Xi nuꞌi, ¿gi ñꞌani mu̱ rä Zi Dada Jeoba di numäñhoꞌi?

1. Rꞌabu̱, ¿te di senti rꞌa de nuꞌu̱ yä amigo rä Zi Dada Jeoba?

¡HÄNGU di nupkägihu̱ mä mfenihu̱ gä pädihu̱ ge rä Zi Dada Jeoba pe̱ꞌtsi nꞌa rä hnini näꞌä di mädi ꞌne di numäñho! Rä Mäkä Tꞌofo enä: «Rä Zi Dada Jeoba xa di mädi ꞌne di numäñho rä hnini» (Sal. 149:4). Pe rꞌabu̱, rꞌa yä amigo rä Zi Dada Jeoba di desanimä ꞌne enä: «Di pädi ge rä Zi Dada Jeoba pe̱ꞌtsi nꞌa rä hnini näꞌä di mädi ꞌne di numäñho. Pe xi nuga, ¿di numäñhogi ꞌne di mäkägi?». Mäyaꞌmu̱, rꞌa yä amigo rä Zi Dada Jeoba ꞌnehe bi japäbi xä ñhei dä senti ge rä Zi Dada Jeoba mi mädi ꞌne mi numäñho (1 Sam. 1:​6-10; Job 29:​2, 4; Sal. 51:11).

2. ¿Toꞌo nuꞌu̱ di mädi ꞌne di numäñho rä Zi Dada Jeoba?

² Rä Mäkä Tꞌofo udi ge mäske gatꞌho xtä mꞌu̱ihu̱ ko rä pekado, rä Zi Dada Jeoba dä za dä nugägihu̱ xä ñho ꞌne dä mäkägihu̱. Pa geꞌä mähyoni gä udihu̱ ge di pe̱ꞌspäbihu̱ rä jamfri rä Ñhesukristo ꞌne gä nxixtehehu̱ (Juan 3:16). Njabu̱ märꞌaa ma dä hyandi ge xtä arrepentihu̱ de mä pekadohu̱ ꞌne ge xtä prometebihu̱ rä Zi Dada Jeoba gä pe̱päbihu̱ rä bolunta (Hech. 2:38; 3:19). Rä Zi Dada Jeoba xa di johya ora di unihu̱ nuya yä paso pa gä pe̱ꞌtsihu̱ nꞌa rä hogä ntsitsꞌi Kongeꞌä. ꞌNehe, xa di numäñhogihu̱ ꞌne di mäkägihu̱ ora handi ge di o̱thu̱ ntsꞌe̱di po di kumplihu̱ näꞌä dä prometebihu̱ ora dä umbäbihu̱ mä bidahu̱ ꞌne dä nxixtehehu̱ (Sal. 25:14).

3. ¿Te mä ntꞌani ma gä thädihu̱?

³ ¿Por hanja rꞌaa di senti ge rä Zi Dada Jeoba hindi numäñho o hindi mädi? ¿De te mä forma rä Zi Dada Jeoba udi ge di numäñhogihu̱ ꞌne di mäkägihu̱? ¿Te dä za gä pe̱fihu̱ pa gä kombensehu̱ mä mfenihu̱ ꞌne mä korasohu̱ ge rä Zi Dada Jeoba di numäñhogihu̱ ꞌne di mäkägihu̱?

¿POR HANJA RꞌAA SENTI GE RÄ ZI DADA JEOBA HINDI NUMÄÑHO?

4, 5. Mäske rꞌabu̱ di sentihu̱ ge hinte di balehu̱, ¿de te di debe gä mꞌu̱ihu̱ seguro?

⁴ Ndunthi de gekhu̱ dende ndi bätsihu̱ ndi sentihu̱ ge hingä ndi balehu̱ (Sal. 88:15). Nꞌa rä zi ku rä thuhu Adrián enä: «Nzäntho xtä senti ge hinte di bale. Di beni ge dende nuꞌmu̱ ndi bätsi, ndi apäbi rä Zi Dada Jeoba dä matsꞌi mä familia pa dä za dä mꞌu̱i ha rä Paraiso, pe nuga ndi ꞌmu̱i seguro ge nuga himi meresegi gä mꞌu̱i ha rä Paraiso». Mä nꞌa rä zi ku rä thuhu Tony beni te mä bida bi zitsꞌi ko nuꞌu̱ yä dada hingä myä Testigo. Nuni zi ku enä: «Nuꞌu̱ mä dada nunka bi xikägi ge mi mäkägi o ge xmä ñho näꞌä ndi pe̱fi. Mi jakägi gä senti ge gatꞌho näꞌä ndi pe̱fi hingä ndi ja xä ñho o ge hingä ndi pe̱fi ja ngu mi to̱ꞌmiꞌu̱».

⁵ Mu̱ rꞌabu̱ di sentihu̱ ge hinte di balehu̱, rä Zi Dada Jeoba ne gä benihu̱ ge go geꞌä mismo bi hyongägihu̱ pa dä ehehu̱ ha rä hnini (Juan 6:44). Rä Zi Dada Jeoba pädi xä ñho toꞌogihu̱ ꞌne handi ndunthi yä hogä tꞌo̱tꞌe de gekägihu̱ mäske nuju̱se̱ hindi handihu̱ (1 Sam. 16:7; 2 Crón. 6:30). Hänge ora xikägihu̱ rä Zi Dada Jeoba ge pa geꞌä di balehu̱ ndunthi, mähyoni gä kamfribihu̱ (1 Juan 3:​19, 20).

6. ¿Te mi senti rä apostol Pablo ora mi epäbi ha rä mfeni nuꞌu̱ yä pekado xki yꞌo̱tꞌe mä mꞌe̱tꞌo?

⁶ Zäi ge rꞌa de gekhu̱ dä o̱tꞌehu̱ rꞌa yä pekado änte de gä pädihu̱ de rä Zi Dada Jeoba ꞌne geꞌä tobe u̱ngägihu̱ mä konsiensiahu̱ ꞌne di sentihu̱ ge rä Zi Dada Jeoba hinxä punꞌgägihu̱ (1 Ped. 4:3). Märꞌaa, mäske o̱tꞌe ndunthi rä tiempo pe̱päbi rä Zi Dada Jeoba, tobe sigi o̱tꞌe ntsꞌe̱di po dä ze̱ti ꞌne dä däpäbi nuꞌu̱ yä tꞌo̱tꞌe hingi ho rä Zi Dada Jeoba. Xi nuꞌi, ¿gi thogi njabu̱ ꞌnehe? Mu̱ hää, ogi kamfri ge ho̱nse̱ꞌi gi thogi njabu̱. Märꞌa yä amigo rä Zi Dada Jeoba xä senti njabu̱ ꞌnehe. Por ejemplo, rä apostol Pablo ꞌnehe xa mi ntsaui nuꞌu̱ yä tꞌo̱tꞌe hingi ho rä Zi Dada Jeoba (Rom. 7:24). Mäske ya xki arrepenti de gatꞌho nuꞌu̱ yä pekado nuꞌmu̱ bi nxixtehe, tobe mi senti ge nꞌa mrä yꞌo̱tꞌä tsꞌoki (1 Cor. 15:9; 1 Tim. 1:15).

7. ¿Te hindi debe gä dudahu̱ mu̱ ya xtä arrepentihu̱ de mä pekadohu̱?

⁷ Rä Zi Dada Jeoba di prometegihu̱ dä punꞌgägihu̱ ora di arrepentihu̱ (Sal. 86:5). Hänge mu̱ ko ngatꞌho mä korasohu̱ xtä arrepentihu̱ po nuꞌu̱ mä pekadohu̱, hindi debe gä dudahu̱ ge rä Zi Dada Jeoba ya xä punꞌgägihu̱ (Col. 2:13).

8, 9. ¿Te dä za gä pe̱fihu̱ pa gä kamfrihu̱ ge rä Zi Dada Jeoba di mäkägihu̱ ꞌne di numäñhogihu̱ mäske rꞌabu̱ hingi tsa gä umbäbihu̱ gatꞌho näꞌä gä nehmähu̱?

⁸ Gatꞌho di nehu̱ gä umbäbihu̱ de mä tsꞌe̱dihu̱ ꞌne de mä tiempohu̱ rä Zi Dada Jeoba. Pe rꞌaa senti ge hinxä logra xä me̱päbi rä Zi Dada Jeoba ja ngu di debe ꞌne ge po geꞌä rä Zi Dada Jeoba hindi numäñho. Nꞌa rä zi nju rä thuhu Amanda enä: «Rꞌabu̱ mäske hingi tsu̱kägi, xa di ne gä umbäbi ndunthi ꞌne mä ndunthi rä Zi Dada Jeoba. Ora hindi logra, geꞌä jakägi gä desanimä ꞌne di senti ge rä Zi Dada Jeoba hindi numäñhogi».

⁹ Ora di sentihu̱ ge nunka dä za gä johyabihu̱ rä koraso rä Zi Dada Jeoba, ¿te ma dä maxkägihu̱ pa gä täpäbihu̱ nuꞌu̱ mä mfenihu̱? Mähyoni gä benihu̱ ge rä Zi Dada Jeoba hingä rä exigente ꞌne di komprendegihu̱ ora handi ge hingi tsa gä umbäbihu̱ gatꞌho näꞌä gä nehmähu̱. Mu̱ di umbäbihu̱ gatꞌho näꞌä tsu̱kägihu̱ —hindi mporta hängu rä ndunthi— rä Zi Dada Jeoba handi ko ndunthi rä muui. Rä Mäkä Tꞌofo no̱ni rꞌa yä jäꞌi nuꞌu̱ bi me̱päbi rä Zi Dada Jeoba ko ngatꞌho yä koraso. Por ejemplo, rä apostol Pablo durante ndunthi yä je̱ya xa bi ñꞌo pa bi ꞌñuti yä jäꞌi de rä Noya Äjuä ꞌne bi mfaxte pa dä nja yä mhuntsꞌi ha ndunthi yä luga. Pe bi zo̱ho̱ rä pa habu̱ rä apostol Pablo ya himbi za bi me̱päbi rä Zi Dada Jeoba ja ngu mi ja änte. ¿Rä Zi Dada Jeoba ya himbi numäñho po geꞌä? Hinä. Koꞌmu̱ rä apostol Pablo bi sigi bi umbäbi näꞌä mi tsu̱päbi, rä Zi Dada Jeoba xa bi mädi ꞌne bi jäpi (Hech. 28:​30, 31). Njabu̱ ꞌnehe, mäske rꞌabu̱ hingi tsa gä pe̱päbihu̱ ndunthi rä Zi Dada Jeoba ja ngu gä nehmähu̱, pe näꞌä sigi mäkägihu̱ ꞌne di numäñhogihu̱, ngeꞌä näꞌä handi ge po̱ni de mä korasohu̱ näꞌä di umbäbihu̱. Ma gä handihu̱ de te mä forma udi rä Zi Dada Jeoba ge di mäkägihu̱ ꞌne di numäñhogihu̱.

¿DE TE MÄ FORMA UDI RÄ ZI DADA JEOBA GE DI NUMÄÑHOGIHU̱ ꞌNE DI MÄKÄGIHU̱?

10. ¿Hanja udi rä Zi Dada Jeoba ge johya kongekhu̱ ꞌne di mäkägihu̱? (Juan 16:27).

¹⁰ Po mäde de rä Mäkä Tꞌofo. Rä Zi Dada Jeoba xa di ho dä xipäbi yä amigo ge di mädi ꞌne di numäñho. Ha rä Mäkä Tꞌofo di tinihu̱ yo mꞌiki hanja rä Zi Dada Jeoba bi xipäbi rä Hesu ge xa mi mädi ꞌne ge mi numäñho (Mat. 3:17; 17:5). Xi nuꞌi, ¿gi hohmä dä xiꞌi rä Zi Dada Jeoba ge xa di johya kongeꞌi? Mäske rä Zi Dada Jeoba hingä ma dä ñä dende mähetsꞌi pa dä xiꞌi, pe hää xiꞌi po mäde de rä Mäkä Tꞌofo. Ora gi nxadi rä Mäkä Tꞌofo ꞌne gi handi hanja rä Hesu mi zofo nuꞌu̱ yä de̱ni, nuꞌu̱ yä noyaꞌu̱ ꞌñenä go xiꞌi rä Zi Dada Jeoba (hñeti Juan 16:27). Mi mꞌu̱kua rä Hesu ha rä Xiꞌmhai bi ꞌñudi xä ñho tenguꞌä rä mꞌu̱i rä Dada. Hänge ora ha rä Mäkä Tꞌofo di tinihu̱ hanja mi xipäbi nuꞌu̱ yä de̱ni ge xa mi mädi mäske rꞌabu̱ hingä geꞌä mi pe̱fi, dä za gä imäjinähu̱ ge nuꞌu̱ yä noyaꞌu̱ geꞌä xikägihu̱ rä Zi Dada Jeoba (Juan 15:​9, 15).

11. Ora di thogihu̱ yä xuñha ꞌne yä dumu̱i, ¿por hanja hindi debe gä mbenihu̱ ge rä Zi Dada Jeoba di nkue̱ kongekhu̱ o ge hindi numäñhogihu̱? (Santiago 1:12).

¹¹ Ko näꞌä pe̱fi. Rä Zi Dada Jeoba xa ne dä maxkägihu̱. Näꞌä rꞌakägihu̱ näꞌä di jakägihu̱ mꞌe̱di. Pe rꞌabu̱ rä Zi Dada Jeoba hopi gä thogihu̱ yä xuñha ja ngu bi thogi mäyaꞌmu̱ nꞌa de nuꞌu̱ yä amigo mrä thuhu Job (Job 1:​8-11). Ora di thogihu̱ yä xuñha, hindi signifika ge rä Zi Dada Jeoba di nkue̱ kongekhu̱ ꞌne hindi numäñhogihu̱, sino ke yä xuñha rꞌakägihu̱ rä oportunida de gä udihu̱ hängu di mädihu̱ rä Zi Dada Jeoba ꞌne hängu rä komfiansa di pe̱ꞌspäbihu̱ (hñeti Santiago 1:12). Ora di thogihu̱ yä xuñha ꞌne yä dumu̱i, dä za gä handihu̱ hängu di mäkägihu̱ rä Zi Dada Jeoba ꞌne rꞌakägihu̱ rä mfatsꞌi pa gä ze̱tihu̱.

12. ¿Te utkägihu̱ rä esperiensia rä zi ku Dimitri?

¹² Ma gä handihu̱ te bi thogi nꞌa rä zi ku rä thuhu Dimitri. Nuni zi ku bi ꞌmu̱i ha nꞌa de nuꞌu̱ yä dähni bi kohi ha Asia. Nꞌa rä pa nuni ku bi ꞌme̱di rä ꞌme̱fi. Koꞌmu̱ bi thogi yä zänä ꞌne himi tini mä nꞌaa, bi desidi bi usa näꞌä rä tiempo pa bi predika mä nꞌa tu̱i ꞌne njabu̱ bi ꞌñuti rä Zi Dada Jeoba ge mi pe̱ꞌspäbi rä komfiansa. Pe bi thogi ndunthi yä zänä ꞌne aparte de ke himi tini mä nꞌa rä ꞌme̱fi, ꞌnehe bi zu̱di nꞌa rä ñheni näꞌä himi hopäbi dä nangi de rä fidi. Hänge rä zi ku Dimitri bi mu̱di bi mbeni ge himi kumpli rä responsabilida ko yä bätsi ꞌne ko rä ꞌme̱hñä, ꞌne bi senti ge rä Zi Dada Jeoba mi nkue̱ kongeꞌä ꞌne himi numäñho. Pe nꞌa rä pa, rä zi nxutsi bi hyokä nꞌa rä zi he̱ꞌmi ꞌne bi hñutsꞌi nuya yä noya ehe ha Isaías 30:15 habu̱ enä: «Mu̱ hingi ntsuhu̱ ꞌne gi ꞌñudihu̱ rä komfiansa, geꞌä ma dä rꞌaꞌähu̱ rä tsꞌe̱di». Ora rä zi nxutsi bi ntregabi nunä zi he̱ꞌmi ꞌnehe bi ꞌñembäbi: «Papa, ora gi turimu̱i beni nunä testo». Rä zi ku Dimitri bi da ngue̱nda ge ko rä mfatsꞌi rä Zi Dada Jeoba, rä familia hixki mꞌe̱päbi te dä hye̱e̱, te dä zi ꞌne habu̱ dä mꞌu̱i. Rä zi ku Dimitri enä: «Dä da ngue̱nda ge mi debe gä sigi gä pe̱ꞌtsä rä calma, hingä ntsu ꞌne gä pe̱ꞌspäbi rä komfiansa rä Zi Dada Jeoba». Mu̱ nuꞌi ꞌnehe gi thogi yä xuñha, dä za gi mꞌu̱i seguro ge rä Zi Dada Jeoba turämu̱i po geꞌi ꞌne ma dä rꞌaꞌi rä tsꞌe̱di pa gi ze̱ti.

13. ¿Te mä nꞌa pe̱fi rä Zi Dada Jeoba pa utkägihu̱ ge di mäkägihu̱ ꞌne numäñhogihu̱?

¹³ Po mäde de yä ku. Rä Zi Dada Jeoba dä za dä usa yä ku pa dä nupkägihu̱ mä mfenihu̱ ora di thogihu̱ yä xuñha ꞌne yä dumu̱i. Geꞌä bi thogi nꞌa rä zi nju näꞌä bi ꞌmu̱i ꞌnehe ha nꞌa de nuꞌu̱ yä dähni bi kohi ha Asia. Nuni zi nju bi ꞌme̱di ꞌnehe rä ꞌme̱fi ꞌne bi zu̱di nꞌa rä ñheni. Mꞌe̱fa, rä däme bi yꞌo̱tꞌe nꞌa rä däta pekado ꞌne bi thäki de gä anciano. Näꞌä zi nju bi ꞌñenä: «Hingä ndi ntiende por hanja ndi thogi gatꞌho nuya yä xuñha. Rꞌabu̱ ndi mbeni ge te xti o̱tꞌe hänge rä Zi Dada Jeoba mi nkue̱ kongeki ꞌne himi numäñhogi. Hänge dä xatuäbi rä Zi Dada Jeoba ꞌne dä apäbi dä ꞌñutkägi mu̱ tobe mi sigi mi mäkägi, ꞌne näꞌä bi dädi mä sadi. Yä anciano bi ñä kongeki ꞌne bi maxkägi pa dä handi ge rä Zi Dada Jeoba xa mi mäkägi». Mꞌe̱fa, näꞌä zi nju bi xatuäbi mänꞌaki rä Zi Dada Jeoba ꞌne mänꞌaki bi hyandi hanja näꞌä bi dädi rä sadi. Nunä zi nju enä: «Mismo näꞌä paꞌä dä häni nꞌa rä karta näꞌä xki yꞌofo yä zi ku de rä mhuntsꞌi. Ora dä heti näꞌä kartaꞌä dä handi hanja rä Zi Dada Jeoba xki dädi mä sadi». Ja ngu di handihu̱, ora mä kuhu̱ di nupkägihu̱ mä mfenihu̱, rä Zi Dada Jeoba utkägihu̱ ge di mäkägihu̱ ꞌne di numäñhogihu̱ (Sal. 10:17).

14. ¿Ndaꞌä mä nꞌa rä forma hanja usa rä Zi Dada Jeoba yä ku pa dä ꞌñutkägihu̱ ge di mäkägihu̱ ꞌne di numäñhogihu̱?

¹⁴ Rä Zi Dada Jeoba ꞌnehe utkägihu̱ ge di mäkägihu̱ ꞌne numäñhogihu̱ ora usa yä ku pa dä rꞌakägihu̱ yä konseho. Por ejemplo, ha rä mu̱di siglo rä Zi Dada Jeoba bi usa rä apostol Pablo pa bi yꞌofo 14 yä karta habu̱ ꞌnehe bi yꞌofo ndunthi yä konseho. ¿Por hanja rä Zi Dada Jeoba bi japäbi rä apostol Pablo dä yꞌofo nuꞌu̱ yä konsehoꞌu̱? Ngeꞌä rä Zi Dada Jeoba xa rä hojäꞌi ꞌne di mäkägihu̱ ja ngu nꞌa rä dada mädi yä zi bätsi (Prov. 3:​11, 12). Hänge ora tꞌakägihu̱ nꞌa rä konseho ko rä Mäkä Tꞌofo, signifika ge rä Zi Dada Jeoba di mäkägihu̱ ꞌne di numäñhogihu̱, ꞌne hindi debe gä mbenihu̱ ge näꞌä di nkue̱ kongekhu̱ (Heb. 12:6). Pe ja märꞌa yä forma hanja rä Zi Dada Jeoba utkägihu̱ ge di mäkägihu̱ ꞌne di numäñhogihu̱. Ma gä handihu̱.

MÄRꞌA YÄ FORMA HANJA RÄ ZI DADA JEOBA UTKÄGIHU̱ GE DI MÄKÄGIHU̱ ꞌNE NUMÄÑHOGIHU̱

15. ¿Toꞌo umbäbi rä Zi Dada Jeoba rä espiritu santo ꞌne por hanja?

¹⁵ Rä Zi Dada Jeoba umbäbi rä espiritu santo gatꞌho nuꞌu̱ di mädi ꞌne di numäñho (Mat. 12:18). Kada nꞌa de nuju̱ dä za gä ñꞌanise̱hu̱: «¿Di nheki ha mä bida ge di pe̱ꞌspäbi rä espiritu santo rä Zi Dada Jeoba? Por ejemplo, ¿mänꞌa di pe̱ꞌtsibye̱ rä pasensia ke änte de gä pädi de rä Zi Dada Jeoba?». Entremäs gi de̱mbäbi rä mꞌu̱i rä Zi Dada Jeoba, mänꞌa ma dä nheki ge gi pe̱ꞌspäbi rä espiritu santo ꞌne ge näꞌä xa di numäñhoꞌi (hyandi rä recuadro «Gehya nuꞌu̱ yä mꞌu̱i ehe de rä espiritu santo rä Zi Dada Jeoba»).

16. Ja ngu di handihu̱ ha 1 Tesalonicenses 2:​4, ¿toꞌo di usa rä Zi Dada Jeoba pa dä mämbäbi rä Noya ꞌne te jaꞌi gi senti ora gi pädi njabu̱?

¹⁶ Rä Zi Dada Jeoba xä nkargobi dä mämbäbi rä Noya nuꞌu̱ yä jäꞌi di numäñho (hñeti 1 Tesalonicenses 2:4). Geꞌä xä hyandi nꞌa rä zi nju rä thuhu Jocelyn. Nunä zi nju enä: «Nꞌa rä pa himi ja mä ganä gä nangi. Ndi senti ge mi otho mä tsꞌe̱di pa te gä pe̱fi. Pe koꞌmu̱ ndrä precursora ꞌne näꞌä rä paꞌä xti ꞌueke pa gä po̱ni gä ungä ntꞌo̱de, hänge dä xatuäbi rä Zi Dada Jeoba ꞌne dä po̱ni». Näꞌä xudiꞌä rä zi nju Jocelyn bi dini nꞌa rä zi ꞌme̱hñä rä thuhu Mary. Nunä zi ꞌme̱hñä xa bi yꞌo̱de xä ñho ꞌne bi asepta nꞌa rä ntꞌudi de rä Mäkä Tꞌofo. Mi thogi rꞌa yä zänä, Mary bi xipäbi rä zi nju Jocelyn ge näꞌä xudi xki ñäui, änte de geꞌä xki xatuäbi Äjuä ꞌne xki yꞌapäbi rä mfatsꞌi. ¿Te bi bädi rä zi nju Jocelyn kongehnä? Rä zi nju Jocelyn enä: «Dä senti hanja rä Zi Dada Jeoba ꞌñenä go mi engägi: “Di mäꞌi ꞌne di numäñhoꞌi”». Mäske hingä gatꞌho yä jäꞌi di ho dä yꞌo̱de de rä Noya Äjuä ja ngu rä zi nä Mary, pe hindi debe gä dudahu̱ ge rä Zi Dada Jeoba xa di johya ora handi ge di o̱thu̱ ntsꞌe̱di po gä po̱nihu̱ gä utihu̱ märꞌa yä jäꞌi de Geꞌä ꞌne de rä Noya.

17. Ko näꞌä rä esperiensia rä zi nju Vicky, ¿te dä za gi pädi de näꞌä rä njutꞌi bi uni rä Zi Dada Jeoba? (Salmo 5:12).

¹⁷ Rä Zi Dada Jeoba di usa näꞌä rä njutꞌi bi uni pa nuꞌu̱ toꞌo di mädi ꞌne di numäñho (1 Tim. 2:​5, 6). ¿Pe xiꞌmu̱ ya di pe̱ꞌspäbihu̱ rä komfiansa näꞌä rä njutꞌi bi uni ꞌne ya xtä nxixtehehu̱, pe mäske njabu̱ di jakägihu̱ xä ñhei gä kamfrihu̱ ge rä Zi Dada Jeoba di mäkägihu̱ ꞌne di numäñhogihu̱? Beni ge hingä nzäntho di debe gä kamfribihu̱ näꞌä xikägihu̱ mä mfenihu̱ ꞌne mä korasohu̱; pe hää nzäntho di debe gä kamfrihu̱ näꞌä xikägihu̱ rä Zi Dada Jeoba. Rä Zi Dada Jeoba di numäñho ꞌne di promete dä jäpi gatꞌho nuꞌu̱ pe̱ꞌspäbi rä komfiansa näꞌä rä njutꞌi bi uni (hñeti Salmo 5:12; Rom. 3:26). Nꞌa rä zi nju rä thuhu Vicky xa bi matsꞌi ndunthi ora bi hñudi bi ntso̱ꞌmi hängu rä muui pe̱ꞌtsi näꞌä rä njutꞌi bi uni Jeoba po kada nꞌa de gekhu̱. Nunä zi nju enä: «Dä da ngue̱nda ge mu̱ hingä asepta ge Jeoba di mäkägi, ꞌñenä go di embäbi: “Ri mhäte hingä xa rä däta pa dä zu̱kägi. Hindä za gi mädi nꞌa rä jäꞌi nguga. Rä bida näꞌä ri Tꞌu̱ gä uni, hindä za dä goꞌmi gatꞌho mä pekado”». Nunä zi nju sigi enä: «Dä handi hängu rä muui pe̱ꞌtsi näꞌä rä njutꞌi bi uni Jeoba po geki ꞌne geꞌä bi maxkägi pa dä senti ndunthi rä mhäte po Geꞌä». Ja ngu rä zi nju Vicky, mu̱ nuju̱ ꞌnehe gä hudihu̱ ꞌne gä ntso̱ꞌmihu̱ hängu rä muui pe̱ꞌtsi näꞌä rä njutꞌi bi uni rä Zi Dada Jeoba po kada nꞌa de gekhu̱, ma gä sentihu̱ hängu di mäkägihu̱ ꞌne ma gä sentihu̱ ndunthi rä mhäte po Geꞌä ꞌnehe.

18. ¿Te di prometegihu̱ rä Zi Dada Jeoba mu̱ gä sigihu̱ gä o̱thu̱ ntsꞌe̱di po gä mädihu̱?

¹⁸ Mäske ha nunä imformäsio dä handihu̱ hängu di mäꞌi rä Zi Dada Jeoba, rꞌabu̱ mänꞌaki ma dä jaꞌi xä ñhei gi kamfri ge di numäñhoꞌi. Ora gi thogi njabu̱, beni ge rä Zi Dada Jeoba handi hängu gi ze̱ti ꞌne xa di numäñhoꞌi ngeꞌä gi sigi gi o̱tꞌe ntsꞌe̱di po gi ꞌñudi ge gi mädi (Sant. 1:12). Hänge sigi gi yꞌo̱tꞌe ntsꞌe̱di po gi joni ko rä Zi Dada Jeoba ꞌne ogi ꞌuege de Geꞌä. Yꞌo̱tꞌe ntsꞌe̱di po gi hyandi de te mä forma udi rä Zi Dada Jeoba ge xa di mäꞌi ꞌne di numäñhoꞌi. Beni ꞌne ogi pumfri ge rä Zi Dada Jeoba «hingi ꞌmu̱i yabu̱ de kada nꞌa de gekhu̱» (Hech. 17:​27, TNM).