Onthiki Onene Menima Yeya-po — Wafwapo-ale?

1. Oityi tutila onthiki Yehinangelo onthiki onene vali menima? (Luka 22:​19, 20)

KOVANTHU va Siovaa, onthiki yokuhinangela ononkhia mba Kilisitu, oyo onthiki onene vali menima. Onene mokonda, oyo vala Sesusi apopilile ovalanduli vae okuti vena okwiihinangaila. (Tanga Luka 22:​19, 20.) Onthwe tuli nokukevela nehambu enene onthiki Yehinangelo. Omokonda yatyi? Matupopi ovipuka vimwe vitukevelesa nehambu.

2. Oityi tusukila unene nonthiki Yehinangelo?

² Ehinangelo litusokesa koviwa viatuka kotyilikutila tyeyovo. Lituhinangelesa ovipuka tuna okulinga tyimoneke okuti twapandula otyilikutila tyeyovo. (2 Kol. 5:​14, 15) Tupu litwavela omphitilo “tulipameke” na vakwetu tufenda navo. (Loma 1:12) Omanima atyo aeho, vokwayeka-po okwivisa veya Kehinangelo, ovanyingi. Vamwe, okuyakulwa nawa tyina veya Kehinangelo, tyivepa umwe ondundo avakondoka ku Siovaa. Ovanyingi tyivetwala umwe kokulilongesa Ombimbiliya, otyetyi vamona, neetyi veiva monthiki Yehinangelo. Ehinangelo litukala tupu unene komutima, ovipuka ovio aviho vituka-ko!

3. Oityi tutila Ehinangelo lituhonyeka ouye auho, atulikwate-po? (Tala olutalatu.)

³ Pahe soka vala oñgeni Ehinangelo lituwaneka na vakwetu tufenda navo ouye auho. Tyina tyiti kokawii-wii monthiki Yehinangelo, Onombangi mba Siovaa ouye auho veliongiya. Onthwe atuho tutehelela elongomona lipopia vali unene otyilikutila tyeyovo. Twiimba oviimbo vivali tuhilivike Huku, tukwata ombolo novinyu, tupu palingwa omalikwambelo ekwana otyo ovanthu aveho vapopia umwe nomutima auho okuti, “amem.” Onthiki yatyo oyo aiho, omawaneno mouye auho alinga vala otyipuka tyike. Pahe soka kehambu ovo Siovaa na Sesusi vakala nalio, tyina vetutala atuho twelikwata-po, tuli nokuvehilivika.

4. Monthele ei matupopi-tyi?

⁴ Monthele ei matukumbulula omapulo aa: Oñgeni matufwiika omutima wetu pala Ehinangelo? Oityi tuna okulinga tukwateseko vakwetu vapole ouwa Kehinangelo? Oityi tuna okulinga tukwateseko vana vayeka-po okwivisa? Omakumbululo omapulo oo, maetukwatesako atukala umwe tyafwapo pala onthiki oyo ikola.

OÑGENI MATUFWIIKA OMUTIMA PALA EHINANGELO?

5. (a) Oityi twesukisila okusoka koviwa vituka kotyilikutila tyeyovo? (Oviimbo 49:​7, 8) (b) Oityi welilongesila kovindiu yokwati Omokonda Yatyi Jesus Ankhila?

⁵ Otyipuka tyimwe tyesukisa unene tuna okulinga opo tufwiike omutima wetu pala Ehinangelo, okusoka koviwa viatuka kotyilikutila tyeyovo tyalingwa na Sesusi Kilisitu. Kohalwetu vala, ankho katutyivili-ale okuliyovola konkhali no kononkhia. (Tanga Oviimbo 49:​7, 8; tupu tala ovindiu yati: Omokonda Yatyi Jesus Ankhila?)a Otyipuka otyo tyalinga ovo Siovaa na Sesusi otyinene. Siovaa welipola umwe Omona wae etuyovole. (Loma 6:23) Tyina tusoka umwe nawa otyipuka otyo ovo Siovaa na Sesusi valinga vetuyovole, noonthwe matupandula vali otyilikutila otyo tyeyovo. Pahe matupopi ovipuka ovo Siovaa na Sesusi velipolele opo vetuyovole. Mahi nkhele matupopi etyi tyalingilwe-po opo otyilikutila otyo tyilingwe.

6. Oityi tyalingwa-po opo otyilikutila tyeyovo tyilingwe?

⁶ Okuyovola otyipuka, okutyifetela tyikondoke apa tyali. Omunthu wo tete, Andau, watungilwe umwe tyehena nkhali. Etyi alinga onkhali, atyiti vala nae novana vae, avapumbwa elao liokukala-ko apeho. Opo etyi Andau avombesa tyikondoke-po, Sesusi afete-po omwenyo wae. Omuvo auho Sesusi ali pano pohi, “kalingile onkhali, nii momulungu wae kamwavahilwe ounkhembi.” (1 Pet. 2:22) Etyi Sesusi aipawa, afete umwe omwenyo wehena nkhali, wata momwenyo Andau avombesa. — 1 Kol. 15:45; 1 Tim. 2:6.

7. Ovipuka patyi Sesusi akondyele navio etyi eli pano pohi?

⁷ Sesusi pweetyi eli pano pohi, wetavelele ku Tate yae wo keulu, namphila atumbaukililwe novipuka ovinyingi ankho vipondola okumulingisisa. Pweetyi omututu, wetavelele kovo tate yae ovakwankhali, namphila ngwe ankho hamukwankhali-ko. (Luka 2:51) Pweetyi pahe eli nokukola, wesukisile umwe okulikwatehila etyivile okututumba neevi vipondola okumulingisisa ehetavele kovo tate yae, neevi vipondola okumulingisisa ayeke-po Siovaa. Pweetyi pahe ekula, ankho una okulikwatehila ehetavele kweevi Satanasi Eliapu limuhindila, ngwe liemuviukile umwe alimuti yeka-po okufenda Huku. (Mat. 4:​1-11) Satanasi ankho liesuka umwe natyo tyokulingisisa Sesusi alinge onkhali ku Huku, opo ehetyivile okufeta otyilikutila tyeyovo.

8. Ovipuka patyi vali ovikwavo Sesusi akondyele navio akoleleya?

⁸ Pweetyi Sesusi ali pano pohi, wakondyele novitateka ovikwavo vali ankho vipondola okumulingisisa. Wamonesilwe onkhumbi, ovanthu avahande okumwiipaa. (Luka 4:​28, 29; 13:31) Wapwile elundo novalongwa vae namphila ankho vapengesa. (Malu. 9:​33, 34) Onthiki maipawa, ovanthu vemulingile onya, otyo vemupenya. Pahe alingwa otyipuka tyimwe tyati otyo tyiihama, otyo tyikundisa, okupapelwa momuti. (Hemb. 12:​1-3) Pokwipawa opo, Siovaa wemuyekelele-tyo umwe vala, akoleleya aike.b — Mat. 27:46.

9. Oñgeni tukala tyina tusoka kotyilikutila tya Sesusi? (1 Petulu 1:8)

⁹ Tyotyili, Sesusi opo afete otyilikutila otyo tyeyovo, wamwene emone. Okusoka umwe nawa kotyipuka otyo Sesusi alingile, tyokuliava amono emone etuyovole, tyitutwala kokumuhumba vali unene. — Tanga 1 Petulu 1:8.

10. Oityi Siovaa alinga aave otyilikutila tyeyovo?

¹⁰ Ya Siovaa oityi alinga? Okuti nae una-vo etyi alinga opo Sesusi aave otyilikutila tyeyovo? Yoo, pena umwe. Ovo Siovaa na Sesusi omapanga amwe omanene. Natyo omo umwe, opo vohe nomona. (Omih. 8:30) Pahe tyina usoka, oñgeni Siovaa akalele tyina atala omona wae uli nokukoleleya ovitateka ovio aviho akondyele navio pano pohi? Tyotyili, Siovaa tyemwiihamene unene okutala omona wae ulingwa onya, umoneswa ononkhumbi, ulolwa.

11. Popia-po tyimwe tyilekesa oñgeni Siovaa akalele etyi Sesusi aipawa.

¹¹ Omunthu wahilwe-po-ale nomona, utyii okuti otyipuka otyo tyiihama unene. Twahula okuti tuyumba-ko onthumbi okuti vokwanyima mavakatutila, mahi no ngootyo tyina twahiwapo, nkhele komutima tyitwiihama umwe. Otyo tyilekesa umwe nawa oñgeni Siovaa akalele mohanyi ya Nisaa yenima 33 P.K. tyina atala Omona wae umoneswa emone aipawa.c — Mat. 3:17.

12. Oityi tuna okulinga tyina tuhungi monthiki Yehinangelo?

¹² Okuhimbikila hono atee monthiki Yehinangelo, otyiwa pokulilongesa awike Ombimbiliya no Mefendelo Liombunga, mulilongese vali unene etyi tyiyemba kotyilikutila tyeyovo. Mupondola okutala m’Omukanda Wokuovolola wo Nombangi mba Jeova (ine muna-o melaka lienyi) okuti hatyo, omomikanda omikwavo vali vitukwatesako okunoñgonoka nawa otyilikutila tyeyovo.d Otyikwavo una okulinga, okutanga onotesitu mbutangwa pomuvo Wehinangelo, mbuli momukanda Omwenyo Wetu Woukilisitau Novilinga Vietu — Omukanda Wovilinga. Pahe tyina tyiti monthiki yatyo Yehinangelo, wahalimbweko okutala ovindiu Yefendelo Liombunga monthiki Yehinangelo. Tyina tufwiika omutima pala Ehinangelo, matutyivili okukwatesako vakwetu navo vapole-ko ouwa. — Esit. 7:10.

KWATESAKO VAKWENYI VAPOLE OUWA KEHINANGELO

13. Otyipuka patyi tyo tete tuna okulinga tukwateseko vakwetu vapole ouwa Kehinangelo?

¹³ Oityi tuna okulinga tukwateseko vakwetu vapole ouwa Kehinangelo? Hatyimwe-ale vali, okuvekonga umwe. Tyehekukonga vala ava tuvasa movilinga viokwivisa, tupondola okusoka kovanthu ovakwavo vali, vetu, naava tuundapa navo, naava tulongeswa navo, atuvehoneka pokamukanda tutyivile okuvekonga. Ine tutupu omikanda ominyingi viokukonga, vamwe tupondola vala okuvetumina monotelefone. Tulolei-ko vala, ou metavela katumwii. — Omup. 11:6.

14. Popia-po tyimwe tyilekesa omokonda yatyi otyiwa okupa umwe omunthu omukanda wokukonga.

¹⁴ Wahalimbweko okuti okweendela umwe omunthu okemukonga, upondola okwahalimbwako, eya. Tala vala etyi tyamwene omukai umwe Ombangi una omulume wehelilongesa. Nthiki imwe wahuvile etyi omulume wae ati, hono ame hipumbwa-le, matweende atuho Kehinangelo. Oityi tyemuhuvisile? Wahuvile mokonda wemutolailile-ale ehimbwe otyo ehetavela. Oityi onthiki oyo atila nae maende Kehinangelo? Omulume oo wati: “Mwene naame napewa omukanda watyo wokwakongwa.” Apopi okuti wakongwa nomukulu umwe wewaneno velityiliya nae. Omulume oo menima olio aende umwe Kehinangelo, nomanima omakwavo vali akalandula-ko.

15. Oityi tuna okuhinangela apeho tyina tukonga ovanthu veye Kehinangelo?

¹⁵ Wahalimbweko okuti ava tukonga, pamwe vena ovipuka ovinyingi mavahande okupula, haunene umwe ine kaveneende-ale komaliongiyo etu. Naina, otyiwa okusoka kovipuka vapondola okupula, atutale oñgeni matuvekumbulula. (Kolo. 4:6) Vamwe vapondola okupula ñgaa: ‘Meliongiyo liatyo omo mulingwa-tyi?’ ‘Mukalwa onoola onoñgapi?’ ‘Muna ovikutu viatyo vivalwa-mo?’ ‘Tyina unyingila-mo ufeta?’ ‘Tyina tuli-mo matwiitwa onombongo?’ Tyina tukonga omunthu opo eye Kehinangelo, tupondola okumutehelela ine una etyi ahanda okupula. Ine una etyi apula, atumukumbulula. Tupu tupondola okumulekesa ovindiu yokwati, Okuhinangela Ononkhia mba Sesusi, no yokwati, Oityi Tyilingwa Mondyuo Yomaliongiyo? anoñgonoke etyi tyilingwa momaliongiyo etu. Pelongeso 28 liomukanda Kalako Nomwenyo Apeho! pena ovipuka ovinyingi vikahi nawa tupondola okumupopila.

16. Vokwakongwa veye Kehinangelo, ovipuka patyi vapondola okupula?

¹⁶ Tyina Ehinangelo liamapu, vokwesuka veya-mo vala onthiki oyo, tyipondola mavapulu vali ovipuka ovikwavo. Ine pena ou walia kombolo, anu kovinyu, vapondola okupula omokonda yatyi ovanyingi vatyo vahalililile-ko. Tupu vapondola okupula, tuñgapi tulinga Ehinangelo menima, nokupula ine omaliongiyo aeho Onombangi mba Siovaa alingwa vala ngeetyi tyilingwa Ehinangelo. Namphila ovipuka ovio vipopiwa-le melongomona, mahi vokweya-mo vala onthiki oyo, vapondola okuvipula vevinoñgonoke vali nawa. Onthele ili mo jw.org yokwati: “Oityi Onombangi Mba Siovaa Vahalingila Ondalelo ya Tatekulu Ngetyi Onongeleya Ononkhuavo Valinga?” ipondola okutukwatesako okukumbulula evi vapula. Onthwe twahanda umwe okulinga atyiho tuvila tyina Ehinangelo lieheneye-po, na tyina liameya-po, na tyina liamalambe, tukwateseko ava “vesuka umwe natyo,” vapole-ko ouwa Kehinangelo. — Ovil. 13:48.

KWATESAKO AVA VAYEKA-PO OKWIVISA

17. Oñgeni ovakulu vewaneno mavakwatesako vana vayeka-po okwivisa? (Isekiyele 34:​12, 16)

¹⁷ Pomuvo Wehinangelo, oñgeni ovakulu vewaneno mavakwatesako ava vayeka-po okwivisa? Lingei umwe evi mavilekesa okuti musuka navo. (Tanga Isekiyele 34:​12, 16.) Tyina Ehinangelo lieheneye-po, veovolei umwe aveho amutomphola navo. Tyimoneke okuti muvehole, mwahanda okuvekwatesako. Vekongei veye Kehinangelo. Ine veya, veyakulei nawa. Tyina Ehinangelo liamalambe, mwahayekei-ko okutomphaula navo, otyo muvekwatesako vakondoke vali ku Siovaa, mokonda ovanthu vetu tuhole. — 1 Pet. 2:25.

18. Oñgeni atuho matukwatesako vana vayeka-po okwivisa? (Ova Loma 12:10)

¹⁸ Atuho mewaneno tupondola okukwatesako vana vayeka-po okwivisa maveya Kehinangelo. Matuvekwatesako ñgeni? Oputyina tuveyakula umwe nawa, nolwembia, nokankhenda, nokuvelinga onthilo. (Tanga Ova Loma 12:10.) Wahalimbweko okuti vakwetu ovo, tyipondola tyevelemena okuhimbika vali okuya komaliongiyo. Tyipondola ankho vatila owoma, ngoti kamavayakulwa-le nawa.e Naina, liyunga umwe. Wehevepule evi vipondola okuvekundisa. Wahapopie onondaka mbupondola okuvekalesa omapita. (1 Tes. 5:11) Ovo navo ovakulu vetu tufenda navo, onondenge mbetu. Tuhambukwa okulivasa vali navo tufende Huku! — Ovii. 119:176; Ovil. 20:35.

19. Oviwa patyi vituka kokuhinangela ononkhia mba Sesusi?

¹⁹ Pahe katulipulu-ale vali, twetyinoñgonoka omokonda yatyi Sesusi atila tuna okuhinangela ononkhia mbae omanima atyo aeho. Okutyilinga otyo tyitweetela ouwa, onthwe na vakwetu. (Isa. 48:​17, 18) Tuhumba vali unene ovo Siovaa na Sesusi. Tulekesa okuti twapandula etyi vetulingila. Tulikwata-po vali na vakwetu tufenda navo. Tukwatesako vakwetu vanoñgonoke oñgeni navo mavapolo ouwa kotyilikutila tyeyovo. Naina, tulingei atyiho tuvila, atulifwiika pala Ehinangelo lienima lino, onthiki onene vali menima!