Woo wichtich es Jehowa sien Nomen fa Jesus?

1-2. (a) Waut deed Jesus aun dän Owent, ea hee omjebrocht wort? (b) Waut vonne Froagen woa wie ons en disen Artikjel unjastonen?

DAUT wia Donnadach lot zeowes, dän 14. Nissan aune 33 no Christus. Jesus haud eene besondre Moltiet met siene true Apostel toop jehaut un hee wist, daut hee boolt wudd verot, jerecht, veuadeelt, jekjwält un hanjerecht woaren. Soo no de Moltiet spruak Jesus siene Apostel Moot too. Un jroz ea dee aula veleeten, säd Jesus noch een sea wichtjet Jebäd. De Apostel Johanes schreef dit Jebäd opp; dauts en Johanes, Kapitel 17.

² Waut wiest Jesus sien Jebäd, äwa waut hee sikj dan jroz Sorjen muak? Woo wiest dit Jebäd, waut fa am wichtich wia de gaunze Tiet, aus hee sienen Deenst hia oppe Ieed derchfieed? Well wie ons de Auntwuaten opp dise Froagen unjastonen.

“EKJ HAB DEE MET DIENEN NOMEN BEKAUNTJEMOAKT”

3. Waut säd Jesus äwa Jehowa sienen Nomen; un waut meend hee doamet? (Johanes 17:​6, 26).

³ En sien Jebäd säd Jesus: “Ekj hab dee met dienen Nomen bekauntjemoakt”. Hee erwänd daut mau rajcht twee Mol, daut hee siene Jinja met Jehowa sienen Nomen bekauntjemoakt haud (läs Johanes 17:​6, 26). Waut meend hee doamet? Must hee dee daut erkjläaren, woo Gott heet? Nä, wiels Jesus siene Jinja wieren je Juden. Dee wisten aul, daut Gott sien Nomen Jehowa wia. Dis Nomen kjeem je doch miere Dusent Mol en de Hebräische Schreften väa. Soo Jesus must dee nich erkjläaren, waut Gott sien perseenelja Nomen wia, oba waut bie disen Nomen aules met en wia. Jesus holp siene Jinja de Persoon, waut disen Nomen haud, soo goot kjanen to lieren, aus see dän noch nich ea jekjant hauden – doa wia met en, waut dee sikj väajenomen haud, waut dee deed un waut fa Ieejenschoften dee haud.

4-5. (a) Woo kaun wäm sien Nomen bie eenem noch wichtja woaren? Met waut jeit daut to vejlikjen? (b) Derch waut lieeden Jesus siene Jinja, Jehowa sienen Nomen noch bäta kjanen?

⁴ Stal die väa, en diene Vesaumlunk es een Eltesta, waut David heet un een Dokta es. Du kjanst disen Brooda aul fa väle Joaren. Oba eenen Dach fält die daut sea needich aun eenen Dokta. Du foascht no daut Hospitol, wua dis Brooda schauft, un hee rat die daut Läwen. Haft dis Brooda nu eenen aundren Nomen fa die jekjräajen? Gaunz secha! David es nich mea bloos de Eltesta, waut du kjansd, oba uk de Dokta, waut die daut Läwen jerat haft.

⁵ Krakjt soo wia daut uk bie Jesus siene Jinja. Dee wisten aul, daut Gott sien Nomen Jehowa wia, oba dee räakjenden disen Nomen nu noch väl mea, wäajen Jesus äant jeholpen haud, dän bäta kjanen to lieren. Woo deed Jesus daut? Hee deed daut doaderch, daut hee sienen Voda en aules nodeed, waut hee säd un deed. Siene Apostel lieeden Jehowa noch bäta kjanen, doaderch woo Jesus aundre lieed un woo hee met aundre omjinkj (Joh. 14:9; 17:3).

“WÄAJEN DIENEN IEEJNEN NOMEN SIENT HAULWEN, DÄN DU MIE JEJÄFT HAST”

6. Opp waut vonne Wajch jeef Jehowa Jesus sienen ieejnen Nomen? (Johanes 17:​11-12).

⁶ Aus Jesus fa siene Jinja bäd, säd hee: “Pauss no dee opp, wäajen dienen ieejnen Nomen sient haulwen, dän du mie jejäft hast” (läs Johanes 17:​11-12). Bediet daut, daut Jesus nu uk wudd Jehowa heeten? Nä. En sien Jebäd säd Jesus äwa dän Nomen Jehowa: “Wäajen dienen ieejnen Nomen”. Soo Jesus kjrieech nich Jehowa sienen Nomen. Waut meent daut dan, wan daut sajcht, daut am Gott sienen Nomen jejäft wort? Ieeschtens, daut Jesus Jehowa sien Veträda wia. Hee wia en sienen Voda sienen Nomen jekomen un hee räd un muak Wunda en disen Nomen (Joh. 5:43; 10:25). Tweedens, de Nomen Jesus bediet: “Jehowa es Radunk”. Soo de Nomen Jehowa es mau rajcht en de Bediedunk von Jesus sienen Nomen bennen.

7. Wuarom kunn Jesus en Jehowa sienen Nomen räden? Met waut jeit daut to vejlikjen?

⁷ Vejlikj wie daut mol. Een Präsident kaun wäm no een aundret Launt schekjen, om doa en sienen Nomen to räden. Wan dis Veträda waut sajcht, jelt daut krakjt soo sea, aus wudd de Präsident daut selfst jesajcht haben. Krakjt soo wia Jesus Jehowa sien Veträda un doawäajen haud hee daut Rajcht, en dän sienen Nomen to räden (Mat. 21:9; Luk. 13:35).

8. Wuarom säd Jehowa, daut Jesus sienen Nomen druach, aul ea dee no de Ieed kjeem? (2. Mose 23:​20-21).

⁸ De Bibel nant Jesus daut Wuat. Wuarom? Wiels Jehowa derch Jesus to Enjel un to Menschen jesajcht haft, waut dee weeten un doonen sullen (Joh. 1:​1-3). Jesus wia woomäajlich de Enjel, waut Jehowa schekjt, om de Israeliten to beschitzen, aus dee en de Wiltnis wieren. Jehowa säd de Israeliten, daut see disen Enjel jehorchen sullen, un hee säd uk wuarom: wiels “hee drajcht mienen Nomen” (läs 2. Mose 23:​20-21).a Jehowa säd dit von Jesus, wiels dee sien Veträda wia un wiels doa sestkjeena soo sea bewäsen haft aus Jesus, daut Jehowa aules rajcht deit un daut hee heilich es.

“VODA, VEHARLICH DIENEN NOMEN”

9. Woo wichtich wia Jehowa sien Nomen fa Jesus? Wuarom kjenn wie daut sajen?

⁹ Soo aus wie aul jeseenen haben, wia Jehowa sien Nomen fa Jesus daut wichtichste – mau rajcht aul ea hee no de Ieed kjeem. Un aus hee oppe Ieed wia, wees hee derch aules, waut hee deed, woo wichtich Jehowa sien Nomen fa am wia! Aum Enj von sienen Deenst säd Jesus to sienen Voda: “Voda, veharlich dienen Nomen.” Un sien Voda auntwuad am fuaz met eene lude Stemm vom Himmel un säd: “Ekj hab dän veharlicht un woa dän wada veharlichen” (Joh. 12:28).

10-11. (a) Woo deed Jesus Jehowa sienen Nomen veharlichen? (See uk daut Bilt.) (b) Wuarom mott Jehowa sien Nomen jeheilicht un veteidicht woaren?

¹⁰ Jehowa deed nich bloos sienen Nomen selfst veharlichen, oba Jesus deed uk. Woo deed hee daut? Hee wees aundre de wundascheene Ieejenschoften von Jehowa un vetald dee äwa de butajeweenelje Sachen, waut dee jedonen haud. Oba om disen Nomen to veharlichen, must doa noch mea jedonen woaren. Jehowa sien Nomen must jeheilicht un veteidicht woaren.b Jesus wees, woo wichtich dit wia, aus hee siene Nofolja bäden lieed. Hee säd: “Ons Voda em Himmel, lot dienen Nomen jeheilicht woaren” (Mat. 6:9).

¹¹ Wuarom mott Jehowa sien Nomen jeheilicht un veteidicht woaren? Wiels em Goaden Eden vetald de Soton Läajes äwa Jehowa Gott un brocht Schaund opp dän. De Soton behaupt, daut Jehowa een Läajna wia un daut dee waut Goodet von Adam un Eva trigjhilt (1. Mo. 3:​1-5). Doaderch jeef de Soton uk auntovestonen, daut de Wajch, woo Jehowa rejieed, nich rajcht wia. Derch dise Läajes brocht hee eenen schlajchten Nomen opp Jehowa. Lota, en Hiob siene Tiet, behaupt de Soton, daut de Menschen Jehowa bloos deenen, wan dee doa waut fäa kjrieen. Dis Läajna säd uk, daut de Menschen Jehowa nich werkjlich leewen un am wudden opphieren to deenen, wan doa waut Schwoaret oppkjeem (Hiob 1:​9-11; 2:4). Doa must eene Tiet vegonen, daut sikj daut utwiesen kunn, wäa de Läajna wia – Jehowa ooda de Soton.

“EKJ JÄW MIEN LÄWEN HAN”

12. Waut wia Jesus reed to doonen ut Leew fa Jehowa sienen Nomen?

¹² Ut Leew fa Jehowa wull Jesus aules doonen, waut hee kunn, om Jehowa sienen Nomen to heiljen un to veteidjen. Jesus säd: “Ekj jäw mien Läwen han” (Joh. 10:​17-18). Jesus wia soogoa reed, fa Jehowa sienen Nomen to stoawen.c De ieeschte beid volkomne Menschen, Adam un Eva, dreiden Jehowa dän Rigjen un stalden sikj opp dän Soton siene Sied. Oba Jesus wia reed, no de Ieed to komen un to bewiesen, daut hee Jehowa leewd. Woo bewees hee daut? Doaderch daut hee Jehowa en aules jehuarsom wia (Heb. 4:15; 5:​7-10). Hee bleef Jehowa sien Läwen lank tru batem Doot aum Liedenspol (Heb. 12:2). Opp dise Wajch wees hee, daut hee Jehowa un sienen Nomen leewd.

13. Wuarom kunn Jesus daut baste bewiesen, daut de Soton een Läajna wia? (See uk daut Bilt.)

¹³ Derch sien gaunzet Läwen wees Jesus gaunz kloa, daut de Soton een Läajna wia un nich Jehowa! (Joh. 8:44). Jesus kjand Jehowa bäta aus irjenteene Persoon, waut jeemols jeläft haud. Wan doa wia een kjlienet Bät von soo jewast, waut de Soton jäajen Jehowa behaupten deed, dan wudd Jesus daut gaunz secha jewist haben. Oba Jesus wia sikj gaunz eenich, Jehowa sienen Nomen to veteidjen, wiels hee wist, daut et nich soo wia, waut de Soton jesajcht haud. Mau rajcht wan daut uk soo sach, daut Jehowa Jesus veloten haud, wull hee leewa stoawen, aus sienen leeftoljen Voda dän Rigjen dreien (Mat. 27:46).d

“EKJ HAB DAUT WOAKJ DERCHJEFIEET, WAUT DU MIE OPPJEEFST”

14. Woo beloond Jehowa Jesus fa sien Tru-Sennen?

¹⁴ En Jesus sien Jebäd aun dän Owent ea hee storf, säd hee: “Ekj hab daut Woakj derchjefieet, waut du mie oppjeefst.” Jesus vetrud gaunz doaropp, daut Jehowa am doafäa beloonen wudd, daut hee wia tru jebläwen (Joh. 17:​4-5). Un hee haud nich fa Dommheit opp Jehowa vetrut, wiels Jehowa leet am nich em Grauf (Apj. 2:​23-24). Hee wuak am vom Doot opp un stald am em Himmel hecha aun (Filip. 2:​8-9). Met de Tiet funk Jesus aun, aus Kjennich en Gott sien Kjennichrikj to rejieren. Waut woat dit Kjennichrikj volbrinjen? En daut tweede Poat von daut “Unser-Vater”-Jebäd säd Jesus: “Lot dien Kjennichrikj komen; lot dienen [aulsoo Jehowa sienen] Wellen oppe Ieed krakjt soo jedonen woaren aus em Himmel” (Mat. 6:10).

15. Waut woat Jesus noch doonen?

¹⁵ Boolt woat Jesus Kjrich fieren jäajen Gott siene Fiend un de Schlajchte en Harmagedon venichten (Opb. 16:​14, 16; 19:​11-16). Meist fuaz nodäm woat hee dän Soton “em Aufgrunt” nennschmieten, wua dee nuscht woat doonen kjennen, soo aus wudd dee doot sennen (Opb. 20:​1-3). En sien Dusentjoaschet Rikj woat Jesus doano seenen, daut et oppe Welt wada Fräd jeft, un hee woat de Menschen halpen, wada volkomen to woaren. Hee woat uk de Vestorwne wada oppwakjen un de gaunze Ieed to een Paradies moaken. Dan woat Jehowa sien Väanämen gaunz erfelt sennen! (Opb. 21:​1-4).

16. Woo woat daut Läwen no daut Dusentjoasche Rikj sennen?

¹⁶ Vondoag dän Dach fält ons daut aun Jesus siene Help, om Sinden-Vejäwunk to kjrieen. Oba no daut Dusentjoasche Rikj woat ons daut doa nich mea aun fälen, wiels wie woaren volkomen sennen un nich mea sindjen. Ons woat daut uk nich mea aun de Help von Jesus un de 144,000 fälen, om Jehowa noda to komen. “Un de latsta Fient, aulsoo de Doot, woat tonuscht jemoakt [sennen].” De Jräwa woaren ladich sennen, wiels de Doodes woaren wada oppjestonen sennen, un jieda eena oppe Ieed woat volkomen sennen (1. Kor. 15:​25-26).

17-18. (a) Waut woat no daut Dusentjoasche Rikj passieren? (b) Waut woat Jesus doonen, wan siene Tiet toom rejieren ieescht äwa es? (1. Korinta 15:​24, 28). (See uk daut Bilt.)

¹⁷ Waut woat noch passieren no daut Dusentjoasche Rikj? Doa woat waut gaunz Besondret passieren. Kjeena woat mea doaraun twiewlen, aus Jehowa een heilja un jerajchta Gott es. Wuarom nich? Em Goaden Eden behaupt de Soton, daut Jehowa een Läajna wia un daut dee nich ut Leew äwa de Menschen rejieed. Von dan aun haben soone, waut Jehowa ieren un respakjten, sienen Nomen jeheilicht un bewäsen, daut hee de basta Harscha es. Soo aum Enj von daut Dusentjoasche Rikj woat Jehowa sien Nomen volstendich veteidicht sennen. Hee woat gaunz kloa bewäsen haben, daut hee ons leeftolja himlischa Voda es.

¹⁸ No daut Dusentjoasche Rikj woat sikj daut fa emma utjewäsen haben, daut de Soton Läajes äwa Jehowa vetalt haft. Waut woat Jesus doonen, wan siene Tiet toom rejieren ieescht äwa es? Woat hee soo sennen aus de Soton un sikj jäajen Jehowa stalen? Nä! (Läs 1. Korinta 15:​24, 28.) Jesus woat sienen Voda daut Kjennichrikj trigjjäwen un woat Jehowa selfst unjadon sennen. Krakjt aundasch aus de Soton es Jesus reed, Jehowa aul siene Macht trigjtojäwen, wäajen hee am leeft.

19. Woo wichtich es Jehowa sien Nomen fa Jesus?

¹⁹ Ons wundat daut nuscht, daut Jehowa Jesus wellich sienen ieejnen Nomen jeef! Jesus haft bewäsen, daut hee de basta Veträda es fa sienen Voda. Woo wichtich es Jehowa sien Nomen fa Jesus? Dauts daut gaunz wichtichste fa am. Hee wia reed, fa disen Nomen to stoawen, un no daut Dusentjoasche Rikj woat hee Jehowa wellich aules trigjjäwen. Woo kjenn wie Jesus sien Biespel nodoonen? Dise Froag woa wie en dän näakjsten Artikjel beauntwuaten.