Base Sólido pa Optimismo Awe

E HISTORIADO i sociólogo H. G. Wells, cu a nace na 1866, a ehercé un influencia poderoso riba hende su forma di pensa den siglo 20. Atrabes di su skirbimentunan, el a exponé su conviccion cu e periodo di gran felicidad lo a bai man den man cu progreso científico. Asina, Collier’s Encyclopedia ta recordá Wells su “optimismo sin límite” segun cu el a traha incesantemente pa promové su causa. Pero e ta mencioná tambe cu su optimismo a cai den otro ora Guera Mundial II a estayá.

Ora Wells a bin realisá cu “ciencia por a contribuí na tantu malu como bon, su fe a desvanecé, i el a cai den pesimismo,” Chambers’s Biographical Dictionary ta declará. Pakico esaki a sosodé?

Wells su fe i optimismo tabata basá solamente riba logronan humano. Ora el a realisá cu humanidad tabata incapas pa alcansá su utopia, e no por a acudí ningun otro caminda. Rápidamente desesperacion a bira pesimismo.

Awe, hopi hende ta pasa den e mésun experencia p’e mésun motibu. Nan ta brota di optimismo ora nan ta yong pero, segun cu nan ta bira mas bieu nan ta bira amargamente pesimista. Tin asta hóbennan cu ta legumai e asina yamá curso normal di bida i ta entregá nan mes na droga, promiscuidad i otro estilo di bida destructivo. Kico ta e solucion? Considerá e siguiente ehempelnan for di tempunan bíblico i mira ki base tin pa optimismo—den pasado, presente i futuro.

Abraham Su Optimismo A Ser Recompensá

Na aña 1943 P.E.C., Abraham a muda for di Haran, a crusa Riu Eufrátes i a drenta e tera di Canan. Bijbel ta describí Abraham como “tata di tur esnan cu tin fe,” i ki un ehempel excelente el a pone!—Romanonan 4:11.

Lot, yu homber huérfano di ruman di Abraham, i su famia a compañá Abraham. Mas despues, ora un hamber a asotá e pais, e dos famianan a muda bai Egipto, i na su debido tempu nan a regresá huntu. P’e tempu aki tantu Abraham como Lot a acumulá hopi rikesa i tambe tou di bestia. Ora a surgi un pleitu entre nan cuidadónan di bestia, Abraham a tuma iniciativa i a bisa: “Por fabor, no laga pa tin mas pleitu entre ami cu bo i entre mi cuidadónan di bestia cu bo cuidadónan di bestia, pasobra ta ruman nos ta. No ta henter e pais ta na bo disposicion? Por fabor, separá for di mi. Si bo bai banda robes, e ora ei ami sigur lo bai banda drechi; pero si bo bai banda drechi, e ora ei ami sigur lo bai banda robes.”—Génesis 13:8, 9.

Abraham, siendo esun mas grandi di nan dos, lo por a dirigí asuntunan na su cumbinencia, i Lot, debí na su respet pa su tio, por a cede na loke Abraham a scoge. En bes di esei, “Lot a hisa su wowonan i a mira henter e Distrito di Jordan, cu henter esei tabata un region unda hopi awa ta core promé cu Jehova a ruiná Sódoma i Gomora, manera e hardin di Jehova, manera e tera di Egipto te na Zoar. E ora ei Lot a scoge pa su mes henter e Distrito di Jordan.” Cu un decision asina, Lot tabatin tur motibu pa ta optimista. Pero kico di Abraham?—Génesis 13:10, 11.

Abraham tabata prufiá, riscando e bienestar di su famia? No. Abraham su actitud positivo i spiritu generoso a trece un recompensa ricu. Jehova a bisa Abraham: “Hisa bo wowonan, por fabor, i mira for di e lugá caminda bo ta, den direccion nort i den direccion sur i den direccion oost i den direccion west, pasobra tur e tera cu bo ta mirando, na bo i na bo simia mi ta bai dun’é te na tempu indefiní.”—Génesis 13:14, 15.

Abraham su optimismo tabatin un base sólido. E tabata fundá riba e promesa di Dios cu lo el a traha un gran nacion for di Abraham di manera cu “tur e famianan dje suela siguramente [lo a] bendicioná nan mes pa medio di [Abraham].” (Génesis 12:2-4, 7) Sabiendo cu “Dios ta haci tur su obranan cooperá huntu p’e bienestar di esnan cu ta stima Dios,” nos tambe tin motibu pa tin confiansa.—Romanonan 8:28.

Dos Spion Optimista

Mas cu 400 aña despues, e nacion di Israel tabata cla pa drenta Canan, ‘un tera cu a abundá cu lechi i miel.’ (Exodo 3:8; Deuteronomio 6:3) Moises a comisioná 12 hefe di tribu pa ‘explorá e tera i trece bek palabra tocante e caminda dor di cua nan mester subi i e stadnan na cua nan lo yega.’ (Deuteronomio 1:22; Númeronan 13:2) Den nan descripcion dje prosperidad dje tera tur e 12 spionnan tabata unánime, pero 10 di nan a duna un informe pesimista cu a hinca miedu den curason dje pueblo.—Númeronan 13:31-33.

Di otro banda, Hosué i Caleb a presentá un mensahe optimista n’e pueblo i nan a haci tur loke nan tabata por pa trankilisá nan temornan. Nan actitud i informe a reflehá pleno confiansa den Jehova su abilidad pa cumpli cu su palabra di hiba nan e Tera Primintí bek—pero en bano. En bes di esei, “henter e asamblea a papia di piedra nan.”—Númeronan 13:30; 14:6-10.

Moises a urgi e pueblo pa confia den Jehova, pero nan a nenga di scucha. Dor cu nan a persistí den nan actitud pesimista, henter e nacion tabatin cu dual 40 aña den desierto. Dje 12 spionnan, solamente Hosué i Caleb a experenciá e recompensanan di ta optimista. Kico tabata e problema básico? Falta di fe, ya cu e pueblo a bai tras di nan mes sabiduria.—Númeronan 14:26-30; Hebreonan 3:7-12.

E Vacilacion di Jónas

Jónas a biba den siglo nuebe P.E.C. Bijbel ta indicá cu e tabata un fiel profeta di Jehova p’e reino di dies tribu di Israel, un tempu durante e reinado di Jeróboam II. Sin embargo, el a nenga di aceptá un comision pa bai Nínive pa duna un spiertamentu n’e pueblo. Historiadó Josefo ta bisa cu Jónas “a pensa cu ta mihó e hui” i bai Jope na lugá di Nínive. Aya el a subi un barcu rumbo pa Társis, probablemente loke awe ta Spaña. (Jónas 1:1-3) E motibu pakico Jónas a adoptá un punto di bista pesimista dje asignacion aki ta ser splicá na Jónas 4:2.

Finalmente Jónas a bai di acuerdo pa cumpli cu su mision, pero el a rabia ora e pueblo di Nínive a repentí. P’esei Jehova a siñ’é un les excelente di compasion dor di laga e mata di calbas di botter bou di cua Jónas tabata sconde pa solo, marchitá i muri. (Jónas 4:1-8) Jónas su sintimentunan di duele p’e morto dje mata mas bien mester tabata p’e 120.000 hombernan den Nínive cu no tabata sa “e diferencia entre nan man drechi i nan man robes.”—Jónas 4:11.

Kico nos por siña for dje experencia di Jónas? Den sirbishi sagrado no tin lugá pa pesimismo. Si nos dicerní Jehova su direccion i siguié cu pleno confiansa, nos lo tin éxito.—Proverbionan 3:5, 6.

Optimismo Meimei di Contratempu

“No mustra cunsumí pa causa dje malechornan,” Rey David a declará. “No envidiá esnan cu ta haci inhusticia.” (Salmo 37:1) Esei, en berdad, ta conseho sabí, pasobra awe inhusticia i perversidad ta tur rond di nos.—Eclesiástes 8:11.

Sin embargo, asta si nos no ta envidiá e inhustunan, ta fácil pa nos sinti nos frustrá ora nos mira hende inocente sufri na man dje malbadonan of ora nos mes ta ser tratá inhustamente. Experencianan asina por asta pone nos desaroyá un actitud desanimá of pesimista. Ora nos ta sinti asina, kico nos mester haci? Di promé, nos por tene na mente cu e malbadonan no por asumí cu nunca nan lo no haña nan pago. Salmo 37 ta pasa na sigurá nos den versículo 2: “Manera yerba nan [malechornan] lo marchitá rápidamente, i manera yerba nobo berde nan lo desvanecé.”

Ademas, nos por sigui haci loke ta bon, keda optimista, i spera riba Jehova. “Apartá di loke ta malu i haci loke ta bon, i por lo tantu biba te na tempu indefiní,” e salmista a continuá. “Pasobra Jehova ta un stimador di husticia, i lo e no bandoná su lealnan.”—Salmo 37:27, 28.

Berdadero Optimismo Ta Prevalecé!

Kico, anto, di nos futuro? E buki bíblico di Revelacion ta bisa nos tocante “cosnan cu mester sosodé pronto.” Entre nan tin e revelacion di un cabai color di candela, cu ta representá guera i cu ta “kita pas for dje tera.”—Revelacion 1:1; 6:4.

Un opinion popular—i optimista—cu a existí na Gran Bretania durante Guera Mundial I tabata cu esei lo tabata e último guera grandi. Na 1916, e estadista británico David Lloyd George tabata mas realístico. El a bisa: “E guera aki, mescos cu e siguiente guera, ta un guera pa caba cu guera.” (Letternan cursivo ta di nos.) E tabatin rason. Guera Mundial II solamente a acelerá e produccion di métodonan mas diabólico di destruccion masal. Mas cu 50 aña despues, ainda no tin un fin di guera na bista.

Den e mésun buki di Revelacion, nos ta lesa di otro ginetenan—simbolisando hamber, pest i morto. (Revelacion 6:5-8) Nan ta mas aspectonan dje señal di tempu.—Mateo 24:3-8.

Esakinan ta causa pa pesimismo? Di ningun manera, pasobra e vision ta describí tambe “un cabai blancu; i esun sintá riba dje tabatin un boog; i un corona a ser duná na dje, i el a sali venciendo i pa completá su victoria.” (Revelacion 6:2) Aki nos ta mira Jesucristo como un Rey celestial eliminando tur maldad, coriendo pa establecé pas i armonia rond mundu.a

Tempu Jesucristo tabata riba tera, como Rey-Designá, el a siña su disipelnan pidi p’e Reino ei den oracion. Tal bes bo tambe a siña resa e oracion di “Nos Tata.” Den dje nos ta pidi p’e Reino di Dios bini, pa su boluntad ser cumplí aki riba tera mescos cu den shelu.—Mateo 6:9-13.

En bes di purba lapi e sistema actual di cosnan, Jehova, actuando mediante su Rey Mesiánico, Cristo Jesus, lo elimin’é completamente. Na lugá di e sistema actual, Jehova ta bisa, “mi ta creando shelu nobo i un tera nobo; i e cosnan anterior lo no ser recordá, ni nan lo no subi na curason.” Bou dje gobiernu di e Reino celestial, e tera lo bira un hogar pacífico i felis pa humanidad, caminda bida i trabou lo ta un goso constante. “Sea gososo pa semper den loke mi ta creando,” Jehova ta bisa. “Mi scogínan lo gosa completamente dje trabou di nan mes man.” (Isaías 65:17-22) Si bo basa bo speransa pa futuro riba e promesa infalibel ei, lo bo tin tur motibu pa ta optimista—awor i pa semper!

[Nota]

[Plachi na página 4]

H. G. Wells

[Rekonosementu]

Corbis-Bettmann