pefo 13 § 17
Ankho Vakevelela Mesiya
17 Ovanthu ankho mavayale Mesiya tyihena ehunga. (Ovii. 69:4) Jesus wati: “Inkha halingile pokati kavo ovipuka vihuvisa, vihenelingwe vali nomunthu nawike, ñgeno kavakalele nonkhali. Anthi pahe vevimona iya vayala ame na Tate yange. Anthi, opo ondaka yahonekwa Movitumino viavo ifuiswepo, yati: Vandyala tyihena ehunga.’” (Swau 15:24, 25) “Ovitumino” vipopiwa apa, ankho ovio Ovihonekwa aviho vikahiko pomuvo opo. (Swau 10:34; 12:34) Etyi tutanga mo no Evandyeliu tyilekesa okuti ovanthu ovanyingi vayalele Jesus, haunene ononkhalamutwe mbonongeleya mbo va Judeu. Tupu Jesus wati: “Ouye utupu ehunga liokuyala onwe, mahi uyele ame, mokonda ndyiava oumbangi konthele yao wokuti ovilinga viao ovivi.” — Swau 7:7.
Omutala Womulavi 15/12/2010 pefo 8 §§ 7-8
Humba Efendelo Liotyotyili
7 Ovipuka Sesusi alingaile vialekesa umwe nawa okuti ankho una ombili. Opasikwa yenima 30 P.K, pweetyi umwe pahe Sesusi ahimbika ovilinga viae, aende novalongwa vae ko Selusalei, tyina vati oko, vakati ñgaa mondywo ya Huku mukahi nokulandesilwa ‘onongombe, nonongi, nonopomba, no vokukumana onombongo vepumphi povipundi viavo.’ Oityi Sesusi alingile, ya oñgeni tyakalesile ovalongwa vae? — Tanga Swau 2:13-17.
8 Otyipuka Sesusi alingile neetyi apopile, tyakwatesileko ovalongwa vae okuhingela etyi Ndaviti apopile momukanda Oviimbo okuti: “Ombili nondywo yove ili nokundia.” (Ovii. 69:9) Omokonda yatyi? Omokonda etyi Sesusi alinga ankho tyipondola okumweetela. Ovatumini vondywo ya Huku — Ovanakwa, novahoneki vovitumino novanthu ovakwavo vali — ankho vetyitavela mokonda navo ankho vamonenapo. Okuvetaata-mo ankho tyipondola okulingisa Sesusi ondyale yavana ankho veliti vafenda Huku pomuvo opo. Ovalongwa vetyimwene okuti Sesusi una ‘ombili nondywo ya Huku,’ ine ombili nefendelo liotyotyili.
Despertai! 22/10/1995 pefo 31 § 4
Omutima Wemutunda — Okuti Tyiipa Omunthu?
Vamwe vehole okupopia okuti Sesusi wankhia tupu okweihamemwa komutima, ngeetyi Ombimbiliya yaula-le okuti: “Omutomba wateya omutima wange, otyipute tyatyo katyiveluka vali.” (Ovii. 69:20) Mahi okuti tyili omutomba wateyele umwe omutima wa Sesusi? Hamwe wateyele umwe, mokonda ovipuka akondyele navio etyi eheneipawe, viemwihamene umwe unene — hakolutu vala, mahi no komutima umwe. (Mateusi 27:46; Luka 22:44; Ova Hembeleu 5:7) Neetyi Sesusi atomwa neonga apatundu “ohonde nomaande” tyipondola hamwe ankho watanduka umwe omutima. Ya omutima okutanduka, hamwe atyitipula omuhipa womutima ponthete, tyipondola okulingisa omunthu okutunda otyipuka tyilinga ‘ngohonde nomaande’. — Swau 19:34.
Perspicaz Vol. 2 pefo 660
Otyifo Tyikola Ovanthu
Mesiya waulilwe okuti makapewa okulia ‘kwotyifo tyikola ovanthu.’ (Ovii. 69:21) Otyo tyalingwa etyi vaavela Sesusi ovinyu yahonya nomeva otyifo tyilula, mahi etyi eimakela ahanu. Ankho vahanda akulwe aheive ononkhumbi ena nokumona. Pokwapopia eulu olio, Mateusi (27:34) wapopia ondaka yongeleku kho·lé (otyifo tyilula), ondaka oyo tupu oyo yapopiwa mo Septuaginta yongeleku m’Oviimbo 69:21. Mahi momukanda wa Maluku mwapopia okuti omila (Malu. 15:23), otyo tyilekesa okuti ondaka “otyifo tyikola ovanthu” tyipondola hamwe ankho “omila.” Tupu tyipondola hamwe ankho vahonyeka ovinyo notyifo tyikola ovanthu, nomila.
Olumono Lwa Huku
Omutala Womulavi 15/1/1999 pefo 18 § 11
Yelula omavoko aama ku Huku melikwambelo
11 Ovanthu ovanyingi valinga vala omalikwambelo okwiita tyimwe ku Siovaa Huku, mahi mokonda onthwe tuna ohole na Siovaa omalikwambelo etu tulinga povanthu ovanyingi natyina twiike, ena umwe okuhilivika Siovaa nokumupandula. Paulu wahoneka okuti: “Mwahayekei natyike tyimulingise otyiho, mahi movipuka aviho onwe likwambelei, livondelei otyo mupandula, itei ku Huku emunoñgonoke; ngwe opo ombembwa ya Huku yehevilwa-le okwiikungunyika, maiyungu omitima vienyi, nomalusoko enyi mu Kilisitu Sesusi.” (Ova Filipu 4:6, 7) Pokulikwambela, tuna okupandula Huku ovipuka ovinyingi etulingila. (Omihe 10:22) Omwiimbi waimbile okuti: “Pandulei, olupandu lwenyi alukala ngovilikutila vienyi ku Huku, amulingi umwe etyi mwapopilile Omunene.” (Oviimbo 50:14) Ndaviti waimbile okuti: “Mandyiimbi oviimbo vihivilika enyina lya Huku, ame mandyimuhivilika andyimupandula.” (Oviimbo 69:30) Noonthwe otyo tuna okulinga ngootyo tyina tulikwambela.
5-11 YA KWENYE KUNENE
OLUMONO LUKAHI MONDAKA YA HUKU | OVIIMBO 70-72
‘Hipululila Ava Mavekeya’ Ononkhono Mba Huku
Omutala Womulavi 1/9/1999 pefo 18 § 17
Vakwendye — Longesei Omitima Vienyi!
17 Opo ulityilike omaliva a Satanasi, wesukisa okulunguka — ya pamwe wesukisa umwe okukola omutima. Pamwe moti umwe vala nga ngoti petupu-ale omunthu okunoñgonoka. Ndaviti welikwambelele okuti: “Mokonda ame ndyikevelela vala kwoove Tatekulu Hamba Onene Siovaa. Tundee poututu ame ndyiyumba vala onthumbi mwoove. Huku yange, ove wandongesa tundee pouna, No pahetyino ndyipopia vala ovilinga viove vihuvisa.” (Oviimbo 71:5, 17) Ndaviti wiiwe okuti omunthu wakola omutima. Onalupi ahimbika okukala ngootyo? Opweetyi omukwendye! Etyi Ndaviti ehenelwise ngoliya, walekesilia-le okuti wakola omutima etyi ayakulila onongi mba tate yae — aipaa onkhulika nehambaungu. (1 Samuwele 17:34-37) Omunkhima auho Ndaviti weupele Siovaa, otyo apopilile okuti: “Tundee poututu ame ndyiyumba vala onthumbi mwoove.” Mokonda Ndaviti wayumbile vala onthumbi mu Siovaa, etyivili okulambela movitateka aviho akalele navio. Noove ine uyumba onthumbi mu Siovaa mekwavela ononkhono utyivile okukoleleya ovitateka viouye uno. — 1 Swau 5:4.
Despertai! 8/10/2004 pefo 23 § 3
Oñgeni Matutekula Wokwakulupa?
Omwiimbi welikwambele okuti: “Wahandyeke-po tyina namakulupa, Wahandyeke-po tyina nehena vali ononkhono.” (Oviimbo 71:9) Huku kayekepo ovaumbili vae vakulupa naapa umwe velitala okuti kavesilivila-le vali. Omwiimbi kasokele okuti hamwe Siovaa wemuyekapo, mahi ngwee welimwene okuti ankho wesukisa vali okuyumba onthumbi momutungi wae mokukulupa omu. Tyina omunthu ayumba onthumbi mu Siovaa, nae umukwatesako. (Oviimbo 18:25) Ya pamwe Siovaa utuma ava tufenda navo vetukwateseko.
Omutala Womulavi 15/1/2014 pefo 23 §§ 4-5
Umbila Jeova Tyina Nkhele Ononthiki Onombi Mbuheneye
4 Inkha walingale ovipuka ovinyingi momanima omanyingi, lipula okuti: ‘Oityi ndyipondola okulinga pahetyino, putyina nkhele ndyina ononkhono nokuapama?’ Mokonda Umukristau omunongo, una onomphitilo vakuenyi vehena. Mongeleka, upondola okulongesa ovakuendye etyi wii konthele ya Jeova. Upondola okupopila vakuenyi ovipuka oviwa welilongesa omuvo ukahi nokuumbila Huku. Ohamba David welikuambelele opo akale nomphitilo yokulinga ngotyo. Wahoneka okuti: “Huku yange, ove wandongesa tunde poukuendye . . . Na tyina namakulupa nokuna onombi, uhandyekepo, Huku yange. Ndyeke ndyipopile ovanthu aveho ounene wove. Na aveho vana maveya okutehelela ounene wove.” — Ovii. 71:17, 18.
5 Oñgeni upondola okupopia ounongo wakala nao omanima omanyingi? Okuti upondola okukonga ovakuendye veye keumbo liove? Upondola okuveita vakaivise nove opo vatale ehambu una movilinga via Jeova? Eliu wati: “Yeka ononthiki mbupopie, nokuyeka omanima omanyingi apopie ounongo.” (Sombe 32:7) Apostolu Paulu wapopilile ovakai Ovakristau ovanongo vaavele ondundo vakuavo nonondaka mbavo no nongeleka. Wahoneka okuti: “Ovakai ovakulu vakale . . . ovalongesi vovipuka oviwa.” — Titu 2:3.
Olumono Lwa Huku
Perspicaz Vol. 1 pefo 768
Eufalate
Onondimbu Mbotyilongo Tyapelwe Ova Isilayeli. Etyi Huku apopia na Ambalayau, watile ava vakatuka mwoove mandyikevepa otyilongo etyi, “okuhimbikila kondongi yo Isitu atee kondongi onene, ondongi yo Eufalate.” (Ehim. 15:18) Pokutyipopila ova Isilayeli, otyipuka otyo tyawanainwe ehimbwe. (Oku. 23:31; Epal. 1:7, 8; 11:24; Susu. 1:4) Omukanda 1 Ehipululo 5:9 upopia okuti pweetyi Ndaviti nkhele ehenetumine, vamwe vatundile momuhoko wa Lumbe, onohika mbavo mbaile “atee apa pahimbikila oluhandya lwokuli konthele Yondongi Eufalate.” Okutunda ko Eufalate atee koutundilo wo Sileyande, paendwa ono kilometulu 800. (1 Ehi. 5:10) Otyo tyilekesa okuti ohika yaava vatukile momuhoko wa Lumbe, ihimbikila koutundilo wo Sileyande “atee apa pahimbikila oluhandya lwokuli konthele Yondongi Eufalate.” Naina etyi Huku apopile tyafwiswapo vala moutumini wo Ndaviti na Salomau, etyi pahe otyilongo tyova Isilayeli tyeliyawisa, atyihimbikila konohika mbutuminwa nohamba yo Sombaa, atee kotyilongo Tyondongi Eufalate, mokutala ankho onondimbu mbatyo mbukakwata umwe motyilongo tyo Asilia. (2 Sam. 8:3; 1 Oha. 4:21; 1 Ehi. 18:3-8; 2 Ehi. 9:26) Mokonda ankho o Eufalate yankhimana unene, pamwe ankho itiwa vala “Ondongi.” — Susu. 24:2, 15; Ovii. 72:8.
12-18 YA KWENYE KUNENE
OLUMONO LUKAHI MONDAKA YA HUKU | OVIIMBO 73-74
Oityi Tuna Okulinga Twahapeleye Omwenyo Wava Vahafende Huku?
Omutala Womulavi 12/2020 pefo 19 § 14
“Siovaa . . . Upameka Vana Vasoya”
14 Omuhoneki wo Oviimbo 73 ankho omu Levita. Mokonda yotyo, ankho una elao liokuundapa mondyuo ya Huku yokufendela. Mahi pena omuvo umwe akalele tyasoya. Omokonda yatyi? Omokonda ankho wafueva omuenyo wonondingavivi vo kuna omalityindailo, mahi kevefwevele mokonda yovivi ankho valinga, mahi omokonda kwe ankho vena vali omuenyo ukahi nawa tyipona wae. (Ovii. 73:2-9, 11-14) Tyina atala ovanthu ovo ankho vekahi nawa. Ovahona, vena omuenyo omuwa, ngoti petupu etyi tyivelingisa otyiho. Otyo atyimusoyesa unene ahoneka okuti: “Tyotyili, nelipuilisa vala etyi nasukukisa omutima wange. Netyi nahalingile natyike tyahaviukile nomaoko ange” olusoko olo, ankho luhanda okunyona oupanga wae na Siovaa.
Omutala Womulavi 12/2020 pefo 19-20 §§ 15-16
“Siovaa . . . Upameka Vana Vasoya”
15 Tanga Oviimbo 73:16-19, 22-25. Omu Levita oo “anyingila mondyuo onene ya Huku”, elivasi-mo navakuavo, otyo atyimukuatesako okukala nawa, atulu omutima atee umwe elikuambela. Etyi alinga ngotyo, aimbuka okuti etyi ankho ena nokusoka tyapenga. Ankho tyina nokumuhondovola ku Siovaa katutu-katutu. Tupu amono okuti onondingavivi ankho mbukahi ngatyina mbuli “pofika yasesa” iya apa katutu “mavakahanyuako”. Opo ahasoye mokonda yokuafweva omuenyo yonondingavivi, omu Levita ankho wesukisa okusoka ngetyi Siovaa asoka. Etyi alinga ngotyo, akala vali nehambu nombembwa. Ati: “Ndyitupu vali ou ndyihambukilwa kombanda yoohi, ove vala [Siovaa Ovii. 73:17; Omih. 18:1].”
16 Etyi tulilongesila-ko. Katupondola okufweva ovanthu vokulinga ovipuka ovivi, ngatyina vena vali omuenyo ukahi nawa, mokonda vetupu ehambu litualako. Iya kamavakakala nomuenyo wahapu komutwe wandyila. (Ecl. 8:12, 13) Ine tuvefweva matusoyo atunyono upanga tuna na Siovaa. Ine wamona okuti katutu-katutu wahimbika okufweva omuenyo wovanthu vokulinga ovipuka ovivi, linga ngetyi tyalingile omu Levita. Tavela onondongwa mba Siovaa, liwaneka navakuenyi mufenda navo Huku. Tyina uhumba vali Siovaa tyipona ovipuka ovikuavo, mokala nehambu liotyotyili. Okulinga ngotyo, motualako okukala mondyila yomuenyo wotyotyili. — 1 Tim. 6:19.
Omutala Womulavi 15/4/2014 pefo 4 § 5
Hetekela Ekolelo Lia Moisesi
5 Oñgeni upondola okuanya “ehambu lionkhali lihasete okupwa”? Uhalimbueko okuti ehambu litundilila konkhali kalitualako apeho. Ekolelo malikukuatesako okuimbuka okuti “ouye ukahi nokulamba, kumue nepeleyo liao.” (1 João 2:15-17) Sokolola kuetyi matyikamonekela vana valinga onkhali avehelivele. Vekahi “pofika yasesa . . . ngotyo, mavakala nonthyulilo ombi!” (Sal. 73:18, 19) Tyina ukahi nokuhongiliyua okulinga onkhali, lipula okuti: ‘Nahanda okukakala ñgeni komutwe wandyila’?
Omutala Womulavi 15/2/2013 pefo 22-23 §§ 3-5
Wahayeke Natyike Tyikutyilike Okunkhimanekwa
3 Omuhoneki wono Salmo ankho una onthumbi yokuti Jeova memunkhimaneka. (Tanga Salmo 73:23, 24.) Mahi, oñgeni Jeova ankhimaneka ovanthu ovataveli? Jeova utyilinga mokuvepanda, nokuveyamba mononkhalelo ononyingi. Mongeleka, uvekuatesako okunoñgonoka ehando liae, nokuveyeka vakale omapanga ae.—1 Coríntios 2:7; Tiago 4:8.
4 Tupu Jeova utunkhimaneka mokutuyeka tuivise onondaka onongwa. (2 Coríntios 4:1, 7) Tyina tuhivilika Jeova movilinga viokuivisa, Jeova utunkhimaneka, tupu tukuatesako vakuetu. Moluotyo, Jeova utulaa okuti: “Ame mandyikankhimaneka vana vankhimaneka.” (1 Samuel 2:30) Jeova unkhimaneka vana vaundapa movilinga viokuivisa mokuveavela enyina ewa, ine omokuvepanda. Iya vakuavo mewaneno vevepopia nawa.—Provérbios 11:16; 22:1.
5 Oityi vana “vakevela ku Jeova nokutualako okueendela mondyila yae” mavakamona komutwe wandyila? Valawa okuti: “Oe [Jeova] mekekupanda unene opo upingane ohi. Tyina onondingavivi mbamanyimuako, ove moketyimona.” (Salmo 37:34) Mavakapewa omunkhima omunene womuenyo wahapu.—Salmo 37:29.
Olumono Lwa Huku
Perspicaz Vol. 2 pefo 222
Leviyataa
Oviimbo 74 upopia oñgeni Siovaa ayovola ovanthu vae, ya onovelesikulu 13 no 14 mbupopia etyi Siovaa ayovola ova Isilayeli ko Esitu. Ondaka yo Hembeleu yapitiywa okuti “omanyama omanene [hebr.: than·ni·ním, plural de tan·nín]” ina apa yapopia okuti “Leviyataa,” ya okumiangulwa kwomutwe wo Leviyataa, kupopia etyi Falaoo novita viae vahanywapo melunga enkhuhu. Omikanda vimwe vitiwa Targuns aramaicos ponondaka mbokwati “omitwe vyo Leviyataa,” viapopia-po okuti “omanene a Falaoo.” (tala Isek. 29:3-5; 32:2, omu Falaoo aelekwa “nenyama enene liomelunga” lili pokati komeva o Nilu; tupu nomu Isek. 32:2.) Omukanda wa Isaiya 27:1 upopia o Leviyataa (LXX: okuti “enyoka liokunthanana”) ngatyina uti outumini, oo omalongo ahonya atuminwa na umwe wapopiwa okuti “enyoka enene, enyoka liokonthuko.” (Ehol. 12:9) Eulo eli lipopia okupindulwa-po kwefendelo liotyityili liova Isilayeli. Tyina Siovaa amahinangela o Leviyataa, Nombambilonia ina okunyingila-po. Naina, onovelesikulu 12 no 13 mbupopia okuhanywa-ko kwo Asilia no Esitu. O Leviyataa yapopiwa apa ilekesa omaongano aeho atyitukila-po Siovaa Huku novanthu vae.
19-25 YA KWENYE KUNENE
OLUMONO LUKAHI MONDAKA YA HUKU | OVIIMBO 75-77
Wehelipake-ko — Omokonda Yatyi?
Omutala Womulavi 1/2018 pefo 28 §§ 4-5
Tala Oñgeni Ovanthu Velikalela
4 Konyima yetyi Paulu apopia okuti ovanthu mavakakala nohole navo muene, nohole no nombongo, ayawisako okuti ovanthu ankho mavakakala vokulimphanda, vomalityindailo iya nokuhena omutima weliola. Ovanthu vokuna ovituwa ovio vasoka okuti vakolela vali ku vakuavo mokonda yolupe luavo, younongo, novipuka vena iya nonkhalelo yavo yomuenyo. Ovanthu ovo, vahanda vala okuhuvisa vakuavo. Omunongo umwe wahoneka konthele yovanthu ovo, wapopia okuti: “Omunthu oo, mokati kae muna otyika-huku oku afenda.” Ovanthu vamwe vapopia okuti elungavi otyipuka otyivi unene iya alo umwe omunthu una elungavi, unumana unene tyina atala omunthu omukuavo una elungavi.
5 Jeova uyele ovanthu velipakako, iya Ombimbiliya ivepopia okuti vena “omaiho elungavi.” (Provérbios 6:16, 17) Tyotyili, ovanthu velungavi kavakala omapanga a Huku. (Salmo 10:4) Elungavi otyituwa Tyeliapu. (1 Timóteo 3:6) Tyiihama okunoñgonoka okuti alo umwe ovaumbili vekolelo va Jeova vakalele nomalityindailo. Mongeleka, Ohamba Uzia yoko Judaa wakalele omukuatyili omanima omanyingi. Mahi Ombimbiliya yati: “Putyina ankho apama, omutima wae auhimbika okukala nomalityindailo, pala ehanyo liae muene iya alingi otyipuka otyivi komaiho a Jeova, Huku yae.” Uzia waile mondyuo ya Huku iya ayoko otyilikutila, otyipuka ankho ahapondola okulinga. Konyima, momuvo umwe, Ohamba Ezekia ankho omukuatyili, wakalele nomalityindailo. — 2 Crônicas 26:16; 32:25, 26.
Omutala Womulavi 15/7/2006 pefo 11 § 2
Etyi Tyipopia Omukanda wa tatu nowa kwana w’Oviimbo
75:4, 5, 10 — Otyi tyihangununa ondaka “onombinga”? Ombinga yotyinyama yafwa otyihoti, o ngouta umwe omunene. Ondaka oyo ombinga, ipopia omafa ononkhono. Siovaa ‘uyelula ombinga yovanthu vae’ mokuvenkhimaneka, oku tupu utetako onombinga mbonondingavivi.’ Mahi tulondolwa ‘twahayele ombinga yetu,’ otyo okuti, katupondola okulityinda-tyinda, okulipakako. Mokonda Siovaa oe uyela ombinga yetu, ovilinga aviho tumona meongano katuvilimbwa atuti hamwe haeko wetwavelavio. — Oviimbo 75:7.
Olumono Lwa Huku
Omutala Womulavi 15/7/2006 pefo 11 § 3
Etyi Tyipopia Omukanda wa tatu nowa kwana w’Oviimbo
76:10 — Oñgeni “onyengo yomunthu” ihilivika Siovaa? Tyina Huku ayeka ovanthu vetumonese ononkhumbi mokonda yonyengo vena novanthu vemufenda, kutuka oviwa. Kononkhumbi tumona tupondola okulilongesilako. Siovaa utuyeka vala tumone ononthumbi atee mwene noonthwe tulilongesilako. (1 Petulu 5:10) ‘Onondaka mavakavitula nambo tyanumana, ombo mambukefiviswa Huku.’ Ya pahe ine tumoneswa ononkhumbi atee tunkhila’po? Opo napo, Siovaa uhivilikilwa-po umwe, mokonda ovanthu vana vamona okukoleleya kweetu neyumbanthumbi, vapondola okuhilivikilapo Huku.
26 YA KWENYE KUNENE ATEE 1 TUNGONKHE
OLUMONO LUKAHI MONDAKA YA HUKU | OVIIMBO 78
Oumphuki Wova Isilayeli Utulondola
Omutala Womulavi 1/12/1996 pefo 29-30
“Hinangelei Kononthiki Mbo Kohale”— Mokonda Yatyi?
Apeho ankho ova Isilayeli vakalela vala okulimbwako. Otyo atyeta-tyi? “Otyo vakalela vala tyokulola Huku, avanumanesa Omusukuki wa Isilayeli. Kavahinangelele okuvoko kwae, kavahinangelele onthiki ina eveyovolele kondyale.” (Oviimbo 78:41, 42) Mokonda ankho valimbwileko ovitumino vya Siovaa, ngwee nae eveanye. — Mateusi 21:42, 43.
Omwiimbi ankho uhinangela ovipuka oviwa Siovaa emulingila, wahoneka okuti: “Ame mandyihinangela evi vilinga Sah. Mandyihinangela ovipuka vihuvisa walingaile kohale-hale. Mandyisoko nawa kovipuka aviho ulinga, andyitungulula ku evi ulinga.” (Oviimbo 77:11, 12) Tyina tusoka ovipuka oviwa twalingila Siovaa no kolwembia olunene ena noonthwe, tyitupameka atutwalako okumufenda. Tupu tyina ‘tuhinangela kononthiki mbo kohale,’ tyitukwatesako atwahaponwa mahi atulingi atyiho tuvila tukoleleye, atukala ovakwatyili ku Siovaa.
Omutala Womulavi 15/7/2006 pefo 17 § 16
‘Tyina Mulinga Ovipuka Mwehevilingei Otyo Mulondovola’
16 Omunthu vokukalela okulondovola usoka vala kwe mwene, novitateka enavio, kasokwale koviwa enavio viatuka kokwakala Ombangi ya Siovaa. Opo twahakale ovanthu vokulondovola vala, tuna okusoka koviwa vituka kokukala ombangi ya Siovaa. Onthwe atuho twatyinda enyina lya Siovaa. (Isa. 43:10) Tupondola okupopia na Siovaa o “muteheleli womalikwambelo” kese oola tuhanda. (Ovii. 65:2; Tia. 4:8) Onthwe tuna omwenyo ukahi nawa mokonda tutyii okuti, Siovaa oe watamo mokutumina, okukakatela mwee elao limwe enene. (Omih. 27:11) Onthwe atuho tupondola okwiivisa oviwa ovipe viouhamba. (Mat. 24:14) Onthumbi tuna motyilikutila tyeyovo, itukalesa nombungo yasukuka. (Swau 3:16) Ovipuka ovio aviho tunavio elao limwe enene, namphila pamwe tukala novitateka.
Omutala Womulavi 1/7/2011 pefo 32 §§ 3-4
Okuti Jeova Upondola Okuhambukwa ine Okunumana?
Omuhoneki wo no salmu wati: “Ovikando ovinyingi vemutyitukililepo mehoko!” (Versikulu 40) Moversikulu onkhuavo ayawisako okuti: “Vapitaulula okulola Huku.” (Versikulu 41) Tala okuti omuhoneki wati oumphuki ankho otyituwa tyavo. Otyituwa otyo tyokuhena onthilo, tyahimbika etyi pakala vala katutu tunde etyi vayovolwa mo Egitu. Ovanthu vahimbika okuñgoñgena Huku, okuti oe kafuilepo ine kahande okuvetekula. (Números 14:1-4) Omukanda umwe wovapitiyi Vombimbiliya, wati onondaka “vemutyitukilapo” monondaka ononkhuavo, okuti “vateneka omitima viavo okuhetavela Huku ine ‘vati “Au” Huku.’” Anthi, mokankhenda kae, Jeova wevela ovanthu vae tyina velekesa okuti velivela. Mahi vakondauka monkhalelo yavo onkhulu youmphuki, iya otyituwa otyo tyatualako. — Salmo 78:10-19, 38.
Oñgeni oumphuki wovanthu va Jeova ankho umukalesa? Oversikulu 40 yati: “Vemuihamesa komutima.” Ombimbiliya imwe yati ankho “valinga evi vimunumanesa.” Omukanda umwe uhangununa okuti: “Onondaka ombo mbulekesa okuti ovipuka ova Hebreu ankho valinga viihameka, ngetyi ovituwa viomona omphuki viihameka.” Ngetyi omona uhetavela aihameka omutima wo vohe, no va Isilayeli onomphuki “vanumanesa Osandu yo Isilayeli.” — Versikulu 41.
Olumono Lwa Huku
Omutala Womulavi 15/7/2006 pefo 11 § 4
Etyi Tyipopia Omukanda wa tatu nowa kwana w’Oviimbo
78:24, 25; okatoi — Omokonda yatyi omanaa yatilwa “ovilia vyo keulu, ombolo yono andyu”? Onondaka ombu kambulekesa okuti omanaa ankho okulia kwono andyu. Yatiwa tupu “ovilia vyo keulu,” omokonda ituka keulu. (Oviimbo 105:40) Mokonda onoandyu mbukala keulu, onondaka mbokwati “ombolo yono andyu,” tyipondola mbulekesa okuti omanaa ankho ituka ku Huku, ukala keulu. (Oviimbo 11:4) Tupu tyipondola hamwe Siovaa watumine ono andyu mbwavele omanaa ova Isilayeli.