Ieeschte Johanes

4 Leewe Breeda, jleeft nich jieda Norecht*, waut minkj von Gott kjemt. Oba prooft de Norechten* auf toom seenen, aus dee von Gott komen, wiels enne Welt sent een deel faulsche Profeeten oppjekomen.

2 Dits, aun waut jie weeten kjennen, aus de Norecht von Gott kjemt: Jieda Norecht, en dee daut aunerkjant woat, daut Jesus aus Mensch* jekomen es, kjemt von Gott. 3 Oba jieda Norecht, en dee Jesus nich aunerkjant woat, kjemt nich von Gott. Un dit jroz es de Norecht von dän Antichrist*, von dee jie jehieet haben, daut dee wudd komen, un dee nu aul enne Welt es.

4 Jie staumen von Gott, kjliene Kjinja, un jie haben de faulsche Profeeten jewonnen, wiels dee, waut met junt veeent es, es jrata aus dee, waut met de Welt veeent es. 5 Dee staumen vonne Welt un doawäajen räden dee uk von Sachen, waut vonne Welt komen, un de Welt horcht no dee. 6 Wie staumen von Gott. Wäa Gott kjanen lieet, horcht no ons; wäa nich von Gott staumt, horcht nich no ons. Derch dit kjenn wie seenen, woont de woare Norecht es un woont de faulsche es.

7 Leewe Breeda, well wie ons wieda unjarenaunda leewen, wiels Leew kjemt von Gott un wäa Leew wiest, es von Gott jebuaren un kjant Gott. 8 Wäa nich Leew wiest, haft Gott nich kjanen jelieet, wiels Gott es Leew. 9 Dit es, woo Gott siene Leew ons jewäsen wort: Gott schekjt sienen eensich jemoakten Sän en de Welt nenn, soo daut wie derch am kjennen daut Läwen kjrieen. 10 Met dise Leew es daut soo aus dit: Nich daut wie Gott jeleeft haben, oba Gott leewd ons un schekjt sienen Sän aus een Veeenjungs-Opfa* fa onse Sinden.

11 Leewe Breeda, wan Gott ons soo aus dit jeleeft haft, dan sent wie uk bemott ons unjarenaunda to leewen. 12 Kjeena haft Gott jeemols jeseenen. Wan wie ons wieda unjarenaunda leewen, dan blift Gott en ons un siene Leew woat en ons volkomen jemoakt. 13 Derch dit weet wie, daut wie met am veeent bliewen un daut hee met ons veeent blift, wiels hee haft ons sienen Jeist jejäft. 14 Un dan uk noch: Wie haben daut selfst jeseenen un wie zeijen doafäa, daut de Voda sienen Sän aus de Welt äaren Rada jeschekjt haft. 15 Wäa daut aunerkjant, daut Jesus Gott sien Sän es, met dän blift Gott veeent un deejanja blift met Gott veeent. 16 Un wie haben de Leew kjanen jelieet, waut Gott fa ons haft, un wie jleewen aun dee Leew.

Gott es Leew, un wäa en de Leew blift, dee blift met Gott veeent un Gott blift met dän veeent. 17 Opp dise Wajch es de Leew en ons volkomen jeworden, soo daut wie aum Jerechtsdach frie räden kjennen*. Wiels krakjt soo aus Jesus Christus es, soo sent wie en dise Welt. 18 En de Leew es kjeene Angst. Oba volkomne Leew schmitt* de Angst rut, wiels Angst helt ons trigj. Jo, wäa Angst haft, es en de Leew noch nich volkomen jeworden. 19 Wie wiesen Leew, wäajen hee ons daut ieeschte jeleeft haft.

20 Wan doa wäa sajcht: “Ekj leew Gott” un sienen Brooda oba haust, daut es een Läajna. Wiels wäa sienen Brooda nich leeft, dän hee jeseenen haft, dee kaun Gott nich leewen, dän hee nich jeseenen haft. 21 Un dit es daut Jeboot, waut wie von am jekjräajen haben: Wäa Gott leeft, dee mott uk sienen Brooda leewen.