Yehova Tin Masha Kariño pa Bo

1. Kon bo ta imaginá ku Yehova Dios ta?

ORA bo resa na Yehova, kon bo ta imaginá ku e ta? Kiko ta bini na bo mente? Bèrdat ku Yehova ta invisibel, pero wak e diferente maneranan ku Beibel ta deskribié. Tin kaminda e ta bisa ku Yehova ta un “solo,” “un eskudo” i “un kandela destruktivo.” (Sal. 84:11; Heb. 12:29) Beibel ta kompará Yehova su presensia ku un piedra di safiro, un regenbog ku ta bria i un metal briante. (Eze. 1:26-28) E deskripshonnan ei por yena bo ku atmirashon òf asta duna bo miedu.

2. Kiko por pone ku ta difísil pa nos hala serka Yehova?

² Komo ku nos no por mira Yehova, kisas esei ta pone ku ta difísil pa nos kere ku e stima nos. Tin di nos ta pensa: ‘Niun hende no stima mi, pues hamas Yehova por stima mi.’ Un di e motibunan ku nos ta pensa esei kisas ta pasó nos mes tata nunka no a stima nos. Yehova ta komprondé kon bo ta sinti i e sa kon duru ta pa bo kere ku e stima bo i pa bo hala serka dje. Pa yuda bo komprondé kuantu e stima bo, el a laga skirbi den Beibel detayenan ku lo yuda bo mira e sorto di persona ku e ta.

3. Dikon ta bon pa siña un poko mas tokante Yehova su amor pa nos?

³ E palabra ku ta deskribí Yehova mihó ta amor. Beibel ta bisa ku “Dios ta amor.” (1 Huan 4:8) Delaster un kos ku Yehova hasi, e ta hasié pa amor. E amor ku e tin ta asina grandi i fuerte ku Yehova ta asta stima hende ku no stim’é. (Mat. 5:44, 45) Den e artíkulo akí, nos ta bai siña un poko mas tokante Yehova i su amor. Mas nos siña tokante Yehova, mas nos lo stim’é.

YEHOVA STIMA NOS MASHA HOPI MES

4. Kon bo ta sinti ora bo pensa ku Yehova tin masha kariño pa bo? (Wak e plachi.)

⁴ “Yehova tin masha kariño.” (Sant. 5:11) Beibel ta kompará Yehova ku un mama kariñoso. (Isa. 66:12, 13) Imaginá un mama ku ta kuida su yu chikitu ku masha ternura i amor. E tiné den su skochi i ta papia kuné masha lif. Ora e yu yora òf tin doló, mesora e t’ei pa hasi sigur ku e yu tin tur loke e mester. Asina tambe, nos por tin sigur ku, ora nos ta sufri òf tin doló, Yehova lo t’ei pa nos. E salmista a bisa: “Ora ku mi preokupashonnan tabata muchu pa mi, ta abo tabata konsolá mi i trankilisá mi.”—Sal. 94:19.

5. Kon bo ta sinti di sa ku Yehova su amor pa bo ta leal?

⁵ Yehova ta leal. (Sal. 103:8) Ora nos faya òf hasi algu malu, e no ta stòp di stima nos. Wak e nashon di Israel. Bes tras bes nan a desapuntá Yehova. Pero ora nan a sinti duele di e kos ku nan a hasi i a stòp di hasi e kos ei, Yehova a sigurá nan ku lo e sigui stima nan pa semper. Un biaha el a bisa e nashon: “Bo a bira balioso den mi bista, mi a konsiderá bo digno di onor, i mi stima bo.” (Isa. 43:4, 5) Anto Yehova no a kambia. Nos por tin sigur ku e stima nos asina tambe. Asta si nos kometé un fayo grave, Yehova lo no bandoná nos. Si nos sinti duele, stòp ku e kos malu i bolbe serka Yehova, nos lo ripará ku ainda e ta stima nos. El a primintí di “pordoná [nos] generosamente.” (Isa. 55:7) Beibel ta bisa ku Yehova su pordon lo duna nos pas, trankilidat i alivio.—Echo. 3:19.

6. Kiko Zakarías 2:8 ta siña nos tokante Yehova?

⁶ Lesa Zakarías 2:8. Komo ku Yehova stima nos, loke nos ta sinti tin efekto riba dje, i e ke protehá nos. Ora nos ta sufri, e tambe ta sufri. P’esei nos por pidié: “Protehá mi manera bo pret’i wowo.” (Sal. 17:8) Wowo ta un parti delikado i presioso di e kurpa. Pues, ora Yehova kompará nos ku su pret’i wowo, ta komo si fuera e ta bisa: “Ken ku mishi ku mi pueblo, ta mishi ku algu ku ta masha presioso mes pa mi.”

7. Dikon nos mester konvensé nos mes ku Yehova stima nos?

⁷ Yehova ke pa bo ta konvensí ku e ta stima bo. Pero e sa ku debí na kosnan doloroso ku bo a òf ta pasa aden, kisas bo ta duda si di bèrdat e stima bo. Kiko por yuda bo konvensé bo mes ku Yehova ta stima bo? Esei ta di mira kon Yehova ta mustra ku e stima Hesus, e ungínan i nos tur.

KON YEHOVA TA MUSTRA SU AMOR?

8. Dikon Hesus tabata asina konvensí ku su Tata stim’é?

⁸ E personanan ku a pasa mas tantu tempu huntu ta Yehova i su Yu. Pa míles di miónes di aña nan amistat i amor a bira mas i mas fuerte. Na Mateo 17:5 nos ta mira ku Yehova no tabatin bèrgwensa pa bisa ku e stima Hesus. Yehova por a djis bisa: ‘Esaki ta esun ku tin mi aprobashon.’ Pero, komo ku e tabata ke pa nos sa kuantu e ta stima Hesus, el a yama Hesus “mi Yu stimá.” Yehova tabata orguyoso di su Yu, foral pasobra e tabata dispuesto di entregá su bida. (Efe. 1:7) Anto Hesus di su banda, nunka a duda ku su Tata stim’é. Hesus tabata asina konvensí ku su Tata stim’é ku e mes a bisa esei bes tras bes.—Huan 3:35; 10:17; 17:24.

9. Kon nos sa ku Yehova stima e ungínan? Splika. (Romanonan 5:5)

⁹ Yehova ta mustra tambe ku e stima e ungínan. (Lesa Romanonan 5:5.) Ripará ku Pablo a bisa ku nan “kurason a yena ku amor di Dios.” Un buki di referensia a kompará Dios su amor ku un riu. Esei ta yuda nos visualisá kuantu Yehova stima e ungínan! Anto e ungínan sa ku Dios stima nan. (Hudas 1) Apòstel Huan a bisa kon nan ta sinti: “Mira ki gran amor e Tata a mustra na nos: el a permití nos ser yamá yu di Dios.” (1 Huan 3:1) Pero ta e ungínan so Yehova stima? Nò, Yehova a mustra ku e stima nos tur.

10. Ki ta e prueba di mas grandi ku Yehova stima bo?

¹⁰ Ki ta e prueba di mas grandi ku Yehova stima nos? E reskate! Loke Yehova a hasi ei ta mustra ku e stima nos mas ku kualke persona. (Huan 3:16; Rom. 5:8) Yehova a entregá su Yu ku el a stima asina tantu i a lag’é muri pa nos tur ya asina nos por haña pordon pa nos pikánan i bira Su amigu. (1 Huan 4:10) Mas nos pensa riba e preis haltu ku Yehova i Hesus a paga, mas mihó nos lo komprondé kuantu nan stima kada un di nos. (Gal. 2:20) Ta bon pa nos realisá ku Yehova no a paga e reskate djis pasobra e mester a kumpli ku su hustisia. El a pag’é pasó e stima nos. Yehova a demostrá nos esei ora el a sakrifiká Hesus, e persona di mas presioso p’e, i lag’é sufri i muri pa nos.

11. Kiko nos ta siña for di Yeremías 31:3?

¹¹ Manera nos a mira, Yehova no ta djis sinti amor pa nos, sino ku e ta mustr’é tambe. (Lesa Yeremías 31:3.) El a hala nos serka dje pasobra e stima nos. (Kompará ku Deuteronomio 7:7, 8.) Nada ni niun persona no por separá nos for di e amor ku e tin pa nos. (Rom. 8:38, 39) Kon bo ta sinti ora bo pensa riba esei? Ban lesa Salmo 23. Miéntras nos ta les’é, wak kon David a sinti tokante Yehova su amor, i kon abo por sinti meskos.

KON BO TA SINTI ORA BO PENSA RIBA KUANTU YEHOVA STIMA BO?

12. Kon lo bo resumí Salmo 23?

¹² Lesa Salmo 23:1-6. Den Salmo 23, David a mustra ku e ta konvensí ku Yehova ta stim’é i ta kuid’é ku kariño. El a bisa ku e tin un amistat será ku Yehova, kende ta su Wardador. David a sintié safe pasó e tabata sa ku Yehova ta gui’é i a konfia kompletamente den djE. David tabata konvensí ku Yehova su amor lo kompañ’é tur e dianan di su bida. Kon bini e tabata asina konvensí?

13. Dikon David tabata konvensí ku Yehova lo kuid’é?

¹³ “Mi no tin falta di nada.” David por a sinti kon bon Yehova tabata kuid’é pasobra semper Yehova a dun’é tur loke e tabatin mester. Ademas, David tabata sa ku e tin Yehova su amistat i aprobashon. Ta p’esei e tabata asina konvensí ku ni maske kiko pas’é, Yehova lo sòru p’e no tin falta di nada. Debí ku David tabata konvensí ku Yehova stim’é i lo kuid’é, esei a yud’é pa no preokupá pero pa ta kontentu i satisfecho.—Sal. 16:11.

14. Kon Yehova ta kuida nos?

¹⁴ Yehova ta kuida nos ku kariño, foral ora kos ta bai malu den nos bida. Claire,a kende tin mas ku 20 aña na Bètel, no tabata sa kiko pa hasi ora su famia a haña nan ku un sla tras di otro. Su tata a haña un ataká selebral, su famia mester a sera nan negoshi chikitu, banko a kita nan kas i un di su ruman muhénan a ser ekspulsá. Kon Yehova a mustra ku e tabata kuida nan? Claire a bisa: “Tur dia Yehova a pèrkurá pa mi famia tin loke nan tabatin mester. Bes tras bes, el a duna nan mas di loke ami por a imaginá! Hopi biaha mi ta sinta pensa kon Yehova a yuda nos i nunka lo mi lubidá kon el a mustra nos ku e ta stima nos. E rekuerdonan ei ta yuda mi sigui sirbié ku goso ora kosnan ta bai malu.”

15. Dikon David a sinti ku el a haña forsa atrobe? (Wak e plachi.)

¹⁵ “E ta duna mi forsa atrobe.” Tabatin biaha ku David a hañ’é ku asina tantu problema ku e tabata sintié angustiá. (Sal. 18:4-6) Pero, e amor i kuido kariñoso di Yehova a yud’é haña forsa atrobe. Yehova a hiba su amigu sosegá na un “kunuku di yerba bèrdè” i “kantu di awa.” Asina ei David a haña forsa atrobe i por a sigui sirbi Yehova ku goso.—Sal. 18:28-32.

16. Kon abo a sinti ku Yehova a duna bo forsa atrobe?

¹⁶ Ora nos haña nos ku difikultatnan den bida, “ta danki na Yehova su amor leal, nos no [ta] kaba na nada.” (Lam. 3:22; Kol. 1:11) Wak loke a pasa ku Rachel. Durante pandemia di COVID-19, su kasá a bandoná tantu e komo Yehova. Kiko Yehova a hasi p’e? El a bisa: “Yehova a hasi sigur pa mi sinti ku tin hende ku stimá mi. El a rondoná mi ku hopi amigu ku a pasa tempu ku mi, trese kuminda pa mi, manda mensahe i teksto animante. Ademas nan tabata hari ku mi i rekordá mi ku ta Yehova ta kuidando mi. Tur ora bai mi ta gradisí Yehova pa mi famia grandi ku ta stima mi.”

17. Dikon David por a bisa “mi no tin miedu”?

¹⁷ “Mi no tin miedu, pasobra bo ta ku mi.” Hopi biaha David su bida tabata na peliger i e tabatin hopi enemigu peligroso. Pero danki na Yehova su amor, e tabata sintié safe. Den kada un di e situashonnan ei David a sinti ku Yehova tabata kuné i esei a trankilis’é. P’esei e por a kanta: “[Yehova] a libra mi for di tur loke ta duna mi miedu.” (Sal. 34:4) Aunke tabatin biaha ku David tabatin hopi miedu, el a keda kalmu pasobra e tabata sa ku Yehova stim’é.

18. Kon e echo ku bo ta konvensí ku Yehova stima bo lo yuda bo ora bo haña bo ku situashonnan ku ta angustiá bo?

¹⁸ Pero kon e echo ku nos ta konvensí ku Yehova stima nos lo yuda nos ora nos haña nos ku situashonnan ku ta angustiá nos? Susi, un pionero, a splika kon e ku su kasá a sinti ora nan yu a kita su bida. Susi a bisa: “Ora un tragedia asina pasa, e ta dal bo asina duru ku bo ta sinti bo desesperá i ku bo no tin forsa mas. Pero e amor i kariño di Yehova a laga nos sinti nos kuidá i protehá.” Rachel, menshoná na paragraf 16, a bisa: “Un anochi, mi kurason kibrá tabata hasi asina tantu doló ku m’a grita yora i sklama na Yehova. Na e momento ei m’a sinti mané el a kue mi den su brasa i kalma mi manera un mama ta kalma su yuchi, i m’a pega soño. Hamas lo mi lubidá e momento ei.” Tasos, kende ta un ansiano, a pasa kuater aña den prizòn pasobra el a nenga di bira sòldá. Kon el a sinti ku Yehova tabata kuid’é? El a bisa: “Yehova a sòru tur kos pa mi i asta mas. Esei a duna mi mas konfiansa den dje. Aunke ku prizòn no ta un lugá dushi, ku yudansa di Yehova su spiritu santu mi tabata sinti mi kontentu. Esaki a siña mi ku mas mi konfia den Yehova, mas mi lo sinti su amor. P’esei, den prizòn m’a kuminsá traha pionero.”

HALA SERKA DI BO DIOS KARIÑOSO

19. (a) Kon bo orashonnan lo ta unabes ku bo sa ku Yehova stima bo? (b) Kua teksto tokante Yehova su amor bo gusta mas? (Wak e kuadro “Teksto Ku Ta Yuda Nos Sinti Yehova Su Kariño.”)

¹⁹ Tur e eksperensianan ku nos a trata ta proba ku Yehova, “e Dios di amor,” ta ku su sirbidónan! (2 Kor. 13:11) E ta interesá den kada un di nos. Nos ta konvensí ku e ta rondoná nos ku “Su amor leal.” (Sal. 32:10) Mas nos meditá riba kon el a mustra nos ku e stima nos, mas real lo e bira pa nos i mas nos lo hala serka dje. No sinti bèrgwensa pa resa na Yehova i pidié pa laga bo sa ku e ta stima bo. Nos por kont’é tur kos ku ta preokupá nos i por tin sigur ku e ta komprondé nos i tin hopi gana di yuda nos.—Sal. 145:18, 19.

20. Kon Yehova su amor ta hala bo mas serka di dje?

²⁰ Meskos ku nos ta hala serka e dushi kayente di un kampvür riba un anochi hopi friu, asina Yehova su tierno amor ta atraé nos. Yehova su amor ta intenso pero na mes momento tierno. Pues, habri bo kurason i aseptá ku Yehova stima bo. Anto e ora ei abo lo por bisa: “Mi stima Yehova”!—Sal. 116:1.