You Still Remember?

You don take time read the Watchtower wey never tey wey we print? See whether you fit answer all this question:

If Jehovah organization tell brothers like, circuit overseer and congregation elders to do something, wetin dem go do?

Make dem quick do wetin dem tell dem. Dem fit ask theirself sey: ‘I dey do wetin go make people wey dey around me serve Jehovah well? I dey quick obey and support brothers wey dey direct us?’​—w16.11, p. 11.

When fake religion start to control correct Christian?

E happen just after the apostle dem die. That time, dem come start to get leader for church. Government and people wey dey lead for Church come make people dey join fake Christian. Correct Christian wey Bible call wheat, no come fit dey serve God as dem suppose. But many years before 1914, correct Christian don already start to comot from fake religion hand.​—w16.11, pp. 23-25.

Wetin make Lefèvre d’Étaples translation good?

Around 1520, Lefèvre translate Bible with French language so that plenty people fit read am. Martin Luther, William Tyndale, and John Calvin gain from how e take explain Bible.​—wp16.6, pp. 10-12.

Wetin make person wey dey ‘put mind for the flesh’ different from person wey dey ‘put mind for the spirit’? (Rom. 8:6)

Person wey dey ‘put mind for the flesh’ dey like to do wetin im body want. E like am sotey na wetin e dey always think about be that. E dey always talk about wetin the flesh want, and to do am dey sweet am reach bone. But ‘person wey dey put mind for the spirit’ dey use im life do things wey concern God and wetin e want. This kind person dey let holy spirit control wetin e dey think. To dey put mind for the flesh dey bring death. To dey put mind for the spirit dey bring life and peace.​—w16.12, pp. 15-17.

Wetin be some things wey we fit do make things no too worry us?

First dey do things wey get value. Know where your power reach, and get time wey you take dey relax everyday. Make you dey enjoy the things wey Jehovah make. Dey enjoy funny things, dey do exercise, and dey sleep well.​—w16.12, pp. 22-23.

‘God carry Enoch comot make e no die the way person dey die.’ (Heb. 11:5) How God take do am?

E be like sey God sofri carry Enoch comot from life to death. When God do am, Enoch no know sey e dey die. ​—wp17.1, pp. 12-13.

Why e good to know where we suppose do reach?

Person wey no dey overdo, know wetin e suppose do and wetin e no suppose do. E know wetin e fit do, and wetin e no fit do. E good make we know how to treat other people well. E no good to feel sey we better pass dem.​—w17.01, p. 18.

Wetin show sey na God help the brothers wey direct the work for apostle time and Governing Body for our time?

Holy spirit help dem understand Bible. Angels help dem to fit direct the preaching work, and dem follow wetin dey Bible for any matter. Na so e still be for our time.​—w17.02, pp. 26-28.

Which things make us value Jesus death?

Four things na: Who let am come die for us, why e let am come, wetin e lose, and wetin the death do for our body. E good make we think about this four things.​—wp17.2, pp. 4-5.

E bad for God servant to change wetin e first choose?

Make we do wetin we talk. But, even if we don choose wetin we want do, e get some matter wey we fit think about again. After Nineveh people repent, God change wetin e sey e want do dem. So, we self fit still change wetin we don choose. Sometimes, e fit be when condition change, or when we hear new thing about the matter.​—w17.03, pp. 16-17.

Why e bad to do amebo or aproko?

Amebo or aproko be like fuel wey dem add join fire. E fit spoil matter more more. Whether dem treat us well or dem no treat us well, aproko no go change anything.​—w17.04, p. 21.